Me Savasava Qai Veiyaloni na iVavakoso

ENA veiyabaki, era tabili ina vale ni sokalou savasava i Jiova e vica vata na udolu me vaka ga e parofisaitaka na iVolatabu. (Maika 4:1, 2) Eda marau nida kidavaki ira nira mai lewena tale ga “na ivavakoso ni Kalou”! (Caka. 20:28) E ka dokai mera mai tomani keda ena qaravi Jiova, mera vakila tale ga na totoka ni parataisi vakayalo eda sa bula tiko kina. Na bula veiyaloni kei na bula savasava vakayalo eda marautaka ena gauna qo, e rawati ga ena veidusimaki ni yalo tabu i Jiova kei na ivakasala vuku ena nona Vosa.—Same 119:105; Saka. 4:6.

² Eda sulumaka “na itovo vou” nida muria na ivakavuvuli vakaivolatabu. (Kolo. 3:10) Oya na vuna eda sega ni kauaitaka kina na duidui lalai e dau basika ena keda maliwa. Ni tiko vei keda na rai i Jiova, eda vakanadakuya kina na veika vakavuravura e dau vakavuveisei, da qai cakacaka ena duavata kei ira na tacida ena veiyasa i vuravura.—Caka. 10:34, 35.

³ Ia e dau basika ena so na gauna na ituvaki e vakaleqa na bula veiyaloni kei na duavata ena ivavakoso. Na cava e dau vakavuna? Nida sega ni muria na ivakasala ena iVolatabu. Kena ikuri nida ivalavala ca kece, ena tiko ga na noda malumalumu. (1 Joni 1:10) Ni dua e butucala, ena rawa ni vakaleqa na savasava kei na bula vakayalo ni ivavakoso. Eda rairai vakacudruya e dua nida sega ni vakasamataka na ka eda cakava se tukuna, se vakacudrui keda e dua ena ka e tukuna se cakava. (Roma 3:23) Na cava meda cakava ena ituvaki qo?

⁴ Eda marau ni vakarautaka vakayalololoma o Jiova na ivakasala veiganiti. E vakasalataki keda na nona Vosa ena ka meda cakava ni basika na duidui ena ivavakoso. E rawa nira vukei keda yadua na ivakatawa dauloloma. Nida muria nodra ivakasala ena iVolatabu, ena vinaka tale noda veimaliwai ena ivavakoso kei na noda veiwekani kei Jiova. Ke da vakasalataki se vunauci nida cala, meda kua ni guilecava ni veivakadodonutaki e ivakaraitaki ni nona lomani keda na Tamada vakalomalagi.—Vkai. 3:11, 12; Iper. 12:6.

KA ME CAKA NI BASIKA NA DUIDUI LALAI

⁵ So na gauna ena rawa ni basika na duidui lalai ena keda maliwa ena ivavakoso. E dodonu me wali totolo ena yalo ni veilomani dina. (Efeso 4:26; Fpai. 2:2-4; Kolo. 3:12-14) O na vakadinadinataka ni levu na duidui e basika ena keda maliwa na lotu vaKarisito e rawa ni wali ga ni muri na nona ivakasala na yapositolo o Pita, oya meda “veilomani vakalevu, ni ubia e levu na ivalavala ca na loloma.” (1 Pita 4:8) E tukuna na iVolatabu: “Eda dau tarabe kece.” (Jeme. 3:2) Nida muria na iVunau Koula, meda cakava vei ira na tacida na ka eda vinakata mera cakava vei keda, ena rawarawa meda veivosoti da qai guilecava na nodra cala.—Maciu 6:14, 15; 7:12.

