Wase Tini

Na Matanitu “ena Sega Sara ni Vakarusai Rawa”

1. Na veika lelevu sa tara mai na bula ni kawatamata ena veigauna sa sivi me yacova mai nikua e dusia vakamatata na cava?

NA VEIKA lelevu e tarai vuravura tu e veisiga e dusia vakamatata nida sega ni kunea rawa na tamata na marau dina ena noda sasaga meda lewai keda ga, me qai kua sara ni vakaliuci kina na veiliutaki cecere ni Kalou. Sega ni dua na matanitu vakatamata mera vakila na yaga ni kena veiliutaki na tamata kece ga. Sa yawa sara beka na vuku ni tamata nikua, ia era se sega ga ni vakaotia rawa na tauvimate se mera vakabula tiko e dua mada ga na tamata me kua ni mate. Sega ni dua na matanitu me vakaotia na ivalu, itovo kaukaua, basulawa, veidabui, se na bula dravudravua. Levu na vanua nikua era veiliutaki tu kina na matanitu era buturaki ira sobu na lewenivanua. (Dauvunau 8:9) E vagagai na vanua, na wai, kei na cagi ena misini era taurivaka e so ena nodra veisasaga kocokoco era cakava ena dela ni lecaika levu. E levu e toso dredre nodra bula ni veisiga baleta nira veidabuitaka na ilavo ni matanitu e so na kena vakailesilesi. Mai na vica na udolu na yabaki e lewai koya tu ga kina na kawatamata, e macala kina vakasigalevu na tikina oqo: “Sa sega ni vu mai vua na tamata na nona sala: sa sega ni vu mai vua na tamata sa lako tu me lewa na nonai lakolako.”​—Jeremaia 10:23.

2. Na cava na iwali duadua ga ni noda leqa na tamata?

² Na cava na iwali? Na Matanitu ni Kalou, a vakavulici ira kina na nona imuri o Jisu mera masuta: “Me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.” (Maciu 6:9, 10, VV) E vakamacalataki ena 2 Pita 3:13 na Matanitu vakalomalagi ni Kalou me o koya na “lomalagi vou” ena liutaka mai na “vuravura vou,” se o ira na kawatamata yalododonu. E rui bibi na Matanitu ni Kalou, oya na vuna a vakaliuca sara ga kina o Jisu me usutu ni nona cakacaka vakavunau. (Maciu 4:17) A vakaraitaka ni dodonu meda vakabibitaka ena noda bula ena nona kaya: “Dou vakasaqara taumada na matanitu ni Kalou, kei na nona yalododonu.”​—Maciu 6:33.

3. Na cava e sa rui bibi kina ena gauna sara ga oqo me vulici na itukutuku me baleta na Matanitu ni Kalou?

³ E rui bibi ena gauna sara ga oqo me vulici na itukutuku me baleta na Matanitu ni Kalou, ni sa voleka ni yavala na Matanitu oya me veisautaka vakadua na liutaki ni noda vuravura. Ena Taniela 2:44, sa tukuni oti tu mai kina oqo: “E na nodra gauna na tui ko ya [veimatanitu era veiliutaki nikua] ena qai vakatura [mai lomalagi] na Kalou ni lomalagi e dua na matanitu, ena sega sara ni vakarusai rawa: ia na matanitu ko ya ena sega ni biu tu me nodra na tamata tani [era na sega vakadua tale ni liutaka na vuravura na tamata], ia ena vurumemeataka ga ka vakaotia na veimatanitu oqori [era tu nikua], ka na tu ga ka sega ni mudu.” Ena mai cava gona na iotioti ni veisiga oqo ni sa vakarusa na ivakarau ni veika ca kece e tu nikua na Matanitu ni Kalou. Sa na rogoci e vuravura taucoko e dua ga na lewa, na lewa ni Matanitu vakalomalagi. Meda marau ni sa voleka sara oqo na noda vakacegui!

