Veikauaitaki​—Ki ni Yalovinaka kei na Yalololoma

“KEVAKA o vakaseavutaka na nona rarawa e dua, e sega ni ka wale na bula,” e vola o Helen Keller. E kila vinaka o Keller na momosi ni yalo. Ni sa yabaki dua vula vitu, e tauvi koya e dua na mate e vakavuna nona mataboko qai didivara. Ia e dua na qasenivuli dau loloma a qai vakavulici Helen me volavola qai wilivola ena Braille, me lai tini vosa sara e muri.

O Ann Sullivan na qasenivuli nei Keller, e kila vinaka na rarawa e vakilai ni dua e vakleqai na yagona. O koya mada ga a voleka ni mataboko. Ia e bulia ena vosota o Ann na iwalewale me veivosaki kina kei Helen ni “vola” na vosa ena liga i Helen. Ni uqeti Helen na veikauaitaki nei nona qasenivuli, e nakita kina me solia vakatabakidua nona bula ena nodra vukei na mataboko kei na didivara. Ni sa vorata rawa ena sasaga na mate e tauvi koya, e lai nanumi ira tale ga era sotava tu na ituvaki vata ga oya. E via vukei ira.

O sa na rairai raica ena vuravura oqo e sega kina na veinanumi, ni rawarawa mera ‘sogota na lomadra’ eso ra qai lecava na ka era gadreva na tani. (1 Joni 3:17) Ia era vakaroti na lotu vaKarisito mera lomana na wekadra ra qai dau veilomani. (Maciu 22:39; 1 Pita 4:8) O sa na rairai kila tiko beka oqo: Dina nida dau nakita meda veilomani, eda dau vakalecalecava ni vakaceguya nodra rarawa na tani. Ena rairai vu oya nida sega ni kauaitaka nodra gagadre eso tale. Na veikauaitaki e ki, e rawa nida vakaraitaka kina na yalovinaka kei na yalololoma.

Cava na Veikauaitaki?

Dua na ivolavosa e kaya ni veikauaitaki “na laurai kei na kilai ni kena ituvaki e dua tale, nona ivalavala, kei na ivakarau ni lomana.” E dau tukuni tale ga ni nona biuti koya e dua ena ituvaki nei dua tale. Meda veikauaitaki ena gadrevi meda kila mada na kena ituvaki e dua tale da qai biuti keda ena ituvaki e sotava tiko. Na veikauaitaki gona e vauci kina noda vakila nona rarawa e dua tale.

E duidui na basogana e dikevi kina ena iVolatabu na vosa oqo na “veikauaitaki.” E vakasalataki ira na lotu vaKarisito na yapositolo o Pita mera ‘veinanumi, veilomani me vaka na veitacini, ra qai yalo vinaka.’ (1 Pita 3:8, VV) Na vosa vaKirisi ni “veinanumi” e kena ibalebale “mo rarawa vata” se “mo yalololoma.” Na ivakarau tale ga oqo e uqeti ira kina na lotu vaKarisito na yapositolo o Paula mera “reki vata kei ira era sa reki, ka tagi vata kei ira era sa tagi.” E kuria o Paula: “Dou lomavata tiko vakai kemudou.” (Roma 12:15, 16) O duavata beka ni na sega ni rawa nida lomani ira na wekada me vakataki keda, ke da sega ni biuti keda ena kedra ituvaki?

Voleka ni o keda kece, eda dau veikauaitaki. O cei e sega ni tarai koya ni raica na itaba ni so na gone waloloi suivotu se o ira na isenivalu era lomaleqa tu? Na tina dau loloma cava ena sega ni kauai ni tgi na luvena? Ia e sega ni kilai rawarawa na leqa kece. Ena dredre dina meda kila na ka e sotava tiko e dua e yalolailai, na mate e sega ni laurai, se leqa ni kana vakaca, kevaka e se sega ni bau yacovi keda na leqa vaka oya! Ia, na iVolatabu e vakaraitaka ni rawa qai dodonu meda bucina meda nanumi ira era sotava eso na ituvaki eda sega ni sotava o keda.

