Soqoni e “Veivakauqeti ena Loloma kei na Caka Vinaka”

VICA na senitiuri nodra soqoni vata voli mai na dauveiqaravi i Jiova qai tuvanaki vinaka. E Isireli makawa, era gole kece e Jerusalemi na tagane mera tiko ena tolu na soqo lelevu. (Vkru. 16:16) Ena imatai ni senitiuri, era soqoni wasoma na lotu vaKarisito ena nodra vale na mataveitacini. (Fmon. 1, 2) Nikua, eda marautaka na soqoni, soqo ni tabacakacaka kei na soqo ni veiwasewase. Na cava eda dau soqoni kina? Ni bibi qori ena noda sokalou.—Same 95:6; Kolo. 3:16.

² E yaga tale ga na noda dau tiko ena soqoni. Ena siga ni Soqo ni Valetabanikau, era vakaroti na Isireli: “Moni soqoni ira vata kece na tagane, na yalewa, na gone, kei koya e tiko vulagi e loma ni nomuni koro, mera rogoca kina, mera vulica tale ga mera rerevaki Jiova na nomuni Kalou qai qarauna mera vakayacora na vosa kece ni Lawa qo.” (Vkru. 31:12) E macala ni inaki levu ni noda soqoni me ‘vakavulici keda o Jiova.’ (Aisea 54:13) E gauna vinaka tale ga meda veikilai, meda veivakauqeti qai veivakayaloqaqataki.

SOQONI NI IVAVAKOSO

³ O ira na tisaipeli era soqoni ni oti na Penitiko 33 G.V., era muria na nodra ivakavuvuli na yapositolo, ra qai “dau tiko ena valenisoro ena veisiga, ni duavata nodra inaki.” (Caka. 2:42, 46) E muri nira soqoni vata mera sokalou na lotu vaKarisito, era dau wilika na ivola e uqeti vakalou, wili kina na ivola era vola na yapositolo kei na so tale na tisaipeli i Karisito. (1 Kor. 1:1, 2; Kolo. 4:16; 1 Ces. 1:1; Jeme. 1:1) Era dau masu vata tale ga vakaivavakoso. (Caka. 4:24-29; 20:36) So na gauna ena talanoataki eso na ka e sotavi ena cakacaka vakaitalatala. (Caka. 11:5-18; 14:27, 28) E dau veivosakitaki na ivakavuvuli vakaivolatabu kei na vakayacori ni parofisai. E dau tau na ivakasala e vauca na itovo vaKarisito kei na ivakarau ni veiqaravi e vakadonuya na Kalou. Era vakadreti kece mera gumatua ni kacivaka na itukutuku vinaka.—Roma 10:9, 10; 1 Kor. 11:23-26; 15:58; Efeso 5:1-33.

⁴ Na soqoni vaKarisito nikua e muria ga na kena ivalavala era dau vakayacora na yapositolo. Eda muria na ivakasala ena Iperiu 10:24, 25: “Meda dau veinanumi . . . , meda kua ni biuta na noda soqoni vata me vaka e nodra ivalavala eso, ia meda veivakayaloqaqataki, io me vakalevu nida raica ni sa voleka mai na siga.” Ena iotioti ni veisiga ca qo, eda vinakata meda vakayaloqaqataki nida tiko wasoma ena soqoni me rawa nida kaukaua tiko ga vakayalo qai yalodina ena bula vaKarisito. (Roma 1:11, 12) Nida lotu vaKarisito, eda maliwai ira na itabatamata takelo qai talaidredre. Eda biuta na gagadre ca vakavuravura kei na itovo sega ni vakalou. (Fpai. 2:15, 16; Taito 2:12-14) E sega tale ni dua na ka e tautauvata kei na noda maliwai ira na tamata i Jiova. (Same 84:10) E sega tale ga ni dua na ka e tautauvata kei na noda vulica qai veivosakitaka na Vosa ni Kalou. Raica mada qo eso na soqoni e tuvanaki me yaga vei keda.

SOQONI ENA MUANIMACAWA

⁵ Na imatai ni wase ni soqoni e dau caka ena muanimacawa ena rogoci kina e dua na ivunau vakaivolatabu e baleti ira na lewenivanua, eso vei ira qori era se qai tiko vakadua ena soqoni. Ena vukea na nodra bula vakayalo na ka vou kei ira na dautukutuku ena ivavakoso.—Caka. 18:4; 19:9, 10.

