Wase Tinikalima

Rogoca na iVakasala, Marau ni o Vakadodonutaki

1. (a) Na cava e ganiti keda kece kina meda vakasalataki se vakadodonutaki? (b) Na taro cava meda vakasamataka vinaka?

E KAYA na iVolatabu ena Jemesa 3:2 (VV) “ni da sa dau cakava kece ga e vuqa na cala.” Eda kila ni levu sara na gauna eda lekata kina na veika e vinakata vei keda na Kalou. Eda vakadinata gona ni dina na vosa oqo ni iVolatabu: “Rogoca na ivakasala qai marau ni o vakadodonutaki mo vuku kina mai muri.” (Vosa Vakaibalebale 19:20, NW) Sega ni vakatitiqataki nida sa veisautaka oti na noda bula me rawa ni salasalavata kei na ivakavuvuli ni iVolatabu. Ia vakacava ke vakasalataki keda ena dua na ka e dua na noda itokani lotu Vakarisito?

2. Na cava meda cakava nida vakasalataki?

² Nira vakasalataki e so, e sega ni bera ga na nodra vakaulubale, vakamamadataka na bibi ni cala, se bilitaka e dua tale. Ia e vinaka cake meda rogoca na ivakasala da qai muria. (Iperiu 12:11) Ena yasana adua, me kua ga nida namaka vakasivia na ka vei ira e so tale, se meda via veivakasalataki ena ka lalai kece ga, se na veika e vakatau ena noda dui lewaeloma. De dua e se sega ni taura kece na kena dina o koya e veivakasalataki, ia o koya e vakasalataki e rawa ni tukuna vakamalua oqori vua. Ia, kaya mada ni yavutaki vinaka ena ivakavuvuli ni iVolatabu na veika eda vakasalataki se vakadodonutaki kina. Meda na raica vakacava oqori?

iVakaraitaki Meda Vuli Kina

3, 4. (a) Na cava e tiko ena iVolatabu eda na vulica kina meda kua ni raica vakatani na ivakasala kei na veivakadodonutaki e tau vei keda? (b) Na cava e kaya o Tui Saula ni sa vakasalataki, qai vakacava na kena itinitini?

³ E tiko ena Vosa ni Kalou na kedra ivakaraitaki e so a tau vei ira na ivakasala. So na gauna e tau vata kei na ivakasala na kuita ni veivakadodonutaki. Na tui kei Isireli, o Saula e dua e vakila oqo. A sega ni muria na ivakaro i Jiova me baleti ira na Amalekaiti. Era dau saqati ira na tamata ni Kalou o ira na Amalekaiti, qai nona lewa o Jiova mera vakarusai kece na matatamata oya kei na nodra manumanu. Ia a vakabula na nodra tui kei na nodra manumanu vinaka duadua o Tui Saula.​—1 Samuela 15:1-11.

⁴ A tala na parofita o Samuela o Jiova me lai vunauci Saula. Na cava e qai kaya o Saula? E kaya ni sa cakava na ka e tukuni vua, oya me vakavuai ira na Amalekaiti, ia e nanuma ga me vakabula na nodra tui. Na ka oya a sega ni salasalavata kei na ivakaro i Jiova. (1 Samuela 15:20) Via bilitaki ira sara na nona tamata o Saula nira sega ni vakamatea na manumanu kece, e kaya: “[A]u a rerevaki ira na tamata, ka vakarorogo ki na nodra vosa.” (1 Samuela 15:24) E vaka me kauaitaka cake na kena irogorogo, qai kerei Samuela me vakarokorokotaki koya ena matadra na tamata. (1 Samuela 15:30) Yaco na gauna me sa sega ni vakadonui koya tale o Jiova me tui.​—1 Samuela 16:1.

5. Na cava e yacovi Tui Usaia ni beca na ivakasala?

⁵ O Tui Usaia mai Juta a “talaidredre vei Jiova na nona Kalou, ka curu ki loma ni vale ni soro i Jiova me vakama na ka boi vinaka.” (2 Veigauna 26:16) Ia a tara ga vei ira na bete mera vakama na ka boi vinaka. E cudru o Usaia ni via tarovi koya na bete levu. Na cava e qai yaco? E kaya na iVolatabu: “Sa tubura na yadrena na vukavuka . . . ni sa yaviti koya ko Jiova. A sa vukavuka ko Usaia na tui ka yacova na siga sa mate kina.”​—2 Veigauna 26:19-21.

