O Cei Dina na Tamata e Rawaka?

E KAYA e dua na ivolavosa ni ibalebale ni rawaka na kena “rawati na iyau, rawati na nodra veivakadonui na tani, se na rawati ni itutu cecere.” Sa oqori beka ga na kena ibalebale? E kena ibalebale beka ga na rawati ni iyau, na rawati ni nodra veivakadonui na tani, se na rawati ni itutu cecere? Ni o se bera ni vakaio, vakasamataka mada oqo: O Jisu Karisito e sega ni binia na nona iyau ena gauna ni nona bula. E sega tale ga ni vaqara na nodra veivakadonui e vuqa; se mera vakacerecerei koya na dau viavia liu ena gauna oya. Ia, e tamata rawaka o Jisu. Ena vuku ni cava?

Ni se bula e vuravura o Jisu a “vutuniyau e na mata ni Kalou.” (Luke 12:​21, VV) Ni vakaturi oti a vakalougatataki koya na Kalou ena “lagilagi kei na vakarokoroko.” E vakalevulevuya na Luvena o Jiova, qai “biuti koya e na vanua cecere duadua mai cake, ka solia vua na yaca e uasivi cake mai na yaca kece ga.” (Iperiu 2:9; Filipai 2:​9, VV) E vakamarautaka na loma i Jiova na ivakarau ni bula i Jisu. (Vosa Vakaibalebale 27:11) E rawaka o Jisu ena nona bula e vuravura ni a cakava na ka a nakiti mai vua, oya me mai cakava na loma ni Kalou me vakarokorokotaki kina na yacana. A cakava o Jisu na loma ni Kalou, e vakalagilagia kina na yacana. Sa qai vakalagilagi Jisu na Kalou ena nona vakaiyautaki koya, vakadonui koya, qai vakacerecerei koya ina dua na itutu ena sega ni rawata e dua na tamata vuli vinaka, se daunipolitiki, se dauqito. O Jisu na tamata rawaka duadua e vavaca na vuravura.

Era kila na itubutubu lotu Vakarisito ke ra muria na luvedra na weniyava i Karisito era na vutuniyau ena mata ni Kalou, me vaka na nona vutuniyau o Jisu, era na vakalougatataki edaidai, era na qai marautaka na veivakalougatataki levu ena vuravura sa bera mai. Na sala vinaka duadua me vakamurimuria kina e dua na itabagone na weniyava i Karisito, oya me cakava na cakacaka a cakava o Jisu, vakauasivi ke mani cakacaka vakaitalatala vakatabakidua.

E dau kena ivalavala ena so na vanua mera dau tu vakasuka na itabagone mai na cakacaka vakaitalatala vakatabakidua. Nira vakacavara na gonetagane na nodra vuli ena koronivuli torocake, e namaki mera cakacaka saumi, mera vakawati, mera tauyavutaka nodra bula. O ira gona na gone era susu mai ena vanua e tiko kina na rai vaka oya e dau cala nodra nanuma, qai vakavuna mera tu vakasuka mai na cakacaka vakaitalatala vakatabakidua. (Vosa Vakaibalebale 3:​27) Baleta na cava? Baleta ni vakamuai ira cala na ivakarau ni rai ni nodra vanua. Oqori sara ga na ka e yacovi Ropate.a

Ni Veisaqasaqa na iVakarau ni Rai Ena So na Vanua Kei na Lewaeloma

O Ropate a susu mai ena dua na vuvale iVakadinadina i Jiova. Ni se qai yabaki tini vakacaca e rivarivabitaki na nona itovo kei na nona ilala. E tekivu me sa leqataki koya o tinana. Mani kerea sara o tinana e dua na painia me vukei koya, oqo e dua na iVakadinadina i Jiova e cakacaka vakaitalatala vakatabakidua. E qai vakamacalataka o Ropate na ka e yaco.

“Au taleitaka vakalevu na nona kauaitaki au na taciqu tagane oqo. Na nona ivakaraitaki vinaka e vakavuna meu vakasamataka meu na painia niu sa biu vuli. Oqori na vuna e baci lomaleqa tale kina o tinaqu. E baleta ni ivakarau ni rai ena noqu vanua ni vinaka ga mera painia na goneyalewa ena gauna ga era biu vuli kina, o ira na gonetagane e vinaka mera tu vinaka mada e liu vakailavo ni bera nira qai vakasamataka na painia.

