Eratou Vakayacora Vakacava Nikua na iLawalawa Dauvakatulewa na Nodratou iTavi?

Ena imatai ni senitiuri, e dua na ilawalawa lailai ni ‘yapositolo kei ira na qase mai Jerusalemi’ era veiqaravi mera ilawalawa dauvakatulewa ena nodra vakayacora eso na vakatulewa bibi ena vukudra na ivavakoso lotu vaKarisito lumuti. (Cakacaka 15:2) Ni bera nira duavata ena dua na vakatulewa era na dikeva vinaka na ka e kaya na iVolatabu, ra qai muria na veidusimaki ni yalo tabu ni Kalou. (Cakacaka 15:25) Na ivakarau qori e muri tale ga nikua.

E vakayagataka na iLawalawa Dauvakatulewa na Kalou me vakayacori kina na lomana. O ratou na tagane lumuti eratou lewe ni iLawalawa Dauvakatulewa eratou kauaitaka dina na Vosa ni Kalou, eratou kila vinaka tale ga na sala me qaravi kina na neimami cakacaka kei na ka e dau tarogi me baleta na neimami vakabauta. Eratou dau bose e veimacawa me ratou veivosakitaka na veika e vauca na mataveitacini e vuravura raraba. Me vaka ga ena imatai ni senitiuri, e dau vakasavui na idusidusi vakaivolatabu ena ivola se ra vakayagataki na ivakatawa dauveilakoyaki kei na so tale. Qori e duavata kina na ka era vakasamataka kei na ka era cakava na tamata ni Kalou. (Cakacaka 16:4, 5) Na iLawalawa Dauvakatulewa e qarava na kena vakarautaki na kakana vakayalo, e veiuqeti me vakaliuci tiko ga na cakacaka vakavunau, e raica tale ga na nodra lesi na mataveitacini tagane mera qarava na itavi.

E muria na veidusimaki ni yalo tabu ni Kalou. Eratou qara na iLawalawa Dauvakatulewa na nona veidusimaki na Turaga Cecere Duadua ni Lomalagi kei Vuravura, na Kalou o Jiova kei na Ulu ni ivavakoso o Jisu Karisito. (1 Korinica 11:3; Efeso 5:23) O ratou na lewe ni ilawalawa qo eratou sega ni vakacolasau vei ira na tamata ni Kalou. Me vakataki ira ga na vo ni lotu vaKarisito lumuti, eratou “muria tiko ga na Lami [o Jisu] se mani vanua cava e lako kina.” (Vakatakila 14:4) Eratou vakavinavinakataka na iLawalawa Dauvakatulewa na neimami masulaka na cakacaka eratou qarava.

• O cei eratou lewena na ilawalawa dauvakatulewa ena imatai ni senitiuri?

• Eratou qara vakacava na veidusimaki ni Kalou na iLawalawa Dauvakatulewa nikua?