4. Na cava e yaco mai lomalagi ena 1914, ia na cava e rui bibi kina oqori vei keda?

⁴ Se vakatikori vakatui o Karisito Jisu ena 1914, qai vakaroti me tekivu mai na gauna oqori me ‘lewa ena kedra maliwa na kena meca.’ (Same 110:1, 2) Ena yabaki tale ga oya, e tekivu kina na iotioti ni veisiga ni ivakarau ni veika ca e cici tu nikua. (2 Timoci 3:1-5, 13) Yaco sara tale ga ena gauna oqori mai lomalagi na raivotu vakaparofisai a raica o Taniela. E solia o “koya sa dede sara na nona bula,” na Kalou o Jiova vua na Luve ni Tamata, o Jisu Karisito “na lewa, kei na vakarokoroko, kei na matanitu, me ra qaravi koya ko ira na tamata kece, kei na veivanua, kei na dui vosavosa.” E vola oqo o Taniela me baleta na nona raivotu: “A nona lewa na lewa sa sega ni mudu, ena sega ni takali, kei na nona matanitu ena sega ni vakarusai.” (Taniela 7:13, 14) Na Matanitu vakalomalagi ga oqo, e kena Tui o Karisito Jisu, ena vakayagataka na Kalou me vakalougatataki ira kina na tamata yalododonu mera marautaka na veika vivinaka tawawiliki rawa a nakiti taumada ena gauna a biuti rau kina na vuda e Parataisi.

5. Na cava soti eda na via kila me baleta na Matanitu ni Kalou? Ena vuku ni cava?

⁵ E nomu gagadre beka mo tutaka ena yalodina na Matanitu ni Kalou? Ke vaka kina, o na via kila sara ga se matanitu vakacava na matanitu vakalomalagi oqo, ena cicivaki tale ga vakacava. O na via kila se cava e sa vakayacora tiko ena gauna oqo, na cava ena rawata ena veigauna mai muri, kei na cava mo cakava mo lewena. O sa na qai taleitaka ga vakalevu na Matanitu ni Kalou ni o dikeva vakavoleka. Ni o sa ciqoma na kena lewa, o na raica ni o na via wasea sara ga na itukutuku ni veika totoka ena kauta mai vei ira na tamata talairawarawa.​—Same 48:12, 13.

O Ira na Veiliutaki ena Matanitu ni Kalou

6. (a) E matataka na veiliutaki cecere i cei na Matanitu Vakamesaia me vaka eda raica ena iVolatabu? (b) Na cava eda na via cakava nida dikeva na Matanitu ni Kalou?

⁶ Na imatai ni ka o na kunea ena nomu vakadidike, oya ni Matanitu Vakamesaia e matataki Jiova kei na nona veiliutaki cecere. O Jiova sara ga e solia vei Luvena “na lewa, kei na vakarokoroko, kei na matanitu.” Ni sa soli oti vua na Luve ni Kalou na lewa vakatui, e rogo sara mai lomalagi na domo era vakarogoya na itukutuku taudonu: “Na matanitu kei vuravura oqo sa qai yaco me nona na noda Turaga [na Kalou o Jiova], a nei koya na nona Karisito; ia ena lewa ko koya [o Jiova] ka sega ni mudu.” (Vakatakila 11:15) O koya gona, na ka kece eda dikeva me baleta na Matanitu oqo kei na veika ena vakayacora ena vakavolekati keda vei Jiova. Me uqeti keda mada ga na veika eda dikeva meda vakamalumalumutaki keda me tawamudu ina nona veiliutaki cecere.

7. E yaga vakacava vei keda ni digitaki Jisu Karisito o Jiova me nona ivukevuke ena veiliutaki?

⁷ Nanuma tale tiko ga ni o Jiova e sa vakatikori Jisu Karisito ena itikotiko vakatui me nona iVukevuke. Sega ni dua vei keda e uasivi Jisu ena nona kila vinaka na ka e ganiti keda, ni a vakayagataki koya na Kalou me Matai Daucakacaka ena kena buli na vuravura kei keda na tamata. Sega ni o koya wale ga oqori, a se vakaraitaka tale ga mai na itekivu sara ni bula ni tamata e vuravura ni “daumarautaki ira.” (Vosa Vakaibalebale 8:30, 31; Kolosa 1:15-17) E biuti lomalagi sara ga o koya ena levu ni nona lomani keda na tamata me mai cabora vakaisoro na nona bula ena vukuda. (Joni 3:16) E vakarautaka gona e kea na yavu meda sereki kina mai na ivalavala ca kei na mate, kei na yavu meda nuitaka kina na bula tawamudu.​—Maciu 20:28.

8. (a) Na cava ena tudei tu ga kina na Matanitu ni Kalou nida raica vata kei na veiliutaki vakatamata? (b) Na isema cava e tiko ena kedrau maliwa na “dauveiqaravi yalo dina ka vuku” kei na matanitu vakalomalagi?