⁶ Ke o kila ni vakacudruya e dua na ka o tukuna se cakava, ena ka vakayalomatua mo vakaliuliu mo drau veiyaloni totolo ni vauci tiko kina nomu veiwekani kei Jiova. E vakasalataki ira nona tisaipeli o Jisu: “Ke o kauta na nomu isoro ina icabocabonisoro o qai nanuma ni beitaki iko na tacimu ena dua na ka, biuta tu na nomu isoro ena mata ni icabocabonisoro, lako drau lai veivakameautaki mada kei tacimu, oti qai lesu mo vakacabora nomu isoro.” (Maciu 5:23, 24) E rawa ni so na ka drau nanuma cala. Ke yaco qori, mo drau veivosakitaka. Ke da vakamatauna kece meda dau veivosaki, ena sega ni levu na nanuma cala, ena rawarawa tale ga ni wali na leqa e dau basika ena vuku ni noda malumalumu.

VAKARAUTAKI NA IVAKASALA VEIGANITI

⁷ So na gauna ena vinakati mera veivakasalataki na ivakatawa, mera vakadodonutaka na nona rai cala e dua. Ia e sega ni rawarawa qo. A vola na yapositolo o Paula vei ira na lotu vaKarisito mai Kalatia: “Raveitacini, ke dua e sega ni liaca ni sa butucala tiko, ni saga o kemuni na rawata na ivakatagedegede vakayalo moni vakadodonutaki koya ena yalomalua.”—Kala. 6:1.

⁸ Nira qarauna na qelenisipi na ivakatawa dauloloma, era sa taqomaka tiko na ivavakoso mai na leqa vakayalo, me kua tale ga ni basika eso na leqa bibi sara. Mera saga gona na qase ni ivavakoso me dina vei ira na vosa ni yalayala i Jiova vei Aisea: “O ira yadua era na vaka na ivunivuni mai na cagi, na ivakaruru mai na uca bi, ena vaka na uciwai ena vanua dravuisiga, ena vaka na yaloyalo ni vatu levu ena vanua sigasiga.”—Aisea 32:2.

VAKATAKILAKILATAKI IRA E VAKAVEITALIA TU NODRA BULA

⁹ E veivakaroti na yapositolo o Paula ni tiko eso e vakaveitalia tu nodra bula e rawa nira vakatetea ena ivavakoso na nodra itovo ca. E kaya: “Keitou vakaroti kemuni . . . moni lako tani mai vei ira na veitacini e vakaveitalia tu na nodra bula ra qai sega ni muria na ivakarau oni rogoca vei keitou.” E vakamatatataka na tikina oya ena nona vola: “Ke dua e sega ni talairawarawa ina neitou vosa e volai yani ena ivola qo, ni vakatakilakilataki koya, ni muduka nomuni veitokani vata kei koya me madua kina. Ni kua ni okati koya me kemuni meca, ia ni vakasalataki koya tiko ga me vaka ni tacimuni.”—2 Ces. 3:6, 14, 15.

¹⁰ O koya gona, e rawa ni tiko ena ivavakoso e dua e sega ni cakava na cala bibi me vakasivoi kina, ia e vakaraitaka ena nona ivalavala ni beca na ivakatagedegede ni Kalou. Qo e okati kina e dua e torosobu sara ga nona vucevucesa, dau vakalelewa, se dukalevu. E dau ‘siova na ka e sega ni nona.’ (2 Ces. 3:11) E rawa ni okati tale ga kina nona saga vakailawaki me rawaka vei ira tale eso, se guta na ka ni veivakamarautaki tawakilikili. Na ca ni itovo qo e rawa sara ga ni vakarogorogocataka na ivavakoso, e rawa tale ga nira muria eso tale na lotu vaKarisito.

¹¹ Eratou na saga e liu na qase ni ivavakoso me ratou vukei koya e cala ni ratou vakasalataki koya ena iVolatabu. Ke sa vakasalataki vakavica qai beca tiko ga na ivakavuvuli ena iVolatabu, me ratou raica na qase me dua na ivunau ena ivavakoso. Eratou na raica vakayalomatua ke veiganiti me dua na ivunau, vakabibi ke cala bibi se vakaleqai ira na mataveitacini. Na ivunau qo ena sega ni cavuti kina na yaca i koya e cala, ia ena veivakasalataki ga. O ira era kila na ituvaki e yaco tiko era na qarauna nodra veimaliwai kei koya e cala, ia era na ‘vakasalataki koya tiko ga me vaka ni tacidra.’

