E Dau Veiqaravi na Qasenivuli Levu

O MARAU beka ni dua e cakava vei iko e dua na ka vinaka?— E levu tale ga era marau ni caka vei ira na ka vinaka. O keda kece sara ga. E kila vinaka tale ga na Qasenivuli Levu, oya na vuna e dau veiqaravi kina. A kaya: ‘Au sega ni lako mai meu qaravi, meu dau veiqaravi ga.’​—Maciu 20:28.

Ke da vinakata meda vakataki koya na Qasenivuli Levu, na cava meda cakava?— Meda qaravi ira na tani. Meda cakava na veika e vinaka vei ira. E levu era sega ni dau cakava oya. Era vinakata ga mera qaravi. Dua na gauna a vaka sara ga oqori na nodra rai na imuri i Jisu. Eratou vinakata kece me ratou uasivi cake.

Dua na siga eratou lako tiko e gaunisala o Jisu kei iratou na nona tisaipeli. Eratou curu sara ina koro o Kapenaumi, volekata na Wasawasa o Kalili, ratou curu sara ina dua na vale. E tarogi iratou o Jisu: “A cava dou sa veileti kina e na gau-ni-sala?” E sega ni dua e vosa baleta ni ratou veiletitaka tiko mai gaunisala se o cei e uasivi vei iratou.​—Marika 9:​33, 34.

E kila o Jisu ni sega ni dodonu me dua vei iratou me nanuma ni uasivi cake. Me vaka eda vulica ena imatai ni wase ni ivola oqo, e qai vakaduria e matadratou e dua na gonelailai qai tukuna vei iratou ni dodonu me ratou yalomalumalumu me vakataki koya na gone oya. Ia eratou sega ga ni vuli kina. Ni bera toka ga nona mate, e qai cakava e dua na ka eratou na sega ni guilecava rawa. Na cava e cakava?—

Ni ratou kana toka, e tucake o Jisu qai luvata na nona kote balavu. E vauca sara na tolona ena dua na tauwelu. E tawana na wai ena dua na beseni. Ratou vakilakila toka na nona imuri se cava e vakarau cakava. E lako kece vei iratou o Jisu, cuva sobu, qai savata na yavadratou. Qai vakamamacataka na yavadratou ena tauwelu. Vakasamataka mada oya! Vakacava ke o tiko e kea? O na raica vakacava na ka oya?—

Ratou raica na nona imuri ni sega ni dodonu me qaravi iratou vaka oya na Qasenivuli Levu. Ratou madua sara ga. A via tarovi Jisu o Pita me kua ni cakava vua na cakacaka lolovira oya. Ia e tukuna o Jisu ni dodonu me savata na yavadratou.

Eda sa sega ni dau veivui yava ena gauna oqo. Ia a dau vakayacori ena gauna a tu kina e vuravura o Jisu. O kila na vuna?— Ena vanua era bula voli kina o Jisu kei na nona imuri, e daramaki tu ga kina na ivava tali. Nira taubale e gaunisala, e dau tauvi kuvu ni qele na yavadra. E ivakaraitaki ni yalololoma na kena sava kei na kena qusi laivi na kuvu e yavadra na vulagi era curu mai vale.

E sega ni bau dua na tisaipeli i Jisu e bole me savata na yavadratou. E mani vakayacora kina o Jisu. Oqo e vakavulici iratou kina na nona imuri ena dua na ivakavuvuli bibi. A vinakati mera vuli kina. E dodonu tale ga meda vuli kina ena gauna oqo.

O kila se cava na ivakavuvuli oya?— Ni dara tale nona kote me lai dabe ena teveli, e qai kaya: “Dou sa kila na ka ka’u sa kitaka vei kemudou, se segai? Dou sa vakatokai au me’ui Vakavuvuli, me’u Turaga talega: ia dou sa vosa dina; ni’u sa vakakina. Ia kevaka ka’u sa vuya na yavamudou, koi au na Turaga kei nai Vakavuvuli, sa dodonu talega mo dou veivui yava.”—Joni 13:2-14.

E vakaraitaka na Qasenivuli Levu ni vinakata mera dau veiqaravi na nona imuri. E sega ni vinakata mera dui nanumi ira ga. E sega ni vinakata mera nanuma nira rui bibi me qai dua tale me qaravi ira. E vinakata ga mera marau nira qaravi ira na tani.

E sega li ni ivakavuvuli vinaka oya?— E rawa beka mo vakataki koya na Qasenivuli Levu mo qaravi ira tale e so?— E rawa kece vei keda meda qaravi ira tale e so. Ena vakamarautaki ira tale ga. Rau na qai marau vakalevu sara o Jisu kei Tamana.

E sega ni dredre noda qaravi ira na tani. Ke o vakaraica vinaka, ena levu sara na ka o rawa ni cakava. Vakasamataka mada: Na cava o rawa ni vukei tinamu kina? O kila ni levu sara na ka e cakava me baleti iko kei na vo ni lewe ni vuvale. E rawa mo vukei koya?— Vakacava mo tarogi koya?

De o rawa ni vakarautaka na teveli ni bera na kana. Se masi iyaya ni kana nira kana oti na lewenivuvale. So na gone era dau kauta i gaunisala na kavanibenu e veisiga. Se cakacaka cava o cakava, o sa veiqaravi tiko, me vakataki Jisu.

Era tu beka na tacimu o rawa ni qaravi ira? Nanuma ni o Jisu, na Qasenivuli Levu, a qaravi ira tale ga na nona imuri. Ni o qaravi ira na tacimu, o sa vakatotomuri Jisu tiko. O rawa ni vukei ira vakacava?— De o rawa ni vakavulici ira mera dau maroroya na nodra iyaya ni vakatatalo ni sa oti nodra vakatatalo. Se o rawa ni vakaisulutaki ira. Se o rawa ni vukei ira mera lobika na nodra itutuvi. O bau vakasamataka e so tale na ka o rawa ni vukei ira kina?— Era na vakavinavinakataka nomu vukei ira me vaka ga nodra vakavinavinakataki Jisu na nona imuri.

E rawa mo veiqaravi tale ga e koronivuli. E rawa mo vukea e dua drau kalasi vata se nomu qasenivuli. Ke ra lutu na nona ivola e dua, e ka vakayalololoma nomu vukei koya ena kedra tomiki. E rawa mo bole mo qusia na papaloaloa se cakava e dua na ka e vinakata o qasenivuli. E cakacaka vakayalololoma na nomu dolava mada ga na katuba vua e dua.

So na gauna ena sega ni vakavinavinakataki na noda veiqaravi. Me sa tarova beka na noda cakava tiko ga na veika vinaka?— Sega! E levu era sega ni vakavinavinakataka na cakacaka vinaka i Jisu. Ia e sega ni bau tarova na nona vakayacora na veika vinaka.

Meda kua ni soro ena noda qaravi ira na tani. Meda nanuma na Qasenivuli Levu, o Jisu, da qai tovolea meda vakatotomuri koya.