iVakaraitaki Vakaivolatabu ni Veikauaitaki

O Jiova e noda ivakaraitaki vinaka ena veikauaitaki. Dina ni uasivi, e sega ni namaka meda uasivi tale ga, “ni sa kila ko koya na kedai bulibuli; sa nanuma ga ni da sa kuvu-ni-soso.” (Same 103:14; Roma 5:12) Ni kila na ka eda rawata, ‘ena sega ni laivi keda meda veretaki vakalevu cake.’ (1 Korinica 10:13) E vakayagataki ira nona dauveqaravi kei na yalona tabu me vukei keda meda tutaka rawa kina.​—Jeremaia 25:4, 5; Cakacaka 5:32.

E vakila sara mada ga o Jiova na veika rarawa era sotava nona tamata. E kaya vei ira na Jiu era lesu mai Papiloni: ‘O koya sa tarai kemudou sa tara na loa ni mataqu.’ (Sakaraia 2:8) Ni kila vinaka ni dau veikauaitaki na Kalou, e kaya kina vua na dauvola iVolatabu o Tevita: “Mo ni vakataloca na wai ni mataqu ki na nomuni tavaya: sa sega beka ni volai oti e na nomuni vola?” (Same 56:8) E veivakacegui nida kila ni sega guilecava o Jiova, e vaka ga era volai tu ena ivola, na wainimatadra nona dauveiqaravi nira saga mera yalodina tiko ga!

Me vakataki Tamana vakalomalagi, e kauaitaka o Jisu Karisito nodra nanuma na so tale. Ni vakabula na turaga didivara, e kauti koya vakatikitiki, kena irairai me kua ni vakamaduataki koya se kurabui ni sa vakabulai vakacakamana. (Marika 7:32-35) Dua tale na gauna, e vakadikeva o Jisu na yada sa vakarau buluti luvena tagane duabau. E totolo nona vakila o Jisu nona rarawa na yada, e mani torova yani na ilakolako ni veibulu qai vakatura na gonetagane.​—Luke 7:11-16.

Ni sa vakaturi o Jisu, a rairai vei Saula ena sala i Tamasiko, qai vakaraitaka vei Saula me kila ni tarai koya nona tusaqati ira tiko vakaca nona tisaipeli. E kaya vua: “Oi au ko Jisu, ko koya ko sa vakacacana.” (Cakacaka 9:3-5) E vakila o Jisu na rarawa era sotava na nona tisaipeli, vaka na tina e vakila na rarawa ni luvena e tauvimate. Vaka tale ga kina noda Bete Levu mai lomalagi o Jisu e ‘lomani keda rawa nida sa maluamlumu,’ se me vaka e kaya na ivakadewa nei Rotherham, e “nanumi keda ena noda malumalumu.”​—Iperiu 4:15.

E vulica na yapositolo o Paula me vakila nodra rarawa kei na nodra nanuma eso tale. “O cei beka sa malumalumu, kau sa sega ni malumalumu? ko cei sa vakacalai, kau sa sega ni lomakatakata kina?” e taroga. (2 Korinica 11:29) Ni sereki Paula kei Sailasa vakacakamana na agilosi ena valeniveivesu mai Filipai, e vure mai nona vakasama o Paula me kaya vua na ivakatawa ni sega ni dua e dro. E vakila ni na rairai vakamatei koya ga na ivakatawa ni valeniveivesu. Mai na ivakarau vakaRoma, e kila o Paula ni na totogitaki vakaca na ivakatawa ke ra dro na kaivesu, vakauasivi kevaka sa vakaroti me yadravi ira vinaka. (Cakacaka 16:24-28) E uqeti na ivakatawa ni valeniveivesu ena yalovinaka i Paula, ra qai sasaga vata kei na nona vuvale mera lotu vaKarisito.​—Cakacaka 16:30-34.

