Nomu Veivakavulici, Sa Yaga Tiko Beka?

O IRA na itubutubu, qase ni ivavakoso, ira na dau vunautaka na itukutuku vinaka​—e gadrevi kece mera qasenivuli. Era vakavulici luvedra na itubutubu, o ira na qase era vakavulici ira na lewe ni ivavakoso vakarisito, kei ira na dau vunautaka na itukutuku vinaka era vakavulici ira na tataleitaki vou. (Vakarua 6:6, 7; Maciu 28:​19, 20; 1 Timoci 4:​13, 16) Cava o na cakava me yaga kina nomu veivakavulici? Vakatotomuria nodra ivakaraitaki kei na nodra iwalewale na qasenivuli vinaka era vakamacalataki tu ena Vosa ni Kalou. O Esera e dua vei ira.

Vuli Mai na iVakaraitaki i Esera

O Esera e lako mai ena iyatukawa vakabete i Eroni, a bula ena rauta na 2,500 na yabaki sa oti e Papiloni. Ena yabaki 468 B.S.K., a gole i Jerusalemi me lai vakateteya kina na sokalou savasava vei ira na Jiu era tiko kina. (Esera 7:​1, 6, 12, 13) Na itavi oqo e gadrevi kina vua me vakavulica na Lawa ni Kalou. Cava a cakava o Esera me vakadeitaka kina ni yaga nona veivakavulici? A muria e so na tikina bibi. Dikeva na veitikina oqo e tiko ena Esera 7:​10:

“Sa [1] vakarautaka oti na lomana ko Esera [2] me vakasaqaqara e na vunau i Jiova, ka [3] me cakava talega, ka [4] me vakavulica e Isireli nai lesilesi kei na lewa.” Meda dikeva vakalekaleka mada na veitikina oqo da qai raica se cava eda na vulica kina.

“Sa Vakarautaka Oti na Lomana ko Esera”

Me vaka na dauteitei e vakarautaka na qele ni vakayagataka na isiviyara ni bera ni kaburaka nona itei, e vaka tale ga oya o Esera ni dau masu me vakarautaka na lomana me ciqoma na vosa ni Kalou. (Esera 10:1) Dua tale na kena itukutukuni, a ‘vagolea sara na lomana’ ina veivakavulici i Jiova.​—Vosa Vakaibalebale 2:2.

E kaya tale ga na iVolatabu ni ‘vakarautaka na lomana me vakasaqara na Kalou dina’ o Tui Jiosafati. (2 Veigauna 19:3) Kena veibasai, o ira na itabatamata e Isireli era “sega ni vakarautaka na lomadra” era vakatokai mera “yalovakatani ka talaidredre.” (Same 78:8) E raica o Jiova “na ka vakayalo ga sa vuni.” (1 Pita 3:4) Io, “ena vakavulici ira na yalomalumalumu e na nona sala.” (Same 25:9) E bibi dina vei ira na qasenivuli nikua mera muria na ivakaraitaki i Esera mera vakarautaka vinaka na lomadra ena nodra dau masu!

“Me Vakasaqaqara e na Vunau i Jiova”

Me qasenivuli vinaka, a vakasaqaqara ena Vosa ni Kalou o Esera. Ke o lai raici vuniwai, o na sega beka ni vakarorogo vinaka qai saga mo kila kece na ka e kaya se wainimate cava mo taurivaka? Ni leqataki nomu bula, o na rogoci koya vinaka. Sa qai bibi sara meda rogoca vinaka na veika e kaya tiko vei keda o Jiova, se ka e vakatura meda vakayagataka, e volai ena nona Vosa, na iVolatabu, kei na kena e vakarautaka tiko mai “na dauveiqaravi yalo dina ka vuku.” E vakatau kina noda bula! (Maciu 4:4; 24:​45-​47, VV) E rawa ni cala na vuniwai, ia “sa vinaka sara na vunau i Jiova.” (Same 19:7) Eda na sega ni gadreva nona nanuma e dua tale.

