Na Bula Vakavuvale Mamarau

E rawa nira marau dina na vuvale?

E rawa vakacava?

O bau kila e dua na vuvale e kune kina na marau kei na duavata e laurai vei iratou ena ivola lailai oqo? Na vuvale e veivanua kece ga sa talawasewase mai. Na veisere, sega na cakacaka, tubucake ni kedra iwiliwili na itubutubu le dua, na nuiqawaqawa​—na ka kece oqo era ikuri ni leqa. E kaya kina e dua na daunivakasala ena veika e baleta na bula vakavuvale: “Sa madra mai ena daligadra na tamata kece na kena tukuni tiko na leqa ni bula vakavuvale.”

Na cava era bololaki tiko kina na vuvale edaidai ena leqa bibi vaka oya? E rawa ni bula mamarau vakacava na noda vuvale?

iTekitekivu ni Vuvale

Kevaka meda kila na isaunitaro kece oqo, e vinakati meda kila se a vu mai vakacava na bula vakawati kei na bula vakavuvale. Baleta ke dua a tekivutaka mai na rua na ka oqo​—e dua na Daubulibuli​—e dodonu sara ga vei ira na lewenivuvale mera rai vua me dusimaki ira, ni kila vinaka o koya na sala me bula mamarau kina na noda vuvale.

Ia era kaya e levu ni sega ni dua a tekivutaka na bula vakavuvale. E kaya na The Encyclopedia Americana: “Era kaya e so na vuku ni vu na bula vakawati ena kena laurai nira dau veisasa na manumanu, na ibulibuli e lolovira vua na tamata.” Ia o Jisu Karisito a cavuta na nodrau a buli na tagane kei na yalewa. A cavuta o koya na ka sa volai makawa tu mai ena iVolatabu: “Na ka sa vauca vata na Kalou, me kakua ni tawasea rua na tamata.”​—Maciu 19:4-6.

E dina o Jisu Karisito. A buli rau gona na imatai ni tamata na Kalou e vuku qai vakarautaka na veika me bula marau kina e dua na vuvale. A vakamautaki rau na imatai ni tagane kei na yalewa na Kalou ena nona kauti rau vata mai, qai kaya ni tagane ena “kabita na watina: a rau na lewe dua ga.” (Vakatekivu 2:22-24) De vu ni leqa ni bula vakavuvale edaidai na kena muri na ivakarau ni bula e beci kina na ivakatagedegede ni Daubulibuli ena nona Vosa, na iVolatabu.

Na Cava Gona me Caka?

Na vuravura edaidai, me vaka o rawa ni kila, e dau uqeta na yalo ni caka nona kei na dui vakacegui koya ga. E tukuna e dua na daunibisinisi vei ira e dua na ilala gonevuli era tuvaitutu tiko mai Mereke: “E ka vinaka na kocokoco. Ke tuburi kemuni na lomakocokoco, kua ni lomaleqa kina.” Ia na qarai ni iyau e sega ni dau kauta mai na marau dina. E laurai ga ni domodomoiyau e dua vei ira na ka e vakaleqa na bula vakavuvale baleta ni dau vakabibitaki kina na veika tale e so mai na noda vuvale, qai dau vakaoti gauna kei na ilavo. Ena yasana adua, e vukei keda na vosa vakaibalebale ni iVolatabu meda raica kina se cava na ka e bibi meda marau kina.

“Sa vinaka me da kana rourou ka veilomani ga, ka ca me da kana pulumokau uro ka veicati tiko.”

“Sa vinaka e dua na tiki ni madrai wale, kei na vakacegu, ka ca ni oso na vale e nai madrali, ni sa tu kina na veileti.”

Vosa Vakaibalebale 15:17; 17:1, “Today’s English Version.”

Erau dina sara ga na vosa oqo se vakaevei? Vakasamataka mada ke ra muria na vuvale kece e vuravura na rua na vakasama oqo! E tu tale ga ena iVolatabu na idusidusi yaga ena sala mera dau veimaliwai kina na vuvale. Raica mada e vica oqo.

Tagane Vakawati: ‘Lomana na watimu me vaka na yagomu dina.’—Efeso 5:28-30.

