Wase e 52

E Vakania Vakacakamana ko Jisu na Lewe Udolu

ERATOU rekitaka voli na 12 na i apositolo na vakatubuqoroqoro ni nodratou cakacaka vakavunau mai na loma taucoko i Kalili. E sega soti ni dede mai na gauna e vakamatei kina ko Joni, eratou sa lesu tale vei Jisu ka vakasavuya na ka veivakurabuitaki eratou sotava. Ni sa raici iratou ni ratou sa oca ni ra lewe vuqa era lako mai ka lako yani sa sega mada ga na gauna me ratou kana kina, sa qai kaya ko Jisu: ‘Me datou lako tani mada vakatikitiki ki na dua na vanua lala mo dou vakacegu mada vakalailai.’

Eratou vodoka sara nodratou waqa, rairai e toka volekati Kapenaumi, sa mua yani na i lakolako ki na dua na vanua lala, ena tokalau beka ni Joritani ka vakalailai yani e liu vei Peciseita. Sa ra raica e lewe vuqa ni ratou sa lako, ka so tale era rogoca na ka oqo. Era cici kecega yani e liu ena baravi, ia ena gauna me qai kabi yani ki vanua na waqa, era sa wawa tu mai na tamata.

Nona sobu mai waqa sa raici ira sara na lewe vuqa ko Jisu, ka lomani ira ni ra vaka na sipi e sega na kedra i vakatawa. Sa qai vakabula na nodra tauvimate ka vuqa na veika e vakatavulica vei ira.

Sa totolo sara na toso ni gauna, era sa qai lako vei Jisu na nona tisaipeli ka kaya: “Oqo na vanua lala, a sa kala na siga: mo vakatalai ira mada yani, me ra lako ki na veiyasana kei na veikoro lalai sa vakavolivoliti keda, me ra volia na kedra madrai.”

Ia, e sauma ko Jisu ka kaya: “Dou solia vei ira me ra kana.” Me vaka ni sa kila oti tu ko Jisu na veika sa vakarau cakava, sa qai vakatovolei Filipi ena nona tarogi koya: “Eda na volia maivei na madrai me ra kana kina ko ira oqo?”

Na vakasama i Filipi ni rui ka dredre. A cava tale ni ra lewe 5,000 na tagane, ka rairai sivia na lewe 10,000 me ra wiliki talega kina na yalewa kei na gone! E sauma sara ko Filipi “ena sega ni rauti ira na madrai sa voli e na pene e rua na drau [e dua na pene na i sau ni tamata ena dua na siga], me ra tauyadua vakalailai ga.”

Me vakaraitaka beka ni rui dredre sara na nodra vakani ira na lewe vuqa, sa tukuna sara ko Adriu: “Sa tiko eke e dua na gonetagane sa tu vua e lima nai buli madrai parile, ka rua na ika,” ka tomana, “ka yaga vakacava oqo vei ira na lewe vuqa oqo?”

Me vaka ni donumaka na vula i tubutubu, ni bera na Lakosivia ni 32 S.K., e veico vinaka tu na vanua o ya. Sa qai tukuna ko Jisu vei ira na nona tisaipeli me ra dabe vakaiwasewase na tamata me yayadrau ka yayalimasagavulu. Sa qai taura na i buli madrai e lima kei na rua na ika, sa tacake ki lomalagi, ka masulaka. Sa qai dovidovia na i buli madrai ka wasewasea na ika. Sa solia yani vei ira na nona tisaipeli, me ra vota vei ira na tamata. E kurabuitaki dina, ni ra kana kece na tamata ka mamau vinaka!

Oti oqori sa qai tukuna vei ira nona tisaipeli ko Jisu: “Dou kumuna vata na veitikina lalai e vo, me kakua ni vakamaumautaki e dua na ka.” Ni ra sa kumuna vata, era sa vakasinaita e 12 na sova na veika sa vo mai na veika era kania! Maciu 14:13-21; Marika 6:30-44; Luke 9:10-17; Joni 6:1-13.

▪ Ena vuku ni cava e vakasaqara kina ko Jisu e dua na vanua lala me baleti iratou na nona i apositolo?

▪ A kauti iratou e vei na nona tisaipeli ko Jisu, ia na cava e sega ni ra mani laki vakacegu kina?

▪ Ni sa kala na siga, na cava eratou a uqeta me vakayacori na tisaipeli, ia e kauwaitaki ira vakacava na tamata ko Jisu?