Sa Voleka “na Gauna sa na Vakavoutaki Kina na Veika Kece”!

Ni sa voleka ni lesu tale i lomalagi o Jisu, eratou tarogi koya e so na nona tisaipeli yalodina: “Turaga, ko ni na vakayacora me dua tale na matanitu ko Isireli e na gauna oqo se sega?” Na isaunitaro i Jisu e vakaraitaka ni na toso tiko na gauna sa na qai yaco mai na Matanitu ni Kalou. Ena levu sara na nodra cakacaka na nona imuri ena gauna oya. Mera vakadinadinataki Jisu e “Jerusalemi, kei Jiutia taucoko, kei Samaria, ka yacova yani na i yalayala kei vuravura.”​—Cakacaka 1:​6-8, VV.

E SEGA ni rawa ni vakacavari na ilesilesi oya ena loma ni vica ga na siga, se macawa, se vula. Sega vakadua nira bau tu vakasuka na tisaipeli, ra sa tekivu vunau sara. Ia, e sega nira guilecava ni na yaco na gauna ena vakavoui kina na veika kece. A vosa kina na yapositolo o Pita ina dua na ilawalawa levu era soqoni vata mai Jerusalemi ena nona kaya: “Ni veivutuni ka saumaki mai vua na Kalou, me bokoci kina na nomu i valavala ca. Ke ko ni na cakava oya e na qai yaco mai na gauna ni veivakaukauwataki mai vua na Turaga; ka me talai Jisu mai, o koya na Mesaia sa digitaka oti tu ko koya me nomuni. Ia sa dodonu me na tiko mada ga mai lomalagi ko koya me yacova na gauna sa na vakavoutaki kina na veika kece, me vaka e a sa vosa oti kina na Kalou e na gusudra na nona parofita yalo savasava e na gauna makawa sara.” (Neitou na matanivola kala.)​—Cakacaka 3:​19-​21, VV.

Na ‘gauna ni vakavoutaki’ oqo ena qai yaco mai kina na “gauna ni veivakaukauwataki” mai vei Jiova. E basogairua na veivakavoui e yalataki oqo. Kena imatai, na veivakavoui o koya ena veivakaukauataki vakayalo eda sa vakila sara tu ga oqo. Kena ikarua, na tauyavutaki ni parataisi dina e vuravura.

Tekivu na Gauna ni Veivakavoui

Sa tukuna oti na yapositolo o Pita vei ira na ilawalawa mai Jerusalemi ni ‘na tiko mada ga o Jisu mai lomalagi.’ Ena tu vakawawa kina o koya me yacova sara na 1914, na gauna sa qai mai taura kina o Jisu na nona kaukaua vakatui qai tekivu veiliutaki kina me Tui lumuti ni Kalou. A parofisaitaka o Pita ni gauna oya ena ‘tala mai’ na Luvena o Jiova ena Nona vakatarai Jisu me mai cakava na nona itavi, ni uto sara ga ni inaki ni Kalou o koya. E vakamacalataka na iVolatabu ena vosa vakatakarakara: “A sa vakasucuma ko koya [na isoqosoqo vakalomalagi ni Kalou] na gonetagane [na Matanitu ni Kalou ena liga i Jisu Karisito], sa lesi me lewai ira na veimatanitu kecega e nai titoko kaukamea.”​—Vakatakila 12:5.

Ia era bese ni vakarorogo ina veiliutaki i Karisito na veimatanitu. Era vosa vakacacataki ira na nona tamata yalodina era bula e vuravura, era kilai nikua mera iVakadinadina i Jiova. Me vakataki ira ga na tacidra yapositolo e liu, era sega tale ni qai lomalomaruataka na iVakadinadina “na cakacaka ni nona vakadinadinataki o Jisu.” (Vakatakila 12:​17, NW) Na tusaqati ni cakacaka era cakava tiko na lotu Vakarisito yalodina oqo e tete yani ina veivanua. Ena 1918, eratou a lewai ina mataveilewai e so na lewe ni komiti ni itikotiko liu ni Watch Tower Society e Brooklyn, mai Niu Yoka, ratou a beitaki vakailasu eratou qai totogitaki vakatawadodonu me ratou bala vakabalavu i valeniveivesu. Sa vaka me sa mai sega tu ni rawa ni vunautaki na Matanitu ni Kalou me “yacova yani na i yalayala kei vuravura.”​—Vakatakila 11:​7-​10.

