Wase 16

Na Sala mo Veivolekati Kina kei na Kalou

1. Na cava soti e laurai ni ra tautauvata kina e vuqa na lotu?

E KURABUI dina e dua na dausaravanua ni raica na ivalavala era sokalou tiko kina na lotu Buda ena nodra valenisoro. E dina ni yali ekea na ivakatakarakara i Karisito kei Meri, ia e vuqa na ivalavala ni sokalou e caka tiko e loma e via tautauvata ga kei na veika e dau caka ena nona lotu mai nona vanua. E dua mada oya, ni raica na vakayagataki ni rosario qai rogoca na lagati ni masu. Ra sa vakadinadinataka oqo e so tale. Nida rai yani ina Tokalau kei vuravura se ina Ra, eda na kurabui meda raica ni vaka me tautauvata tu ga kina na veika era cakava na tamata me ra vakavolekati ira kina vua na Kalou, se veika tale e so e dau sokaloutaki.

2. E vakamacalataki vakacava na masu, na cava era dau masu kina e vuqa?

² E vuqa era dau masu vua na Kalou ena nodra vinakata me ra volekati koya. Na masu e vakamacalataki me “nona sasaga na tamata me veitaratara kei na veika e uasivi se tabu oya, na Kalou, na veikalou, na vanua e tawakilai, se o ira mai na vuravura ni yalo.” (The New Encyclopædia Britannica) Ni ra masu e so, e tiko ga ena nodra vakasama na ka me baleti ira. E dua oqo a taroga e dua na iVakadinadina i Jiova: “Ke o masulaki au, e vakacava sa na oti kina na leqa ena noqu vuvale, ena noqu cakacaka, kei na noqu dau tautauvimate?” E rairai nanuma na tagane oya ni na vaka dina kina, ia e vuqa era vakila ni tiko ga na leqa e dina ni ra sa masulaka. Eda na taroga gona: ‘Na cava sara mada na vuna meda saga meda volekati koya kina na Kalou?’

NA VUNA MEDA VOLEKATI KOYA KINA NA KALOU

3. Me vakamuai vei cei na noda masu, ena vuku ni cava?

³ E sega ni ka wale na masu, e sega tale ga ni ka meda rawaka ga kina. E dua na vuna levu eda torova kina na Kalou, oya meda veivolekati kei koya. Me vakamuai gona vua na Kalou o Jiova na noda masu. E kaya na daunisame o Tevita: “Sa voleka ko Jiova vei ira kecega era sa masu vua.” (Same 145:18) E sureti keda o Jiova meda veiwekani kei koya. (Aisea 1:18) O ira na ciqoma na veisureti oqo era duavata kei na ka e kaya na daunisame: “Ia koi au, e yaga vei au me’u toro vua na Kalou.” Baleta na cava? Ni o ira na torovi Jiova yani era na vakila na marau dina kei na lomavakacegu.​—Same 73:28.

4, 5. (a) Na cava na vuna e bibi kina meda masu vua na Kalou? (b) Ena vakacava na noda veivolekati kei na Kalou nida dau masu vua?

⁴ Na cava meda masuta kina na veivuke ni Kalou ke sa ‘kila rawa tu o koya na ka e yaga vei keda’? (Maciu 6:8; Same 139:4) Nida masu, eda vakaraitaka kina nida vakabauta na Kalou da qai vakadinata ni o koya na iVurevure ni i “solisoli vinaka kecega kei nai solisoli kecega e yaga sara.” (Jemesa 1:17; Iperiu 11:6) E vinakata o Jiova na noda masu. (Vosa Vakaibalebale 15:8) E marau ni rogoca na noda vosa ni veivakacaucautaki kei na vakavinavinaka, me vaka ga ni marau e dua na tama ni rogoci luvena ni vakavinavinakataki koya mai vu ni lomana. (Same 119:108) E rawarawa sara na veivosaki ni rau dau veivolekati o tama kei luvena. Na gone e lomani ena dau taleitaka me vosa vei tamana. E dina tale ga oqo nida raica na noda veiwekani kei na Kalou. Ke da taleitaka dina na ka eda sa vulica me baleti Jiova kei na nona lomani keda, eda na vinakata dina meda masu vua, meda vakaraitaka vua na ka e tu e lomada.​—1 Joni 4:16-18.

