Sasaga Vagumatua​—Ena Qai Vakalougatataka o Jiova

“MO LAIVI au mada me‘u lako, ni sa kida na mataka.”

“Au na sega ni laivi iko, kevaka ko sa sega ni vosavakalougatataki au mada.”

“Ko cei na yacamu?”

“Ko Jekope.”

“Ena sega tiko ni yacamu ko Jekope, ko Isireli ga: ni ko sa kaukauwa vua na Kalou kei ira na tamata, ka ko sa gumatua.”​—Vakatekivu 32:​26-​28.

Na veivosaki vakavure vakasama oya e ivakaraitaki ni vukitotolo me vaka na dauqito i koya na turaga sa yabaki 97 o Jekope. E sega ni tukuna na iVolatabu ni dauqito, ia erau a veimulomulo kei na dua na agilosi ena bogi taucoko. Cava na vuna? E kauaitaka vakabibi o Jekope na vosa ni yalayala i Jiova vua na tukana me baleta na nona ivotavota.

Ena vica na yabaki yani i liu a vakayalia na nona itutu vakaulumatua o Iso na taci Jekope ni a veisosomitaka kei na dua na veleti rourou. Ia oqo, sa yaco na itukutuku vei Jekope ni sa gole tiko yani o Iso kei na 400 na nona tamata. Sa macala ga ni na taqaya, a via vakadeitaka o Jekope na vosa ni yalayala i Jiova ni na tiko vinaka na nona vuvale ena tai kadua ni uciwai na Joritani. A vakayacora o Jekope na veika e salavata kei na nona masu. Sa vakau iloloma rawa o Jekope ni bera ni yaco yani o Iso. E vakarautaki koya tale ga ni wasea rua na nona tamata, a kauti ira na watina kei na luvena ena tai kadua ni uciwai o Japoki. Ena nona sasaga kaukaua kei na tagi, a vakarautaki koya vinaka ena nodrau veimulomulo ena bogi taucoko kei na agilosi ‘me kune loloma kina.’​—Osea 12:4; Vakatekivu 32:​1-​32.

Raica mada na ivakaraitaki i Rejeli, na ikarua ni wati Jekope, e watina lomani tale ga. E kila vinaka o Rejeli na vosa ni yalayala i Jiova ni na vakalougatataki o Jekope. Na tuakana o Lia, na imatai ni wati Jekope, e vakalougatataki ni va na luvena tagane, ia e yava ga o Rejeli. (Vakatekivu 29:​31-​35) A sega ni yalolailai, a kerei Jiova tiko ga ena masu qai cakava na ka e salavata kei na nona kerekere. A kauti Pila na nona vada o Rejeli vei Jekope me watina me vaka ga na ka a cakava na buna o Sera vei Eka. E kaya kina o Rejeli “me’u vakaivakawa talega vua.”a E rua kina na luve i Pila vei Jekope, o Tani kei Nafitalai. Na gauna a sucu kina o Nafitalai a tukuna ena levu ni nona marau o Rejeli: “Au sa veiqati sara kei tuakaqu, ia ka’u sa gumatua.” A qai vakalougatataki tale ga o Rejeli ni rua na luvena tagane, o Josefa kei Penijamini.​—Vakatekivu 30:​1-8; 35:24.

Cava na vuna e vakalougatataka kina o Jiova na nodrau sasaga vakayago vaka kina vakayalo o Jekope kei Rejeli? Baleta ni rau vakaliuca tiko ga na loma ni Kalou rau qai vakamareqeta na nodrau ivotavota. Rau gumatua ni masuta na nona veivakalougatataki rau qai vakayacora na veika erau masulaka me salasalavata kei na inaki ni Kalou.

Me vakataki Jekope kei Rejeli, era vakadinata e levu nikua ni gadrevi na sasaga vagumatua me rawa ni vakalougatataki ira kina o Jiova. Na sasaga oqo e salavata na tagi, yalolailai kei na rarawa. O Elizabeth, e dua na tina lotu Vakarisito, a vakananuma lesu na sasaga vagumatua a cakava me tiko tale ena soqoni, ni oti e dua na gauna balavu a yali tu mai kina. E dua dina na ka ni bolebole ni lima na luvena tagane lalai, e tawavakabauta na watina, qai 30 na kilomita na balavu ni vanua e draivataka me qai yaco ina Kingdom Hall. “E gadrevi dina na lewamatau me wasoma na neitou tiko ena soqoni, au kila ni na vinaka vei au vaka kina vei iratou na gone. Eratou dikeva kina ni sala ga oqo ena yaga vei iratou.” A qai vakalougatataka o Jiova na nona sasaga. Mai na tolu na luvena tagane eratou cakacaka vagumatua tiko ena ivavakoso vakarisito, e rua erau cakacaka vakatabakidua. Nona marautaka na nodratou toso vakayalo, a kaya: “Eratou sa sivi au tale ena veika vakayalo.” A vakalougatataki dina na nona sasaga vagumatua!

Sasaga Vagumatua e Vakalougatataka o Jiova

E tiko na icocovi ni sasaga vagumatua kei na cakacaka vakaukaua. Na levu ga ni noda sasaga nida vakayacora e dua na itavi se dua na cakacaka, ena levu tale ga na noda lomavakacegu. Oqo na sala e buli keda kina o Jiova. A vola o Tui Solomoni: “Me kana talega ka gunu na tamata yadua, ka kunea na kena vinaka ni nona cakacaka kecega, sai koya oqo nai solisoli ga ni Kalou.” (Dauvunau 3:​13; 5:​18, 19) Me vakalougatataki keda na Kalou, meda sasagataka ga na ka e dodonu. Me kena ivakaraitaki, e dodonu beka meda namaka na veivakalougatataki i Jiova kevaka e ikarua tiko ni ka ena noda bula na veika vakayalo? E rawa beka ni nuitaka e dua na lotu Vakarisito yalayala oti na veivakadonui i Jiova, ke ciqoma e dua na cakacaka se dua na itutu ena dau calata kina na vakasosoqoni vata e dau vakaukauataki kina noda vakabauta kei na veivakavulici ena soqoni vakarisito?​—Iperiu 10:​23-​25.

