Cava a Rusa Kina na Vuravura ena Gauna Oya?

A SEGA ni leqa tubukoso na kena yaco na Waluvu ena vuravura taucoko. Ni a vakataulewataka sara ga na Kalou. Era a vakasalataki, ia era sega ni via kauai kina na lewe vuqa. Na cava na vuna? E vakamacalataka o Jisu: “Ni sa bera na waluvu era sa kana na tamata, ka gunu, ka vakawati ka veimusumusukitaki me ra vakawati, ka yacova na siga sa vodo kina ki waqa ko Noa; a ra sa sega mada ni kila eliu, [se, “sega ni kauaitaka,” NW] a sa qai yaco dina na waluvu ka kauti ira kece yani.”​—Maciu 24:​38, 39.

Gauna ni Rarama

Ni bera na Waluvu, e so na veika vivinaka a donui ira ia sa sega ni basai keda edaidai. Me kena ivakaraitaki, era a vosataka na kawatamata kece e dua ga na vosa. (Vakatekivu 11:1) Ena vakarawarawataka oqori na nodra soli vakasama na kenadau ena veicakacaka ni liga kei na veika vakasaenisi. Kuria, ni dede na nodra bula e kena ibalebale nira na rawa ni vakavinakataka cake tiko ga na veika era sa vulica mai ena loma ni vica vata na senitiuri.

So era kaya ni a sega ni dede dina na nodra bula na tamata ena gauna oya kei na yabaki e cavuti ena ivolatukutuku vakaivolatabu e vakaibalebaletaka ga na vula. E dina beka oya? Vinaka meda dikeva mada na ivakaraitaki i Meelelieli. E kaya na iVolatabu: “A sa bula ko Meelelieli ka yabaki onosagavulu ka lima, a sa qai sucu ko Jereti na luvena: . . . na yabaki kecega sa bula kina o Meelelieli sa walu na drau ka ciwasagavulu ka lima na yabaki: a sa qai mate.” (Vakatekivu 5:​15-​17) Ke dua na yabaki e vakaibalebaletaka e dua na vula, e kena ibalebale ni a vakaluveni o Meelelieli ni se qai yabaki lima! Ia, e sega ni rawa ni vaka kina, sa baleta ga ni gauna oya era se volekata na tamata na bula uasivi a vakayalia na imatai ni tamata, o Atama. Era a bula dina me vica vata na senitiuri. Na cava soti era a rawata?

Vica vata na senitiuri ni bera na Waluvu, sa dua na ka na tubu ni lewe i vuravura, mani tara gona kina e dua na koro o Keni, na luve i Atama, qai vakatoka me o Inoki. (Vakatekivu 4:​17) Ena loma ni gauna ni bera na Waluvu, e levu na mataqali iyaya era a buli kina. Era a bula voli kina “na matai ni parasa kei na aironi.” (Vakatekivu 4:​22) Sega ni vakabekataki ni veiyaya ni cakacaka oqori a vakayagataki ena tarataravaki, cakacaka vakamatai, cula isulu, kei na teitei. Era cavuti ena ivolatukutuku ni nodra bula na kawatamata e liu na cakacaka kece oqori.

Ni toso na gauna sa na rabailevu sara na kilaka e rawati, e sega ni vakabekataki nira a vakayagataka na kila oqo na itaba era qai muri mai mera kenadau kina ni tukikaukamea, qaravi qele, susu sipi kei na bulumakau, volaivola, droini kei na ceuceu. Me kena ivakaraitaki, o Jupali a “tamadra kecega era dau ni api kei na kove.” (Vakatekivu 4:​21) A gauna ni rarama oya. Ia, a qai mudu vakasauri na veika kece. Na cava a yaco?

Na Cava a Vu ni Leqa?

E levu na ka vivinaka a rawati ni bera na Waluvu, ia a ca na kena itekitekivu. A vorata na Kalou na vuda, o Atama. A vakamatei tacina o Keni, a tara na imatai ni korolevu a volatukutukutaki. Sa rauta me tubu totolo na ca! Na leqa ni bula i Atama era sa qai mai tauca tu kina na kena isoqoni na nona kawa.​—Roma 5:​12.

E sa via yacova sara toka ga na kena iyacoyaco na veika ena gauna a vakadeitaka kina o Jiova me cici tale toka ena 120 na yabaki na ituvaki oya. (Vakatekivu 6:3) E kaya na iVolatabu: “Sa ka levu nai valavala ca ni tamata e vuravura, io sa ca walega e na veisiga kecega nai naki kecega kei na nanuma ni lomana. . . . A sa sinai e nai valavala kaukauwa ko vuravura.”​—Vakatekivu 6:​5, 11.

Yaco na gauna, sa qai tukuni vakadodonu vei Noa nira na rusa na tamata kece ena dua na waluvu. (Vakatekivu 6:​13, 17) A “dauvunautaka nai valavala dodonu” o Noa, ia a dredre dina mera vakabauta na tamata ni sa vakarau rusa na veika kece e tu yavoliti ira. (2 Pita 2:5) Eratou a bula wale ga e le walu ni ratou a talairawarawa ina veivakasalataki. (1 Pita 3:​20) Na cava e bibi kina vei keda ena gauna oqo?

E Tarai Keda Vakacava Oya?