⁵ Nida sa torovi koya na Kalou Cecere, meda torovi koya ena yalo vakarokoroko. Meda kua ni lomaleqataka vakalevu se vosa cava sara mada me taurivaki. (Iperiu 4:16) E dola tu ga na sala ni noda veitaratara kei Jiova. E dua dina na ka dokai ni rawa nida ‘sova yani na lomada’ vua na Kalou ena masu! (Same 62:8) Na noda taleitaki Jiova ena vakavolekati keda sara vua, me vaka na nona volekati Jiova o Eparama, na itokani ni Kalou. (Jemesa 2:23, VV) Ia nida masu tiko vua na Turaga Sau ni lomalagi kei vuravura, e dodonu meda doka na lomana ena sala e vinakata meda torovi koya kina.

IVALAVALA GADREVI MO VEIVOLEKATI KINA KEI NA KALOU

6, 7. E dina ni sega ni lavaka na Kalou meda sauma na noda masu vua, na cava ga e gadrevi ena gauna eda masu kina?

⁶ E gadrevi beka na ilavo meda qai torova rawa kina na Kalou? E vuqa era dau sauma na italatala me masulaki ira. E so era bau lai vakabauta ni na vakatau na rogoci ni nodra masu ena levu ni ka era cautaka. Ia e sega ni kaya na Vosa ni Kalou ni gadrevi na ilavo me qai rawa kina na masu vei Jiova. E soli wale na veika vakayalo e vakarautaka, e solia wale tale ga na nona veivakalougatataki vei ira era masuti koya.​—Aisea 55:1, 2.

⁷ Na cava ga e gadrevi? E dua, me vinaka na inaki ni lomada. (2 Veigauna 6:29, 30; Vosa Vakaibalebale 15:11) E dodonu meda vakabauta mai lomada ni “daurogoca na masu” na Kalou o Jiova qai dau “saumi ira talega era sa dauvakasaqarai koya.” (Same 65:2; Iperiu 11:6) Meda dau yalo­malu­ma­lumu tale ga. (2 Tui 22:19; Same 51:17) E vakaraitaka o Jisu Karisito ena dua na nona vosa vakatautauvata ni a yalododonu cake e dua na daukumuni ivakacavacava a masu vua na Kalou ni a yalomalumalumu, ia a sega ni vaka kina na Farisi dokadoka. (Luke 18:10-14) Nida masu vua na Kalou, meda nanuma tiko ni “ka vakasisila vei Jiova ko ira yadua sa viavialevu.”​—Vosa Vakaibalebale 16:5.

8. Ke da vinakata me rogoca na noda masu na Kalou, meda vakasavasavataki keda mai na cava?

⁸ Ke da vinakata me rogoca na noda masu na Kalou, meda vakasavasavataki keda mai na ivalavala dukadukali. Ena nona uqeti ira na so na tisaipeli o Jemesa me ra volekati koya yani na Kalou, a kaya tale ga: “Vakasavasavataka na ligamudou, oi kemudou na lomalomarua.” (Jemesa 4:8) O ira mada ga na dau caka ca e rawa ni ra veivinakati kei Jiova ke ra veivutuni ra qai biuta na nodra ivalavala makawa. (Vosa Vaka­ibale­bale 28:13) Ena sega ni via rogoci keda o Jiova ke yacana wale tu ga na noda sa vakasavasavataki keda. E kaya na Vosa ni Kalou: “Sa wanonovi ira na tamata yalododonu na mata ni Turaga, ka sa qara tu na daligana ki na nodra masu; ia sa dua tani na mata ni Turaga vei ira sai valavala ca.”​—1 Pita 3:12.

9. Ena vuku i cei ga eda na rawa ni torovi Jiova kina, baleta na cava?

⁹ E kaya na iVolatabu: “Ni sa sega na tamata yalododonu e vuravura, sa caka vinaka tiko, ka sega ni caka cala.” (Dauvunau 7:20) O na rairai taroga kina: ‘Meda na qai torovi koya ga vakacava na Kalou o Jiova?’ E sauma na iVolatabu: “Kevaka sai valavala ca e dua, sa dua na noda Dautataro vei Tamada, ko Jisu Karisito, na yalododonu.” (1 Joni 2:1) E dina nida ivalavala ca, ia e rawa nida masuta na Kalou ena doudou baleta ni a mate o Jisu Karisito me keda ivoli. (Maciu 20:28) O koya duadua ga na sala meda na veitaratara kina kei na Kalou o Jiova. (Joni 14:6) Meda kua ni nanuma cala ni na yaga tiko ga vei keda na isoro ni veivoli i Jisu, da qai nakita meda valavala ca tiko ga. (Iperiu 10:26) Ia kevaka eda valuta dina tiko vakaukaua na ca, qai so na gauna eda cala tale, e rawa nida veivutuni da qai kerea vua na Kalou me vosoti keda. Nida torovi koya ena yalomalumalumu, ena rogoci keda.​—Luke 11:4.