¹² Nira yalodina tiko ga na lotu vaKarisito, ena rawa ni liaci koya kina na tacida e cala me veisautaka nona itovo. Ni laurai ni sa vakanadakuya na nona ivalavala, ena sega tale ni vinakati me vakatakilakilataki tiko.

NI CALA BIBI E DUA

¹³ Ni tukuni meda yalorawarawa ni vosoti ira na tacida, e sega ni kena ibalebale meda vakalecalecava se raica vakamamada nodra cala. E tiko eso na cala e sega ni nakiti. Ke guilecavi ga na cala va qo, ena sega ni vinaka vua na tacida e cakacala, e rawa tale ga ni vakavuleqa ena ivavakoso. (Vunau 19:17; Same 141:5) E matata mai na Lawa e vola o Mosese ni duidui na cala—eso e cala mamada, so e bibi. E va tale ga qo ena ivavakoso vaKarisito.—1 Joni 5:16, 17.

¹⁴ E vakarautaka o Jisu eso na idusidusi matata me muri ke yaco na duidui ena kedra maliwa na lotu vaKarisito. Dikeva na veitaravi ni ka me vakayacori: “Ke valavala ca e dua na tacimu, [1] lai vakaraitaka vua nona cala ni drau tiko taurua. Ke rogoci iko, o sa vakabula na tacimu. Ia ke sega ni rogoci iko, [2] kauta e dua se rua tale, me rawa ni vakadeitaki na ka kece ena itukutuku ni le rua se tolu na ivakadinadina. Ke sega ni rogoci ratou, [3] tukuna ina ivavakoso. Ke sega tale ga ni rogoca na ivavakoso, me okati o koya me vaka e dua mai na veimatanitu, se daukumuni ivakacavacava.”—Maciu 18:15-17.

¹⁵ Eda kila mai na vosa vakatautauvata e qai cavuta tarava o Jisu ena Maciu 18:23-35, na ivalavala ca e cavuti ena Maciu 18:15-17 e vauci kina na ka vakailavo se ka e baleta na iyau taukeni, ni sega ni sauma e dua na ka e dodonu me sauma, se nona veidabui se vakaucaca me vakarogocataki kina e dua.

¹⁶ Ke o vakadeitaka ni cala vei iko e dua ena ivavakoso, kua ni totolo sara mo lai raici ratou na ivakatawa se dua tale me vosa ena vukumu. Me vaka na ivakasala i Jisu, na imatai ni ka mo cakava mo lai raici koya e cala vei iko. Tovolea mo drau veivakameautaki, me kua ni dua tale e okati kina. Kua ni guilecava ni a sega ni tukuna o Jisu ‘lako ga vakadua, mo lai vunauca.’ O koya gona, ke sega ni vakatutusa qai kere veivosoti ena imatai ni nomu lai raici koya, de vinaka mo lai raici koya ena dua tale na gauna. Ke rawa ni drau veivakameautaki ga ena sala qo, ena marau o koya e cala ni o sega ni veitukuniyaka nona cala me rogorogo ca kina ena ivavakoso. O sa na “vakabula na tacimu.”

¹⁷ Ke vakatutusa o koya e cala, kere veivosoti qai vakavinakataka tale na ka e vakaleqai, e sega ni vinakati me muri na ikalawa e tarava. E macala gona ni cala bibi, ia e rawa ni rau walia ga o rau na okati ena cala ya.

¹⁸ Ke o sega ni vakabula rawa na tacimu ni o vakaraitaka vua na nona cala ni “drau tiko taurua ga,” mo qai vakayacora na ka e kaya o Jisu, “kauta e dua se rua tale” mo dou raici koya. Me nodrau inaki tale ga o rau na tomani iko me rau vakabula na tacimu. E vinaka mo kauti rau na vakadinadinataka se raica na cala, ia ke sega ni dua e raica na ka e caka, o rawa ni digia e dua se rua tale na tacimu me rau lai tiko ena veivosaki. Ena vinaka sara ke rau kenadau ena ka ena veivosakitaki, e rawa ni rau vakadeitaka se a vakayacori dina na cala se sega. Ke digitaki e dua na qase ni ivavakoso me ivakadinadina ena veivosaki va qo, e sega ni matataka o koya na ivavakoso baleta ni sega ni lesi koya na ilawalawa qase.