⁸ Na Matanitu ni Kalou e matanitu tawayavalati rawa qai matanitu tudei. Oqori e baleta ni o Jiova e tawamate rawa. (Apakuki 1:12) O Jisu, o koya e lesi vakalou me Tui, e tawamate rawa tale ga, na ka e uasivi ira kina na tui kei vuravura. (Roma 6:9; 1 Timoci 6:15, 16) Era na veiliutaki vata kei Karisito ena itikotiko vakatui mai lomalagi e le 144,000 na tamata yalodina ni Kalou era kau “maivei ira kecega na veimataqali, kei na duivosavosa, kei na veimatanitu, kei na veivanua.” E soli tale ga vei ira oqori na bula tawamate rawa. (Vakatakila 5:9, 10; 14:1-4; 1 Korinica 15:42-44, 53) Na iwase levu vei ira oqori era sa tu oti mai lomalagi, qai dua ga na kena vo era se bula tiko e vuravura. O ira na kena vo oqori era colata tiko na itavi i koya na “dauveiqaravi yalo dina ka vuku,” a kaya o Jisu ni na qarava tiko ena yalodina na veika e baleta na Matanitu ni Kalou e ke.​—Maciu 24:45-47, VV.

9, 10. (a) O cei soti era vakatubuleqa tiko ena vakarusai ira se vesuki ira na Matanitu ni Kalou? (b) Meda qarauni keda mai na cava soti kevaka eda sega ni via meca ni Matanitu Kalou?

⁹ Sa voleka ni tala mai o Jiova na nona mataivalu ena gauna sa lokuca o koya me vakasavasavataki kina na vuravura. Era na vakarusai vakadua na tamata e lomadra voli mera saqata na nona veiliutaki cecere ra qai beca na nona isolisoli vakayalololoma e vakadewataka mai vei keda o Jisu Karisito. (2 Cesalonaika 1:6-9) Na siga dina i Jiova oya, na gauna e waraki balavu tu mai me na vakadinadinataka kina o koya na dodonu ni nona veiliutaki uasivi. “Raica, sa toro mai na siga i Jiova, sa ka rarawa dina sara e na cudru levu kei na cudru waqawaqa, . . . ena vaqeavutaka ko koya na kena tamatai valavala ca.” (Aisea 13:9) “A siga ni cudru na siga ko ya, na siga ni ca kei na rarawa, a siga ni veivakacacani kei na veivakarusai, a siga butobuto ka loaloa, a siga ni o kei na butobuto levu.”​—Sefanaia 1:15.

¹⁰ Era na vakarusai vakadua na lotu lasu kece kei na matanitu kece ni tamata kei na kedra mataivalu, e lewai ira na iliuliu ca tawarairai ni vuravura oqo. O ira taucoko na vakavuravura voli nira dau caka nodra, dau veidabui, qai tawakilikili na nodra itovo era na vakarusai. Ena vesu o Setani kei ira nona timoni me duanaudolu na yabaki, qai sega ni rawa mera veitaratara kei ira na lewe i vuravura ena gauna oqori. Sa na lewa na veika kece e caka e vuravura na Matanitu ni Kalou. Sa na wacava na nodra vakacegu o ira kece na tamata yalododonu!​—Vakatakila 18:21, 24; 19:11-16, 19-21; 20:1, 2.

iNaki ni Matanitu ni Kalou​—Rawati Vakacava?

11. (a) Ena vakayacora vakacava na inaki i Jiova me baleta na vuravura na Matanitu Vakamesaia? (b) Ni sa na veiliutaki na Matanitu ni Kalou, ena qai vakaevei na nodra bula na tamata era vakaitikotiko voli e vuravura ena gauna oya?

¹¹ Na ka kece a nakita taumada na Kalou me baleta na vuravura ena vakayacora na Matanitu Vakamesaia. (Vakatekivu 1:28; 2:8, 9, 15) E sega ni tokona na kawatamata na inaki oya me yacova mai nikua. Ia o ira na lewe i vuravura mai muri era na vakarorogo vei koya na Luve ni Tamata, o Jisu Karisito. O ira kece na bula yani ni sa vakarusa o Jiova na ivakarau ni veika ca makawa oqo era na cakacaka vata ena nodra muria mai vu ni yalodra na veidusimaki i koya na Tui, o Karisito, me vukici kina na vuravura taucoko me parataisi. (Iperiu 2:5-9) Era na marautaka na vua ni nodra cakacaka na kawatamata kece ra qai vakamamautaki ena levu ni ka e vuataka o vuravura.​—Same 72:1, 7, 8, 16-19; Aisea 65:21, 22.