GAUNA MEDA VOSA KINA VUA NA KALOU

10. Eda na vakatotomuri Jisu vakacava ena noda dau masu, ia na gauna vakacava eda rawa ni masu kina vakataki keda?

¹⁰ E rui bibi vei Jisu Karisito na nodrau veiwekani kei Jiova. E dau raica gona o koya me tiko na gauna me masu duadua kina vua na Kalou. (Marika 1:35; Luke 22:40-46) Ena yaga tale ga ke da muria na ivakaraitaki i Jisu da qai dau masu wasoma vua na Kalou. (Roma 12:12) E veiganiti meda masu nida yadra mai ena mataka, ni se bera tale ga nida moce ena bogi, meda vakavinavinakataki Jiova ena veika eda sa cakava rawa. Ena loma ni dua na siga, kua ni guilecava mo torova na Kalou “ena gauna kece ga.” (Efeso 6:18, NW) E rawa sara ga nida masu lo e lomada nida kila ni rogoci keda o Jiova. E yaga na noda dau veivosaki taurua ga kei na Kalou ni na dei kina na noda veiwekani, qai vakavolekati keda sara yani vei Jiova na noda dau masu e veisiga.

11. (a) Na cava me ra dau masu vata kina na vuvale? (b) Na cava na ibalebale ni “Emeni” eda dau kaya ni sa tini na masu?

¹¹ E rogoca tale ga o Jiova na masu e cauraki ena vukudra e dua na ilawalawa tamata. (1 Tui 8:22-53) Eda rawa ni vakavolekati keda yani vakavuvale vua na Kalou ni masu na ulu ni noda vuvale. Ena qaqaco kina eke na ivau ni bula vakavuvale, era na qai vakabauta na lalai ni bula dina tiko o Jiova ni ra rogoca na masu nei tamadra kei tinadra, e cauraki vua na Kalou ena yalomalumalumu. Vakacava ke dua e masu ena vukudra e dua na ilawalawa, ena nodra soqoni beka na iVakadinadina i Jiova? Ke da dua vei ira na tiko ekea, meda vakarorogo vinaka sara baleta meda rawa ni kaya mai vu ni lomada ni tini na masu, “Emeni,” na kena ibalebale “Me sa vaka kina.”​—1 Korinica 14:16.

NA MASU E ROGOCA O JIOVA

12. (a) Na cava e sega ni dau rogoca kina e so na masu na Kalou? (b) Na cava meda kua ni nanuma kina na veika e baleti keda ga nida sa masu?

¹² Era nanuma e so ni na sega ni rogoca na nodra masu na Kalou e dina ni ra masuti koya sara ga ena yaca i Jisu. Ia e kaya na yapositolo o Joni ni ‘kevaka eda sa kerea e dua na ka me vaka na loma ni Kalou, sa rogoci keda o koya.’ (1 Joni 5:14) Na noda kerekere gona me salavata kei na loma ni Kalou. Eda rawa ni masulaka na veika e tara na noda bula vakayalo ni kauai na Kalou ena ka meda vinaka kina vakayalo. E dodonu meda vorata na malele ni lomada ina veika e vakayago ga. E dina ni veiganiti meda masuta na yalomatua kei na yaloqaqa me vosoti rawa kina na tauvimate, ia me kua ga ni lai vakaruguti na noda bula vakayalo ena kena lomaocaocataki vakasivia na bulabula vinaka vakayago. (Same 41:1-3) E kidava e dua na marama lotu Vakarisito ni a sa rui kauai vakasivia ena mate a tauvi koya voli, mani kerei Jiova me vukei koya me tiko vua na rai dodonu me baleta na kena mate. E seavu wale na nona lomaocaoca me baleta na mate oya, qai vakila ni soli vua na “kaukauwa mana levu.” (2 Korinica 4:7) Sa dua na ka na nona gadreva me vukei ira vakayalo na tani, mani lai dua sara kina e dau kacivaka vakatabakidua na Matanitu ni Kalou.