Bucina na Veikauaitaki

E vakauqeti keda vakawasoma na iVolatabu meda vakatotomuria na Tamada vakalomalagi kei na Luvena o Jisu Karisito, e gadrevi gona kina meda bucina na itovo oqo. Eda na cakava vakacava? E tolu na sala e rawa nida vakavinakataka kina noda vakila na ka era gadreva kei na nodra nanuma eso tale: nida rogoci ira, vakadikevi ira, da qai raitayaloyalotaka na ka.

Vakarorogo. Nida vakarorogo vakavinaka eda rawa ni kila kina nodra leqa na so tale. Na vinaka ga ni noda vakarorogo, na nodra dolava na lomadra ra qai vakaraitaka na nodra nanuma. “Au rawa ni vosa vua e dua na qase kaeu nuidei ni na rogoci au,” e kay o Miriam. “Au via kila ni matata vua noqu leqa. Au nuitaki koya vakalevu ni tarogi au ena so na taro vakavure vakasama, e vakadeitaka ni rogoca vinaka na veika au kaya vua.”

Dikeva. Sega ni tamata kece era na kaya vei keda na ka era nanuma kei na veika era sotava tiko. Na dauvakadidike vinaka ena kila ni yalolailai tiko e dua nona itokani lotu VaKarisito, ni sa sega ni dau vasa e dua na itabgone, se ni sa sega ni lomakatakata e dua na italatala. Na ivalavala oqo ni kena vakilai na leqa ena gauna se qai tekivu kina e bibi me tiko vei ira na itubutubu. E kaya o Marie: “Sa dau kila rawa tu o tinaqu na veika au vinaka ni bera niuu kaya vua, e vakarawarawataka noqu tukuna vua noqu leqa.”

Raivakatayaloyalotaka. Na sala duadua me rawa nida veikauaitaki kina oya meda tarogi keda yadua: ‘Ena vakacava na kequ ituvaki niu sotava na veika oya? Cava au na cakava? Na cava au na gadreva?’ Eratou sega ni biuti iratou rawa na dauveivakacegui lasulasu i Jope ena kena ituvaki. Eratou tini beitaki koya kina ni cakava na ivalavala ca eratou nanuma ni vakayacora.

Na kawatamata tawataucoko e rawarawa me vakalewa na cala e cakava e dua mai na nona vakila na ituvaki ni loma i koya oya. Ia, ke da tovolea meda raivakatayaloyalotaka nona rarawa e dua tale ena vukei keda meda lomani koya mai na noda vakacala. E kaya o Juan e dua na qase ni ivavakoso matua: “E dau vinaka sara na ivakasala au tauca niu vakarorogo vinaka qai tovolea meu kila na ituvaki kece ni bera niu vakatura eso na ka.”

Na ivola e veisoliyaka na iVakadinadina i Jiova sa vukei ira e levu ena ituvaki oqo. Na ivoladraudrau Na Vale ni Vakatawa kei na Yadra! sa veivosakitaki kina na leqa levu me vaka na yalolailai kei na nodra vakacacani na gone. E yaco donu sara ga mai na itukutuku oqo me vukei ira na dau wiliwili mera kauaitaka nodra nanuma o ira era sotava na ituvaki vaka oqo. Vaka kina na ivola Questions Young People Ask​—Answers That Work sa vukei ira e levu na itubutubu mera veivosakitaka kina na leqa nei luvedra.

Veikauaitaki e Vukea na Cakacaka vaKarisito

Vica ga vei keda ena vakalecalecava nona viakana e dua na gone ke tu vei keda na kakana e rawa nida wasea vua. Kevaka eda dau veikauaitaki, eda na kila tale ga nona ituvaki vakayalo e dua. Na iVolatabu e tukuni Jisu: “Ia ni sa raici ira na lewe vuqa ko koya, sa lomani ira, ni ra sa malumalumu, ka biu wale tu, me vaka na sipi sa sega na nodrai vakatawa.” (Maciu 9:36) Vica vata na milioni nikua era tu tale ga ena ituvaki vakayalo oqo ra qai gadreva na veivuke.