⁶ Na ivakarau ni noda soqoni na iVakadinadina i Jiova nikua, e muria ga na kena e dau vakayacora o Karisito Jisu, ratou nona yapositolo kei ira na lotu vaKarisito. Eda kila ni sega ni dua e vuravura me uasivia na totoka ni veivakavulici i Jisu. E tukuni me baleti koya: “Keimami se sega ni bau rogoca e dua e vosa me vakataki koya.” (Joni 7:46) Ni vosa o Jisu, e vaka ga e tu vua na lewa, era vakadrukai na vakarorogo. (Maciu 7:28, 29) Era vakalougatataki vakalevu o ira na muria na nona vosa. (Maciu 13:16, 17) Eratou muria na yapositolo na nona ivakaraitaki. Eda wilika ena Cakacaka 2:14-36 na ivunau veiuqeti i Pita ena Penitiko 33 G.V. E uqeti ira sara ga na vica vata na udolu na ka era rogoca. E muri era yaco mera vakabauta o ira na rogoca na ivunau i Paula mai Aceni.—Caka. 17:22-34.

⁷ Nikua, sa yaga tiko vei ira na vica na milioni na ivunau e rogoci e veimacawa ena ivavakoso. E yaga tale ga na vunau soqovi levu ena soqo ni tabacakacaka kei na soqo ni veiwasewase. E uqeti keda meda yadrava tiko na ivakavuvuli vaKarisito da qai tudei ena veiqaravi tabu. Nida sureti ira na tataleitaki kei ira na lewenivanua, eda rawa ni vukei ira mera kila na yavu ni ivakavuvuli ena iVolatabu.

⁸ E dau veiveisau na ulutaga ni ivunau. Eso e baleta na ivakavuvuli vakaivolatabu, parofisai, ivakasala me baleta na vuvale, vakawati, itabagone, itovo vaKarisito kei na ibulibuli vakatubuqoroqoro i Jiova. Eso tale e baleta na nodra vakabauta, yaloqaqa kei na nodra yalodina o ira na talanoataki ena iVolatabu kei na ka eda vulica kina.

⁹ Me yaga vei keda na ivunau, e bibi meda vakarorogo matua vei koya e vunau, meda cega na tikinivolatabu, vakamuri koya ni wilika tiko kei na nona vakamacalataka. (Luke 8:18) Nida vakadeitaka na dina ni ka eda rogoca, eda na taura matua na ka vinaka eda vulica da qai muria sara.—1 Ces. 5:21.

¹⁰ Ke tiko ena ivavakoso o ira mera vunau, ena caka e veimacawa na soqoni qo. E rawa nira kerei mera mai vunau na tacida ena ivavakoso voleka. Ke le vica ga o ira mera vunau ena ivavakoso, e rawa ni tuvanaki na gauna veiganiti me caka kina qori.

¹¹ Na ikarua ni wase ni soqoni ena muanimacawa e dau vulici kina na Vale ni Vakatawa. Era vakaitavi na vakarorogo ni yavutaki ena Vale ni Vakatawa vulici. O Jiova e vakarautaka na kakana vakayalo ena kena gauna donu ni vakayagataka Na Vale ni Vakatawa.

¹² E vakamacalataki ena ulutaga e vulici na sala me muri kina e veisiga na ivakavuvuli vakaivolatabu. E vukei keda na lotu vaKarisito meda vorata na “yalo ni vuravura” kei na itovo tawakilikili. (1 Kor. 2:12) E dau vakamatatataki tale ga ena Vale ni Vakatawa na ivakavuvuli kei na parofisai vakaivolatabu meda kila kina na ka dina e vakatakilai mai, da qai muria tiko ga na nodra sala na yalododonu. (Same 97:11; Vkai. 4:18) Ni o tiko ena Vuli Vale ni Vakatawa qai vakaitavi kina, ena uqeti iko mo vakanamata ina vuravura vou ni yalododonu e yalataka o Jiova. (Roma 12:12; 2 Pita 3:13) Nida veimaliwai vaKarisito, ena uqeti keda meda vuataka na itovo e okati ena vua ni yalo tabu, da qai gumatua ni qaravi Jiova. (Kala. 5:22, 23) Ena vakaukauataki keda meda vosota na ituvaki dredre da qai vakarautaka e dua na “yavu vinaka ni bula e se bera mai,” meda “taura matua kina na bula dina.”—1 Tim. 6:19; 1 Pita 1:6, 7.

¹³ Na cava meda cakava me yaga kina na ituvatuva ni veivakani vakayalo qo? Meda vulica rawa vakavuvale se yadudua, wilika na tikinivolatabu kece, da qai vakamacala ena noda vosa ga. Ena tara kina na lomada na ka dina, ena uqeti ira tale ga na tacida nira rogoca noda ivakamacala. Nida vakatudaliga nira vakamacala na tacida, ena yaga vakalevu na ka e vulici e veimacawa.