Na ivola na Veigauna (a vola taumada o Esera me dua ga na ivola) e vakaraitaka ni a dua na gonevuli gugumatua o Esera. Me vola rawa na ivola oya, a vakayagataka e levu tale na itukutuku.a Dua na ka nodra gadreva na Jiu era se qai yaco ga mai Papiloni na ivakamacala ni nodra matanitu. Era lecava tu na ivalavala ni nodra lotu, na veiqaravi ena valenisoro, kei na nodra itavi na Livai. Na ituvatuva ni nodra kawa e yaga vakalevu vei ira. A kauaitaka sara vakalevu o Esera na veitikina oqori. Me yacova ni basika na Mesaia, era na dua tiko ga na matanitu na Jiu, e tiko nodra qele, tiko nodra valenisoro, kawa vakabete, kei na kovana. Ena vuku ni itukutuku a kumuna o Esera, e taqomaki kina na duavata kei na sokalou dina.

E vakacava na ivakarau ni nomu vuli ni vakatauvatani kei Esera? Na vulici vagumatua ni iVolatabu ena vukei iko me yaga nomu veivakavulici ena iVolatabu.

“Vakasaqaqara e na Vunau i Jiova” Vakavuvale

Na vakasaqaqara ena lawa i Jiova e sega ni caka ena gauna ga ni vuli vakataki keda. Na gauna tale ga ni vuli vakavuvale e daumaka me caka kina.

O Jan kei Julia, erau veiwatini mai Necaladi, erau se wiliwili vakadomoilevu tiko ga vei luvedrau tagane e rua me tekivu mai na siga erau sucu kina. Nikua, o Ivo sa yabaki 15, kei Edo sa yabaki 14. Eratou se vuli tiko ga vakavuvale, vakadua e veimacawa. Kaya o Jan: “Sega ni neirau inaki me keitou kovuta e levu na tikina ena vuli ia me matata ga vei rau na cauravou na ka e vulici.” E kuria: “Erau dau vakekeli vakalevu na cauravou. Erau dau vakadikeva na vosa vou kei ira era talanoataki ena iVolatabu​—gauna era bula kina, o cei o ira, nodra cakacaka, kei na so tale. Gauna rau sa kila kina na wilivola, rau sa dau vaqaqara ena ivola me vaka na Insight on the Scriptures, ivolavosa, kei na encyclopedia. Oqo na ka e taleitaki kina na vuli. Erau dau vakanamata na cauravou ena gauna ni vuli.” Dua tale na kena yaga vei rau, e sega ni dua e tarai rau ena nodrau dui kalasi ena vulici ni vosa ni rau daunivosa.

Dua tale na veiwatini mai Necaladi o John kei Tini, erau a vakavulici luvedrau tagane, o Esli (sa yabaki 24 qai painia tiko ena dua tale na ivavakoso ena gauna oqo), kei luvedrau yalewa, o Linda (sa yabaki 20, e watina e dua na tacida tagane vinaka). Ia, erau sega ni veivakavulici ena ivola ni vuli ena iwalewale sa dau matau tu oya me tarogi na taro qai saumi, erau moica na vuli vakavuvale me ganita na nodrau yabaki kei na ka erau gadreva na gone. Na iwalewale cava erau vakayagataka?

E kaya o John ni rau dau digitaka na luvena e dua na ulutaga vinaka mai na “Taro na Dauwiliwili” (mai Na Vale ni Vakatawa) kei “Na Rai ni iVolatabu” (mai na Yadra!). E muri, rau sa qai tukuna mai na ka erau sa vakarautaka, e dau taleitaki kina na veivosaki vakavuvale. Erau yalomatua kina na gone ni rau vakekeli kei na veivosakitaki ni veika erau sa vulica. O dau “vakasaqaqara e na vunau i Jiova” kei luvemu? Ena sega wale ga ni vakavinakataka oqo nomu ivakarau ni veivakavulici ia ena vukei luvemu tale ga me dua na qasenivuli vinaka.