Noda bula ena gauna oqo e vaka sara ga na gauna i Noa. Eda dau rogoca wasoma na ka vakadomobula era cakava na batikadi, laba kawa, ra mate e levu ena veivanavanai vakaveitalia, qai veivakurabuitaki na takalevu ni ivalavala kaukaua e vale. E sa baci sinai tale tu o vuravura ena itovo voravora me vaka ga e liu, sa vakatakilai oti vei vuravura ni na vakarau lewai. A kaya sara ga o Jisu ni na lako mai me vaka na Turaganilewa sa lesia na Kalou, me tawasei ira na tamata me vaka ga na nona tawasei ira na sipi kei na me na ivakatawa. O ira e sega na kedra yaga, e kaya o Jisu, “era na qai lako . . . ki na cudruvi tawa mudu.” (Maciu 25:​31-​33, 46) Ia, e kaya na iVolatabu ni gauna oya, era na bula e le vica vata na milioni​—na isoqosoqo levu era sokaloutaka na Kalou dina duadua ga. Era na marautaka tiko ga na bula vakacegu kei na bula nuidei ena vuravura e se bera mai, na ka e sega ni bau vakilai e liu.​—Maika 4:​3, 4; Vakatakila 7:​9-​17.

Levu era vakalialia na veika e tukuna na iVolatabu kei na ivakasala ni veilewai ena vakadinadinataki kina vei ira na dina ni veivosa oya. Ia, na yapositolo o Pita e vakamacalataka nira lecava na kena dina o ira na tawavakabauta. A vola: “Ni na lako mai e na gauna emuri sara eso na dauveivakasewasewani, . . . ka kaya, Evei na vosa ni yalayala ni na lako tale mai ko koya? . . . Ia na ka oqo era sa vinakata me ra lecava, ni sa vosa ni Kalou ka tu kina na lomalagi eliu, kei na vuravura sa wase mai na wai, a sa tu e na vuku ni wai; a sa vakarusai kina na vuravura sa tu e na gauna ko ya, e na waluvu: ia na lomalagi kei na vuravura sa tu edaidai, sa maroroi ga e na vosa talega ko ya, sa maroroi ki na bukawaqa me yaco mada na siga ni lewa kei na veivakarusai ni tamata tawalotu.”​—2 Pita 3:​3-7.

Me ivakaraitaki ni talairawarawa ina ivakaro vakaparofisai i Jisu, e sa gutaki tiko edaidai ena vuravura taucoko na veivakasalataki ni kena sa roro voleka mai na siga ni veilewai, kei na vunautaki ni itukutuku vinaka ni bula sautu ena sotavi ni oti oya. (Maciu 24:14) E sega ni dodonu meda taura vakamamada na veivakasalataki oya. E dau vakayacora na Kalou Kaukaua Duadua na nona vosa ni yalayala.

Na Vuravura e se Bera Mai

Nida raica na veiveisau ena vakarau yaco, sa na mua e vei na bula ni kawatamata? Ena iucu ni nona iVunau rogolevu mai na Ulunivanua, a yalataka o Jisu: “Sa kalougata ko ira sa yalomalua: ni ra na taukena na vanua.” A tomana ena nona vakavulica vei iratou na nona tisaipeli me ratou masu vua na Kalou: “Me yaco na nomuni lewa. Me caka na lomamuni e vuravura me vaka sa caka mai lomalagi.” (Maciu 5:5; 6:​10) Io, a vakavulica sara ga o Jisu ni na waraki ira tu na kawatamata yalodina na veigauna uasivi sa tu mai liu ena vuravura ga oqo. E vakatoka o koya “na vuravura vou.”​—Maciu 19:​28, VV.

O koya gona ni o vakasamataka tiko na veigauna sa tu oqo e liu, kua ni o vakalaiva na veivakasewasewani mo vakatitiqataka kina na ivakasala ni Kalou. E dina ni na rairai tudei qai sa dede na kena cici tu mai na noda vuravura oqo. Ia, meda kua ni vakanuinui kina. E sa vakataulewataki oti na kawatamata. Meda tugana mada ga i lomada na icavacava ni nona ivola na yapositolo o Pita:

“Ia ni na takali yani na ka kecega oqo, a cava nai valavala sa kilikili kei kemudou, e nai valavala savasava kei na daulotu, ni dou sa dauwaraka ka daugadreva sara na kena yaco mai na siga ni Kalou, . . . ni dou sa waraka na veika vakaoqo, dou gumatua kina me kunei kemudou ko koya e na vakacegu, ni dou sa sega ni tauvi-duka, ka sega ni cala. . . . Dou tubu cake e na loloma, kei na kila na noda Turaga ko Jisu Karisito nai Vakabula.” (2 Pita 3:​11, 12, 14, 18) O koya gona, meda vuli mai na ka a yaco ena gauna i Noa. Toro voleka vua na Kalou. Me tubu na nomu kila i Jisu Karisito. Bucina na yalo ni qaravi Kalou, mo dua tale ga kina vei ira na vica vata na milioni era digitaka mera bulata na icavacava ni vuravura oqo ra qai bula ena vuravura sautu e se bera mai.

[iYaloyalo ena tabana e 5]

E se tekivu caka na dautukikaukamea ni bera na Waluvu

[iYaloyalo ena tabana e 7]

Na veigauna uasivi sa tu mai liu