Taro na Dauwiliwili

Na cava na “[i]vakavakacegu” e cavuti ena Iperiu 4:9-11, e rawa vakacava vua e dua me “curu ki nai vakavakacegu ko ya”?

A vola na yapositolo o Paula vei ira na Iperiu lotu Vakarisito ena imatai ni senitiuri: “Sa vo tiko e dua nai vakavakacegu me nodra na tamata ni Kalou. Ia ko koya sa curu ki na nonai vakavakacegu, sa vakacegu mai na nona cakacaka, me vaka sa vakacegu na Kalou mai na nona. O koya oqo me da qai gumatua sara me da curu ki nai vakavakacegu ko ya.”​—Iperiu 4:9-11.

Ni tukuna o Paula sa vakacegu mai na nona cakacaka na Kalou, e rairai a vakaibalebaletaka tiko na ka e vakamacalataki ena Vakatekivu 2:2, eda wilika: “E na kenai kavitu ni siga sa vakaotia na Kalou na nona cakacaka sa kitaka ko koya; a sa vakacegu ko koya e na kenai kavitu ni siga mai na nona cakacaka kecega sa kitaka ko koya.” Na cava e “vakacegu” kina o Jiova “[e]na kenai kavitu ni siga”? A sega ni gadreva me vakaukauataki tale “mai na nona cakacaka kecega sa kitaka ko koya.” E idusidusi vei keda na tikina e tarava: “A sa vakalougatataka na kenai kavitu ni siga na Kalou ka vakatabuya, ni sa vakacegu kina mai na nona cakacaka kecega sa bulia na Kalou ka kitaka.”​—Vakatekivu 2:3; Aisea 40:26, 28.

Mai na ono na siga sa sivi, e duidui taudua na “[i]kavitu ni siga” baleta ni siga oya a vakalougatataka na Kalou qai vakatabuya, na siga e digitaki, se vakatabakidua, ina dua na inaki uasivi. Na inaki cava? Dua na gauna e liu, a vakatakila na Kalou na nona inaki me baleta na kawatamata kei na vuravura. A vakarota na Kalou vei rau na imatai ni tagane kei na watina: “Drau vakaluveni, ka tubu me lewe vuqa, ka vakatawai vuravura, ka vakamalumalumutaka; ka lewa na ika ni waitui, kei na manumanu vuka, kei na ka bula kecega sa qasi voli e dela i vuravura.” (Vakatekivu 1:28) Sa vakarautaka na Kalou vua na kawatamata kei na vuravura e dua na tekitekivu vinaka, ia ena taura na gauna me vakamalumalumutaki qai veisautaki na vuravura taucoko me parataisi mera bula kina na vuvale kawatamata uasivi, me vaka ga a nakita na Kalou. O koya gona, ena “[i]kavitu ni siga,” a vakacegu kina na Kalou, se cegu, a sega ni bulia tale kina e dua na ka e vuravura me rawa nira tubu vinaka kece na veika sa buli oti me vaka na nona lewa. Ni mai cava na “siga” oya, ena vakavatukanataki na ka kece a nakita taumada na Kalou. Ena vakacava na dede ni vakacegu oya?

Nida lesu tale ina vosa i Paula ena Iperiu, e vakabibitaka tiko o koya ni “sa vo tiko e dua nai vakavakacegu me nodra na tamata ni Kalou,” qai uqeti ira na nona itokani lotu Vakarisito mera gumatua sara mera “curu ki nai vakavakacegu ko ya.” E laurai ni gauna e vola kina o Paula na veivosa oya, sa tekivu tu mai ena rauta ni 4,000 na yabaki i liu na “[i]kavitu ni siga” e vakacegu kina na Kalou, ia e se vakacagau tiko ga. Ena sega ni cava me yacova na gauna sa vakavatukanataki kina vakadua na inaki ni Kalou vua na kawatamata kei na vuravura ni cava na Duanaudolu na Yabaki ni Veiliutaki i Jisu Karisito, na “Turaga ni Siga ni Vakacecegu.”​—Maciu 12:8, VV; Vakatakila 20:1-6; 21:1-4.