“Ni oti noqu vuli cakacaka, au sa bau kenadau toka ni dua na cakacaka, au mani tauyavutaka e dua na noqu bisinisi. Sa tekivu me kania noqu gauna na noqu bisinisi, e dina niu lako tiko ina soqoni kei na cakacaka vakavunau, ia sa sega soti ga ni lomaqu. Sa tekivu me beitaki au na noqu lewaeloma, baleta niu kila niu rawa ni qaravi Jiova vakavinaka cake. Ia sa bau dredre dina meu saga meu kua ni cakava na ka era namaka vei au na tani, ia au marau dina niu a rawata. Au sa vakawati ena gauna oqo, keirau sa painia tiko kei watiqu sa rauta oqo e rua na yabaki. Au se qai lesi wale ga oqo meu dua na dauveiqaravi vakaitalatala ena ivavakoso. Meu kaya ga vakadodonu niu sa qai lomavakacegu, e baleta ga niu sa qai qaravi Jiova ena vu ni yaloqu taucoko, kei na kena levu au rawata.”

E vakavuqa me dau uqeti ira na gone na ivoladraudrau oqo mera vulica e dua na cakacaka, se mera yacova e dua na ivakatagedegede vinaka ni vuli e koronivuli. Ena vuku ni cava? Mera vutuniyau beka kina? E sega ni o koya oqori na vuna. Na vuna levu ga, me rawa nira rawati ira nira sa tamatabula, ra qai qaravi Jiova ena kena vinaka duadua era rawata, vakauasivi ke ra cakacaka vakaitalatala vakatabakidua. Ia, e dau vakavuqa mera lai tini tacori tale na goneyalewa kei na cauravou ina sasaga ni vaqara cakacaka vinaka, me lai vakawaletaki kina na cakacaka vakaitalatala. So sa sega sara ga nira qai vakasamataka na cakacaka vakaitalatala vakatabakidua. Na cava na vuna?

Ena vukei keda meda kila na vuna mai na ka e tukuna o Ropate. Ni oti nona vuli cakacaka o Ropate e tauyavutaka sara e dua na bisinisi. Sega ni dede sa vaka me vesuki koya nona bisinisi qai vaka me matewale nona sasaga. E saga o koya me tu vinaka vakailavo. Ia e bau dua beka ena loma se ena taudaku ni ivavakoso vakarisito e sa rawata oqori? E dodonu mera colata na lotu Vakarisito na nodra icolacola vakailavo, mera dui qaravi ira vakataki ira ena ka vakailavo; ia mera nanuma tiko ni sega ni levu e rawa nira kaya nira sa tu vinaka sara ga vakailavo ena gauna veilecayaki oqo. Oqori na vuna e veivakacegui kina vei ira na lotu Vakarisito na vosa ni yalayala i Jisu e volai ena Maciu 6:​33.

E marau o Ropate ni sa yaco na lomana, sa sega ni qai muria na ivakarau ni rai ena nona vanua. Sa marautaka tiko edaidai na cakacaka vakaitalatala vakatabakidua. E ka dokai na cakacaka vakaitalatala vakatabakidua. Sa lomavakacegu ena gauna oqo o Ropate. E tukuna o koya ni sa qai qaravi Jiova ena kena ‘levu duadua’ qai vakavu lomavakacegu tale ga vua.

Vakayagataka Vinaka Nomu Taledi

E levu sara na iVakadinadina i Jiova e tu vei ira na taledi. So era ulu kaukaua sara; e so tale ga era liga maqosa. E taka mai vei Jiova na isolisoli kece oqo, o koya e solia “vei keda kecega na bula, kei na cegu, kei na ka kecega.” (Cakacaka 17:25) Ke sega na bula e kawale na isolisoli kece oqo.

Nida sa yalataki keda e dodonu ga meda vakayagataka noda bula ena cakacaka i Jiova. Oqori sara ga na ka e cakava e dua na cauravou e tu vua na taledi. E bula ena imatai ni senitiuri S.K. E lewe ni dua na vuvale rogo, a susu mai ena koro kilai levu o Tarisu mai Silisia ena nona bula vakacauravou. Dina ni dua na Jiu, ia e wili me lewenivanua o Roma ena vuku i tamana. Sa macala ga ni na levu sara na dodonu e tu vua, qai vakatarai tale ga vua e levu na ka. Ni sa cauravou mai e qai vakavulici koya ena Lawa o Kamelieli​—e dua na “parofesa” rogo ena gauna oya. E kena irairai ni na sega ni dede e sa na rawa ‘iyau, era na vakadonui koya na tani, ena vakaitutu cecere tale ga.’​—Cakacaka 21:39; 22:​3, 27, 28.

