Marautaka na iNuinui ni Matanitu ni Kalou!

ERA soqo vata mai na le 5,784 ena 10 Maji, 2001, mera mai tiko ena dua na soqo marautaki ena tolu na vale mai na yasana o Niu Yoka, era dau vakayagataka na vuvale levu e Peceli. Na nodra soqo ni tuvaitutu na ika110 ni kalasi mai na nodra koronivuli na daukaulotu e Kiliati.

A kidavaki ira kece qai dolava na porokaramu o Carey Barber, e dua na lewe ni iLawalawa Dauvakatulewa ni iVakadinadina i Jiova, ena nona kaya: “E marautaki dina nida kila ni sa 110 na kalasi ni gonevuli e Kiliati era vakavulici ena cakacaka vakaulotu, ra qai lesi ina veiyasa i vuravura.”

Na Sala Mo Marau Tiko ga Kina

Ni doladola oti o Brother Barber, a vosa vei ira na vakarorogo, wili kina na le 48 na gonevuli era mai tuvaitutu o Don Adams, ena ulutaga “Na Veivakalougatataki Mai Vei Jiova e Veivakavutuniyautaki.” Ni yavutaka na nona vosa ena Vosa Vakaibalebale 10:​22, a vukei ira na vakarorogo mera kua ni guilecava ni o Jiova ena vakacegui ira qai vakalougatataki ira na nona dauveiqaravi ke ra vakaliuca ena nodra bula na veika e vauca na Matanitu ni Kalou. A vakayaloqaqataki ira na gonevuli mera ciqoma na nodra ilesilesi vou ena yalo vata ga a vakaraitaka na yapositolo o Paula ena gauna a vakamasuti kina me ‘lai Masitonia me lai veivuke.’ (Cakacaka 16:9) Dina ni na gadrevi vua me vosota na veika dredre, ia na nona tu vakarau me lako ina nona ilesilesi me lai vunau a sotavi kina e vuqa na ituvaki marautaki.

Sa mai cava na nodra vuli vula lima na lewenikalasi era mai tuvaitutu oqo, era vulica na iVolatabu ra qai vakarautaki tale ga ina cakacaka vakaulotu. Ia, o Daniel Sydlik, e dua na lewe ni iLawalawa Dauvakatulewa ni iVakadinadina i Jiova, e vakayaloqaqataki ira mera vuli tiko ga. Nona vosa tiko ena ulutaga “Mo Tisaipeli Dina,” a kaya: “Mo dua na tisaipeli ena vinakati mo na talairawarawa tiko ga ina vosa i Jisu. Ena vakatau oqo ena noda dau tu vakarau ena veigauna meda rogoca na nona vosa, na nona itukutuku, kei na nona ivakavuvuli.” A tukuna tale ga o koya ni o ira na tisaipeli i Karisito era dau qai vakatulewa ga nira rogoca na domo ni nodra Turaga; e bulataka o Karisito na vuku vakalou. (Kolosa 2:3) E sega ni dua vei keda ena rogoca ga vakadua na veivosa i Jisu qai tukuna ni sa kila kece na ka e baleti koya, mani vakayaloqaqataki ira kina na gonevuli oqo o Brother Sydlik mera tomana tiko ga na nodra vulica, bulataka, qai vakatavulica na ka dina vakarisito ni na rawati kina na veisereki.​—Joni 8:​31, 32.

Mo marautaka tiko ga na nomu veiqaravi vua na Kalou ena gadrevi mo na tu vakarau mo ciqoma na veivakavulici kei na veivakadodonutaki. E taroga e dua na qasenivuli e Kiliati, o Lawrence Bowen, “Ena Vakadodonutaki Iko na Nomu Ivi?” E vakamacalataka ni ivi vakaivakatakarakara ena iVolatabu e dusia na nona vakanananu titobu se ivakarau ni yalona sara ga e dua. Ena rawa ni vakadodonutaka e dua kevaka e sa vakayacoka sara ga ina nona bula na ivakasala mai na Vosa ni Kalou. (Same 16:7; Jeremaia 17:10) E vakamarautaki Jiova na nona yalodina e dua. Ni wilika oti na Vosa Vakaibalebale 23:​15, 16, a taroga o koya e vunau tiko: “Ena vakadodonutaki iko na nomu ivi?” E tomana ena nona kaya: “Keimami masulaka me vakadina kina, oni na vakavuna me na marau vakaidina o Jiova. Ena tarai koya na ka oni cakava. Io, oni na vakamarautaka na ivi ivakatakarakara ni Kalou ni oni dei tiko ga ena nomuni ilesilesi ena yalodina.”