SOQONI ENA LOMANIMACAWA

¹⁴ Na soqoni Noda Bula vaKarisito kei na Cakacaka Vakaitalatala ena vakayacori e veimacawa ena Vale ni Soqoni. E wasei vakatolu na soqoni qo, e kena inaki me ‘vakarautaki keda vinaka’ meda italatala ni Kalou. (2 Kor. 3:5, 6) E tabaki e veivula na ituvatuva kei na ka e vulici ena iVola ni Soqoni—Noda Bula vaKarisito kei na Cakacaka Vakaitalatala. E tiko tale ga ena iVola ni Soqoni qo na vakatutu ni cakacaka vakaitalatala.

¹⁵ Na imatai ni iwase ni soqoni qo e vakatokai na iYau Mai na Vosa ni Kalou, e vukei keda meda kila vinaka na ivolatukutuku ni iVolatabu kei na sala meda muria kina. Ena dua kina na vosa, wili iVolatabu kei na veivosakitaki ni iwase ni iVolatabu vakamacawa. E tiko ena iVola ni Soqoni na iyaloyalo kei na vanua mo vola kina na ka o vulica. Nida vulica vakatitobu na iVolatabu ena yaga ena noda bula kei na noda veivakavulici, meda ‘vakarautaki vinaka kina ena cakacaka vinaka kece.’—2 Tim. 3:16, 17.

¹⁶ Na ikarua ni iwase ni soqoni na Gumatua ena Cakacaka Vakaitalatala. E kena inaki me vakavulici keda ena cakacaka vakaitalatala, meda maqosa tale ga ena vunau kei na veivakavulici. Me ikuri ni itavi ni gonevuli ena saravi tale ga na vidio ni vakatutu. Ena uqeti keda na soqoni qo meda rawata na “yame e vakavulici,” meda ‘kila kina na vosa donu meda cavuta vua e oca.’—Aisea 50:4.

¹⁷ Na ikatolu ni iwasewase na Noda Bula vaKarisito. E veivosakitaki kina na yaga ni noda muria na ivakavuvuli vakaivolatabu e veisiga. (Same 119:105) E bibi ena iwasewase ni soqoni qo na Vuli iVolatabu ni iVavakoso. E vaka ga na vulici ni Vale ni Vakatawa, ena tarogi na taro, eda na vakamacala kina.

¹⁸ Ni yaco mai e veivula na iVola ni Soqoni ni Bula vaKarisito, ena dikeva qai cakava e dua na ituvatuva na kodineita ni ilawalawa qase se dua na qase me vukei koya. E veimacawa, ena jeameni e dua na qase e maqosa ena veivakavulici e lesia na ilawalawa qase. Ena raica o koya me tekivu qai cava na soqoni ena kena gauna, me vakasalataki ira qai vakavinavinakataki ira na gonevuli.

¹⁹ Ni wasoma noda vakavakarau, noda tiko kei na noda vakaitavi ena Soqoni ni Bula vaKarisito kei na Cakacaka Vakaitalatala, eda na kila vinaka na iVolatabu, kena ivakavuvuli, eda na doudou ni vunautaka na itukutuku vinaka qai maqosa ena veivakatisaipelitaki. Ena yaga tale ga vei ira na se bera ni papitaiso na veimaliwai kei na veiuqeti ni itavi. E rawa nida vakayagataka na Watchtower Library, JW Library^®, LAIBRI ENA INTERNET^™ (ke sa tiko ena vosa vakaViti) kei na laibri ena Vale ni Soqoni meda vakavakarau ina soqoni. E tiko ena Laibri ni Vale ni Soqoni na noda ivola, na Watch Tower Publications Index se iDusidusi ni Vakadidike ni iVakadinadina i Jiova, e vica na ivakadewa ni iVolatabu, na concordance, ivolavosa, kei na so tale na ivola dusidusi. Rawa ni vakayagataki na laibri ni bera ni tekivu na soqoni se ni sa oti.

