Sega ni Rere o Tevita

Cava o dau cakava ni o rere?— De dua o lai kere veivuke vei Ta se o Na. Ia e tiko e dua tale e kaukaua duadua e rawa ni vukei iko. O kila se o cei ya?— Io, na Kalou o Jiova. Meda raica mada na kena italanoa e dua na cauravou e cavuti ena iVolatabu, na yacana o Tevita. A sega ni rere ni kila ena vukei koya tu ga o Jiova.

Ni se gonedramidrami o Tevita, rau sa vakavulici koya nona itubutubu me lomani Jiova. Qori e vukei koya me kua ni rere ni sotava eso na ka rerevaki. E kila o Tevita ni nona itokani o Jiova, ena vukei koya tale ga. Ni vakatawa sipi tiko ena dua na gauna, a lako mai e dua na laione qai kauta e dua na sipi! O kila na ka e cakava o Tevita? A cicimuria na laione qai vakamatea. Ni via kauta e dua tale na sipi na bea, a vakamatea tale ga o Tevita! O cei a vukei koya?— Io, o Jiova.

A laurai ena dua tale na gauna na nona yaloqaqa o Tevita. Era vala tiko na Isireli kei na kai Filisitia. Dua vei ira na sotia ni Filisitia e tuwawa, na yacana o Koliaci. Na tuwawa qori e vakalialiai ira na sotia ni Isireli vaka kina o Jiova. A bolei ira na sotia ni Isireli mera vala kei koya, ia era rere kece. Ni rogoca qori o Tevita, e tukuna sara vei Koliaci: ‘Au na vala kei iko! Ena vukei au o Jiova, au na vakabalei iko!’ Vakacava e yaloqaqa o Tevita?— Io, e yaloqaqa dina. O via kila na ka e qai yaco?

A taura o Tevita na nona irabo kei na lima na vatu dravia vinaka, a gole sara me vala kei na tuwawa. Ni raica o Koliaci ni se gone o Tevita, e vakalialiai koya. Ia e kaya o Tevita: ‘O mai valuti au ena iseleiwau, ia au mai valuti iko ena yaca i Jiova!’ E biuta e dua na vatu ena nona irabo, e cicivi Koliaci qai rabotaka vua. E lauta vinaka sara ga na yadrei Koliaci na vatu, e bale mani mate sara! Era dro kece na kai Filisitia ena levu ni nodra rere. A vakabalea vakacava e dua na tuwawa na cauravou vakataki Tevita?— A vukei koya o Jiova, e kaukaua cake sara vua na tuwawa qori!

Cava o vulica ena italanoa kei Tevita?— Sega ni dua e kaukaua me vakataki Jiova. E nomu itokani tale ga o koya. Ke o rere ena dua tale na gauna, nanuma tiko ena vukei iko o Jiova mo yaloqaqa!