Wase e 131

Na iOtioti ni Nona Rairai, kei na Penitiko 33 S.K.

SA VEIVOSAKITAKA oti ko Jisu me ratou sotavi koya na lewe 11 na i apositolo ena dua na ulunivanua mai Kalili. E tukuni tale beka ga vei ira na vo ni tisaipeli na soqo oqo ka mani 500 vakacaca na tamata era soqovata. E soqo marautaki dina oqo ena gauna ka rairai kina ko Jisu ka tekivu vakatavulici ira!

Me i kuri ni veika oqori, sa qai vakamacalataka vei ira na i soqosoqo levu oqori ko Jisu ni sa solia vua na Kalou na lewa kece mai lomalagi kei vuravura. “Dou lako,” e uqeti ira, “ka qisi ira me ra noqu tisaipeli na lewe ni veivanua kece ga, ka papitaisotaki ira e na yaca ni Tamamudou kei na Luvena kei na yalo tabu, vakavulici ira me ra muria na veika kece ga au sa vakarota vei kemudou.”

Mo vakasamataka mada! E solia vei ira na tagane, na yalewa kei na gone na i lesilesi oqo me ra laki vakaivotavota talega ena cakacaka ni vakayaco tisaipeli. Era na saga na dauveitusaqati me ra tarova na nodra vunau kei na veivakatavulici, ia e vakacegui ira ko Jisu: “Ka mo dou kila, au sa tiko vata kei kemudou e na veisiga kece ga me yacova na i vakataotioti kei vuravura.” E tiko vata voli kei ira na nona i muri ko Jisu ena vuku ni yalo tabu, me vukei ira me ra vakayacora na nodra cakacaka vakaitalatala.

E vakatakilai koya voli ko Jisu vei ira na nona tisaipeli ena nona bula voli ena 40 taucoko na siga ni oti na nona vakaturi. Na gauna kece e daurairai kina e vakasalataki ira me baleta na Matanitu ni Kalou, ia e vakabibitaka na nodra i colacola me vaka ni ra nona tisaipeli. Ena dua mada ga na gauna e rairai kina vei tacina vakacabecabe ko Jemesa ka vakadeitaka vua na tawavakabauta e liu oqo ni o Koya dina na Karisito.

Nodratou tiko voli ga mai Kalili na i apositolo, e rairai vakasalataki iratou ko Jisu me ratou lesu ki Jerusalemi. Ena gauna sa sotavi iratou kina mai kea, sa qai tukuna vei iratou: “Dou kakua ni biuti Jerusalemi, ia dou waraka tiko mada ga na ka e a yalataka ko Tamaqu, me vaka au a sa tukuna oti vei kemudou. E a dauveipapitaisotaki e na wai ko Joni; ia ni oti ga ’qo e vica na siga dou sa na qai papitaiso e na yalo tabu.”

Sa qai sotavi iratou tale na nona i apositolo ko Jisu ka liutaki iratou tani mai na koro me yaco sara ki Pecani, ka tara toka ena dua na baba ena tokalau ni Ulunivanua ni Veiolive. E kurabuitaki dina, ni veitalia na levu ni nona kaya oti ni sa vakarau lako ki lomalagi, eratou vakabauta tikoga ni na tauyavutaki na nona Matanitu e vuravura. Eratou qai taroga: “Turaga, ko ni na vakayacora me dua tale na matanitu ko Isireli e na gauna oqo se segai?”

Ena nona sega ni via vakadodonutaka tale na nodra nanuma cala, e kaya ga ko Jisu: “E sega ni nomudou i tavi mo dou la’ki kila na kena gauna se na kena vula, ni sa lesia tu koya ko Tamaqu e na nona lewa ga vaka i koya.” E baci vakabibitaka tale na cakacaka e dodonu me ratou cakava, ka kaya: “Dou na rawata na kaukauwa, ni sa lako mai vei kemudou na yalo tabu; dou na qai dautukuni au mai Jerusalemi, kei Jutia taucoko, kei Samaria ka yacova nai yalayala kei vuravura.”

Ni ratou se rai tikoga, sa tekivu me tubu cake ki lomalagi ko Jisu, sa tabonaki koya mai na matadratou e dua na o. Ni sa vukica oti me tawarairai na yagona vakayago, sa cabe cake ki lomalagi me vaka e dua na yago vakayalo. Ni ratou se rai cake tikoga ki lomalagi na lewe 11, sa rairai mai vei iratou e 2 na tamata ka vakaisulu vulavula. E rau mani taroga na agilosi rairai ena yago vakatamata oqo: “Oi kemudou na kai Kalili, dou sa tu ka rai matua ki lomalagi e na vuku ni cava? ko Jisu oqo ko koya sa kau tani cake vei kemudou ki lomalagi, ena lako tale mai vakakina me vaka dou sa raici koya ni sa lako ki lomalagi.”

E sega ni uvu na davui me kilai levu kina na i valavala ni nona sa qai biuti vuravura oqo ko Jisu, eratou a raica walega na nona i muri yalodina na ka o ya. O koya gona ena lesu mai ena i valavala vata ga o ya o koya⁠—​ena sega ni uvu na kena davui me kilai levu kina, era na vakila o ira ga na nona i muri yalodina ni sa lesu mai o koya ka sa tekivuna na nona tiko ena kaukauwa ni Matanitu.

Eratou sirova lesu na i apositolo na Ulunivanua ni Veiolive, takosova na Buca ko Kitironi, ka curu tale yani ki Jerusalemi. Eratou mani tiko voli ga e kea ena nodratou muria na i vakaro i Jisu. Ni oti e tini na siga, ena nodra Solevu ni Penitiko na Jiu ena yabaki 33 S.K. era soqoni tiko e lewe 120 na tisaipeli ena dua na tabavale e cake mai Jerusalemi, a qai rogo mai e dua na rorogo e vaka na liwa kaukauwa ni cagi ka vakasinaita na loma ni vale oqori. E laurai na ka e vaka na yameyame ni bukawaqa ni laki toka ena deladra yadua na tiko o ya, ka tekivu me ra vosataka na veimataqali vosa na tisaipeli. Oqo gona na sovaraki ni yalo tabu e a yalataka tu ko Jisu! Maciu 28:16-20; Luke 24:49-52; 1 Koronica 15:5-7; Cakacaka 1:3-15; 2:1-4.

▪ E vakasala ni tatau tiko vei cei ko Jisu ena ulunivanua mai Kalili, ia a cava soti na i vakasala oqo?

▪ Na veivakacegui cava e solia ko Jisu vei ira na nona tisaipeli, ia e tikovata vakacava kei ira o koya?

▪ E vakacava na balavu ni gauna ni oti nona tu cake mai na mate e daurairai voli ko Jisu vei ira nona tisaipeli, ia na cava e vakatavulici ira kina?

▪ O cei na tamata a rairai sega ni tisaipeli ni bera na mate i Jisu e a rairai talega vua ko Jisu?

▪ Na cava na i otioti ni rua na nona sota kei iratou na nona i apositolo ko Jisu, ia na cava e yaco ena rua na gauna oqo?

▪ Ena yaco vakaevei na i valavala ni lesu mai i Jisu me vaka ga na nona a lako?

▪ Na cava e yaco ena Penitiko 33 S.K.?