¹⁹ Ke sega ni vakameautaki rawa na leqa ni o saga vakavica vata—ni drau veivosaki taurua se o lai raici koya kei na dua se rua tale—o qai sega ni guilecava rawa, e dodonu mo vakaraitaka vei ratou na qase ni ivavakoso. Kua ni guilecava ni nodratou inaki tale ga me savasava qai veiyaloni tiko ga na ivavakoso. Biuta vei ratou na qase me ratou walia na leqa qai nuitaki Jiova. Me kua sara ni vakatarabetaki iko se vakararawataki iko na ka e cakava e dua tale ena nomu qaravi Jiova.—Same 119:165.

²⁰ Eratou na dikeva na cala na ivakatawa. Ke ratou raica ni ka e cakava vei iko na tacida ya e cala bibi qai sega ni via veivutuni se vakadodonutaka na cala e cakava, ena rairai veiganiti me ratou vakasivoi koya. Qo ena taqomaki kina na qelenisipi, ena qarauni tale ga kina me savasava tiko ga na ivavakoso.—Maciu 18:17.

QARAVI NI KISI E VAUCA NA VALAVALA CA BIBI

²¹ Eso na cala bibi me vaka na veiyacovi tawadodonu, veibutakoci, veimoceri vakatagane se vakayalewa, vosavakacaca, vukitani, qaravi matakau, kei na ivalavala torosobu va qori, e sega ni vinakati wale ga kina nona veivosoti o koya e caka vua. (1 Kor. 6:9, 10; Kala. 5:19-21) E dodonu me vakaraitaki vei ratou na qase ni ivavakoso me ratou dikeva, ni rawa ni vakaleqa na savasava kei na bula vakayalo ni ivavakoso. (1 Kor. 5:6; Jeme. 5:14, 15) E rawa ni dua e lako vei ratou na qase me lai vakatusa na nona cala, se vakaraitaka na ka e kila me baleta na nona cala e dua tale. (Vunau 5:1; Jeme. 5:16) E duidui na sala eratou na kila kina na qase na nona valavala ca bibi na tacida papitaiso, ia ena gauna eratou kila kina, ena lesi sara e rua na qase me rau lai vaqaqa na dina ni itukutuku ya. Ke sa matata na itukutuku qai vakadeitaki ni cala bibi, ena lesia na ilawalawa qase e dua na komiti ni veilewai eratou lewena e tolu se sivia na qase me dikeva na kisi qo.

²² Era na yadrava tiko na qelenisipi na qase ni ivavakoso, era na saga mera taqomaka mai na veika e rawa ni vakaleqa vakayalo. Era na vakayagataka tale ga na Vosa ni Kalou ena nodra maqosa kece mera vunauca kina e dua e lako sese, ra qai saga me vinaka tale nona bula vakayalo. (Juta 21-23) E salavata qo kei na ivakasala i Paula vei Timoci: “Au vakaroti iko ena mata ni Kalou kei Karisito Jisu, o koya ena lewai ira na bula kei ira na mate . . . Mo veivunauci, mo veivakadodonutaki, mo veivakauqeti, me salavata kei na nomu vosota vakadede kei na nomu veivakavulici maqosa.” (2 Tim. 4:1, 2) E macala eke ni vinakati mera solia nodra gauna na qase ni tiki sara ga ni nodra itavi bibi. Era vakavinavinakataka na lewe ni ivavakoso na nodra sasaga, era ‘rokovi ira tale ga vakalevu.’—1 Tim. 5:17.

