Reki Vata kei na Kalou Mamarau

“Io, ra mataveitacini, mo ni reki tiko ga, . . . ena qai tiko vata kei kemuni na Kalou ni loloma kei na vakacegu.”​—⁠2 KORINICA 13:​11, NW.

1, 2. (a) Na cava era sega ni reki kina e levu? (b) Na cava na reki, eda na teivaka vakacava?

ENA veisiga ca oqo, e levu era sega soti ni marau. Ni tarai ira, se dua era lomana na leqa, na lomadra e tautauvata sara ga kei na loma i Jope ena gauna makawa ni a kaya: “A tamata sa sucu maivua na yalewa sa vica walega na nona siga, ka sa vutu ni rarawa.” (Jope 14:⁠1) Dau tarai ira tale ga na lotu Vakarisito na ca kei na dredre ni ‘gauna rarawataki’ oqo, qai sega ni kurabuitaki ni so na gauna ra dau tini yalolailai na tamata i Jiova.​—⁠2 Timoci 3:⁠1.

² Ia e se rawa ga nira reki na lotu Vakarisito nira sotava na dredre. (Cakacaka 5:​40, 41) Me macala se rawa vakacava oya, meda dikeva mada e liu na ibalebale ni reki. E tukuni ni reki “na marau ni yaloda e vu mai na noda rawata se kila nida na rawata e dua na ka vinaka.”a O koya gona, nida dabe da qai vakasamataka na veika vinaka eda sa vakalougatataki tiko kina edaidai, ena gauna vata oya, da rai sara tiko i liu ena veika rekitaki sa waraki keda tu mai ena vuravura vou ni Kalou, ena uqeti keda oqori meda reki tiko ga.

3. Ena vakasama cava e rawa ni tukuni ni tu na vuna vinaka vei keda kece meda reki kina?

³ O keda kece eda marautaka tu e so na ka vinaka eda vakalougatataki kina. De na kau tani nona cakacaka e dua na ulunivale. Ena lomaleqa beka kina. Baleta ni nona gagadre me qaravi iratou tiko ga na nona vuvale. Ia, ni se kaukaua vinaka tu na nona icegu qai bulabula vinaka, oqori e dua na ka e se rawa ni yaga tiko ga vua. Ke mani kunea e dua tale na cakacaka, ena rawa vua me cakacaka vakaukaua. Ena dua tale na yasana, de na vakasauri ga na nona tauvimate bibi e dua na yalewa lotu Vakarisito. Ia ena marautaka dina o koya na nodra veitokoni vakayalololoma na nona itokani kei ratou na lewe ni nona vuvale, era vukei koya me vosota na nona tauvimate ena yalo vakamarama kei na yaloqaqa. O ira tale ga na lotu Vakarisito kece, se mani duidui vakacava na kedra ituvaki, e rawa nira marau nira mai kilai koya “na Kalou mamarau,” o Jiova kei Jisu Karisito, “na Turaga mamarau duabau ga.” (1 Timoci 1:​11, NW; 6:​15, NW) Io, erau marau vakalevu na Kalou o Jiova kei Jisu Karisito. Erau reki tu ga e dina ni duatani sara na ituvaki e vuravura mai na ka a nakita taumada o Jiova. E levu sara na ka eda rawa ni vulica mai vei rau ena sala meda reki tiko ga kina.

Erau Reki Tu ga e Veigauna Kece

4, 5. (a) E vakaevei na loma i Jiova ni rau sa veivorati na imatai ni tamata? (b) E raica vakacava tiko o Jiova na yasana vinaka ena vukuda na kawatamata?

⁴ E totoka vakaoti na nodrau bulabula o Atama kei Ivi qai vinaka vakaoti na nodrau vakasama. E tu na cakacaka yaga me rau cakava qai mai totoka tu yani na nodrau itikotiko. O koya e uasivi oya ni sega ni cavuka na nodrau veitaratara kei Jiova. A inaki ni Kalou me rau bula mamarau tu ga. Ia erau a sega ni lomavakacegu na vuda ena isolisoli vinaka kece oya; rau butakoca na vuanikau vakatabui “mai na kau sa kilai kina na ka vinaka kei na ka ca.” Na talaidredre oqo e vu mai kina na ka rarawataki kece eda sotava tiko nikua na nodrau kawa.​—⁠Vakatekivu 2:​15-​17; 3:6; Roma 5:​12.