Na itinitini ni vosa ena porokaramu oqo a vosa kina o Mark Noumair, a kaulotu tu mai Kenya ni bera ni dua na qasenivuli e Kiliati. Na nona ulutaga “Sa Vinaka ni sa Rai na Matada” e vakabibitaka na noda lomavakacegu. Me salavata kei na Dauvunau 6:​9, a vakatura o Brother Noumair: “Ciqoma na kemu ituvaki. Oya ni ‘sa rai na matada.’ Mo kua ni tatadrataka tu ga na ka mo na cakava, saga mo cakacaka ga ena lomanibai ni ituvaki o sotava tiko. O na sega ni lomavinaka, se sega ni na lomavakacegu kevaka o tatadrataka tu ga na ka, se sivia na ka o namaka, se o dau vakaosota na nomu vakasama ena veika o sega soti ni taleitaka me baleta na nomu ilesilesi.” Io, na vanua cava ga eda vakaitikotiko kina se ituvaki cava ga eda sotava tiko, ke tiko vei keda na lomavakacegu sa mai vua na Kalou, eda na marautaka na noda veiqaravi vua na noda Dauveibuli Cecere.

Marau e Sotavi Ena Cakacaka Vakavunau, e Kiliati Tale Ga

Ni soli oti na ivakasala yaga mai na veiulutaga oya, era tukuna e so na gonevuli na veika marautaki era a sotava ena nodra cakacaka vakaitalatala ena loma ni nodra vuli vula lima. Ena nona veidusimaki o Wallace Liverance, na vunivola ni koronivuli e Kiliati, era tukuna na gonevuli era mai tuvaitutu oqo na sala era vakadonui kina mera italatala ni Kalou. (2 Korinica 4:2) Era uqeta rawa gona kina na nodra lewaeloma soli vakalou na so. Na nodra vakasavuirogorogo na gonevuli e vakaraitaka na sala era vuli iVolatabu rawa kina na tataleitaki era sotava e salatu, ena vunau e veivale, kei na so tale na ituvatuva. Ena so tale na gauna, era kaya na tataleitaki ni ivola vakaivolatabu ni isoqosoqo i Jiova e tabaki kina na ka dina. A vakayacoka sara ga e dua na tikinivolatabu vua e dua na itaukeinivale. Mani yaco me sa vuli iVolatabu sara tiko ga oqo kei ira na iVakadinadina i Jiova.

Tarava sa qai vakatarogi ira era a vuli e Kiliati ena veiyabaki sa sivi o Joel Adams. Nona ulutaga “Mo Vuli Tiko ga, Mo Qaravi Jiova Tiko Ga.” O ira era vakatarogi era soli ivakasala veiganiti sara ga vei ira na daukaulotu vou. A kaya o Harry Johnson ena nona nanuma lesu na nona vuli mai na ika26 ni kalasi e Kiliati: “Keimami vulica ni o Jiova a liutaki ira na nona tamata ena liutaki ira tiko ga. Na veivakadeitaki oya e veivakauqeti ena veiyabaki kece oqo.” A vakasalataki ira na gonevuli o William Nonkes, e dua a vuli mai na ika53 ni kalasi e Kiliati: “Na ka e bibi duadua, mo nanuma dei na ivakavuvuli vakaivolatabu, qai vakayagataka ina vakatulewa kece o cakava ena nomu bula oqo kei na veigauna kece ga se bera mai. Ena vukei iko mo na dei tiko ga ena nomu ilesilesi, qai marautaka tale ga na veivakalougatataki i Jiova.”