6. (a) Na cava erau sega ni via rogoca kina na ivakasala o Saula kei Usaia? (b) Na cava e leqa levu kina nikua na beci ni ivakasala?

⁶ Na cava a dredre kina vei rau o Saula kei Usaia me rau rogoca na ivakasala? Na leqa levu ga ni rau dokadoka, erau viavialevu. Dau tini ga ina rarawa e levu e vaka oqo na nodra ivalavala. Kevaka era ciqoma na ivakasala, era nanuma nira na rogorogo ca kina se ra na raici sobu mera tamata malumalumu. Ia e tamata malumalumu ga o koya e dokadoka. Na dokadoka e vakabuawataka na vakasama, ena rawa ni beci kina na veivuke i Jiova e lako tiko mai na nona Vosa kei na nona isoqosoqo. E tauca kina o Jiova na ivakasala oqo: “Sa liu na viavialevu, ia sa muri na rusa, A sa liu na yaloviavialevu ia sa muri na bale.”​—Vosa Vakaibalebale 16:18; Roma  12:3.

Me Ciqomi na iVakasala

7. Na cava e so na ivakavuvuli yaga eda taura rawa mai na ivalavala ni nona ciqoma na ivakasala o Mosese?

⁷ E tiko tale ga ena iVolatabu na kedra ivakaraitaki vinaka na tamata era ciqoma na ivakasala, e rawa nida vuli mai kina. Vakasamataki Mosese mada, a vakasalataki koya na vugona tagane ena ka me cakava me mamada kina na nona itavi bibi. A rogoci koya o Mosese qai muria sara na ivakasala oya. (Lako Yani 18:13-24) Eda kila ni turaga levu o Mosese, ia na cava ga e yalorawarawa kina me ciqoma na ivakasala? Baleta ga ni tamata yalomalumalumu. “Ko Mosese sa uasivi e na yalomalumalumu, vei ira na tamata kecega sa tiko e vuravura.” (Tiko Voli Mai na Lekutu 12:3) Na cava e bibi kina na yalomalumalumu? E kaya na Sefanaia 2:3 ni na vakatau kina na noda bula.

8. (a) Na cava soti na ivalavala ca i Tevita? (b) Na cava e cakava o Tevita ni sa vunauci koya o Necani? (c) Na cava na vua ni ivalavala ca i Tevita?

⁸ A veibutakoci kei Pacisepa o Tui Tevita, oti qai via vunitaka ena nona bukia na vere me vakamatei o Uraia na watina. Tala sara yani o Jiova na parofita o Necani me vunauci Tevita. A veivutuni o koya qai totolo ni vakatusa: “Au sa cala vei Jiova.” (2 Samuela 12:13) E dina ni vosoti Tevita na Kalou baleta ni sa veivutuni, ia ena sega ni drotaka o koya na ca ni ka e cakava. E kaya vua o Jiova ni na ‘sega ni yali mai na nona vale na iseleiwau,’ nira na soli na watina vei ira na ‘wekana,’ qai “mate vakaidina” na luvena e vua ni nona veibutakoci.​—2 Samuela 12:10, 11, 14.

9. Na cava meda kua ni guilecava ke da mani vakasalataki se vakadodonutaki?

⁹ E kila o Tevita na kena vinaka me dau rogoci na ivakasala yaga. So na gauna e vakavinavinaka vua na Kalou ni tala mai e dua me mai vakasalataki koya. (1 Samuela 25:32-35) Vakaevei o keda? Ke da ucui koya, oqori ena taqomaki keda meda kua ni tukuna se cakava e levu na ka ena vakararawataki keda emuri. Ia vakacava ke mani ganiti keda meda vakasalataki se da mani vakadodonutaki sara? Meda kua ni guilecava ni oqori e dusia tu na loloma i Jiova ena vukuda, kei na nona vinakata meda vinaka tawamudu kina.​—Vosa Vakaibalebale 3:11, 12; 4:13.