⁵ E dina ni sega ni raica o Jiova vei Atama kei Ivi na yalo ni vakavinavinaka, a reki tiko ga o koya. A nuidei tu nira na via qaravi koya e so vei ira na nodrau kawa. Ni se bera mada ga ni rau vakaluveni o Atama kei Ivi, e vakadinadinataka na levu ni nona nuidei o Jiova ena nona vakarogoya ni nona inaki me voli ira lesu na nodrau kawa dau talairawarawa! (Vakatekivu 1:​31; 3:​15) Ena veitabadrau na yabaki e muri, dua na iwase levu ni kawatamata era muria na nodrau ivakaraitaki o Atama kei Ivi, ia a sega ni vakanadakuya na kawatamata o Jiova ena vuku ni levu ni talaidredre. A kauaitaki ira ga na tagane kei na yalewa era ‘vakamarautaka na lomana,’ o ira na sasagataka dina mera vakamarautaki koya nira lomani koya.​—⁠Vosa Vakaibalebale 27:11; Iperiu 6:​10.

6, 7. Ena yavu cava soti e reki tiko ga kina o Jisu?

⁶ Vakaevei ga o Jisu​—⁠a reki tiko ga vakacava? Ni se dua tu na agilosi kaukaua mai lomalagi, a raica vinaka tu o Jisu na veika era cakava voli na tagane kei na yalewa e vuravura. A votu mamaca tu na nodra malumalumu, ia a lomani ira ga o Jisu. (Vosa Vakaibalebale 8:​31) E muri, ni sa mai bula e vuravura “ka tiko vata” kei na tamata, a sega ni veisau na nona rai me baleti ira na kawatamata. (Joni 1:​14) E rawa vakacava vua na Luve uasivi ni Kalou me duadua tu ga vaka oya na nona rai me baleta na kawatamata ivalavala ca?

⁷ Kena imatai, e yalorawarawa o Jisu ena vuku ni ka e dau namaka vua kei ira tale na so. A kila ni na sega tu ga ni vakalotutaki vuravura taucoko. (Maciu 10:​32-​39) Ke mani dua mada ga e ciqoma rawa mai vu ni lomana na itukutuku me baleta na Matanitu ni Kalou, sa dua na ka na nona marau. So na gauna e sega ni vinaka na nodra itovo kei na nodra ivalavala na nona tisaipeli, ia e kila tiko ga o Jisu ni lomadra dina mera cakava na inaki ni Kalou, qai lomani ira kina o koya. (Luke 9:​46; 22:​24, 28-​32, 60-​62) Ni masu gona vua na Tamana vakalomalagi, e umana kina o Jisu na vinaka era sa vakaraitaka na nona tisaipeli me yacova na gauna oya, e kaya: “A ra sa talairawarawa ki na nomuni vosa.”​—⁠Joni 17:⁠6.

8. Cavuta e so na sala eda rawa ni vakatotomuri Jiova kei Jisu kina ena ka e baleta na noda reki tiko ga.

⁸ Sega ni vakatitiqataki ni na yaga vei keda kece meda dau vakananuma na nodrau ivakaraitaki ena tikina oqo na Kalou o Jiova kei Karisito Jisu. Ena rawa beka nida vakatotomuri Jiova ena noda sega ni lomaleqataka soti ke sega ni yaco na ka me vaka sara ga eda namaka? Ena rawa beka nida muria vakavoleka na weniyava i Jisu ena noda tovolea me donu tiko ga na noda rai me baleta na ituvaki eda tiko kina ena gauna oqo, kei na noda dau yalorawarawa ena vuku ni ka eda namaka ena vukuda kei ira tale na so? Meda raica mada se na yaga vakacava e so vei ira na ivakavuvuli oqori ena dua na cakacaka eda dau vakamareqeta na lotu Vakarisito gugumatua ena veivanua kece​—⁠na cakacaka vakaitalatala

Me Donu Tiko ga Noda Rai Baleta na Cakacaka Vakaitalatala

9. A reki tale vakacava o Jeremaia, ia e yaga vakacava vei keda na nona ivakaraitaki?

⁹ E loma i Jiova meda rekitaka na noda qaravi koya. Me kua ni vakatau na noda reki mai na vua ni noda cakacaka. (Luke 10:​17, 20) Vica vata na yabaki na nona vunau voli na parofita o Jeremaia ena yalava e sega ni vuavuaivinaka. Ni sa rui lomaleqataka tale na nodra sega ni via vakarorogo na lewenivanua, e oti sara ga e kea na nona reki. (Jeremaia 20:⁠8) Ia e reki tale na yalona ni vakasamataka vakabibi na totoka ni itukutuku e kauta voli. A kaya vei Jiova o Jeremaia: “Sa kune na nomuni vosa, ia ka’u a kania; ka sa yaco na nomuni vosa me ka ni reki kei na ka ni marau ki na lomaqu: ni ka’u sa vakatokai e na yacamuni, Jiova.” (Jeremaia 15:16) Io, a rekitaka o Jeremaia na nona ilesilesi dokai me vunautaka na vosa ni Kalou. O keda tale ga meda rekitaka.

