Na Vosa ni Yalayala ni Kalou—Vakadeitaka na iNuinui ni Gauna Mai Muri

Na Vosa ni Yalayala ni Kalou—Vakadeitaka na iNuinui ni Gauna Mai Muri

ENA vuku ni Vosa ni Kalou, na iVolatabu, era vakanamata na lotu Vakarisito dina ina veigauna mai muri ena vakabauta, vakanuinui kei na nuidei. Nira lomavakacegu ena nodra veiwekani kei na Kalou o Jiova, era sa vakanamata tu kina ina veisiga ni mataka. Me vaka a vakamacalataki ena imatai ni vosa ni Soqo ni Tikina “Na Vosa ni Yalayala ni Kalou,” era sa vulica tiko mai vagumatua ena dua na gauna balavu na iVakadinadina i Jiova na parofisai ena iVolatabu. Na cava sara mada e baci vakarautaka mai o Jiova me baleti ira nona tamata ena soqo oqo? Nira cega na nodra iVolatabu, era via kila sara ga na isaunitaro oqo o ira kece na vakarorogo. E wasei vakatolu na usutu me baleta na siga e tolu ni soqo.

IMATAI NI SIGA: Lako Tiko ena Rarama ni Vosa ni Kalou

E vakamacalataki ena ulutaga “E Dusimaki Keda na Vosa ni Kalou” ni o ira na tamata i Jiova era vaka e dua na tamata e tekivutaka na nona ilakolako ena buto ni bogi. E vaka me buawa na veika e raica ni sa qai malawa na mataka, ia ni sa sigalevu tutu, sa qai matata na veika e raica. Me vaka e sa tukuni tu mai ena Vosa Vakaibalebale 4:18, era sa qai mai raica vinaka na nodra sala na tamata i Jiova ena ramase ni ka dina ni vosa ni yalayala ni Kalou. Era sega ni vakalaivi tu mera tarabe ena butobuto vakayalo.

A vukei ira na vakarorogo na ulunivosa, “Dau Vakananuma na Vosa ni Yalayala ni Kalou,” mera kila ni o ira na vakararavi vei Jiova era na sega ni yalolailai se vakanuinuikara, me vakataki ira na muri ira tiko na mesaia kei na parofita vakailasu. Na kena veibasai ga, ni bini kasauru na ivakadinadina me baleta na Mesaia dina, o Jisu Karisito! Me kena ivakaraitaki, na vakamataliataki vakacakamana i Jisu e laurai taumada kina ni o koya ga na Tui digitaki ni Matanitu ni Kalou. Tekivu mai na nona tui ni Matanitu ni Kalou ena 1914 e sa vakatokai tale ga o koya me “kalokalo i vola siga” e cavuti ena 2 Pita 1:19. E kaya o koya e vosa, “ni Mesaia se Kalokalo iVolasiga, e vakaraitaka oqo ni sa vakarau cadra mai e dua na siga se itabagauna vou vei ira kece na tamata talairawarawa.”

A tekivutaki na porokaramu ni oti na vakasigalevu ena vosa, “Meda Cila me Vaka na Cina,” e vakamakaretaka na nona ivakasala na yapositolo o Paula ena Efeso 5:8 meda “ia tiko nai valavala ni gone ni rarama.” Era dau cila me vaka na cina na lotu Vakarisito, sega wale ga ena nodra wasea na Vosa ni Kalou vei ira na tani, ia ena nodra bulataka sara ga e veisiga na ivakaro ni iVolatabu nira vakatotomuri Jisu.

Me rawa nida cila me vaka na cina, e dodonu meda “Dau Taleitaka na Wilika na Vosa ni Kalou.” Eratou tasereka e le tolu na ulutaga oqo ena dua na vosa veitaravi. Ni oti nona tokaruataka na vosa i Abraham Lincoln, ni “isolisoli vinaka taudua e sa bau solia na Kalou vua na tamata” na iVolatabu, e tarogi ira na vakarorogo o koya a vunau se vakaraitaka vakacava na ivalavala ni nodra wiliwili na titobu ni nodra taleitaka na Vosa i Jiova. Era uqeti na vakarorogo mera dau wilika sara vakavinaka na iVolatabu, mera taura na gauna mera raitayaloyalotaka kina na ka e volai ena iVolatabu, ra qai sema vata na veika vovou era se qai vulici kei na kena era sa kila rawa tu.

