A Sucu O Jisu ena Tiseba?

E SEGA ni tukuna na iVolatabu na tikinisiga se na vula a sucu kina o Jisu. Ia nida dikeva na itukutuku ena iVolatabu eda rawa ni vakadeitaka ni a sega ni sucu o koya ena vula o Tiseba.

E yaga meda kila se dau vakacava tu na draki e Peceliema, na koro a sucu kina o Jisu, ena vula o Tiseba. Ena nodra ivolanivula na Jiu na vula o Kisiliu (veitaudonui kei na Noveba/Tiseba) e dau draki batabata, tau tale ga vakalevu na uca. Na vula e tarava, na Tebeth (veitaudonui kei na Tiseba/Janueri) e dau liliwa sara na draki, dau tau ena so na gauna na ucacevata ena veitokaitua. Na cava tale e kaya na iVolatabu me baleta na draki ena yasayasa ya?

Era vakadeitaka tale eso era vola na iVolatabu ni vula o Chislev a vula ni draki batabata kei na uca. Kena ivakaraitaki, e vola o Esera nira “sautaninini ena vuku ni . . . uca bi” e dua na ilawalawa era soqoni vata e Jerusalemi ena “ikaciwa ni vula [Kisiliu], ena ika20 ni siga ni vula.” Qai volaitukutukutaka o Esera na ka era kaya sara ga na ilawalawa ya me baleta na draki: E “gauna ni uca. E sega ni rawa na duri e tuba.” (Esera 10:9, 13; Jeremaia 36:22) Sa rauta mera sega ni dau tu e tuba na qelenisipi kei ira na ivakatawanisipi ena yasayasa ya ena veibogi ni vula o Tiseba!

Ia e vakaraitaka na iVolatabu nira qarava tiko nodra sipi e tuba na ivakatawa ena bogi e sucu kina o Jisu. E kaya sara mada ga o Luke: “Eratou tu e tautuba ena bogi eso na ivakatawanisipi ena vanua ya, eratou veisau yadra tiko ena vakatawai ni nodra qelenisipi” volekati Peceliema. (Luke 2:8-12) Eda dikeva eke nira tiko voli e tuba na ivakatawanisipi, sega wale ga ena loma ni siga, ia era vakatawasipi tiko ena bogi. Vakacava era na cakava qo ke ra donuya na draki liliwa kei na vulaiuca e dau tarai Peceliema ena Tiseba? Sega sara! E macala gona mai na veika a yaco tiko ena gauna a sucu kina o Jisu ni a sega ni sucu o koya ena vula o Tiseba.a

E tukuna vakamatata na iVolatabu na tikinisiga kei na vula a mate kina o Jisu, ia e sega ni tukuna vakadodonu na gauna a sucu kina. E veiganiti qo nida nanuma na vosa i Tui Solomoni: “E vinaka na yaca rogo vinaka e ca na waiwai talei, e vinaka na siga ni mate e ca na siga ni sucu.” (Dauvunau 7:1) Eda sega gona ni kurabui ni tukuna vakamatailalai na iVolatabu na cakacaka vakaitalatala kei na mate i Jisu, ia e vica ga na ka e tukuni me baleta na gauna e sucu kina.