Wase e 56

Na Cava e Vakadukadukalitaka na Tamata?

SA KAUKAUWA sara mai na tusuqati i Jisu. Era sega ni biuti koya walega e lewe vuqa na nona tisaipeli, ia era via vakamatei koya talega na Jiu mai Jutia, e vaka sara ga na nodra via vakamatea ni a tiko voli mai Jerusalemi ena Lakosivia ni 31 S.K.

Ia oqo na Lakosivia ni 32 S.K. Me vaka na i naki ni veika e gadreva na Kalou me laki tikova, e rairai mani lakova na Lakosivia ki Jerusalemi ko Jisu. Ia, e vakayacora sara vakayalomatua ni ririkotaki na nona bula. Ni oti oqori sa qai lesu tale ki Kalili.

E rairai tiko voli mai Kapenaumi ko Jisu ena gauna era a lakovi koya yani kina na Farisi kei ira na vunivola mai Jerusalemi. Era vakasaqara voli na yavu me beitaki kina ena nona voroka na lawa vakalotu. “A sa talaidredre kina ko ira na nomu tisaipeli ki na nodrai vakavuvuli na qase?” era taroga. “Ni ra sa kana ka sega mada ni vuluvulu.” Na ka oqo e sega ni gadreva na Kalou, ia era raica na Farisi ni cala bibi ke sega ni daucaka na i vakavuvuli vakavanua oqo, me vui kece na liga me yala sara ki na duruduru ni liga.

E sega ni sauma ko Jisu na nodra veibeitaki, ia a dusia ga o koya na nodra lawaki ca ka ra nakita kina me ra voroka na Lawa ni Kalou. “A cava dou sa talaidredre talega kina ki na vunau ni Kalou e na nomudoui vakavuvuli?” e via kila o koya. “Ni sa vakarota na Kalou, Vakarokoroko vei rau na tamamu kei na tinamu: ia, Ko koya sa vosa vakacacataka na tamana se na tinana, me sa vakamatei. Ia dou sa kaya, O koya yadua ena kaya vei tamana se tinana, sa vakatabui me nona na Kalou na noqu ka sa yaga vei iko: me sa qai sega ni vakarokoroko vei tamana.”

E dina ni ra dauvakatavuvulitaka na Farisi na i lavo, na i yaya se dua ga na ka sa yalataki vua na Kalou me i solisoli, e sa taukeni mai na valenisoro, ka sega ni rawa me vakayagataki ki na dua tani tale na i naki. Ia, na ka e yalataka e dua me i solisoli, e tiko voli ga vei koya e yalataka. Ena sala oqori ena nona tukuna ga o gone ni nona i lavo se i yaya e sa “koripani”​—me i solisoli yalataki vua na Kalou se ki na valenisoro—sa na levea kina na nona i colacola ni veiqaravi vei rau na nona i tubutubu e rau sa qase, ka rairai rau leqa sara tu ga.

Na nona cudruvi ira vakadodonu na Farisi ni ra vukica vakatani me ca na Lawa ni Kalou, sa kaya kina ko Jisu: “Dou sa qai vakawaletaka kina vaka oqo na vosa ni Kalou e na vuku ni nomudou i vakavuvuli vakavanua. Dou tamata dauveivakaisini, sa tukuni kemudou vakavinaka sara ga ko Aisea, ni a kaya, Era vakarokorokotaki au na tamata oqo e na tebenigusudra, sa yawa sara mai vei au na lomadra. Sa ka wale na nodra so-kalou vei au, ni ra vakatavuvulitaka na vakasama ni tamata me i vakavuvuli.”

Era lako vakatikitiki beka na lewe vuqa me rawa ni ra vakatarogi Jisu na Farisi. Ia oqo, ni ra sa sega ni sauma rawa na Farisi na taro kaukauwa a tarogi ira kina ko Jisu, sa qai kacivi ira mai na lewe vuqa me ra toro voleka mai. “Dou rogoca mada,” e kaya o koya, “ka kila sara, e sega ni ka e curu ki na gusu e dau vakadukadukalitaka na tamata, ia, na ka ga e lako mai na gusu, oqori e vakadukadukalitaka na tamata.”

E muri ni ra curu yani ki na dua na lomanivale, eratou sa qai tarogi koya na nona tisaipeli: “Ko ni sa kila li ni ra sa yaloca na Farisi e na nodra rogoca na nomuni vosa?”

“E na cavu laivi na kau kece ga e sega ni tea ko Tamaqu vakalomalagi,” e sauma yani ko Jisu. “Dou laivi ira ga. Era sa dauveituberi mataboko. Kevaka e tubera na mataboko e dua na mataboko e rau sa sikalutu ruarua.”

E vaka me kurabuitaka ko Jisu, ni qai taroga ko Pita ena vukudra na vo ni tisaipeli, me vakamacalataka vinaka mada vei iratou na veika ena vakadukadukalitaka na tamata. “O i kemudou tale ga dou sa sega tiko li ni kila rawa, ne?” e sauma yani ko Jisu. “Dou sega tiko li ni kila ni ka ga e curu yani ki na gusu e lutu ki na kete ka curu tani yani? Ia na ka e curu tani mai na gusu e lako sara mai loma ni tamata, ka sa i ira na veika ga oqo e vakadukadukalitaka na tamata. Ni sa dau lako mai na loma ni tamata na vakanananu ca, na daulaba, na dauyalewa, na dauveibutakoci, na daubutako, na veibeitaki vakailasu, kei na dauvakaucaca. Sa i ira na veika ga oqo e vakadukadukalitaka na tamata; ia, e sega ga ni vakadukadukalitaka na tamata na nona kana ka sega mada ni vuluvulu.”

E sega ni vakalailaina e keri ko Jisu na veika e vauca na tiko savasava. E sega ni veibataka tiko o koya ni sega ni dodonu vua na tamata me kua ni vuya na ligana ni vakarautaka na kakana se vakarau kana. Ia, e a vakacala ga na nodra i valavala veivakaisini na i liuliu ni lotu ena nodra saga me ra moica vakatani na lawa dodonu ni Kalou mai na i vakavuvuli vakavanua ka sega ni vaka i Vola Tabu. Io, na i valavala e ca dina sa i koya e vakadukadukalitaka na tamata, ka vakaraitaka ko Jisu ni vu kece mai na loma ni tamata na veika oqori. Joni 7:1; Vakarua 16:16; Maciu 15:1-20; Marika 7:1-23; Lako Yani 20:12; 21:17; Aisea 29:13.

▪ Na veitusaqati cava e sa sotava oqo ko Jisu?

▪ Na veibeitaki cava era kauta cake mai na Farisi, ia me vaka e vakaraitaka ko Jisu era nakita vakacava na Farisi na nodra voroka na Lawa ni Kalou?

▪ Na cava e vakaraitaka ko Jisu ni veika ena vakadukadukalitaka na tamata?