SOQONI NI CAKACAKA VAKAVUNAU

²⁰ Ena so na lomanimacawa kei na muanimacawa, era na sota vakalekaleka na dautukutuku ena soqoni ni cakacaka vakavunau. De dua ena caka qori ena vale ni mataveitacini se dua tale na vanua veiganiti. E rawa tale ga ni vakayagataki na Vale ni Soqoni. Nira soqoni e vica vata na iwasewase ena duidui vanua ena yalava, ena rawarawa kina vei ira na dautukutuku mera tiko ena vanua ni sota. Ena totolo na wasewasei ni dautukutuku kei na nodra gole yani ena yalava. Ena kilai ira vinaka tale ga na dautukutuku na ivakatawa ni iwasewase. E yaga me duidui na vanua era sota kina na iwasewase lalai, ia ena so na ituvaki ena vinaka mera sota kece ga ena dua na vanua. Kena ivakaraitaki, ke vica ga na dautukutuku era vunau ena lomanimacawa, ena vinaka mera cakacaka vata kece ga na iwasewase se mera sota ena Vale ni Soqoni se dua tale na vanua veiganiti. Ni caka qori, era na vakaisa kece na dautukutuku. E rawa ni caka na sota ena Vale ni Soqoni ena gauna ni olodei. E rawa tale ga ni tuvanaka na ivavakoso me caka na soqoni ni cakacaka vakavunau ni oti na vulici ni Vale ni Vakatawa.

²¹ Ke caka na sota vakaiwasewase lalai, ena liutaka na ivakatawa ni iwasewase lalai na soqoni ni cakacaka vakavunau. So na gauna, ena rawa ni lesia na ivakatawa ni iwasewase lailai nona ivukevuke se dua na tacida tagane e rawata na kena ivakatagedegede me liutaka na soqoni qori. Me vakarautaka rawa o koya e liutaka na soqoni eso na tikina ena yaga ena cakacaka vakaitalatala. Ni lesi oti na dautukutuku kei na yalava me tarai, ena masu e dua na dautukutuku. Oti mera gole sara yani na lewe ni iwasewase. Me lima ina vitu na miniti na balavu ni sota, ia me lekaleka ke oti ga na soqoni vakaivavakoso. E dodonu me veiuqeti qai yaga na soqoni, me dusimaki ira na dautukutuku ena cakacaka vakavunau. O ira na ka vou se o ira na vinakata na veivuke e rawa nira cakacaka vata kei ira na dautukutuku matua.

ITUVATUVA NI SOQONI ENA IVAVAKOSO VOU SE IVAVAKOSO LALAI

²² Ni levu era mai tisaipeli, e tubu kina na iwiliwili ni ivavakoso. Ena vakalewena na ivakatawa ni tabacakacaka e dua na ivolakerekere me tauyavu kina e dua na ivavakoso. Ia ena so na ituvaki, ena rairai yaga ena so na iwasewase lalai mera soqoni ena ivavakoso voleka.

²³ So na gauna, era lewe ga ni ivavakoso lalai na tacida yalewa. Ke yaco qori, ena ubia na uluna na tacida yalewa e masu se liutaka na soqoni, me salavata kei na ituvatuva vakaivolatabu. (1 Kor. 11:3-16) Levu na gauna ena dabe tu ga na tacida yalewa qori me liutaka na soqoni. Ia era na sega ni vunau ena soqoni. Era na wilika na ka e vakarautaka na isoqosoqo ra qai vakamacala kina, se na veivosakitaki se vakatasuasuataki. Ena lesia na valenivolavola ni tabana e dua na tacida yalewa me dau veitaratara kei na valenivolavola, me qarava tale ga na soqoni. Nira sa rawata na kena ivakatagedegede na tagane, era na qarava na itavi qori.

SOQO NI TABACAKACAKA

²⁴ E tuvanaki mera soqo vata vakarua ena veiyabaki na ivavakoso ena dua na tabacakacaka. E gauna marautaki vei ira na tiko ni rawa nira “lomasavu” mera veimaliwai. (2 Kor. 6:11-13) E vakarautaka na isoqosoqo i Jiova na usutu vakaivolatabu veiganiti kei na itavi ena porokaramu. Ena rogoci na vunau, vakatasuasua, veivosaki, vosavosaiyalona, kei na veitarotarogi. E dau veiuqeti dina na ivakasala e tau ena kena gauna donu. E gauna vinaka tale ga mera papitaiso kina na tisaipeli vou me ivakaraitaki ni nodra yalataki ira vei Jiova.

SOQO NI VEIWASEWASE

²⁵ E dau vakayacori e veiyabaki na soqo lelevu. E dau tolu na siga ni soqo ni veiwasewase, era soqo vata kina na ivavakoso mai na vica na tabacakacaka. So na valenivolavola ni tabana lalai era raica ni veiganiti mera soqo vata ga ena dua na vanua na ivavakoso kece. Ena so na vanua, ena duidui na ituvatuva ni soqo qo me ganita na ituvaki se na veidusimaki ni isoqosoqo. E vakayacori tale ga ena so na gauna na soqo ni veimatanitu se soqo lavotaki ena so na vanua ra qai tiko kina e sivia na tini na udolu na iVakadinadina mai na duidui vanua. Ena vica na yabaki sa sivi, levu era sa mai kila na ka dina ena kena kilai levu na soqo lelevu va qo.

