Tukutuku Mai na Daukacivaka na Matanitu

Vakalougatataki Nodra Vakabauta

SA RUI vakasakiti na vakabauta ni yapositolo o Paula, qai dau vakauqeti ira nona itokani ena vakabauta mera vaqaqacotaka tale ga na nodra vakabauta. E kaya: “O koya sa torova na Kalou e dodonu me vakabauta ni sa bula ko koya, ni sa saumi ira talega era sa dauvakasaqarai koya.” (Iperiu 11:6) Erau vakaraitaka na vakasavuirogorogo e tarava oqo mai Mozambique ni vakalougatataka o Jiova na vakabauta dina, qai dau rogo masu tale ga.

• E dua na ganeda dawai ena vualiku ni yasana o Niassa a kauaitaka dina se ratou na tikova vakacava kei iratou na luvena e ono na Soqo ni Tikina “Na Sala Vakalou.” Na sala wale ga ni nona rawailavo na volivolitaki ena makete, ia ni sa roro mai na siga ni soqo, e se qai rawata wale ga na nodratou ivodovodo ni lako yani ena sitimanivanua. E sega ni yalolailai ni solia taucoko na nona vakabauta ina veivuke i Jiova ena nona sasagataka me ratou tiko ena soqo ni tikina.

Eratou vodo ina sitimanivanua kei na ono na luvena. Ni sa vakacagau tiko na ilakolako sa lako yani na dautauritikite me taroga na nodratou tikite. Ni raica na nona lapel card, e taroga na dautauritikite se mataqali ivakatakilakila cava oya. E kaya na ganeda ni oya e vakatakilakilataki koya ni dua na mata ni soqo ni tikina ni iVakadinadina i Jiova. “E vakayacori e vei na soqo?,” e taroga na dautauritikite. Ni rogoca ni na vakayacori ena yasana o Nampula, rauta ni 300 na kilomita mai kea, e vakasauri na nona tukuna me sauma ga e veimama ni ivodovodo! E solia sara vua na nodratou tikite vakavuvale me baleta tale ga na nodratou lesu tale, ni sa saumi rawa tale ga ena ilavo e vo. E kalougata dina ni a vakanuinui vakatabakidua vei Jiova!​—Same 121:​1, 2.

• Rauta ni 25 na yabaki na nona masuta tiko na Kalou e dua na yalewa daulotu me vakaraitaka vua na ivalavala dodonu me sokalou kina vua. E bosoka vata tiko na lotu e lewena na veika vakalotu kei na ivalavala vakavanua, e qai vakatitiqataka tiko ni vakamarautaka na Kalou na mataqali sokalou vaka oya.

E kaya: “Au dau nanuma tiko ga na vosa i Jisu ena Maciu 7:7: ‘Dou kerekere, ka na soli vei kemudou: dou vakasaqara, ka dou na kunea; dou tukituki, ka na dolavi vei kemudou.’ Au dau vakananuma na tikinivolatabu oqo niu dau masuta na Kalou me vakaraitaka vei au na ka dina. Dua na siga sa qai tukuna na neitou italatala vei keimami kece na volivolitaki tiko ena makete me keimami soli ilavo vua kei na so na iyaya keimami volitaka tiko me rawa ni cabora kina na nona veivakalougatataki. Au vakadeitaka ni sega ni vakaivolatabu na kerekere oqo, au sega ni mani kauta kina e dua na ka. Ni sa raica na italatala niu sega ni kauta yani e dua na ‘isolisoli,’ sa qai vakamadualaki au e matadra kece na lewenilotu. Au sa kila sara ga ena siga oya ni oqo e sega ni sala me sokaloutaki kina na Kalou, au sa biuta kina na lotu oya. Ia au gumatua tiko ga ena masu meu kunea na ka dina.

“Sa qai yaco meu yalodoudou meu raica e dua na wekaqu e iVakadinadina i Jiova. E solia vei au e dua na ivolacebaceba, ia niu sa wilika oti, au sa kila sara ga ni sa rogoca na Kalou na noqu masu. Sa qai yaco me taleitaka tale ga o kequ isa na ka dina ena iVolatabu, keirau sa qai vakamatanitutaka na neirau vakawati. Lakolako, sa qai tauvimate bibi sara na watiqu. Ia, me yacova sara nona mate, a vakayaloqaqataki au meu yalodina tiko ga ena sala ni dina me rawa ni keirau na lai sota ena Parataisi.

“Au na vakavinavinaka tiko ga vei Jiova ni a rogoca noqu masu qai dusimaki au ina sala dodonu meu qaravi koya kina. E sa rogoci tale ga na noqu masu nira sa mai yalataki ira na luvequ e le walu mera dauveiqaravi i Jiova.”