10. Kevaka mada ga e sega ni vuavuaivinaka ena gauna oqo na noda yalava, eda na rekitaka tiko ga vakacava na noda cakacaka vakaitalatala?

¹⁰ Ke ra mani le levu era sega ni via rogoca na itukutuku vinaka, e se levu ga na vuna meda reki kina nida cakacaka vakavunau voli. Nanuma tiko ni dei tu na vakanuinui i Jiova ni so na tamata era na via qaravi koya. Me vakataki Jiova, meda nuitaka tiko ga ni na so era na qai liaca ni tiko na ile bibi mera na vakatulewa kina, ra qai ciqoma sara na itukutuku me baleta na Matanitu ni Kalou. Meda kua ni guilecava ni dau veisau na kedra ituvaki na tamata. Ni yaco vakasauri na leqa se ka rarawataki, o koya mada ga e nanuma ni sa tu vua na ka kece e rawa ni tini lomatarotarotaka na inaki ni bula. Ia vakaevei ni sa kauaitaka vaka oya ‘na nona gagadre vakayalo,’ o na tu beka e kea ena tikinigauna oqori mo vukei koya? (Maciu 5:​3, NW) De dua, ni o lai vunautaka tale yani na itukutuku vinaka ena nomu yalava, sa na tu mai kina e dua ena via rogoci iko sara ga!

11, 12. Na cava e yaco ena dua na tauni, na cava eda vulica mai kina?

¹¹ E rawa nira veisau tale ga o ira na vakaitikotiko ena noda yalava. Meda raica mada oqo e dua na kena ivakaraitaki. Era vakaitikotiko ena dua na tauni lailai e vica na veiwatini gone, era vakaluveni ra qai dau veivolekati sara. Nira veisiko e kea na iVakadinadina i Jiova, dua vata ga na vosa era rogoca e veikatuba, “Keirau sega ni taleitaka!” Ia ni dua e kauai me via rogoca na itukutuku me baleta na Matanitu ni Kalou, totolo wale o ira na kena vo mera lai vakacuruvosa me baleti ira na iVakadinadina. A sega gona ni rawarawa na vunau e kea. Ia era sega ni soro na iVakadinadina; ra vunau tiko ga. Na cava sa qai yaco?

¹² Ni toso na gauna, ra tubu cake na gone ena tauni oya, ra vakawati, ra dui vakavale sara e kea. Nira liaca ni vaka me sega ni kauta mai na marau dina na nodra ivakarau ni bula, ra tekivu qara kina na ka dina e so vei ira na veiwatini gone oya. Era qai kunea na ka dina nira sa ciqoma na itukutuku vinaka era vunautaka na iVakadinadina. Ni oti gona e vica vata na yabaki, sa qai tubu tu na ivavakoso lailai e kea. Vakasamataka mada na levu ni nodra marau na dautukutuku ni Matanitu ni Kalou era sega ni datuvu! Me vakavureki mada ga vei keda na noda sega ni cegu ni kacivaka tiko ga na itukutuku lagilagi ni Matanitu ni Kalou!

Era na Tokoni Iko na Tacimu Vakayalo

13. O cei beka meda goleva nida sa yalolailai?

¹³ Ni sa qai toso cake ga na dredre ni bula, se o sotava na leqa levu, o dau qara i vei na vakacegu? O ira na tamata yalayala i Jiova era le vica na milioni era dau golevi Jiova e liu ena masu, oti oya, ra golevi ira na tacidra vakarisito. Ni se bula e vuravura o Jisu, dua na ka e dau vakamareqeta na nodra veitokoni na nona tisaipeli. Ena bogi ni se bera ni mate, a kaya ni o ira oya era “dautiko vata kei au e na noqu vosota na dauveivakatovolei.” (Luke 22:28) Eda kila ni o ira na tisaipeli oya era tamata ivalavala ca, ia na nodra yalodina e vakaceguya na Luve ni Kalou. Mera vu ni veivakaukauataki tale ga vei keda o ira eda sokalou vata.