²³ Ena ituvaki kece sa vakadeitaki kina na cala, e nodra inaki levu na ivakatawa mera vukei koya e cala me vinaka tale nona bula vakayalo. Ke veivutuni dina, eratou na vukei koya na qase, ena vunauci ena gauna eratou bose vata kina se nira tiko na ivakadinadina, qo ena vakadodonutaki koya e cala, me ka ni vuli tale ga vei ira na kena vo. (2 Sam. 12:13; 1 Tim. 5:20) Ena kisi kece e veivunauci kina e dua na komiti ni veilewai, ena tau na vakatatabu vei koya e cala. Qo ena vukei koya me ‘vakadodonutaka na sala e muria.’ (Iper. 12:13) Ena qai laveti na vakatatabu ke laurai ni sa bula vinaka tale vakayalo.

KACIVAKI NI VEIVUNAUCI

²⁴ Ke sa vakadeitaka e dua na komiti ni veilewai ni sa veivutuni o koya e cala, ia ena rawa ni kilai na ka e cakava ena ivavakoso se vanua e vakaitikotiko kina, se mera qarauni koya na lewe ni ivavakoso, ena kacivaki vakalekaleka qo ena Soqoni ni Noda Bula vaKarisito kei na Cakacaka Vakaitalatala. Qo na ka me wiliki: “E sa vunauci o [Yacana].”

KE SA LEWAI ME VAKASIVOI

²⁵ So na gauna era sega ni dau veivutuni na caka cala, era guta ga na ka ca era vakayacora tiko ra qai sega ni via kauaitaka na sasaga eso mera vukei kina. E sega ni laurai vei ira na “ka e vakaraitaka nira sa veivutuni” ni rogoci tiko na kisi ni veilewai. (Caka. 26:20) Na cava ena caka? Ena ituvaki va qo, ena veiganiti me vakasivoi mai na ivavakoso o koya e cala ni sega ni veivutuni, me kua kina ni veimaliwai kei ira na tamata savasava i Jiova. Ena sega ni vakaleqa kina na ivavakoso o koya e cala, me savasava tiko ga na ivavakoso, me kua tale ga ni rogorogo ca. (Vkru. 21:20, 21; 22:23, 24) Ena gauna e kila kina o Paula na nona ivalavala vakamadua e dua ena ivavakoso e Korinica, e vakasalataki ira na qase mera “solia na tamata va qori vei Setani . . . , me bulabula tiko ga kina vakayalo na ivavakoso.” (1 Kor. 5:5, 11-13) E volatukutukutaka tale ga o Paula na nodra vakasivoi eso nira saqata na ka dina ena imatai ni senitiuri.—1 Tim. 1:20.

²⁶ Ke vakadeitaka na komiti ni veilewai ni sa ganita me vakasivoi e dua e cala ni sega ni veivutuni, me tukuni vua na lewa qo, me vakamatatataki tale ga vua na yavu vakaivolatabu e vakasivoi kina. Ni vakasavuya na komiti ni veilewai na vakatulewa vei koya e cala, me vakaraitaka tale ga vua ke nanuma ni cala sara ga na vakatulewa qai vinakata me rogoci tale na nona kisi, me vola mai na nona kerekere qai vakamatatataka na vuna e vinakata kina me rogoci tale nona kisi. Ena soli vua e vitu na siga mai na gauna e vakasavui kina vua na vakatulewa ni komiti. Ke volavola mai me kerea me rogoci tale na nona kisi, e dodonu me qiri sara na ilawalawa qase vua na ivakatawa ni tabacakacaka, me lesia eso na qase veiganiti mera lewe ni komiti ni veirogoci tale. Ni ciqomi na ivolakerekere, me sagai sara me rogoci tale na kisi ena loma ga ni macawa e tarava. Ni dua e kerea me rogoci tale na nona kisi, ena sega mada ni kacivaki na nona vakasivoi. Ena loma ni gauna ya, ena sega ni vakamacala se masu ena soqoni, kei na so tale na itavi ni veiqaravi ena ivavakoso.

²⁷ Na rogoci tale ni dua na kisi e ituvatuva vakayalololoma e kauaitaki kina o koya e beitaki. Ke nakita o koya e cala me kua ni tiko ena gauna ni veirogoci tale, ena qai kacivaki na nona vakasivoi ni sa sagai oti vakavica na veitaratara kei koya.