Na ikarua ni vosa veitaravi e vakabibitaki kina na yaga ni vuli, sega ni wiliwili wale ga, ia na kena vakayagataki sara vakavinaka na “kakana dina.” (Iperiu 5:13, 14) E veitarai cake na vuli, e kaya o koya a vunau, ‘kevaka [eda] sa vakarautaka oti na [lomada]’ me vakataki Esera na bete ni Isireli. (Esera 7:10) Ia na cava e rui bibi kina na vuli? Baleta ni vauci sara ga kina na noda veiwekani kei Jiova. O koya gona, me vakamareqeti na vuli iVolatabu, me marautaki, qai veivakabulabulataki, dina ga ni na vinakati kina na vakasama vakatitobu kei na sasaga. Eda na kunea vakacava na gauna ni vuli? E tukuni ena ikatolu ni itavi ni vosa veitaravi ni rawa oqori ena noda ‘volia na gauna’ mai na veika e sega soti ni bibi. (Efeso 5:16) Io, eda na kunea ga e so na gauna galala ke da vakayagataka vinaka noda gauna.

E vakadeitaka na vosa “E Vakaukauataki Ira na Oca tu Na Kalou” nira oca tu nikua e levu na tamata. Nida cakacaka vakaitalatala, ena rawa nida taukena na “kaukauwa mana levu” kevaka eda vakararavi ga vei Jiova, o koya “sa dausolia na kaukauwa vei ira era sa malumalumu.” (2 Korinica 4:7; Aisea 40:29) E rawa ni vakaukauataki keda na Vosa ni Kalou, na masu, na ivavakoso vakarisito, na vakaitavi wasoma ena cakacaka vakaitalatala, o ira na qase ni ivavakoso, kei na nodra ivakaraitaki ni yalodina e so tale. E vakabibitaka na usutu ni “Dodonu Meda sa Rawata Makawa Meda Dau Veivakavulici” ni dodonu mera dauveivakavulici na lotu Vakarisito, me ikuri ni nodra dauvunau me qai sasagataki vakaukaua me rawati “[na] veivakavulici.”—2 Timoci 4:2, VV.

E vakamacalataki ena iotioti ni vosa ni imatai ni siga, “Era na Guca o Ira na Via Vorata na Kalou,” nira beitaki vakailasu ena dua na gauna wale tiko ga oqo ena so na vanua na iVakadinadina i Jiova mera lotu vakarerevaki dau muri tamata. Ia e sega ni dodonu meda taqaya, ni kaya na Aisea 54:17: “Nai yaragi kecega sa caka me kemu ena sega ga ni yaco; kei na yame kecega ena mai veilewai kei iko ko na vakacala ga. Oqo na nodrai votavota na tamata i Jiova, kei na nodra veivakadonui maivei au, sa kaya ko Jiova.”

IKARUA NI SIGA: Veika e Vakatakilai ena Vosa ni Yalayala Vakaivolatabu

Ni sa oti na veivosakitaki ni tikinivolatabu ni siga oqo, era marautaka na vakarorogo na ikarua ni vosa veitaravi ni soqo, na kena ulutaga “Nida Kauta Tiko na Rarama, Meda Vakacaucautaki Jiova.” E vakaraitaki ena imatai ni vosa ni isausau ni lotu Vakarisito me vakacaucautaki Jiova ena nona vunau ena vanua kece ga. E tukuni ena vosa e tarava na kena gadrevi mera dusimaki na tisaipeli vou ina isoqosoqo ni Kalou. Ena sala cava? Ena noda vakayagataka e lima se tini na miniti ni bera ni tekivu na vuli iVolatabu yadua se ni sa oti, me vakamacalataki vua na gonevuli se cicivaki tiko vakacava na isoqosoqo ni Kalou. E vakabibitaki ena ikatolu ni itavi ni vosa veitaravi oqo meda vakacaucautaki Jiova ena cakacaka vinaka.

E vakamacalataki ena vosa e tarava “Lomana Vakalevu na Vosa i Jiova” na tikina digitaki e so mai na Same 119. Me vaka nida dau guiguileca, e dodonu meda dau vakaroti wasoma ena Vosa i Jiova. Sa bibi dina kina vei keda meda dau vakananuma na vunau i Jiova, me vaka ga a cakava na daunisame!