14, 15. Erau vosota rawa vakacava na mate i luvedrau e dua na veiwatini, na cava o vulica rawa vei rau?

¹⁴ Rau a qai vakadinadinataka na talei ni nodra dau veitokoni na mataveitacini e dua na veiwatini lotu Vakarisito, o Michel kei Diane. A vakadinadinataki vakavuniwai ni tubu tiko e dua na ka ena mona i luvedrau sa yabaki 20, o Jonathan, e lotu Vakarisito bulabula qai levu na ka e vakanamata tu kina. Dua na ka na nodra sasaga na vuniwai mera vakabulai koya, ia e sa qai ca ga na bula i Jonathan, mani cibati koya vakadua ena dua na yakavi. Rau sa rarawa dina o Michel kei Diane. Rau kila ni Soqoni ni Cakacaka ena yakavi oya sa voleka ni cava. Ia ni rau gadreva vakalevu me rau vakacegui, rau kerei koya sara na qase a tomani rau voli me ratou salavata ina Kingdom Hall. Eratou tadu yani ni se kacivaki sara tiko ga na leqa i Jonathan. Oti na soqoni, ni rau matatagitagi tu, ra mai reguci rau sara na mataveitacini ra qai vakayaloqaqataki rau. E kaya o Diane: “Keirau yaco yani ina vanua ni soqoni ena rarawa levu, ia sa dua na ka na nodra veivakacegui na mataveitacini! Sega ni kena ibalebale qo nira kauta tani na mosi ni loma i keirau, ia era vukei keirau ga me keirau vosota!”​—⁠Roma 1:​11, 12; 1 Korinica 12:​21-​26.

¹⁵ Na leqa erau sotava oya o Michel kei Diane e vakavolekati rau sara ga vei ira na tacidrau vakayalo. Erau veivolekati tale ga kina. Kaya o Michel: “Au sa qai mai vakamareqeta ga kina na watiqu lomani. Ni dau tarai keirau na yalolailai, keirau na veivosakitaka sara e so na usutu vakaivolatabu kei na nona sa dau vakaukauataki keirau tiko kina o Jiova.” Kaya tale o Diane: “Sa qai talei cake ga vei keirau ena gauna qo na Matanitu ni Kalou keirau vakanuinui tu kina.”

16. Na cava e yaga kina meda vakaliuliu ni vakaraitaka vei ira na tacida na lomada?

¹⁶ Io o ira na tacida vakarisito era na vu ni “veivakacegui” vei keda nida sotava na leqa, era na vukei keda meda reki tiko ga. (Kolosa 4:​11, VV) Ia ena sega ni tu tu ga sa ra kila sara na ka eda vakasamataka tiko. De vinaka meda vakaraitaka vei ira nida gadreva na veitokoni. Oti oya, eda na qai vakavinavinakataki ira na tacida mai vu ni lomada ena vuku ni nodra dau veivakacegui, da okata oya ni vaka me veivakacegui sara tiko ga o Jiova.​—⁠Vosa Vakaibalebale 12:25; 17:⁠17.

Raica Mada na Nomu iVavakoso

17. Na ka dredre cava soti e sotava e dua na itubutubu le dua, ia na cava na noda rai me baleti ira era vakataki koya?

¹⁷ Na nomu raici ira ga vakavoleka na tacimu vakayalo, na levu tale ga ni nomu vakamareqeti ira kei na nomu rekitaka nomu veiwekani kei ira. Raica mada na nomu ivavakoso. Na cava o raica? E dua beka kina na itubutubu le dua e sasaga tiko vakaukaua me susugi ira na luvena ena ka dina? O sa bau vakasamataka na nona ivakaraitaki vinaka? Tei vakasamataka mada e so na leqa e sotava. O Jeanine, e dua na itubutubu le dua, e cavuta e so vei ira oqori: na galili, nodra dau vakasagai koya na tagane mai vanua ni cakacaka, kei na lailai ni ilavo e rawata. Ia na ka e dredre duadua vua, oya na nona kila na yalodratou na luvena, ni ratou duidui gona. Dua tale na leqa e kauta cake mai o Jeanine: “Ni sega na watiqu, dau rawarawa vei au meu vakaliuci luvequ tagane me vaka sara ga e ulunivale, dina ga niu kila ni sega ni dodonu meu cakava qo. E dua tiko na luvequ yalewa, qai so na gauna au dau talaucaka tu vua na noqu leqa, na ka e dodonu ga meu tukuna vua e dua keirau itabavata.” E cakacaka saumi o Jeanine me qarava kina na nona vuvale me vakataki ira ga e vica vata na udolu na itubutubu le dua era qarava na Kalou ena yalodina. E tuberi rau tale ga na luvena ena iVolatabu, vakavulici rau ena cakacaka vakaitalatala, qai kauti rau ina soqoni ni ivavakoso. (Efeso 6:⁠4) Sa na wacava na marau i Jiova ni raica nodratou sasaga e veisiga na vuvale oqo me ratou yalodina tiko ga! Eda rekitaka dina nira maliwai keda tu o ira vaka oqo!

