Wase e 96

Ko Jisu kei na Dua na Dauveiliutaki Vutuniyau Gone

NI LAKOVA yani ko Jisu na yasayasa vaka-Peria ki Jerusalemi, sa qai cici yani e dua na cauravou ka tekiduru vua. E vakatokai na tamata oqo me dauveiliutaki, e rairai kena i balebale ni taura e dua na i tutu dokai ena valenilotu e kea se lewe ni Sanadrini. E vutuniyau vakalevu talega o koya. E taroga o koya, “Na i Vakavuvuli vinaka, na cava e dodonu me’u cakava me’u taukena kina na bula tawa mudu?”

“Na cava ko vakatokai au kina me’u vinaka?” e sauma yani ko Jisu. “E sega tale e dua e vinaka, na Kalou duadua ga.” Rairai taurivaka na cauravou na “vinaka” me i tutu, sa qai vakatakila vua ko Jisu ni i tutu vaka o ya e nona duadua ga na Kalou.

E tomana ko Jisu, “Ia kevaka ko via curu ki na bula, mo muria na vunau.”

“A vunau cava?” e taroga na tamata.

E cavuqaqataka mai e lima na i Vunau e Tini, e sauma yani ko Jisu: “Mo kakua ni laba, mo kakua ni dauveibutakoci, mo kakua ni butako, mo kakua ni veibeitaki vakailasu, vakarokoroko vei rau na tamamu kei na tinamu.” Sa qai tomana ena dua na i vunau e bibi cake sara, e kaya ko Jisu: “Mo lomana na kai nomu me vakataki iko.”

“A veika kece ga oqori au sa dau muria tiko mai na gauna au se gone kina ka yacova mai oqo,” e sauma yani na tamata mai na vu ni yalona dina. “Na cava tale e sa vo tiko vei au?”

Ena nona rogoca ko Jisu na nona kerekere vagumatua na cauravou, e lomani koya dina. Ia e kila rawa ko Jisu ni lomana na i yau vakayago sa qai dusimaka na ka e gadrevi vua: “Sa vo tiko vei iko e dua na ka; mo la’ki volitaka na ka kece ga e tu vei iko, ka solia na kena i lavo vei ira na dravudravua, ko na qai vakaiyautaki mai lomalagi. Ia mo lako mai, ka muri au.”

E vakaraici koya ko Jisu, e rairai ena nona lomana, ni sa tucake na tamata o ya ka lako yani ena rarawa kei na lomabibi. Ni sa vakamatabokotaki koya na nona i yau ki na talei ni i yau dina. E tukuna ena rarawa ko Jisu, “Sa dredre dina vei ira na vutuniyau me ra curu ki na matanitu ni Kalou!”

E vakidacalataki iratou na tisaipeli na vosa i Jisu. Ia eratou kurabui vakalevu sara ni tomana na i vunau e sa kilai raraba tu: “Sa rawarawa cake me curuma na mata ni cula na kameli, ka dredre me curuma na matanitu ni Kalou na tamata vutuniyau.”

“Ko cei beka ena vakabulai rawa?” era via kila na tisaipeli.

Sa qai raici iratou matua ko Jisu, ka tukuna: “Na ka oqo sa sega sara ga ni rawata na tamata, sa rawata na Kalou; ni sa rawata na Kalou na ka kece ga.”

Ni raica rawa ko Pita ni duidui sara na nodratou digidigi mai vua na cauravou vutuniyau gone, sa qai kaya: “Ni raica mada, keitou sa biuta na ka kece ga ka muri kemuni.” Sa qai taroga: “A cava keitou na rawata kina?”

E yalataka ko Jisu, “Ni sa tiko na Luve ni Tamata e na nona i tikotiko lagilagi, e na vuravura vou, dou na qai tiko tale ga ko i kemudou ka muri au voli e na i tikotiko vakaturaga e tinikarua, ka lewai ira na mataqali e tinikarua ni Isireli.” Io, e vakaraitaka ko Jisu ni na vakavoui na i tuvaki ni veika kei vuravura, me sa na tautauvata kina na veika kei na were ko Iteni. Sa na rawata ko Pita kei ira na vo ni tisaipeli na nodra i covi ni liutaka vata mai kei Karisito na Parataisi ka na roboti vuravura taucoko. Sa dina, na i covi lagilagi vaka o ya e uasivia na cava ga ena gadrevi me da vakayalia!

Ia, ena gauna mada ga oqo sa tu na i covi, ni tukuna vakamatata ko Jisu: “Sa sega e dua na tamata sa biuta na vale, se na veitacini, se na ganena, se na tamana, se na tinana, se na luvena, se na vanua, e na vukuqu, kei na vuku ni tukutuku-vinaka, me qai sega ni saumi, ena rawata yadrau e na bula oqo, na veivale, kei na veitacini, kei na ganena, kei na tinana, kei na luvena, kei na vanua, kei na veivakacacani talega; ia e na gauna maimuri, na bula tawa mudu.”

Me vaka a yalataka ko Jisu, ena nodra veilakoyaki voli e vuravura na nona tisaipeli, era na rekitaka nodra veiwekani vata kei ira na nodra i tokani lotu va-Karisito e rui veivolekati ka talei vakalevu sara mai na nodra veiwekani kei na wekadra vakayago. E rairai ni calata ruarua na dauveiliutaki vutuniyau gone na i covi oqo kei na bula tawamudu ena Matanitu vakalomalagi ni Kalou.

Ni oti oqori sa qai tomana ko Jisu: “Ia e lewe vuqa vei ira na liu era na muri, kei ira na muri era na liu.” A cava na kena i balebale oqo?

E vakaibalebaletaka o koya ni lewe vuqa vei ira na tamata era “liu” ena nodra rekitaka na i tavi vakalotu, me vakataki koya na dauveiliutaki vutuniyau gone, era na sega ni curuma na Matanitu. Era na “muri” sara. Ia, e lewe vuqa ka ra okati kina na tisaipeli yalomalumalumu i Jisu, era beci mai vei ira na Farisi viavia yalododonu ni ra “muri”​—o ya era tauvanua, se ‛am ha·’aʹrets—era na “liu.” Ni yaco me ra “liu” sa kena i balebale na nodra rawata na i votavota me ra veiliutaki vata kei Karisito ena Matanitu. Marika 10:17-31; Maciu 19:16-30; Luke 18:18-30.

▪ E rairai mataqali dauveiliutaki vakacava o koya na tamata vutuniyau gone?

▪ Na cava e cata kina ko Jisu me vakatokai me vinaka?

▪ E vakaraitaka vakacava na i talanoa ni ka e sotava na dauveiliutaki gone na rerevaki ni bula vutuniyau?

▪ Na i covi cava e yalataka ko Jisu vei ira na nona i muri?

▪ E yaco vakacava o ira sa liu me ra muri, kei ira sa muri me ra liu?