Ni dua e cakacaka vagumatua ena dua na gauna balavu qai vaqara ga na cakacaka isau vinaka se na iyau vakayago ena sega ni ‘kunea na ka vinaka’ kevaka e sega ni okata kina na veika vakayalo. A vakamacalataka o Jisu na ka ena yaco ni sasagataki na ka e cala ena ivakaraitaki i koya na daukakaburaki. Na sore e “kaburaki e na veiwa-vakavotona,” e vakamacalataka o Jisu ni oqo o ira na “rogoca na vosa: ia na lomaocaoca e na vuku ni vuravura oqo, kei nai yau e dauveivakaisini, sa vakaruguta na vosa, a sa sega kina ni vua.” (Maciu 13:22) E veivakasalataki tale ga o Paula ena icori vata ga oya qai kuria ni o ira na vakaliuca na veika vakayago “era sa bale ki na dauvere kei nai cori, kei na gagadre ca e vuqa, ka lialia, ka dauveivakacacani, oqori sa luluvuraki ira na tamata e na mate kei na rusa.” Cava na kena iwali? A tomana o Paula: ‘Mo dro tani mai ena veika oqo qai kua ni vakararavi ena iyau e sega ni tudei, vua ga na Kalou bula, o koya ena solia vakalevu vei keda na ka kece ga eda marau kina.’​—1 Timoci 6:​9, 11, 17.

Veitalia ga na noda yabaki ni bula se na balavu ni gauna eda qaravi Jiova tiko mai kina, e yaga vei keda kece na nodrau ivakaraitaki ni sasaga vagumatua o Jekope kei Rejeli. Na nodrau vinakata na veivakadonui ni Kalou, e sega vakadua ni yali vei rau na nodrau ivotavota, se mani vakacava na dredre se na rarawa erau sotava. Na bula dredre e vakilai tu nikua e rawa ni rerevaki, vakatuburarawa se veivakayalolailaitaki. Na dai i Setani oya meda kua ni sasaga vagumatua me rawa nida coriti ena nona ilawaki. E rawa ni vakayagataka na icori me vaka na ka ni veivakamarautaki, qito se na veika eda dau taleitaka na cakava, na cakacaka se na qarai ni iyau, me rawa ni cakayaco kina na nona sasaga. E sega ni dau rawati na veika vivinaka e dau lavaki mai. O ira na coriti tu ena veika vaka oqo, era dau tini rarawa ena levu na gauna. Me vakataki Jekope kei Rejeli, meda bucina na yalo ni sasaga vagumatua da qai valuta tiko ga na ilawaki i Setani.

Ena vinakata sara ga na Tevoro meda soro koso, meda lai nanuma kina ‘sa sega ni rawa nida cakava kina e dua na ka. Sa sega na iwali ni noda leqa. E sega ni yaga na noda sasaga.’ E bibi kina vei keda kece meda qarauna na yalo ni dadatuvu, eda lai nanuma kina ni sa ‘sega ni dua e lomani keda’ qai ‘guilecavi keda o Jiova.’ Na vakasama cala vaka oqo e veivakaleqai. Sega li ni vakaraitaka oya nida sa vakasavuligataka tiko noda sasaga me yacova sara nida vakalougatataki? Nanuma tiko ni o Jiova e vakalougatataka na noda sasaga vagumatua.

Waraka Tiko ga na Veivakalougatataki i Jiova

Na qaqaco ni noda bula vakayalo e vakatau vakalevu ena noda kila e rua na tiki bibi ni ka dina me baleta noda bula nida dauveiqaravi i Jiova. (1) E sega ni dua e sotava duadua tiko na leqa, na tauvimate se na dredre ni bula, kei na (2) E rogoca o Jiova na nodra tagi o ira era gadreva dina na nona veivuke kei na nona veivakalougatataki.​—Lako Yani 3:​7-10; Jemesa 4:8, 10; 1 Pita 5:​8, 9.

Ke mani vakacava na dredre kei na yalolailai o sotava, kua vakadua ni soro koso ina “[i]valavala ca eda sa tao rawarawa kina”​—na lailai ni vakabauta. (Iperiu 12:1) Sasaga tiko ga me yacova sara ni o vakalougatataki. Vosota tiko ga, qai nanuma na ivakaraitaki i koya na kena turaga o Jekope, nona veimulomulo ena bogi taucoko me vakalougatataki kina. Me vakataki koya na dauteitei e kakaburaki ena vulaitubutubu qai waraka na gauna me na qai tatamusuki kina, waraki Jiova ga ena qai vakalougatataka na nomu gugumatua ni o cakava na veika vakayalo, se mani lailai vakacava na ka o rawata. (Jemesa 5:​7, 8) Nanuma tiko ga na vosa ni daunisame: “O ira era sa tagi lako ni ra sa kabukaburaki voli, era na sere ga ni ra sa tatamusuka.” (Same 126:5; Kalatia 6:​9) Tudei, mo dua vei ira era sasaga tiko vagumatua.

[iVakamacala e ra]