So na iTovo Yaga Meda Vakaitovotaka

10. Na itovo cava a vakaraitaka o Jisu ni na vinakati vei ira na lewe ni Matanitu ni Kalou?

¹⁰ Me vinaka na noda veiwekani kei Jiova kei ira na tacida lotu Vakarisito, e tiko e so na itovo meda na vakaitovotaka. A vakabibitaka o Jisu e dua vei ira oqori ena gauna a vakaduria kina e dua na gonelailai ena kedratou maliwa na nona tisaipeli qai kaya: “Kevaka dou sa sega ni saumaki mai, ka yaco me vaka na gone lalai, dou na sega sara ni curu ki na matanitu vakalomalagi: ia ko koya sa vakamalumalumutaki koya me vaka na gone lailai oqo, ko koya ga sa levu cake e na matanitu vakalomalagi.” (Maciu 18:3, 4) A vinakati vei iratou na tisaipeli i Jisu me ratou vakamalumalumu, ni ratou a veibataka tiko se o cei e uasivi.​—Luke 22:24-27.

11. (a) Meda vakamalumalumutaki keda vei cei? Ena vuku ni cava? (b) Ke da yalomalumalumu, na cava eda na cakava ke da vakasalataki?

¹¹ E kaya na yapositolo o Pita: “Dou dui vakamalumalumutaki kemudou vakai kemudou, ka dou vakaisulu e na yalomalumalumu: ni sa vorati ira na viavialevu na Kalou, ia sa solia nai solisoli loloma vei ira na yalomalumalumu.” (1 Pita 5:5) Eda kila ni vinakati meda vakamalumalumutaki keda vua na Kalou, ia na tikinivolatabu oqo e vakaraitaka ni kilikili meda vakamalumalumutaki keda tale ga vei ira eda vakabauta vata. Ke dina ena vukuda oqori, eda na sega ni cata ke ra vakatura vei keda e so na ka e yaga na tacida vakayalo, da qai vuli vei ira.​—Vosa Vakaibalebale 12:15.

12. (a) Na cava e dua tale na itovo yaga e lakolako vata kei na yalomalumalumu? (b) Na cava meda dau qarauna kina na noda ivalavala?

¹² O koya e yalomalumalumu, e dau veinanumi. A vola na yapositolo o Paula: “Me kakua e dua me qara na ka sa yaga duaduaga vei koya, a ka talega sa yaga vei koya na tani. . . . O koya ga, se dou kana, se dou gunu, se cava na ka dou sa kitaka, mo dou kitaka kecega me vakarokorokotaki kina na Kalou. Dou kakua ni vakacala e dua, vei ira na Jiu, se vei ira na lewe ni veimatanitu tani, se vei ira nai soqosoqo lewe ni lotu ni Kalou.” (1 Korinica 10:24-33) A sega ni kaya tiko o Paula me sa kua sara ga nida qai vakabibitaka e dua na ka eda dau taleitaka, ia a uqeti keda meda kua ni cakava na ka ena vakadoudoutaka e dua na wekada me vakayacora na ka e veisaqasaqa kei na nona lewaeloma.

13. Na cava ena vakaraitaka nida saga dina tiko meda vakaitovotaka na ivakasala ni iVolatabu?

¹³ O dau dre me yaco ga na lomamu, se o dau veinanumi? E yaga dina ke da tovolea meda dau veinanumi. Levu na sala eda rawa ni cakava kina oqori. Na noda isulusulu kei na sasauni e dua vei ira. Oqo e vakatau ena ka eda dui taleitaka, me kua ga ni veicoqacoqa kei na idusidusi vakaivolatabu ena ka e rakorako, matau, qai savasava. Ia, vakaevei ke o liaca ni so, e duidui na nodra itovo vakavanua, era sega ni via rogoca na itukutuku ni Matanitu ni Kalou baleta ga na nomu isulusulu se sasauni? O na yalorawarawa mo veisautaka oya? Macala tu ga ni bibi cake sara mai na noda vakalomavinakataki keda ga na noda vukea e dua tale me rawata na bula tawamudu, se vakaevei?