Ni vakasamataka tiko na inuinui totoka oya, a vakamacalataka o Paula na sala ena curuma rawa kina e dua na ivakavakacegu ni Kalou. A vola: “Ko koya sa curu ki na nonai vakavakacegu [na Kalou], sa vakacegu mai na nona cakacaka.” E macala e ke, ni a dua na nona itekitekivu uasivi na kawatamata, ia a sega ga ni curu ena ivakavakacegu ni Kalou. A vakavuna oqo ni lekaleka wale na nodrau marautaka o Atama kei Ivi na gauna ni vakacegu ni Kalou ena “[i]kavitu ni siga,” ni rau sega ni muria na nona ituvatuvanaki vei rau. Rau talaidredre rau qai sega ni vinakata me lewai rau na Kalou. Rau via muria ga na sasaga i Setani, sega ni nona veidusimaki vakayalololoma na Kalou (Vakatekivu 2:15-17) Kena itinitini, rau vakayalia kina na inuinui ni bula tawamudu ena vuravura parataisi. Tekivu mai na gauna oya, era bobula kina na kawatamata kece ina ivalavala ca kei na mate.—Roma 5:12, 14.

A sega ni vakaseva na inaki ni Kalou na nona mai talaidredre na kawatamata. A vakacagau tiko ga na gauna ni nona vakacegu. Ia, a vakarautaka o Jiova e dua na isolisoli vakayalololoma—⁠na ivoli—⁠ena vuku i Luvena, o Jisu Karisito, mera vakanuinui kina o ira kece era vakabauta na ivoli mera na sereki se vakacegui mai na ivau ni ivalavala ca kei na mate. (Roma 6:23) Oya na vuna e vakauqeti ira kina na nona itokani lotu Vakarisito o Paula mera ‘vakacegu mai na nodra cakacaka.’ Mera ciqoma na isolisoli ni veivakabulai ni Kalou ra qai kua ni via lewa ga na nodra bula ena gauna mai muri, me vakataki Atama kei Ivi. Mera kua tale ga ni vakadonui ira ga.

E dau veivakacegui dina ke da sega ni vakaogai keda ena veika e yaga ga vei keda se na cakacaka ni noda bula e veisiga meda cakava kina na loma ni Kalou. E veisureti o Jisu: “Dou lako mai vei au, koi kemudou vakaaduaga sa oca ka colata nai colacola bibi, ia ka’u na vakacegui kemudou. Vakataqara vei kemudou na noqui vua, ka vuli vei au, ni’u sa yalomalua ka yalomalumalumu: dou na kunea kina na vakacegu ni yalomudou. Ni sa rawarawa na noqui vua, ka mamada na noqui colacola.”​—Maciu 11:28-30.

A vakayaloqaqataki ira dina na Iperiu lotu Vakarisito mai Jerusalemi na ivakamacala i Paula me baleta na ivakavakacegu ni Kalou kei na sala ena rawata kina e dua, nira a sotava e levu na veivakacacani kei na veivakalialiai ena vuku ni nodra vakabauta. (Cakacaka 8:1; 12:1-5) Ena vakayaloqaqataki ira tale ga na lotu Vakarisito edaidai na veivosa i Paula. Nida kila deivaki ni sa roro mai na gauna me vakayacora kina na Kalou na nona vosa ni yalayala ena kena yaco na vuravura me parataisi ena ruku ni veiliutaki dodonu ni nona Matanitu, eda na vakacegu tale ga mai na noda cakacaka da qai gumatua sara meda curu ina nona ivakavakacegu.​—Maciu 6:10, 33; 2 Pita 3:13.

[iYaloyalo ena tabana e 31]

Ena qai vakavatukana na nona vosa ni yalayala na Kalou me parataisi na vuravura ni sa cava na siga ni nona vakacegu