Wase e 91

Ni sa Vakaturi ko Lasarusa

SA YACO mai oqo ko Jisu kei ira era salavata mai kei koya, ena i bulubulu i Lasarusa. E dua na qara vatu ka kena i sogo e dua na vatu. “Dou kauta tani na vatu,” e kaya ko Jisu.

Sa qai via tarova ko Marica, ni sega tiko ni kila na veika sa nakita ko Jisu me cakava. “Turaga,” e kaya o koya, “oqo e sa na bona na yagona; ni sa oti e va na bogi na nona mate.”

Ia e qai taroga ko Jisu: “Au a sega li ni kaya vei iko, ni ko na raica na kaukauwa ni Kalou, kevaka ko sa vakabauta?”

Sa kau tani na vatu. E qai tacake ko Jisu ka masu: “I Tamaqu, au sa vakavinavinaka vei kemuni ni ko ni sa rogoca na noqu masu; ka’u kila ni ko ni sa dau rogoca e na veigauna kece ga; ia au cavuta ga oqo me baleti ira era tu voli oqo, me ra vakabauta kina ni ko ni a talai au mai.” E masu ena matana levu ko Jisu me ra kila kina na tamata na veika sa vakarau cakava ena vakayacori ena kaukauwa ka rawata mai vua na Kalou. Sa qai kaci ena domo levu ko koya: “Lasarusa, lako mai!”

Sa qai lako mai tuba ko Lasarusa. E viviraki na ligana kei na yavana, ka ubi na matana ena dua na i sulu. “Dou sereki koya, ka laiva me lako,” e kaya ko Jisu.

Ni ra sa raica na cakamana, e lewe vuqa vei ira na Jiu era a mai vakacegui Meri kei Marica sa ra vakabauti Jisu. Ia e so tale vei ira era lako yani ka laki tukuna vei ira na Farisi na ka sa qai yaco. E sega ni bera ko ira oqo kei ira na bete i liuliu era sa vakarautaka e dua nodra bose na mataveilewai levu na Jiu, na Sanadrini.

O ira na lewe ni Sanadrini, ko Kaiafa ka bete levu tiko, kei ira talega na Farisi kei na Setoki, o ira na bete i liuliu kei ira talega na bete levu e liu. Era lelevaka o ira oqo: “Na cava me da cakava? Ni sa vuqa na veicakacaka mana sa cakava na tamata oqo? Kevaka eda vakalaivi koya tiko ga vaka oqo, era na vakabauti koya na tamata kecega, ka ra na qai lako mai na kai Roma ka kauta tani ruarua na noda i tikotiko tabu kei na noda matanitu.”

E dina ga ni ra tukuna na i liuliu vakalotu ni “vuqa na veicakacaka mana sa cakava” ko Jisu, ia na ka walega era kauwaitaka na nodra i tutu kei na veiliutaki. Na vakaturi i Lasarusa e vakacacani ira vakaukauwa sara na Setoki, baleta ni ra sega ni vakabauta na vakaturi mai na mate.

E vosa cake mai oqo ko Kaiafa, e rairai dua vei ira na Setoki, ka vaka: “Dou sa sega ni kila e dua na ka, se vakananuma ni sa yaga vei keda me mate e dua na tamata e na vukudra na tamata, ka me kakua ni rusa na matanitu taucoko.”

A vakavuna na Kalou me vosataka ko Kaiafa na veika oqo, ni qai vola na i apositolo ko Joni: “A sa sega ni vosataka na ka oqo [ko Kaiafa] vakataki koya.” Na ka e vakaibalebaletaka tiko ko Kaiafa ni dodonu me vakamatei ko Jisu me tarovi Koya kina mai na nona vakalolovirataka na nodra i tutu ni veiliutaki kei na nodra kaukauwa. Ia, me vaka na i vakamacala i Joni, ‘a parofisaitaka ko Kaiafa ni na mate ko Jisu e sega ni baleti ira duadua ga na lewe ni matanitu koya, ia me rawa ni vakasoqoni ira vata talega na luve ni Kalou.’ Ia, e vakadina kina ni i naki ni Kalou me mai mate na Luvena me i voli ni sereki ni tamata kece.

E rawai ira na Sanadrini ko Kaiafa ena nodra lalawataka rawa ena gauna oqo me ra vakamatei Jisu. E rairai kila rawa na bukivere oqo ko Jisu mai vei Nikotimo, e dua vei ira na lewe ni Sanadrini e veikilai kei koya, ka lako tani kina o koya mai kea. Joni 11:38-54.

▪ Na cava e masu kina ena matana levu ko Jisu ni bera nona vakaturi Lasarusa?

▪ Era ciqoma vakacava na veivakaturi o ira na raica?

▪ Na cava e vakavotuya na ca ni nodra i valavala na lewe ni Sanadrini?

▪ Na cava a nakita ko Kaiafa, ia na cava a parofisaitaka o koya ni a vakamuai koya kina na Kalou?