14. Na cava e bibi kina meda vakaitovotaka na yalomalumalumu da qai dau veinanumi?

¹⁴ E vakaraitaka vei keda o Jisu na yaga ni yalomalumalumu kei na veinanumi, a bau vuya sara na yavadratou na nona tisaipeli. (Joni 13:12-15) E kaya na Vosa ni Kalou me baleti koya: “Me tiko vei kemuni na i tovo ni yalo ka a tiko vei Karisito Jisu: O koya, e dina ga ni tiko vua e na veigauna kece ga na bula va-Kalou, e a sega ni bau nanuma me vakaukauwataka me rau tautauvata tiko ga kei na Kalou. Ia e a nakita ga vaka i koya me laiva tu mada yani na veika kece e a tu vua, ka mai taura na i vakarau ni bula vakatamata bobula. A sa yaco me vakataki ira na tamata ka sa rairai mai e na yago vakatamata. Ia ni sa rairai e na yago vakatamata sa vakayalomalumalumutaki koya ka sa talairawarawa me yacova sara na mate.”​—Filipai 2:5-8, VV; Roma 15:2, 3.

Mo Marau ni Vakadodonutaki Iko o Jiova

15. (a) Me marautaka na Kalou na noda ivalavala, na veiveisau cava ena gadrevi vei keda? (b) E vakarautaka mai vakacava o Jiova vei keda kece na nona ivakasala kei na veivakadodonutaki?

¹⁵ Nida tamata ivalavala ca, ena gadrevi me veisau na noda itovo kei na noda ivalavala meda qai ucuya na Kalou. Meda sulumaka na itovo ni “tamata vou.” (Kolosa 3:5-14, VV) Ena yaga e ke na ivakasala kei na veivakadodonutaki meda raica rawa kina na noda malumalumu kei na kena iwali. Na noda idusidusi levu ga na iVolatabu. (2 Timoci 3:16, 17) Ia na ivalavala me bulataki kina na Vosa ni Kalou e dau vakatakilai mai ena ivola vakaivolatabu kei na soqoni e vakarautaka na isoqosoqo i Jiova. Vakaevei ke da baci rogoca e dua na ivakasala eda sa rogoca oti, eda na lialiaci beka kina da qai saga meda veisau?

16. E dau vukei keda vakacava o Jiova?

¹⁶ E dau vukei keda o Jiova ena leqa eda sotava ni lomani keda. Vica na milioni era sa vukei ena nodra vakavulici ena iVolatabu. Era dau veivakasalataki ra qai veivakadodonutaki na itubutubu mera taqomaki kina na luvedra mai na ivalavala ena rawa ni vakamosiyalo mai muri. (Vosa Vakaibalebale 6:20-23) Ena loma ni ivavakoso, e so era dau kere veivuke kei na ivakasala vei ira na italatala matua me vuavuaivinaka cake kina na nodra cakacaka vakavunau. So na gauna era dau kere ivakasala na qase ni ivavakoso vei ira e so tale na nodra itokani qase se vei ira na sa matua ena cakacaka vakavunau. Ke so era gadreva na veivuke, era na vakayagataka ena yalomalumalumu na iVolatabu o ira na tu vinaka vakayalo mera veivukei. Ke o veivakasalataki, nanuma tiko mo ‘vakaraici iko de o mani veretaki tale ga.’ (Kalatia 6:1, 2, VV) Io, e ganiti keda kece meda dau vakasalataki, da vakadodonutaki tale ga meda qarava rawa kina na Kalou dina ena duavata.

Railesuvi

• E vukei keda vakacava o Jiova meda lialiaci ena veika meda veisautaki keda kina?

• Na cava e sega ni rawarawa kina vei ira e levu mera ciqoma na ivakasala e gadrevi, ia vakacava ke ra sega ni ciqoma?

• Na itovo talei cava soti ena vakarawarawataka vei keda meda ciqoma na ivakasala, ia eda vuli vakacava mai na ivakaraitaki i Jisu?

[iYaloyalo ena tabana e 142]

A beca na ivakasala o Usaia qai tauvi koya kina na vukavuka

[iYaloyalo ena tabana e 142]

A kalougata o Mosese ni ciqoma na ivakasala i Jecoro