²⁸ Ke sega ni kerea o koya e cala me rogoci tale nona kisi, me qai vakamacalataka vua na komiti ni veilewai na bibi ni veivutuni kei na ka me cakava me vakalesui tale mai kina ena ivavakoso. E yaga, e ka vakayalololoma tale ga qo ni tu na vakanuinui ni na veisautaka nona ivalavala, toso na gauna sa na rawa ni lesu mai ina isoqosoqo i Jiova.—2 Kor. 2:6, 7.

KACIVAKI NI VEIVAKASIVOI

²⁹ Ke sega ni veivutuni dina o koya e cala, ena vakasivoi mai na ivavakoso. Ena kacivaki ena ivavakoso: “Sa sega ni iVakadinadina i Jiova o [Yacana].” Qo ena uqeti ira na yalodina ena ivavakoso mera kua ni veimaliwai kei koya.—1 Kor. 5:11.

O IRA NA BIUTA NA ISOQOSOQO

³⁰ Na vosa “biuta na isoqosoqo” e vakaibalebaletaka na ka e cakava e dua e papitaiso ni nakita me cakitaka nona vakabauta ena nona vakaraitaka ni sega ni vinakata me kilai me dua na iVakadinadina i Jiova. Se cakitaka nona vakabauta ena ka e cakava, me vaka nona lewena e dua na isoqosoqo e veisaqasaqa kei na ivakavuvuli vakaivolatabu, ena qai lewai koya na Kalou o Jiova.—Aisea 2:4; Vkta. 19:17-21.

³¹ E vola na yapositolo o Joni me baleti ira era cakitaka na vakabauta vaKarisito ena nona gauna: “Era biuti keda nira sega ga ni noda itokani. Ke ra noda itokani, ke ra tiko vata ga kei keda.”—1 Joni 2:19.

³² Ni dua e biuta na isoqosoqo, ena duidui sara na kena ituvaki kei na dua e malumalumu vakayalo, sa sega ni vakaitavi ena cakacaka vakavunau. Ena rairai malumalumu vakayalo e dua ni sega ni vulica wasoma na Vosa ni Kalou. De dua e sotava eso na ituvaki dredre se veivakacacani qai sega ni gumatua ni qaravi Jiova. Era na vukei koya vakayalo na qase kei ira na mataveitacini.—Roma 15:1; 1 Ces. 5:14; Iper. 12:12.

³³ Ia ke vakatulewataka e dua na lotu vaKarisito me biuta na isoqosoqo, ena kacivaki vakalekaleka ena ivavakoso: “Sa sega ni iVakadinadina i Jiova o [Yacana].” Ena tautauvata ga kei na dua e vakasivoi.

VAKALESUI MAI

³⁴ E rawa ni vakalesui mai e dua e vakasivoi se dua e biuta na isoqosoqo ke vakadinadinataki na nona veivutuni, e veirauti tale ga na gauna e vakaraitaka kina ni sa vakanadakuya na sala ca. Me laurai tale ga ni gu na lomana me veiwekani tale kei Jiova. Mera qarauna na qase me veirauti na balavu ni gauna e soli vua e vakasivoi me vakaraitaka kina ni veivutuni dina. E rawa ni vica vata na vula, dua na yabaki, se mani sivia me vakatau ena cala e cakava. Ni sa taura na ilawalawa qase na nona ivolakerekere me vakalesui mai, ena raici koya na komiti ni veivakalesui mai.Ena dikeva na komiti ke laurai dina vua ni ‘cakava na ka e vakaraitaka ni sa veivutuni’ ra qai vakatulewataka me vakalesui mai se sega.—Caka. 26:20.

³⁵ Ke vakasivoi ena duatani tale na ivavakoso, eratou na raici koya na komiti ni veivakalesui mai ena ivavakoso sa soqoni tiko kina me rogoci na nona kerekere. Ke ratou nanuma me sa vakalesui mai eratou na veitaratara kei na ilawalawa qase ena ivavakoso a vakasivoi kina, me ratou vakaraitaka na nodratou vakatutu. Erau na cakacaka vata na komiti ni rua na ivavakoso qo me kumuni kina na itukutuku kece, me tau tale ga e dua na vakatulewa dodonu. Ia ena vakatulewataka na komiti ni veivakalesui mai ena ivavakoso a vakasivoi kina me vakalesui mai se sega.