12. Na cava ena caka me vinaka vakaoti kina na nodra vakasama kei na yagodra na lewe ni Matanitu ni Kalou?

¹² E vinaka vakaoti na kedrau ituvaki o Atama kei Ivi ni rau sa buli, qai inaki ni Kalou me rau vakatawani vuravura ena nodrau kawa e vinaka vakaoti tale ga na nodra vakasama kei na yagodra. Na inaki oqori ena vakavotukana ena kena lagilagi taucoko ni sa veiliutaki na Matanitu ni Kalou. Ena vinakati kina me kau tani vakadua na ivalavala ca, oqori na vuna e sega ni veiqaravi wale ga kina Vakatui o Karisito, e nona itavi tale ga me Bete Levu. Ena qai vukei ira vakamalua na tamata era talairawarawa vua me yaga vei ira na nona isoro ni ivalavala ca.

13. Na veivakalougatataki cava ena tau vei ira na tamata ni sa veiliutaki na Matanitu ni Kalou?

¹³ Ni sa veiliutaki na Matanitu ni Kalou, ena totoka vakaoti na nodra vakabulai vakayago na lewe i vuravura. “Ena qai rai na matadra na mataboko, ka rogo na daligadra na didivara. Ena qai ladelade na lokiloki me vaka na me kila, ka sere na yamedra na galu.” (Aisea 35:5, 6) O ira na sa qase kei ira e tauvi ira tu na mate ni kuliniyago era na vakila nira sa gonegone qai tu vinaka tale tu na kuliniyagodra, kei ira na tamata tautauvimate era na bulabula vinaka. “Ena qai vinaka tale na lewena me vaka na lewe ni gone: Ena vuki me cauravou tale.” (Jope 33:25) Ena yaco mai na siga, ena sega tale ni kaya kina e dua, “Ka’u sa tauvimate.” Baleta? Ni ra sa na sereki mai na ivalavala ca kei na leqa e dau vu mai kina o ira na tamata era rokova na Kalou. (Aisea 33:24; Luke 13:11-13) Io, “na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.”​—Vakatakila 21:4.

14. Na nona vinaka vakaoti e dua na tamata e vauci kina na cava tale?

¹⁴ Ia na bula e vinaka vakaoti e sega ni yalani ga ena bulabula vinaka ni yago kei na tu vinaka ni vakasama. E vauci tale ga kina na kena vakaitovotaki vinaka na ivalavala i Jiova nida a buli ‘meda itovo vata kei na Kalou, meda ucui koya.’ (Vakatekivu 1:26) Me na rawati oqo, ena vinakati meda vakavulici. Ena vuravura vou, era na “tiko kina nai valavala dodonu.” O koya gona, me vaka e parofisaitaka o Aisea, “era na qai vulica nai valavala dodonu na lewe i vuravura.” (2 Pita 3:13; Aisea 26:9) Na itovo oqo e dau veivakaduavatataki​—ra vakaduavatataki kina na matatamata kece, o ira na veitokani, o ira na vuvale vata, qai bibi duadua, eda vakaduavatataki kina kei koya sara ga na Kalou. (Same 85:10-13; Aisea 32:17) Ni toso na gauna, era na qai vakavulici tiko ena loma ni Kalou o ira na vulica na ivalavala dodonu. Ni sa dei e lomadra na nodra lomani Jiova, era na saga sara mera vakaitovotaka na nona ivalavala ena veibasoga ni nodra bula kece. Era na tini kaya kina me vakataki Jisu, ‘Au sa kitaka tiko ga na ka sa vinakata o Tamaqu.’ (Joni 8:29) Ke ra cakava oqo na tamata kece, sa na wacava na totoka ni bula!

Veika e sa Rawati

15. Vakayagataka na taro ni parakaravu oqo mo vakavotuya kina na veika e sa rawata na Matanitu ni Kalou, kei na ka e dodonu meda sa cakava sara tiko ga nikua.

¹⁵ Sa raici votu sara tu ga nikua na veika totoka e sa rawata na Matanitu ni Kalou kei ira na tutaka na kena veiliutaki. Na taro era tiko oqo kei na veitikinivolatabu ena vakavotuya e so na ka e sa rawati, kei na ka e dodonu mera vakayacora ena gauna sara ga oqo o ira kece na via lewena na Matanitu ni Kalou.

O cei sara mada e valuti ira e liu na Matanitu ni Kalou, ia na cava na kena itinitini? (Vakatakila 12:7-10, 12)

Me tekivu sara mai na gauna e vakatikori kina vakatui o Karisito, o ira na kena vo ni ilawalawa cava era sa vakasoqoni tiko edaidai? (Vakatakila 14:1-3)

Na cakacaka cava sa tukuna oti tu mai o Jisu ni na vakayacora ni sa tekivu oti na veivakararawataki levu, me vaka e volai ena Maciu 25:31-33?

