Lewe ni iLawalawa Dauvakatulewa Vou

ENA 2 Okotova, 1999, e tini kina na bose vakayabaki ni Watch Tower Bible and Tract Society of Pennsylvania ena dua na itukutuku matanidavui. Era marau na 10,594 era tiko ena bose oqo kei ira era rogoca ena talevoni, ni sa kacivaki e va tale na lewe ni iLawalawa Dauvakatulewa vou ni iVakadinadina i Jiova. O iratou na lewe ni iLawalawa Dauvakatulewa vou oqo eratou lotu Vakarisito lumuti kece. O Samuel F. Herd; M. Stephen Lett; Guy H. Pierce; kei David H. Splane.

• E tekivu painia o Samuel Herd ena 1958, mai na 1965 ina 1997, a veiqaravi voli vakaivakatawa ni tabacakacaka kei na ivakatawa ni tikina. Oti oya erau sa qai mai lewe tiko ni vuvale e Peceli e Mereke kei na watina o Gloria, ni mai cakacaka voli o Brother Herd ena Tabana ni Veiqaravi (Service Department). E dau veivuke tale ga vei iratou na Komiti ni Veiqaravi (Service Committee).

• O Stephen Lett a tekivu painia ena Tiseba ni 1966, qai mai veiqaravi ena Peceli e Mereke mai na 1967 ina 1971. Ena Okotova ni 1971, erau vakamau kina kei na watina o Susan, rau mani gole yani ena cakacaka vakapainia lavotaki. Mai na 1979 ina 1998, a veiqaravi tiko mai kina vakaivakatawa ni tabacakacaka. Tekivu ena Epereli ni 1998, erau sa mai lewe tiko ni vuvale e Peceli e Mereke kei na watina o Susan. E lai veiqaravi tiko ena Tabana ni Veiqaravi, e dau veivuke tale tiko ga ena Komiti ni Veivakavulici (Teaching Committee).

• A vakavuvale o Brother Guy Pierce, ena Epereli 1982, erau sa qai painia vata kei watina. E veiqaravi vakaivakatawa ni tabacakacaka mai na 1986 ina 1997, oti erau sa qai lai lewenivuvale e Peceli e Mereke kei na watina o Penny. E lai veivuke tiko i keri o Brother Pierce vei iratou na lewe ni Komiti ni Mataveiqaravi (Personnel Committee).

• A tekivu painia o David Splane ena Sepiteba ni 1963. E vuli o koya mai Kiliati ena ika42 ni kalasi, oti sa qai lai kaulotu i Senegal, Aferika, oti e lai 19 na yabaki nona cakacaka vakaivakatawa ni tabacakacaka e Canada. Tekivu mai na 1990, erau sa lai lewenivuvale e Peceli e Mereke kei na watina o Linda. E keri, e lai veiqaravi voli kina o Brother Splane ena Tabana ni Veiqaravi kei na Tabana ni Volavola. Tekivu mai na 1998, sa dau veivuke tiko o koya ena Komiti ni Volavola (Writing Committee).

O iratou na va na lewe ni iLawalawa Dauvakatulewa vou oqo eratou sa mai tomani C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, kei D. Sydlik. O koya gona, e sa mai tubu na kedratou iwiliwili na iLawalawa Dauvakatulewa. E noda masu kece ni na vakalougatataka tiko ga o Jiova na iLawalawa Dauvakatulewa, ena vakaukauataki iratou tale ga, ni tomana tiko ga na ilawalawa oqo na nona liutaka na nodra cakacaka na tamata ni Kalou ena veiyasa i vuravura, me qaravi ira tale ga vakayalo.