O cei mada na cauravou oqo? Na yacana o Saula. Ia e qai veisau na yacana me o Paula na yapositolo ena gauna sa tavuki kina me lotu Vakarisito. Sa vakanadakuya nona sasaga taumada, sa mai vakayagataka vakatabakidua nona bula ena cakacaka i Jiova me vaka e dua na lotu Vakarisito. E sega ni rogo o Paula ni dua na loya wararasa, ia e rogo ga ni dau gumatua ni vunautaka na itukutuku vinaka. Ni oti e voleka ni 30 na yabaki nona kaulotu, sa qai vola e dua na ivola vei ira na nona itokani mai Filipai. A taleva mada e liu na ka e sa rawata ni bera ni mai lotu Vakarisito, oti sa qai tukuna: “Au sa biuta tani na ka kece ga e na vukuna [vuku i Jisu Karisito]; au sa okati ira kece ga me ra de ni manumanu, me noqu kina na Karisito.” (Filipai 3:8; VV) E sega ni veivutunitaka o Paula na sala e vakayagataka kina nona bula!

Ia e vakacava na veituberi a cakava o Kamelieli vei Paula? E yaga beka vua? Io! E dau vakayagataka ena so na gauna me “taqomaka ka vakadeitaka [kina] na i tukutuku vinaka.” Ia na cakacaka levu i Paula me vunautaka na itukutuku vinaka​—e dua na ka e sega ni a vakavulica rawa vua na nona vuli e liu.​​—Filipai 1:​7, VV; Cakacaka 26:​24, 25.

E so tale ga nikua era vakayagataka na isolisoli kei na taledi e tu vei ira vaka kina na ka era vulica mera vakateteya kina na ka e baleta na Matanitu ni Kalou. E dua na kena ivakaraitaki o Emi, e vakoroi ena ka vakabisinisi, kei na lawa. A dua tu nona cakacaka vinaka ena dua na kabani ni tabana vakalawa, ia nikua sa bole me cakacaka tu ga ena dua na valenivolavola ni tabana ni Watch Tower Society. E vaka oqo nona vakamacalataka o Emi nona bula edaidai: “Au vakabauta ni sa donu noqu digidigi me baleta na noqu bula. . . . Au sega ni vinakata meu cakacaka me vaka e dua vei ira keimami a vuli vata ena univesiti. Au cibi ena ilakolako ni bula au sa mai muria oqo. Sa tu vei au na ka kece e gadrevi meu bula kina kei na ka au vinakata​—na bula vakacegu kei na mamarau kei na dua na cakacaka e yaga qai veivakacegui.”

E digitaka o Emi me cakava na cakacaka ena maravu kina nona vakasama, ena vakacegui kina, qai salavata kei na veivakalougatataki i Jiova. Sega ni vakabekataki nira na vinakata tale ga na itubutubu lotu Vakarisito mera vaka oqori o ira na luvedra!

Rawaka Ena Cakacaka Vakaitalatala Vakarisito

Ia e vinakati me tiko tale ga na rai dodonu me baleta na cakacaka vakaitalatala vakarisito. E sega ni dredre noda vakila nida sa rawaka tiko ni vinaka na noda cakacaka vakavunau, e levu na ivola vakaivolatabu eda solia rawa da qai veitalanoa vinaka kei ira na itaukeinivale. Ia ni sega soti ni levu era vakarorogo vei keda, ena rawa nida vakasamataka nida vakaoti gauna tiko. Kua ni guilecava ni dua na ibalebale ni rawaka na ‘rawati ni nodra veivakadonui na tani.’ O cei eda vinakata me vakadonui keda? E sega tale ni dua, o Jiova ga. Eda na rawata na veivakadonui oqo veitalia mada ga ke ra rogoca na tamata na noda itukutuku se sega. E vakavulici iratou na nona imuri o Jisu ena dua na lesoni me baleta sara ga na vakasama oqo.