Na cakacaka ni veivakarautaki cava sa vakayacori tiko nikua? O cei era vakaitavi kina? (Same 110:3; Maciu 24:14; Vakatakila 14:6, 7)

Na cava era sega ni tarova rawa kina na cakacaka vakavunau o ira na keda meca mai na tabana vakapolitiki kei na tabana vakalotu? (Sakaraia 4:6; Cakacaka 5:38, 39)

Na veiveisau cava e raici ena nodra bula na tamata era vakamalumalumutaki ira ena lewa ni Matanitu ni Kalou? (Aisea 2:4; 1 Korinica 6:9-11)

Matanitu ena Lewa me Duanaudolu na Yabaki

16. (a) Ena vakaevei na dede ni nona veiliutaki na Karisito? (b) Na veika totoka cava ena vakayacori ena loma ni gauna oya, ni sa oti tale ga na gauna oya?

¹⁶ Ni sa vesu oti o Setani kei ira na nona timoni, era na qai veiqaravi ena nodra itavi vakatui vakabete me duanaudolu na yabaki o Jisu Karisito kei ira na le 144,000 era itaukei vata kei koya. (Vakatakila 20:6) Era na vukei na kawatamata ena loma ni gauna oya mera yacova na bula uasivi, mai vakaoti kina vakadua na ivalavala ca kei na mate a vakataka mai o Atama. Ena icavacava ni duanaudolu na yabaki, ni sa vakacavara vinaka na nona ilesilesi Vakatui Vakabete o Jisu na Mesaia, sa na qai “solia na matanitu ki vua” na Tamana, “me lewa tiko kina na Kalou na veika kece ga.” (1 Korinica 15:24-28, VV) Ena gauna oqori, sa na qai sereki vakalekaleka o Setani me vakatovolea na kawatamata sa vakabulai, me laurai kina na dina ni nodra tutaka na veiliutaki cecere i Jiova. Ni sa cava na iotioti ni veivakatovolei oya, ena qai vakarusai Setani vakadua o Jiova kei ira na dauveivorati era tokoni koya. (Vakatakila 20:7-10) O ira na tutaka tiko ga na dodonu i Jiova me veiliutaki era sa na vakadinadinataka na nodra yalodina. Ena qai vakataudeitaki na nodra veiwekani kei Jiova, mera ciqomi kina mera luvena dina ra qai vakadonui mera bula tawamudu.​—Roma 8:21.

17. (a) Ni sa cava na duanaudolu na yabaki, sa na qai vakacava na Matanitu ni Kalou? (b) Na cava e vakaibalebaletaki ni tukuni ni na “sega ni vakarusai” na Matanitu ni Kalou?

¹⁷ O koya gona, ena veisau na itavi i Jisu kei ira na le 144,000, oqo na nodra itavi me baleti vuravura. Sa na qai cava beka e nodra itavi ni oti oya? E sega ni kaya na iVolatabu. Ia kevaka eda tutaka ena yalodina na veiliutaki cecere i Jiova, eda na bula tiko ena icavacava ni duanaudolu na yabaki meda raica kina se cava tale sa nakita tu o koya me baleti ira, me baleta tale ga na vuravura kei na lomalagi. Ia e tukuni ni na “sega ni mudu” na veiliutaki i Karisito ena duanaudolu na yabaki, na nona Matanitu tale ga “ena sega ni vakarusai.” (Taniela 7:14) Na cava na kena ibalebale? Na kena ibalebale ni na sega ni gole na veiliutaki vei ira e duatani na nodra inaki, baleta ni o Jiova ena lewa tiko ga. Ena ‘sega tale ga ni vakarusai’ na Matanitu ni Kalou baleta ni ka e rawata ena tu me tawamudu. (Taniela 2:44) Era na vakalagilagi tale ga me tawamudu, ena vuku ni nodra veiqaravi yalodina vei Jiova, na Mesaia kei ira na nona itokani era vakaitavi kei koya ena cakacaka vakatui vakabete.

Railesuvi

• Na cava na vuna e iwali duadua ga kina ni leqa ni kawatamata na Matanitu ni Kalou? Se veiliutaki mai ni naica na Tui ni Matanitu ni Kalou?

• Na cava sara mada o taleitaka me baleta na Matanitu ni Kalou kei na ka ena vakayacora?

• Na cava e sa vakayacora tiko ena gauna sara ga oqo na Matanitu ni Kalou, ia eda vakaitavi kina vakacava o keda?

[iYaloyalo ena tabana e 92, 93]

Na tamata kece era na vulica na ivalavala dodonu ni sa veiliutaki na Matanitu ni Kalou