Ena nona itavi ena porokaramu, a digitaka o Richard Rian na ulutaga “Vakaukauataki Mo Cakava na Loma i Jiova.” E dua vei ira na vakatarogi o John Kurtz, a vuli mai na ika30 ni kalasi, qai lai kaulotu tu mai Sipeni me sivia e 41 na yabaki. Ni tarogi na cava soti e vulica e Kiliati, a kaya o Brother Kurtz: “Na ivola e yavutaki kina na vuli na iVolatabu. E vakayagataki tale ga e so na ivola vakaivolatabu me keimami kila vinaka kina na iVolatabu. Na kena era sa tu kece vei keda. E sega ni dua na itukutuku vunitaki e vakavulici e Kiliati. Au sega ni dau cegu na vakabibitaka na tikina oqo, baleta na veika kece ga e vulici e Kiliati e tu vakarawarawa kece vei keda na kena ivakamacala.”

Sa qai taucoko sara na porokaramu vakayalo totoka oqo ni mai tinia o Brother Gerrit Lösch, e dua na lewe ni iLawalawa Dauvakatulewa ni iVakadinadina i Jiova ena ulutaga “Vukataki Ena Taba i Jiova, Qai Vakarurugi Tale ga Kina.” A vakamacalataka ni veitaqomaki kei na veitokoni ni Kalou vei ira na nona dauveiqaravi yalodina e vakatayaloyalotaka vakaivolatabu na taba ni ikeli. (Vakarua 32:​11, 12; Same 91:4) Na ikeli levu e dau tevuka na tabana, so na gauna me vica vata tu na aua, me vakarurugi ira kina na luvena. So na gauna ena ovici ira na luvena ena tabana na tina ni ikeli me taqomaki ira mai na cagi batabata. Ena sala vata oya qai lako vata kei na nona inaki, e vukei ira kina na nona dauveiqaravi yalodina o Jiova, vakabibi ena gauna era sotava kina na veivakatovolei vakayalo. Ena sega ni vakalaiva o Jiova me sivia na nodra kaukaua na ka era vakatovolei kina na nona dauveiqaravi, ia ena solia ga na sala mera dro bula kina kei na kaukaua mera vosota kina. (1 Korinica 10:​13, VV) A tinia o Brother Lösch ena nona kaya: “Ena vinaka meda vakaruru toka mada ga ena ruku ni taba i Jiova meda taqomaki tiko ga kina vakayalo. E kena ibalebale oqo meda kua ni bucina na yalo ni via lewai keda ga. Meda kabiti Jiova tiko mada ga kei na nona isoqosoqo e vaka na tina, nida na sega ni tawasei keda mai na nodrau veidusimaki kei na veivakasalataki vakayalololoma.”

A wilika na jeameni na nodra vakanuinui vinaka e so mai na veiyasa i vuravura. Oti oya sa qai soli na nodra sitivikiti. Ena gauna a tekivutaki kina na koronivuli e Kiliati, a kena inaki me vica wale ga na kalasi ena loma ni lima na yabaki. Ia sa oti tale oqo e 58 na yabaki na nona vakatara tiko o Jiova na Kalou me cici tiko. Me vaka ga e kaya o Brother Barber ena nona dolava na porokaramu: “E totoka dina na kedra irogorogo na vuli e Kiliati mai na 1943, na gauna e tekivutaki kina o Kiliati! Na nodra cakacaka vata era vukei ira kina e vica vata tale na drau na udolu na tamata yalomalumalumu ena vuravura oqo mera mai lewe ni isoqosoqo lagilagi i Jiova.” Io, e veivuke dina na koronivuli ni kaulotu oqo ena nodra marautaka na vica vata na milioni na inuinui ni Matanitu ni Kalou.

[Kato ena tabana e 24]

VEIKA ME BALETA NA KALASI

Vanua era cavutu mai kina: 8

Vanua era lesi kina: 18

Levu ni gonevuli: 48

iVakatautauvata ni nodra yabaki: 34

iVakatautauvata ni yabaki ena dina: 18

iVakatautauvata ni yabaki ena cakacaka vakaitalatala vakatabakidua: 13

[iYaloyalo ena tabana e 25]

Nodra Tuvaitutu na Kalasi 110 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Vacek, E.; Madelin, L.; Evans, G.; Watanabe, K.  (2) Trafford, P.; Turfa, J.; Wilson, P.; Williams, R.; Weber, A (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P.  (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T.  (5) Evans, N.; Gold, R.; Bollmann, I.; Vacek, R.; Oundjian, J.; Wilson, N.  (6) Turfa, J.; Zuidema, L.; Zuidema, R.; Bengtsson, C; Bengtsson, J.; Galano, M.; Galano, L.  (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F.  (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.