“Cakava”

A bulataka o Esera na ka a vulica. Kena ivakaraitaki, ni se tiko ga mai Papiloni, ke a vinaka cake sara nona bula. Ia, ni liaca ni rawa ni vukei ira na wekana, e biuta tu yani na bula totoka e Papiloni me lako vakayawa i Jerusalemi, me sotava na kena ca, leqa, kei na dredre. Matata, ni sega ni vakumuna wale toka ga o Esera na itukutuku ena iVolatabu ia e tu vakarau me cakava na ka e vulica.​—1 Timoci 3:​13.

E muri, ni sa tiko e Jerusalemi, a baci laurai vei Esera ni bulataka na ka e vulica kei na ka e vakavulica. E laurai oqo ni rogoca nodra vakawati na tagane ni Isireli kei ira na yalewa lotu butobuto. E kaya na iVolatabu ni ‘dresulaka nona isulu kei na nona itutuvi, e vutia tani na drau ni uluna kei na kumina, qai tiko sobu me yacova na yakavi.’ A ‘madua qai velavela ni ta cake’ vei Jiova.​—Esera 9:​1-6.

E yaga dina vua na vulici ni Lawa ni Kalou! Sa matata sara tu ga vei Esera na leqa levu era na sotava na lewenivanua nira talaidredre. E lailai na kedra iwiliwili na Jiu era suka e nodra vanua. Kevaka era vakawati veicurumaki, era na duavata kei ira na matanitu lotu butobuto era toka volekati ira, sa na rawarawa tale ga ni yali vakadua na sokalou savasava e vuravura!

Na ivakaraitaki ni rere vakalou kei na gugumatua nei Esera e uqeti ira na Isireli mera vakadodonutaka nodra ilakolako. Era biuta na watidra era sega ni qaravi Jiova. Ena loma ga ni tolu na vula sa vakadodonutaki na ka kece. Na talairawarawa i Esera ina Lawa ni Kalou e veivuke sara vakalevu me yaga kina nona veivakavulici.

E vaka tale ga oya nikua. E kaya e dua na tama lotu Vakarisito: “Era sega ni muria na gone na ka o kaya; na ka ga o cakava!” Na ivakavuvuli oqo e vauci tale ga ena ivavakoso vakarisito. O ira na qase era ivakaraitaki vinaka era na rairai namaka ni na rogoci ena ivavakoso nodra veivakavulici.

‘Me Vakavulica e Isireli na iLesilesi kei na Lewa’

E dua tale tiko na vuna e yaga kina nona veivakavulici o Esera. E sega ni tukuna nona nanuma, ia e vakavulica ‘na ilesilesi kei na lewa.’ Oqo ga na ilesilesi se lawa i Jiova. E nona itavi vakabete oqo. (Malakai 2:7) E vakavulica tale ga na lewadodonu, qai kotora na ivakaraitaki ni ka e kaya ni kabita tiko ga na ka e dodonu qai dina, e muria na ivakatagedegede. Nira lewadodonu na veiliutaki, era na dei kina qai tauci na vua vinaka. (Vosa Vakaibalebale 29:4) E vaka tale ga kina o ira na qase ni ivavakoso vakarisito, na itubutubu, kei ira na dauvunautaka na Matanitu ni Kalou era kila vinaka na Vosa ni Kalou era na vakadeitaka na veika vakayalo nira vakavulica na ilesilesi kei na lewadodonu ena ivavakoso, ena vuvale, vaka kina vei ira na tataleitaki.

O duavata beka ni na yaga nomu veivakavulici ke o vakatotomuria na ivakaraitaki i Esera? Me rawa oya, ‘vakarautaka na lomamu, vakasaqaqara ena vunau i Jiova, cakava, qai vakavulica na ilesilesi kei na lewadodonu.’​—Esera 7:​10.

[iVakamacala e ra]

[Kato/iYaloyalo ena tabana e 22]

CAVA A YAGA KINA NA VEIVAKAVULICI I ESERA?

1. A vakarautaka vinaka na lomana

2. Vakasaqaqara ena Lawa i Jiova

3. iVakaraitaki vinaka ni cakava na ka e vulica

4. Vakavulica na rai ena iVolatabu