E ivakasala rawarawa, ia e yaga vakalevu! E tukuna tale ga na iVolatabu vua na tagane vakawati me ‘dokai watina.’ (1 Pita 3:7) E cakava oqo o koya ena nona dau veikauaitaki, e okati kina nona dau yalololoma, dau yalovinaka, kei na nona dau tauca na vosa ni veivakacegui. Ena bibi tale ga vua na nanuma i watina qai dau rogoci koya. (Vakatauvatana Vakatekivu 21:12.) O sega li ni duavata ni na vakila na vuvale na kena vinaka ke dau kauaitaki watina vakayalololoma o tagane, ena sala vata ga e vinakata o koya me kauaitaki kina?​—Maciu 7:12.

Yalewa Vakawati: ‘Vakarokorokotaki watimu.’—Efeso 5:33.

E vakavu marau tale ga ina bula vakavuvale na yalewa vakawati ena nona tokoni watina ena nona itavi bibi. Oqo na ka a nakita na Kalou, ni a vakarautaka na yalewa o koya me “dauveivuke e yaga vua.” (Vakatekivu 2:18) O rawa li ni raica na kena vinaka ina bula vakavuvale ni dau rokovi watina o yalewa, oya ena nona dau tokona na ka sa vakatulewataka, qai dau cakacaka vata kei koya ena kena rawati na ka sa lalawataki tu vakavuvale?

Na Veiwatini: “Me rau sa dau veidinadinati na tagane kei na yalewa.”—Iperiu 13:4, “VV.”

Ni rau dau veidinadinati, ena kilai sara ga na kena vinaka ena bula vakavuvale. E vakaleqa vakalevu na bula vakavuvale na veibutakoci. (Vosa Vakaibalebale 6:27-29, 32) Na ivakasala vukutaki gona ni iVolatabu e vaka oqo: “Mo marautaki koya sa watimu ni ko sa cauravou . . . a cava ko via marautaka kina na yalewa tani?”​—Vosa Vakaibalebale 5:18-20.

iTubutubu: “Vakatavulica [na luvemuni] e na sala e dodonu me [ra] lako kina.”—Vosa Vakaibalebale 22:6.

Ena vinaka dina ga na bula vakavuvale ke rau raica na itubutubu ni tiko na gauna me rau dau kauaitaki ira kina na luvedrau. E uqeti ira kina na itubutubu na iVolatabu mera dau vakavulici ira na luvedra ena ivakavuvuli dodonu nira ‘tiko voli e vale, nira lako voli tale ga ena sala, nira lai davo, kei na nodra duri cake tale ga.’ (Vakarua 11:19) E tukuna tale ga vei ira na itubutubu na iVolatabu ni dodonu mera dau vakadodonutaka na luvedra me ivakaraitaki ni nodra lomani ira.​—Efeso 6:4.

Ragone: “Oi kemudou na gone, dou talairawarawa vei ira na nomudou qase e na ka sa vinaka vua na Turaga.”—Efeso 6:1.

E dina ni sega ni ka rawarawa mo ni dau talairawarawa vei ira na nomuni itubutubu ena vuravura oqo e sa luluqa kina na veidokai. Ia oni sega li ni duavata ni ka vakavuku cake mo ni cakava na ka e tukuna vei kemuni o koya e tekivutaka na bula vakavuvale? E kila o koya na sala meda na marau cake kina ena noda bula vakavuvale. O koya gona, saga vakaukaua mo ni dau talairawarawa vei ira na nomuni itubutubu. Me lomamuni sara ga mo ni kua ni goleva na veika ni vuravura e rawa ni temaki kemuni mo ni cakava na veika ca.​—Vosa Vakaibalebale 1:10-19.

Ena vakilai na vinaka ena bula vakavuvale kevaka era saga na lewenivuvale yadua mera vakaitovotaki ira ena ivakasala ni iVolatabu. Ena sega ni vinaka wale ga na bula vakavuvale ena gauna oqo, ia sa rawa ni vakanuinuitaki tale ga na bula uasivi ena vuravura vou sa yalataka tu na Kalou. (2 Pita 3:13; Vakatakila 21:3, 4) Me ivakarau tudei ni vuvale yadua na vuli iVolatabu vakavuvale. E milioni vakamilioni na vuvale e vuravura sa ra raica na yaga ni idusidusi e volai tu ena ivola, Na Sala me Marau Kina na Vuvale.

Na tikinivolatabu kece e lavetaki mai na Vakadewa ni Vuravura Vou ni iVolatabu.