KACIVAKI NA VAKALESUI MAI

³⁶ Ke ratou vakadeitaka na komiti ni veivakalesui mai ni sa veivutuni dina o koya a vakasivoi se dua e biuta na isoqosoqo, sa ganita tale ga me vakalesui mai, me kacivaki ena ivavakoso a vakasivoi kina. Ke sa soqoni tiko ena dua tale na ivavakoso, me kacivaki tale ga ena ivavakoso ya. Me va qo na ka e kacivaki: “Sa vakalesui mai me iVakadinadina i Jiova tale o [Yacana].”

KISI E BALETI IRA NA GONE ERA PAPITAISO

³⁷ Nira valavala ca bibi na gone era sa papitaiso, e dodonu me vakaraitaki vei ira na qase ni ivavakoso. Nira qarava na kisi va qo na qase, ena daumaka me rau tiko ruarua na nona itubutubu papitaiso. Ia erau na tokoni ratou na komiti ni veilewai, erau na sega ni tovaki luvedrau me kua ni vakadodonutaki. Na komiti ni veilewai ena saga me vunauci koya na gone e cala, me vakavinakataka tale nona bula vakayalo me vaka ga e dau caka vei ira na uabula. Ia ke sega ni veivutuni na gone, sa na vakasivoi.

NIRA CALA BIBI NA DAUTUKUTUKU BERA NI PAPITAISO

³⁸ Vakacava ke ra valavala ca bibi na dautukutuku bera ni papitaiso? E sega ni rawa nira vakasivoi nira se bera ni papitaiso. De dua e sega ni matata vei ira na ivakatagedegede vakaivolatabu, o koya gona na veivakasalataki vakayalololoma e rawa ni vukei ira mera “vakadodonutaka tiko ga na sala” era muria.—Iper. 12:13.

³⁹ Ke sega ni veivutuni e dua na dautukutuku bera ni papitaiso ni rau sa raici koya e rua na qase, ena kacivaki qo ena ivavakoso: “Sa sega ni dautukutuku bera ni papitaiso o [Yacana].” Na ivavakoso ena okati koya me vaka ga e dua na tamata ni vuravura. E sega ni vakasivoi, ia era na qarauna na lotu vaKarisito na nodra veimaliwai kei koya. (1 Kor. 15:33) Ena sega tale ga ni vakabau na nona ripote ni cakacaka.

⁴⁰ Toso na gauna, ena rairai vinakata o koya a dautukutuku tu e liu me dautukutuku tale. Ena ituvaki qo, me rau raici koya e rua na qase me dikeva nona toso vakayalo. Ke rawata na kena ivakatagedegede, ena kacivaki vakalekaleka qo: “Sa dautukutuku bera ni papitaiso tale o [Yacana].”

VAKALOUGATATAKA O JIOVA NODA SOKALOU

⁴¹ Eda marautaka na lewe ni ivavakoso na parataisi vakayalo totoka e vakarautaka vei keda o Jiova. E bulabula na noda lomanibai vakayalo, e drodro vakayauyau na wai makare ni ka dina. E taqomaki keda tale ga o Jiova ena ituvatuva vakalou e vakarautaka ena veiliutaki i Karisito. (Same 23; Aisea 32:1, 2) E veilecayaki sara na iotioti ni veisiga qo, ia eda lomavakacegu nida tiko ena parataisi vakayalo.

⁴² Nida veiyaloni qai savasava na ivavakoso, ena serau tiko ga kina na rarama ni ka dina ni Matanitu ni Kalou. (Maciu 5:16; Jeme. 3:18) Ena veivakalougatataki i Jiova, eda na marau meda raica e levu tale mera mai kilai koya, ra qai tomani keda ena noda cakava na lomana.