13. Na cava e so na ka e ganita meda cavuta ena noda masu, me vaka e volai ena Maciu 6:9-13?

¹³ Na cava me masuti me na marau o Jiova ni rogoca? E vakavulici ira nona tisaipeli o Jisu Karisito ena masu. Ena masu idusidusi e volai koto ena Maciu 6:9-13, e tuva kina o koya na veika e ganita meda masuta. Nida masu, na cava eda na kauai vakabibi kina? Me bibi duadua vei keda na yaca ni Kalou o Jiova kei na nona Matanitu. E veiganiti meda kerea na veika eda gadreva meda bula kina. E bibi tale ga meda kerea me bokoci na noda ivalavala ca, kei na noda vakabulai mai na vere, vaka kina mai na liga i koya na vunica o Setani na Tevoro. E sega ni loma i Jisu me lagati na masu oqo se me cavuqaqataki vakavicavata, me qai sega ni macala tu na kena ibalebale. (Maciu 6:7) Ke dua tiko ga na mala­ni­vosa e cavuta, se baci cavuta o gone vei tamana, ena vakacava tu mada na nodrau veiwekani?

14. Na cava tale e rawa ni lewe ni noda masu, me ikuri ni noda daukerekere?

¹⁴ Na kerekere kei na vakamamasu mai vu ni lomada e dodonu me salavata kei na masu ni veivakacaucautaki kei na vakavinavinaka. (Same 34:1; 92:1; 1 Cesalonaika 5:18) E rawa nida masulaki ira tale ga na tani. Na noda masulaki ira na tacida kei na ganeda vakayalo era tauvimate se vakacacani tu e vakaraitaka nida kauaitaki ira, e marau o Jiova ni rogoca na vakamamasu vaka oya. (Luke 22:32; Joni 17:20; 1 Cesalonaika 5:25) E vola sara ga na yapositolo o Paula: “Dou kakua sara ni lomaocaoca; ia e na ka kecega me vakatakilai vua na Kalou na nomudou kerekere e na masu kei na dau cikecike kei na vakavinavinaka. Ia na vakacegu ni Kalou, sa uasivia na ka kecega e kilai rawa, ena vakataudeitaka na yalomudou kei na lomamudou e na vuku i Karisito Jisu.”​—Filipai 4:6, 7.

MASU TIKO GA

15. Na cava meda nanuma tiko ke so na gauna e vaka me sega ni rogoci na noda masu?

¹⁵ E dina ni o sa mai veikilai tiko oqo kei na Kalou, ia ena so ga na gauna o na nanuma ni vaka me sega ni rogoci na nomu masu. E rawa ni yaco oqo baleta ni se sega beka ni kena gauna me rogoca na Kalou na ka sara ga o masulaka tiko. (Dauvunau 3:1-9) E dau tu na gauna e vaka me na sega ni cakava e dua na ka o Jiova, ia e dau rogo masu o koya qai kila tale ga na gauna vinaka duadua me yavala kina.​—2 Korinica 12:7-9.

16. Na cava meda masu tiko ga kina, ena lai tara vakacava na noda veiwekani kei na Kalou na noda vakayacora oqo?

¹⁶ Nida masu tiko ga vua na Kalou, e vakaraitaka oya ni ka eda kaya tiko vua e vu mai lomada. (Luke 18:1-8) Me kena ivakaraitaki, eda na kerei Jiova beka me vukei keda meda valuta e dua na malumalumu. Mai na noda masu tiko ga kei na noda cakacakataka na ka eda masulaka, eda vakaraitaka kina ni sa lomada dina sara ga na ka eda masulaka tiko. Meda kua tale ni wereubiubi ena ka eda masuta, meda masulaka tale ga vakadodonu. E rui bibi tale ga meda masu vagumatua nida sa temaki. (Maciu 6:13) Nida sa masu tiko da qai saga ena gauna vata oqori meda valuta na noda gagadre ca, eda na vakila sara ga na veivuke i Jiova. Oqo ena vaqaqacotaka na noda vakabauta, ena vakataudeitaka tale ga na noda veiwekani kei koya.​—1 Korinica 10:13; Filipai 4:13.