18, 19. Vakamacalataka se da na taleitaki ira cake vakacava na lewe ni ivavakoso.

¹⁸ Raica tale mada na nomu ivavakoso. De o na raica ni so na yada se dawai yalodina era “sega ni yali vakadua” mai na soqoni. (Luke 2:​37, NW) Era dau galili beka ena so na gauna? Io. Ni mositi ira vakalevu na takali nei watidra! Ia era vakaogai ira tiko ga ena cakacaka i Jiova ra qai dau veikauaitaki. Nira dau matamamarau tu ga, era reki tale ga kina na lewe ni ivavakoso! E kaya e dua na lotu Vakarisito sa yabaki 30 vakacaca na nona cakacaka vakaitalatala vakatabakidua: “Dua vei ira na ka au rekitaka vakalevu duadua oya noqu raica nira qaravi Jiova tiko ga ena yalodina na taciqu kei na ganequ era vosota e levu sara na ka dredre!” Io, era vu ni veivakayaloqaqataki vei ira na gone o ira na lotu Vakarisito itabaqase ena keda maliwa.

¹⁹ Vakaevei ga o ira na ka vou era se qai tekivu sosoqoni ena ivavakoso? Sega li ni uqeti keda na nodra dau vakamacala ena soqoni? Vakasamataka na levu ni nodra toso vakayalo mai na gauna sara era se tekivu vulica kina na iVolatabu. Ena marautaki ira dina o Jiova. Ia vakaevei o keda? Eda dau vakavinavinakataki ira, da vakacaucautaka na nodra sasaga?

20. Na cava e rawa ni tukuni kina ni lewe ni ivavakoso yadua era yaga kece ena ivavakoso?

²⁰ E vakacava, o vakawati, o dawai, se o itubutubu le dua? O gonetagane se goneyalewa sega ni vakatamani (se vakatinani), se dua beka o iko sa leqa na watimu? O dua o lewe ni ivavakoso tu mai ena vica vata na yabaki se o se qai mai lewena ga oqo? Mo kila tiko ni veivakauqeti dina na nomu ivakaraitaki vinaka. Qai vakavureki tale ga vei keimami nomu dau veitomani ena lagasere ena ivavakoso, kei na nomu vakamacala se vakaitavi ena Koronivuli ni Vuli iTalatala Liutaki Vakalou. Ia o koya e bibi cake sara, ni marau kina o Jiova.

21. E levu tu na vuna meda cakava na cava, ia na taro cava soti e votu kina?

²¹ Io, ena gauna dredre mada ga oqo, se rawa ga nida rekitaka na noda sokalou vua na noda Kalou mamarau. Levu sara tu na vuna meda ciqoma kina na vosa ni veivakayaloqaqataki i Paula: “Mo ni reki tiko ga, . . . ena qai tiko vata kei kemuni na Kalou ni loloma kei na vakacegu.” (2 Korinica 13:​11, NW) Ia vakacava nida sotava na draki ca levu se dua na leqa levu, se da vakacacani, se tarai keda na leqa vakailavo? Ena rawa beka nida reki tiko ga ena ituvaki vaka oya? Meda qai dui sauma na taro oqo nida dikeva na ulutaga e tarava.

[iVakamacala e ra]

Sauma Mada

• E vakamacalataki vakacava na reki?

• E yaga vakacava na rai donu meda reki tiko ga kina?

• Ena donu tiko ga vakacava na noda rai me baleta na yalava ni noda cakacaka vakavunau?

• Ena sala cava soti o taleitaki ira kina na tacimu tagane kei na tacimu yalewa ena nomu ivavakoso?

[iYaloyalo ena tabana e 10]

Rawa nira veisau o ira na tiko ena noda yalava

[iYaloyalo ena tabana e 12]

Na veika dredre cava era vakila tiko o ira na lewe ni nomu ivavakoso?