²⁶ E gauna marautaki dina vei keda na dauveiqaravi i Jiova na soqo va qo. E dau vakatakilai mai kina na rarama ni ka dina. E dau sevutaki kina eso na ivola vovou me yaga ena noda vuli vakataki keda se vuli vakaivavakoso, kei na kena me vakayagataki ena cakacaka vakaitalatala. E dau caka tale ga kina na papitaiso. Qo e gauna vinaka meda veiuqeti kina vakayalo. E vakadinadinataka nida lewena e dua na mataveitacini e vuravura raraba da qai vakaraitaka na ivakatakilakila nida tisaipeli i Jisu Karisito.—Joni 13:35.

²⁷ Nida tiko ena soqoni kece vakaivavakoso, soqo ni tabacakacaka kei na soqo lelevu, e uqeti keda meda cakava na loma i Jiova. Eda taqomaki tale ga ena idre ni vuravura ena rawa ni vakaleqa noda vakabauta. Na soqoni kece qori e vakacaucautaki qai vakalagilagi kina o Jiova. (Same 35:18; Vkai. 14:28) Eda vakavinavinaka vei Jiova ni vakarautaka na soqo va qo meda vakabulabulataki kina vakayalo ena gauna ni vakataotioti qo.

NA IVAKAYAKAVI NI TURAGA

²⁸ Era vakananuma vakadua e veiyabaki na mate i Jisu Karisito se na iVakayakavi ni Turaga na ivavakoso kece ni iVakadinadina i Jiova e vuravura. (1 Kor. 11:20, 23, 24) Qo na soqo bibi duadua vei keda na dauveiqaravi i Jiova nida vakaroti meda vakananuma.—Luke 22:19.

²⁹ Na tikinisiga ni iVakananumi e veidonui kei na tikinisiga ni Lakosivia e cavuti ena iVolatabu. (Lako 12:2, 6; Maciu 26:17, 20, 26) E dau caka vakadua e veiyabaki na Lakosivia mera vakananuma kina na Isireli nodra biuti Ijipita ena 1513 B.G.V. Ena gauna qori, e vakarota o Jiova na ika14 ni siga ena imatai ni vula mera kania kina na lami ni Lakosivia, oti mera biubiu mai Ijipita. (Lako 12:1-51) E cakacakataki na tikinisiga qo nida wilika e 13 na siga mai na vula vou e laurai e Jerusalemi ena icavacava ni vula o Maji se na itekitekivu ni vula o Epereli. Vakalevu me donuya na siga ni iVakananumi na imatai ni taucoko ni vula ena icavacava ni vula o Maji se itekitekivu ni vula o Epereli.

³⁰ E vakamacalataki ena Maciu 26:26-28 na sala me vakananumi kina na mate i Jisu. Na madrai kei na waini e vakayagataki e ivakatakarakara wale ga. Era vakayagataka o ira era kacivi mera veiliutaki kei Jisu i lomalagi ena Matanitu ni Kalou. (Luke 22:28-30) Era uqeti kece na lotu vaKarisito yalayala kei ira na tataleitaki mera tiko ena iVakayakavi ni Turaga, me vakaraitaka nodra vakavinavinakataka na isoro i Jisu Karisito e vakarautaka o Jiova ena vukuda. Ni bera na iVakananumi, ena rogoci e dua na ivunau me uqeti ira na tataleitaki mera tiko ena soqo qo, mera taleitaka tale ga na vulica na iVolatabu.

³¹ Eda dau vakanamata na iVakadinadina i Jiova ena gauna marautaki meda soqoni vata kina, meda “veinanumi nida veivakauqeti ena loloma kei na caka vinaka.” (Iper. 10:24) E tu vakarau na dauveiqaravi yalodina e vuku me vakarautaka na soqoni me ganita na keda ituvaki. Eda uqeti kece na dauveiqaravi ni Kalou kei ira na tataleitaki meda kua ni calata na soqoni. Nida vakavinavinakataka na isolisoli i Jiova e vakarautaka nona isoqosoqo, eda na duavata na nona dauveiqaravi, koya e bibi sara ena lagiti qai rokovi kina o koya.—Same 111:1.