Wase e 38

E Lailai Beka li na Vakabauta i Joni?

SA YABAKI dua oqo nona bala voli e valeniveivesu ko Joni na Dauveipapitaiso, sa rogoca ni sa vakaturi na luvena na yada mai Neini. Ia e via rogoca sara ga mai vei Jisu ko Joni me baleta na i balebale ni ka oqo, sa qai tala yani e rua na nona tisaipeli me rau laki vaqaqa: “Oi kemuni beka ko Koya e lako mai, se da waraka e dua tani?”

Rairai vaka me taro duatani oqori, vakauasivi ni a raica ko Joni na yalo tabu ni Kalou ni lako sobu mai vei Jisu ka rogoca na domona na Kalou ni vakadonuya na papitaiso i Jisu ka volekata ni rua na yabaki yani ki liu. Na taro i Joni e rairai vakavuna me ra laki nanuma kina e so ni sa vaka me malumalumu mai na nona vakabauta. Ia e sega ni vakakina. Kevaka me sa tekivu vakatitiqa mai ko Joni, ke a sega ni vakacaucautaki koya ko Jisu, ka ni a vakayacora vakakina ena gauna oqo. Meicavai e taroga kina na taro vakaoqo ko Joni?

E rairai via kila me tukuna vakamacala sara ga ko Jisu ni sa i Koya na Mesaia. Ena vakayaloqaqataki Joni oqo ena nona sa mai vesu tu oqo e valeniveivesu. Ia rairai e tiko tale na vu ni taro i Joni. E via kila de na lako tale mai e dua, me na sosomitaka, ka na qai vakaotia na i vakayaco ni veika kece sa tukuni tu mai vakailiu me na vakayacora na Mesaia.

Ena veiparofisai ena i Vola Tabu e kila vinaka ko Joni, ena yaco me tui ka me dauveivakabulai na Lumuti ni Kalou. Ia, e se vesuki tu mada ga oqo ko Joni, sa oti e vica vata na vula oqo na papitaiso oti i Jisu. O koya gona, e rairai taroga tiko vei Jisu ko Joni: ‘Sa i kemuni dina li o koya ena tauyavutaka na Matanitu ni Kalou ena nomuni vakaraitaka na nomuni kaukauwa, se na tiko e dua tani tale, me kemuni i sosomi, o koya eda na waraka me vakayacora na parofisai veivakurabuitaki kecega me baleta na lagilagi ni Mesaia?’

Me i sosomi ni nona tukuna vei rau na tisaipeli i Joni ko Jisu, ‘Io, sa i au o koya ka dodonu me lako mai!’ sa qai vakayacora ena gauna vata oqori na cakacaka veivakurabuitaki ena nona vakabulai ira e lewe vuqa na tamata, e vakabulai ira mai na veimataqali tauvimate kecega. Oti oqori sa qai tukuna vei rau na tisaipeli: “Drau lako, ka tukuna vei Joni na veika drau sa raica ka rogoca; ni ra sa rai na mataboko, sa lako na lokiloki, sa vakasavasavataki na vukavuka, sa rogo na didivara, sa vakaturi cake tale na mate, sa vunautaki nai tukutuku-vinaka vei ira na dravudravua.”

Se dua tale na i balebale ni taro i Joni o ya, ni nanamaki tu o koya ni na levu na ka ena cakava ko Jisu mai na kena sa vakayacora tiko ka na rairai sereki Joni talega. Ia, e tukuna tiko vei Joni ko Jisu me kakua ni levu sara na ka me namaka mai na cakamana e sa vakayacora tiko ko Jisu.

Ni rau sa lesu na tisaipeli i Joni, sa qai golevi ira na lewe vuqa ko Jisu ka tukuna vei ira ni sa i Joni na i “talatala” i Jiova ka tukuni vakailiu ena Malakai 3:1 ia o koya talega ko Ilaija na parofita ena Malakai 4:​5, 6. Sa qai vakacaucautaki Joni ni tautauvata vinaka kei ira na parofita era a bula e liu vua, sa qai vakamacalataka o koya: “Au sa kaya vakaidina vei kemudou, Sa sega ni tubu e dua vei ira sa sucu mai na yalewa me uasivi vei Joni na dauveipapitaiso; ia ko koya sa lailai sara e na matanitu vakalomalagi sa uasivi vei koya. Ia mai na gauna i Joni na dauveipapitaiso ka yacova na siga oqo, sa rawa na matanitu vakalomalagi e na gugumatua.”

E vakaraitaka tiko e ke ko Jisu ni na sega ni laki bula ena Matanitu vakalomalagi ko Joni, o koya ka lailai ka tiko voli e kea e levu cake vei Joni. A vakarautaka ga na sala me baleti Jisu ko Joni ia, a mate ni bera ni dregata na Karisito nona veiyalayalati, se veidinadinati kei ira na nona tisaipeli, ni ra na laki veiliutaki vata kei koya ena nona Matanitu. Oqori na vuna e kaya kina ko Jisu ni na sega ni laki bula ki na Matanitu vakalomalagi ko Joni. Ia ena yaco ga ko Joni me lewe ni Matanitu ni Kalou e vuravura. Luke 7:18-30; Maciu 11:2-15.

▪ Na cava e taroga kina ko Joni se sa i Jisu beka o Koya ka na lako mai se dua tani tale e waraki?

▪ Na veiparofisai cava e tukuna ko Jisu ni sa mai vakayacora ko Joni?

▪ Na cava e sega kina ni laki bula vata kei Jisu mai lomalagi ko Joni na Dauveipapitaiso?