Tarava e dua na ulutaga totoka dina—na vunau ni papitaiso e kena ulutaga, “Ena Tini Sara me Papitaiso o Koya e Rogoca na Vosa ni Yalayala ni Kalou.” A vakadeitaki tale vei ira na papitaiso mera vakatotomuri Karisito, sega wale ga ena nodra sa mai papitaiso, ia mai na nodra muria vinaka sara ga na weniyavana. (1 Pita 2:21) Sa dua na ilesilesi dokai vei ira na ka vou oqo mera vakaitavi ena kena vakavatukanataki na Joni 10:16 (VV), ni sa tukuna tu vakailiu o Jisu nira na mai duavata “e so tale na [nona] sipi” kei ira nona tisaipeli lumuti ena yalo tabu!

A dolavi na porokaramu ni oti na vakasigalevu ena vosa, “Rogoca na Ka e Tukuna na Yalo Tabu,” e vakamacalataki kina ni vosa tiko mai vei keda na yalo tabu i Jiova, ena iVolatabu, “na dauveiqaravi yalo dina ka vuku,” kei na noda lewaeloma vakavulici ena iVolatabu. (Maciu 24:45, VV) E sega kina ni gadrevi vei ira na lotu Vakarisito mera rogoca sara ga na domo mai lomalagi mera qai kila na sala mera vakamarautaka kina na Kalou. E vakasalataki ira na lotu Vakarisito na ulutaga e tarava, “Tudei Ena iVakavuvuli ni Sokalou Dina,” mera kakua ni siova na vakasama torosobu kei vuravura. Ena rawa ni vakacaraki keda kevaka eda via vakatovolea na ivakamacala torosobu era kaburaka tiko na vukitani kei ira na itini tale e so nei Setani. Ena vinaka cake meda dau wilika ga vakawasoma na iVolatabu kei na ulutaga kece ena Vale ni Vakatawa kei na Yadra!

E vakabibitaka na vosa e tarava e kena ulutaga “Taura Matua na iVakarau ni Vosa Dina,” meda kila sara ga vakavinaka na “ivakarau” vakaivolatabu, se na ituvatuva ni ka dina. (2 Timoci 1:13) Na kilai vinaka ni ivakarau vakaivolatabu oqo e sega wale ga ni idola ni noda yalodina vua na Kalou, e dusimaka tale ga na ka e veicoqacoqa kei na ka dina.

Vakasamataka mada ni raici iko o Jiova mo dua na ka domoni. Sa ka dokai dina! E veiuqeti dina kina na vosa e yavutaki ena parofisai i Akeai, “Vakasinaiti Tiko na Vale i Jiova Ena  ‘Ka sa Domoni’ ” baleta ni vakadeitaka vei ira na vakarorogo ni o ira yadudua na lewe ni “isoqosoqo levu sara” era ka domoni dina vei Jiova. (Vakatakila 7:9) Oqo na vuna ena vakabulai ira kina o Jiova ena iotioti ni nona “vakayavalataka” na veimatanitu kece ga ena gauna ni “rarawa levu” sa roro tiko mai. (Akeai 2:7, 21, 22; Maciu 24:21, NW) Ia, ena gauna mada ga oqo, e dodonu mera yadra tiko ga vakayalo na tamata i Jiova, me vaka e vakamacalataki ena vosa e tarava “Vakayadrati Keda Tiko na Vosa ni Yalayala Vakaivolatabu.” E tokaruataka o koya e vunau na vosa i Jisu: “O koya gona mo dou yadra tiko, ni dou sega ni kila na gauna e na yaco mai kina na nomudou Turaga.” (Maciu 24:42, VV) Na sala cava eda na yadra tiko kina vakayalo? Ena noda vakaogai keda ena cakacaka i Jiova, dau masu, qai waraka tiko na siga levu i Jiova.

Na iotioti ni ulutaga ni ikarua ni siga “Na Vosa ni Yalayala Ena Gauna ni iVakataotioti.” Ena sega ni guilecavi rawa ena veiyabaki sa tu oqo e liu na ulutaga oqo. Cava na vuna? Baleta ni a vakaraitaka o koya e vosa na ivola vou—Pay Attention to Daniel’s Prophecy! (Nanuma Matua na Parofisai i Taniela!) E kaya o koya e vosa, “na ivola e 320 na taqana oqo e tu vata kei na iyaloyalo droinitaki vinaka me vakamacalataka na veitikinivola kece ni Taniela.” Na ivola oqo e vaqaqacotaka noda vakabauta, qai vakadeitaka ni sa vakararamataka tiko o Jiova na nona Vosa ni yalayala!

