Vinakata o Repeka me Vakamarautaki Jiova

E lomani Jiova o Repeka, vaka kina na watina o Aisake. Erau veikilai vakacava o Repeka kei Aisake? A vakaraitaka vakacava o Repeka ni via vakamarautaki Jiova? Meda raica mada e liu eso na ka me baleti Aisake.

Erau itubutubu i Aisake o Eparaama kei Sera. Eratou tiko ena vanua o Kenani, e sega ni sokaloutaki kina o Jiova. Ia e vinakata o Eparaama me wati luvena na yalewa e qaravi Jiova. E mani tala nona dauveiqaravi o Eliesa me lai raica mai na wati Aisake e Karana, era tiko kina eso na wekai Eparaama.

Era gole vata kei Eliesa eso tale na dauveiqaravi. Dua na ilakolako balavu dina qori ra qai kauta e tini na kameli me vodo kina na kakana kei na iloloma. Ena kila vakacava o Eliesa na yalewa me wati Aisake? Ni yaco yani e Karana o Eliesa kei ratou nona ilala, eratou lai vakacegu toka ena dua na toevu ni kila o Eliesa era sa vakarau mai taki wai na yalewa. A masu vei Jiova qai kaya: ‘Keu kere wai vua e dua na goneyalewa, qai vagunuvi au kei na noqu kameli, au na kila oni sa digia na yalewa qori.’

A gole sara mai na toevu o Repeka. E tukuni ena iVolatabu ni goneyalewa totoka. Ni kere wai vua o Eliesa, a kaya o Repeka: ‘Kua ni leqa. Au na lai takia mai na memu wai, na medra tale ga nomu kameli.’ Vakasamataka mada! Era dau gunu wai vakalevu na kameli nira karamaca, mani cici vakavica vata ena toevu o Repeka. Vakacava o raica ena iyaloyalo na nona cakacaka vakaukaua o Repeka?— E kurabuitaka o Eliesa na sala e sauma kina o Jiova nona masu.

A solia vei Repeka o Eliesa e levu na iloloma totoka. E sureti Eliesa sara kei ratou na vo ni dauveiqaravi o Repeka ina nodratou vale. Ni vakamacalataka o Eliesa na vuna e talai koya yani kina o Eparaama kei na sala e sauma kina o Jiova nona masu, eratou marautaka na vuvale i Repeka me wati Aisake.

Vakacava a marau tale ga o Repeka me wati Aisake?— E kila o Repeka ni talai Eliesa yani o Jiova. Ni ratou tarogi Repeka nona vuvale ke via lako i Kenani me lai wati Aisake, a sauma: ‘Io, au via lako.’ Ni vakaio oti ga, e biubiu sara kei Eliesa o Repeka me rau lesu i Kenani rau qai lai vakawati kei Aisake.

A karoni Repeka o Jiova ni a cakava na ka e vinakata. Ena vica vata na yabaki e muri, a qai sucu ena vuvale i Repeka o Jisu! Ke o vakamarautaki Jiova me vakataki Repeka, ena karoni iko tale ga.