Vaka ga ena gauna i Jisu, meda na vorata na veivakaduiduitaki se na itovo vakavanua sa vakawakana tu meda tara kina na lomadra eso. Na italatala e dau kauai ena vakasamataka na veika erau duavata kina se tukuna na ulutaga e tiko ena nodra vakasama na tamata me rawa ni rawai ira nona ivakamacala. (Cakacaka 17:22, 23; 1 Korinica 9:20-23) Na yalovinaka e salavata kei na veikauaitaki era na taleitaka kina na itukutuku ni Matanitu ni Kalou, me vaka a yaco vua na ivakatawa ni valeniveivesu mai Filipai.

E yaga na veikauaitaki ni na vukei keda meda raibaleta nodra cala eso ena ivavakoso. Ke da saga meda kila na nanuma i koya na tacida e cakacala, e sega ni vakabekataki ni na rawarawa noda vosoti koya. De dua ena vakatale ga oya na ka eda cakava ke da tu ena kena ituvaki. Na veikauaitaki i Jiova e uqeti koya me ‘nanuma nida sa kuvunisosos,’ e doodonu kina me uqeti keda oya meda kakua ni kauaitaka nodra cala eso tale da qai “dauveivosoti”’?​—Same 103:14; Kolosa 3:13, VV.

Kevaka eda na veivakasalataki, eda na rairai cakava ena sala malumu ke da kila na nanuma kei na ituvaki i koya e cala. Na qase e dau veikauaitaki ena rairai vakananuma: ‘Keu a cakava tale ga na cala oqo. Keu a tiko sara ga ena kena ituvaki.’ E vakasalataka kina o Paula: “Dou vakavinakataki koya e na yalo malumalumu, oi kemudou sa vakayalo; ka mo vakaraici iko, de ko sa dauveretaki tale ga.”​—Kalatia 6:1.

Na veikauaitaki ena tosoi keda meda vukea e dua kevaka eda rawata, veitalia ke sega ni kerea na noda itokani lotu vaKarisito. E vola na yapositolo o Joni: “Ko koya sa tu vua nai yau ni vuravura oqo, a sa raica na wekana ni sa dravudravua, a sa sogota na lomana vua, sa tiko vakacava e na lomana na loloma vua na Kalou? . . . Me da kakua ni loloma e na vosa ga, se e na yameda; e na cakacaka ga kei na lomadina.”​—1 Joni 3:17, 18.

Meda veilomani ena ‘cakacaka kei na lomadina,’ e dodonu meda raica e liu na ka e gadreva na tacida. Eda dau dikeva vakavinaka na ka era gadreva eso tale meda vukei ira kina? Oqo gona na ibalebale ni veikauaitaki.

Bucina na Veinanumi

Eda na sega ni sucukaya beka mai na veikauaitaki, ia e rawa nida bucina na veinanumi. Kevaka eda vakarorogo vinaka, vakadikeva vagumatua, da qai raivakatayaloyalotaki keda vakawasoma ena nona ituvaki e dua tale, eda na veikauaitaki kina. Ena uqeti keda meda vakaraitaka na loloma, yalovinaka, da qai yalololoma vei ira na luveda, vei ira tale eso na lotu vaKarisito, kei ira na wekada.

Kua ni laiva na kocokoco me tarova nomu veikauaitaki. E vola o Paula: “Dou kaua ni nanuma na nomudou ka ga koi kemudou yadua, ia mo dou dui nanuma talega na nodra ka na tamata tani.” (Filipai 2:4) Noda bula tawamudu e vakatau ena veikauaitaki nei Jiova kei na nona Bete Levu, o Jisu Karisito. E noda itavi gona meda bucina na itovo oqo. Noda veikauaitaki ena vukei keda meda italatala da qai itubutubu vinaka. Kena itinitini, na veikauaitaki ena vukei keda meda kila ni “levu cake na noda marau nida dau solika mai na noda taura na ka.”​—Cakacaka 20:35, NW.

[iYaloyalo ena tabana e 25]

Na veikauaitaki e vauci kina noda dikeva vakavinaka na ka era gadreva eso tale da qai vukei ira kina

[iYaloyalo ena tabana e 26]

Eda na vulica meda vakaraitaka na veikauaitaki e tiko vua na tina yalololoma vei luvena?