Ia ena 1919, eratou sa qai sereki na lewe ni komiti ni itikotiko liu, mai bokoci taucoko na ka eratou a beitaki kina ni cala na lewa a tau vei iratou. Sega tale ni ratou vakaoti gauna ni ratou vakavouya tale na igu ni cakacaka vakayalo. Me tekivu mai na gauna oya, era se marautaka tu ga oqo na tamata i Jiova na nodra vutuniyau vakayalo.

Tekivu sara e dua na cakacaka vakaitamera ni nodra vakavulici na tamata ena veivanua kece mera vakabauta na ka kece e vakarota o Jisu vei ira na nona imuri mera cakava. (Maciu 28:20) E veivakayaloqaqataki dina nida raica e so era a dau itovo tu vakamanumanu nira sa veisau! Era luvata tani nodra itovo makawa me vaka na “daucudru,” na “veivosacataki,” kei na “vosa dukadukali,” ra qai daramaka na itovo vou, ‘o koya sa vakavoui tiko ena vuku, me veiucui kina kei koya [na Kalou] a buli keda.’ Ena vakasama vakayalo, sa vakayacori sara tiko ga na vosa i Aisea na parofita: “Ena tiko vata na wolifa [na tamata e dau ivalavala tu vaka na wolifa] kei na lami [na tamata yalomalumalumu], ka na davo vata na lepate kei na luve ni me, ena tiko vata talega na luvedratou na pulumokau kei na laioni kei na manumanu uro.”​—Kolosa 3:​8-​10, VV; Aisea 11:​6, 9.

Vakavoui e Levu Tale na Ka!

Me ikuri ni veivakavoui e yaco kina na parataisi vakayalo nikua, sa na vakarau vakavoui tale ga na noda vuravura me parataisi. E dua na tiki lailai kei vuravura a parataisi ena gauna a biuti rau kina na vuda o Atama kei Ivi o Jiova ena were o Iteni. (Vakatekivu 1:​29-​31) Oya na vuna e rawa nida kaya kina ni na vakavoui tale o vuravura me Parataisi. Ni bera ni yaco oya, ena vagalalataki mada e vuravura o lotu lasu e sega ni doka na Kalou. Na isoqosoqo vakapolitiki ni vuravura oqo ena vakayacora oya. (Vakatakila 17:​15-​18) Oti oya, sa na qai vakarusai na isoqosoqo vakapolitiki kei na bisinisi, kei ira na veitokoni kina. Kena iotioti ni meca ni Kalou​—o Setani na Tevoro kei ira nona timoni​—era na vesu tu me duanaudolu na yabaki​—na balavu ni gauna me caka kina na veivakavoui. Ena gauna oya, ena “reki . . . na lekutu kei na vanua dravuisiga; ia na vanua liwa lala ena marau, ka se me vaka na rose.” (Aisea 35:1) Ena vinaka na vuravura taucoko. (Aisea 14:7) O ira mada ga na vica vata na milioni era mate tu era na vakaturi mera bula ena vuravura. Era na vakila kece na yaga ni isoro ni veivoli. (Vakatakila 20:​12-​15; 22:​1, 2) Sa na oti vakadua na mataboko, na didivara, kei na lokiloki. “Na lewe ni koro ena sega ni kaya, Ka’u sa tauvi mate.” (Aisea 33:24) Ni oti ga vakalailai na cava ni Duanaudolu na Yabaki ni Veiliutaki i Karisito, ena qai sereki vakalekaleka na Tevoro kei ira nona timoni mera raica se sa vakayacori tiko vakacava na loma ni Kalou me yacova mai na gauna oya. Kena itinitini, nira na qai vakarusai vakadua.​—Vakatakila 20:​1-3.

Ni sa mai cava na veivakavoui e vuravura taucoko ena icavacava ni duanaudolu na yabaki, era na vakacaucautaki Jiova na “ka kecega sa cegu rawa,” era na cakava tiko oqo me tawamudu. (Same 150:6) O na dua beka vei ira? E rawa ni vaka kina.