Me vaka o kila ni a talai ira o Jisu e 70 na dauvunautaka na Matanitu ni Kalou ina “veikoro kece kei na veivanua e vakarau me lakova.” (Luke 10:​1, VV) Ena sega ni tomani iratou o Jisu ena nodratou ilakolako vakavunau ena veikorolelevu kei na veikorolalai. E dua na ka e se qai yaco vakadua vei iratou. Ia ni se bera ni talai iratou o Jisu sa vakasalataki iratou mada e liu. Ni ratou sotava e dua e “yaga me vakacegui” me ratou vakamacalataka sara vakavinaka vua na Matanitu ni Kalou. Ia kevaka eratou vakasukai mai, me ratou gole yani, ratou kua tale ga ni kauaitaka. E vakamacalataka vei iratou o Jisu ni o ira era sega ni vakarogoci iratou, era sega tale ga ni vakarogoci Jiova.​—Luke 10:​4-7, 16.

Nira sa vunau oti na le 70, era lai tukutuku tale vei Jisu ena “marau ka kaya, ‘Turaga, era sa bau gu ce tale ga vei keimami na tevoro e na vuku ni yacamuni.’ ” (Luke 10:​17, VV) Sa dua na ka nodra qoroqoro nira vakasavi ira rawa na kabula vakayalo kaukaua oya, e dina nira tamata ivalavala ca ga! Ia e tukuna ga o Jisu vei ira na nona tisaipeli mamakutu oqo: “Dou kakua ni reki e na ka oqo, ni sa guca vei kemudou ko ira na yalo; oqo ga mo dou reki kina, ni sa volai na yacamudou mai lomalagi.” (Luke 10:​20, neitou na matanivola kala.) Ena sega ni tu ga vei ira na le 70 ena veigauna na kaukaua me rawa nira vakasavi ira kina na timoni, ena sega ni na vuavuaivinaka tu ga na nodra cakacaka vakaitalatala. Ia ke ra yalodina tiko ga, ena vakadonui ira tiko ga o Jiova.

O Dau Marautaki Ira na Cakacaka Vakatabakidua?

Dua na gauna a tukuna e dua na cauravou vua e dua na qase lotu Vakarisito: “Au na vaqara e dua na cakacaka ena gauna sa na cava kina noqu vuli ena koronivuli torocake. Ke sega niu kunea e dua noqu cakacaka, au na qai vakasamataka na cakacaka vakaitalatala vakatabakidua.” Ia, e sega ni tiko vei ira e vuqa na sa painia tu na rai vaka oqori. So era biuta nodra cakacaka vinaka me rawa nira painia. So tale era vakuakua ni dolavi vei ira na sala me rawa nira vakarabailevutaka nodra vuli. Era vakataki Paula na yapositolo ena nodra vakuai ira mai ena levu na ka, ia me vakataki Paula, o Ropate kei Emi, era sega vakadua ni veivutunitaka na nodra digidigi. Era taleitaka ni rawa nira vakayagataka na isolisoli e tu vei ira mera vakacaucautaki Jiova kina ni ganita vinaka me soli vua na ka vinaka duadua eda rawa ni solia.

E duidui na vuna e sega kina ni rawa mera painia o ira kece na iVakadinadina i Jiova yalodina. Rairai ena tu na nodra itavi vakaivolatabu mera qarava. Ia ke ra qarava na Kalou mai na ‘lomadra taucoko, yalodra taucoko, kei na nodra vakasama taucoko,’ ena marautaki ira o Jiova. (Maciu 22:​37, VV) Dina ni sega ni rawa mera painia, ia era na duavata ga kei ira e rawa nira painia nira sa digitaka e dua na cakacaka vinaka.

E vola na yapositolo o Paula: “Ia dou kakua ni vakatauvatani kemudou kei ira era sa vakavuravura.” (Roma 12:2) Me salavata kei na ivakasala oqori nei Paula, meda kua vakadua ni vakalaiva me moica noda vakasama na ivakarau ni rai ni noda vanua, se na rai ni vuravura oqo me baleta na ivakatagedegede e dodonu me yacova e dua. Ke rawa ni o painia se sega, me liu tiko ga ena nomu bula na cakacaka i Jiova. O na rawaka wale ga mai na veivakadonui i Jiova.

[iVakamacala e ra]

[iYaloyalo ena tabana e 19]

Kua ni lai tacori tu ena dua na vanua ena lai matewale kina na nomu sasaga