17. E yaga vakacava ke da vakamatauna na dau vakararavi vua na Kalou ena gauna eda vakayacora kina na lomana?

¹⁷ Ke da vakamatauna na dau vakararavi vei Jiova ena gauna kece eda vakayacora kina na lomana, ena macala nida sega ni qaravi koya tiko ena noda kaukaua ga. Ni o Jiova ga e dau vakaukauataki keda. (1 Korinica 4:7) Mai na noda vakadinata oqo, sa da na rawa ni yalomalumalumu kina, eda na qai veivolekati sara kei koya. (1 Pita 5:5, 6) Io, e tu na vuna vinaka meda dau masu tiko ga kina. Eda na vakila na marau dina mai na noda dau masu vagumatua kei na noda kila na sala meda veivolekati kina kei na Tamada vakalomalagi dau loloma.

SEGA NI VAKABI GA ENA DUA NA YASANA NA VEITARATARA KEI JIOVA

18. E rawa nida vakarorogo vakacava vua na Kalou?

¹⁸ Ke da vinakata me rogoca na noda masu na Kalou, ia meda rogoca na nona vosa. (Sakaraia 7:13) Sa oti na nona dau uqeti ira na parofita me ra gusuna, e sega tale ga ni bau vakayagataki ira na dauvakacuru me ra vakadewa na nona itukutuku. (Vakarua 18:10-12) Eda rawa ga ni vakarorogo vua na Kalou ena noda vulica na nona Vosa, na iVolatabu. (Roma 15:4; 2 Timoci 3:16, 17) E sega ni dau garova na lomada na kakana e yaga ina yagoda, e vinakati kina meda vakamatauna. E vaka tale ga kina na kena vinakati meda vakamatauna “nai vakavuvuli sa vaka na wai-ni-sucu dina.” Vakamatauna gona na lomamu me garova na kakana vakayalo ena nomu dau wilika e veisiga na Vosa ni Kalou.​—1 Pita 2:2, 3; Cakacaka 17:11.

19. E yaga vakacava vei keda na noda vakasamataka na ka eda wilika mai na iVolatabu?

¹⁹ Dau vakasamataka na ka o wilika mai na iVolatabu. (Same 1:1-3; 77:11, 12) Oya mo lesuva tale vakavinaka ena nomu vakasama na ka o sa wilika. E rawa ni vakatauvatani oqo kei na kena qaqi vinaka na kakana e keteda. O na qaqia vinaka na kakana vakayalo ena nomu vakasotara na ka o wilika tiko kei na ka o sa vulica oti. Vakasamataka se na yaga vakacava ina nomu bula na ka o wilika, saga ni vakananuma se itovo cava soti i Jiova e vakavotui kina kei na veika e vakayacora. Ena nomu vuli gona vakataki iko, sa rawa ni o vakayagataka na kakana vakayalo e vakarautaka o Jiova. Ena vakavolekati iko vua na Kalou oqori, ena rawarawa tale ga ni o walia kina na nomu leqa ni veisiga.

20. E vukei keda vakacava meda veivolekati kei na Kalou na noda dau tiko ena soqoni vakarisito?

²⁰ O rawa ni volekati koya tale ga na Kalou ena nomu rogoca na nona Vosa e dau veivosakitaki ena soqoni vakarisito, me vaka ga na nodra vakarorogo na Isireli ni ra soqoni vata me wiliki vei ira na Lawa ni Kalou. O ira na dauveivakavulici ni gauna oya era vakamacalataka na ibalebale ni Lawa, era vukei ira kina na vakarorogo me ra kila, me ra qai muria na ka era rogoca. E vakavu marau dina oqo. (Niemaia 8:8, 12) Me nomu ivalavala gona mo dau tiko ena nodra soqoni na iVakadinadina i Jiova. (Iperiu 10:24, 25) Ena vukei iko oqori mo kilai koya kina na Kalou, mo qai vakaitovotaki iko ena ka o kila. O na marau dina kina. Ni o mai lewena na ilawalawa mataveitacini vakarisito e vuravura, sa na rawarawa ekeri mo na volekati Jiova tiko ga. Eda na qai veivosakitaka tarava, ni vakacegu dina ena kune ena kedra maliwa na tamata ni Kalou.

O SE NANUMA TIKO?

Na cava na vuna mo volekati Jiova kina?

Na cava e so na ivalavala e gadrevi me tiko vei keda meda na qai veivolekati kina kei na Kalou?

Na cava e so na ka o rawa ni masulaka?

Na cava mo dau masu tiko ga kina?

O na vakarorogo vakacava vei Jiova edaidai?

[iYaloyalo ena tabana taucoko e 157]