IKATOLU NI SIGA: Sega ni Lutu Vakadua na Vosa ni Yalayala ni Kalou

A dolavi na iotioti ni siga ni soqo ena vosa veitaravi “Na Vosa ni Yalayala me Baleta na Gauna Lokuci.” E vakamacalataki ena vosa e tolu oqo e tolu na itukutuku bibi nona na parofita o Apakuki me baleta na veivakarusai nei Jiova. A tau ina matanitu lakosese o Juta na imatai ni itukutuku ni veivakarusai kei na kena ikarua ina matanitu dauveivakabobulataki o Papiloni. Na kena iotioti, e se bera tiko ni yaco, e baleta nodra na vakarusai na tamata ivalavala ca sa voleka sara tiko ga oqo na kena gauna. Ena nona vakamacalataka tiko na Amaketoni na ikatolu ni tacida e vakaitavi ena vosa veitaravi, a vakabibitaka na mataqali rere e dodonu me tiko vei keda ena nona kaya: “Ena rise na yaloda ni sa na vakaraitaka o Jiova na nona kaukaua vakaiyanaqa.”

Na ulutaga ni drama veiuqeti ni soqo oqo, “Meda Vakamareqeta na Noda iVotavota Vakayalo.” E rui titobu dina na tasereki ni duidui ni nodrau raica na veika vakayalo o Jekope kei Iso. Ni vakawaletaka o Iso na nona ivotavota vakayalo, a mani soli kina vei Jekope, e qai vakamareqeta sara o koya. Era tarogi na vakarorogo, “Na [ivotavota vakayalo] cava sa solia tu vei keda o Jiova?” E sauma o koya e vosa, “Na ka dina mai na nona Vosa, na iVolatabu; na inuinui ni bula tawamudu; kei na itavi dokai meda matataki koya ena noda kacivaka tiko na itukutuku vinaka.”

Na ulutaga ni itavi e tarava “O Raica Tu Mada Vakacava na Noda iVotavota Talei?” Eda vakaraitaka na itovo ni rai dodonu me baleta na noda ivotavota vakayalo ena noda vakaliuca na cakacaka i Jiova kei na noda itavi dokai vakayalo me qai muri na veika e baleti keda ga se na veika vakayago. Eda na taravaka cake kina na noda bula ena veiwekani voleka kei Jiova, eda duidui kina mai vei Atama, Iso, kei ira na Isireli tawayalodina.

Na vunau soqovi levu, “Vakavoui na Ka Kece Ga—Me Vaka ga sa Yalataki,” e semati iratou vata e va na parofisai bibi me baleta na “lomalagi vou” kei na “vuravura vou.” (Aisea 65:17-25; 66:22-24; 2 Pita 3:13; Vakatakila 21:1, 3-5) E matata ni inaki i Jiova me na rabailevu sara na kena vakavatukanataki na parofisai kece oqo mai na kena a vakayacori ni vakatikori tale o Isireli ena 537 B.S.K. Sa tuvanaka rawa o koya na nona Matanitu me veiliutaki (na “lomalagi vou”), kei ira mera na vakarurugi kina e vuravura (na “vuravura vou”), ni oqo o ira mera na tawana na parataisi totoka e vuravura.

E qai vakacavari na soqo ena dua na vosa vakasakiti qai veivakauqeti “Na Veika Meda Nanamaki Kina ni Dusimaki Keda Tiko na Vosa ni Kalou.” Era baci vakadreti tale na vakarorogo ni “sa vakalekalekataki na gauna sa vo” me na vakacavari kina na cakacaka ni kena kacivaki na itukutuku ni Matanitu ni Kalou. (1 Korinica 7:29) Eda sa tu sara ga oqo ena gauna me sa na vakarau tau kina na vakatulewa i Jiova me baleti Setani kei na nona ituvatuvanaki ca kece sara. Me duavata mada ga na noda vakanananu kei na daunisame ena nona lagata: “Sa waraki Jiova na yaloda; a nodai vukevuke kei na nodai sasabai ko koya.” (Same 33:20) Sa dua na ituvaki totoka dina ena waraki ira e yavutaki na nodra nanamaki ena vosa ni yalayala ni Kalou!

[iYaloyalo ena tabana e 7]

E vakarautaki e dua na drama veivakauqeti dina me vakabibitaka na vakamareqeti ni nodra ivotavota vakayalo na dauveiqaravi i Jiova

[iYaloyalo ena tabana e 7]

Era papitaiso e levu era rogoca na vosa ni yalayala ni Kalou