Wase e 55

Sega ni Ra qai Muri Jisu Tale e Vuqa na Tisaipeli

E VEIVAKATAVULICI voli ko Jisu ena valenilotu mai Kapenaumi ena nona i tavi me vaka na madrai dina ka lako mai lomalagi. E kena i rairai ni nona vosa, e i kuri ga ni nona i vakamacala a tekivutaka vei ira na tamata ena gauna era kunei koya kina ena nona lesu mai na tai kadua, ena natuicake ni Wasawasa ko Kalili, na vanua era a kania kina na madrai kei na ika e cakamanataki.

E tomana ko Jisu, ka vaka: “Ia na lewequ ga sa i koya na madrai au na solia me bula kina ko vuravura.” Ena vula i tubutubu ni 30 S.K., ena rua na yabaki yani ki muri, a tukuna ko Jisu vei Nikotimo ni lomani vuravura vakalevu na Kalou a solia mai kina na Luvena me i Vakabula. Sa vakaraitaka kina ko Jisu ni tamata yadua ga mai na vuravura ni kawatamata e kania vakaivakatakarakara na lewena, ena nona cakacakataka na nona vakabauta na i soro e sa vakarau cakava oqo, ena rawata na bula tawamudu.

Era sa qai tarabe na tamata ena vosa i Jisu. Era taroga: “E na solia rawa tu vakaevei na tamata oqo na lewena me da kania?” E vinakata ko Jisu me matata vei ira era rogoci koya tiko ni i vakatakarakara ga na laukana ni lewena. O koya gona me vakabibitaka oqo, e tukuna e dua tale na ka e rogorogo vakasisila dina kevaka me tauri vakayago.

“Kevaka ko ni sega ni kania na lewe ni Luve ni tamata ka gunuva na nona dra,” e cavuta ko Jisu, “e na sega vei kemuni na bula. Ko koya sa kania na lewequ ka gunuva na noqu dra sa nona na bula tawa mudu, ia au na vakaturi koya cake e na i otioti ni gauna. Ni sa kakana dina na lewequ, ka sa ka ni gunu dina na noqu dra. Ko koya sa kania na lewequ ka gunuva na noqu dra, sa bula tiko e lomaqu, ka’u sa bula tale tiko ga e lomana ko i au.”

Na i vakatavuvuli i Jisu e rogorogo ca dina e vaka me vakatura tiko na kana tamata. Ia, e sega ni tokona dina ko Jisu me laukana sara na lewena se gunuvi na nona dra. E vakabibitaka o koya vei ira kece era na rawata na bula tawamudu ni dodonu me ra cakacakataka na nodra vakabauta na i soro e sa vakarau vakayacora ena gauna me na cabora kina na yagona savasava ka liviraka yani na nona dra. Ia, e lewe vuqa mada ga vei ira na nona tisaipeli era sega ni bau saga me ra kila na i balebale ni ka e vakatavuvulitaka sa ra qai saqata: “A vosa dredre oqo: ko cei sa vakabauta rawa?”

Ni sa kila o koya ni lewe vuqa vei ira na nona tisaipeli era sa vosa kudrukudru, sa kaya ko Jisu: “E vakaevei e vakaleqa na lomamuni na ka oqo? Ia a cava beka ko ni na kaya kevaka ko ni na raica na Luve ni Tamata ni sa lako cake ki na vanua ka a tiko kina e liu? . . . A vosa ka’u sa vosataka vei kemuni sa vosa vakayalo ka sa vu ni bula. Ia e so vei kemuni e sega tiko ni vakabauta.”

E tomana nona vosa ko Jisu: “O koya oqo au a kaya kina vei kemuni ni na sega ni lako rawa mai vei au e dua na tamata, kevaka e sega ni dolava vua na sala ko Tamaqu.” Ena vuku ni ka o ya, era sa suka tale kina e lewe vuqa vei ira na nona tisaipeli, ka sega tale ni muri koya. Sa qai golevi iratou na lewe 12 na nona i apositolo ko Jisu ka tarogi iratou: “Dou sa via lako tani tale ga ko i kemudou?”

Sa qai sauma ko Pita: “Turaga, me keitou na lako tale vei cei? O i kemuni ga sa tu vei kemuni na vosa ni bula tawa mudu. Keitou sa vakabauta ka kila ni sa i kemuni na Le Dua Yalosavasava ni Kalou.” Sa i vakaraitaki vinaka dina ni yalodina, e dina ga ni ratou sega ni kila vinaka beka ko Pita kei iratou na vo ni apositolo na i balebale ni ka a vakatavuvulitaka ko Jisu ena ka oqo!

E dina ga ni a marautaka na i sau ni vosa i Pita, e kaya ga ko Jisu: “E sega li ni’u a digitaki kemudou na lewe tinikarua? Ia e dua vei kemudou sa nonai to na tevoro.” Sa tukuni Jutasa Isikarioti tiko oqo o koya. Sa raica rawa beka vei Jutasa ena gauna o ya ko Jisu ni sa “vakatekivu,” se buroro tiko vua e dua na i tosotoso cala.

A se qai vakararawataka oti ga na lomadra na tamata ko Jisu ni saqata nodra saga me ra bulia me tui, ia ena rawa me ra vakananuma e lomadra, ‘E rawa vakacava me Mesaia o koya oqo kevaka e sega ni taura na i tutu dodonu ni Mesaia?’ Na ka sara ga oqo ena tu talega e lomadra na tamata. Joni 6:51-71; 3:16.

▪ E solia na lewena ena vukudra o cei ko Jisu, ia e vakaevei na i valavala ni nodra ‘kania na lewena’?

▪ Na vosa cava tale i Jisu era vakasisilataka na tamata, ia na cava e vakabibitaka tiko?

▪ Ni ra sa sega tale ni qai muri Jisu e lewe vuqa, na cava e qai sauma ko Pita?