Rawa Vakacava ni Vakadonuya o Jiova Noda Bula e Veisiga?

“Yali enanoa, ena maliwa ni gauna e cadra qai dromu kina na siga, e rua na aua talei, rau ya onosagavulu na miniti. Sa sega ni rawa ni vakalesui mai ni sa yali vakadua!”​—Lydia H. Sigourney, dauvolaivola ni Mereke (1791-​1865).

E LEKALEKA wale na noda bula ni veisiga. E dau vakananuma na daunisame o Tevita na lekaleka ni bula, e uqeti koya me masulaka: “I Jiova, mo ni vakatakila vei au na noqui otioti, kei nai vakarau ni noqu gauna, se sa vakaevei; me’u kila kina na noqu mate rawarawa. Raica, ko ni sa lewa me sa vaka na raba ni liga na noqu gauna; ia na noqu veiyabaki sa tauvata vei kemuni kei na ka sa sega.” E kauaitaka o Tevita me vakamarautaka na Kalou ena nona ivosavosa kei na nona itovo. A kaya ena nona nuitaka na Kalou: “Ka’u sa nuinui ga vei kemuni.” (Same 39:​4, 5, 7) E rogoci koya o Jiova, a dikeva na veika e cakava, qai vakalougatataki koya.

E rawarawa sara meda osooso tu ga e veisiga da qai kidomoki ena ivakarau ni bula ni vakusakusa. Oqo e rawa ni vakalomaocaocataki keda, vakabibi ni lailai na gauna qai levu na ka e tu me caka. Eda vakataki Tevita beka​—noda kauaitaka noda bula me rawa ni vakadonui keda kina na Kalou? Meda kila tiko ni o Jiova e dau dikevi keda vakavinaka. A vakadinadinataka ena 3,600 na yabaki sa oti o Jope, e daurerevaka na Kalou, ni dau dikeva o Jiova nona bula e veisiga. A taroga o Jope: “Ni sa cudru ko koya, a cava me’u kaya vua?” (Jope 31:​4-6, 14) E rawa ni talei vei Jiova noda bula ni veisiga ke da vakaliuca na ka vakayalo, muria nona ivakaro da qai vakayagataka vakavuku noda gauna. Meda dikeva mada oqo.

Me Bibi Duadua na Veika Vakayalo

E uqeti keda na iVolatabu meda vakaliuca na veika vakayalo, e kaya: “Mo ni dau digitaka na veika e uasivi sara.” Na cava na veika uasivi oqo? E okati kina na ‘kila ka kei na rai dodonu.’ (Filipai 1:​9, 10, VV) Meda kila na inaki i Jiova ena gadrevi kina na vakayagataki vakavuku ni noda gauna. Eda na vakalougatataki da qai kune vakacegu ke da vakaliuca na veika vakayalo.

E uqeti keda na yapositolo o Paula meda “vakatovolea na ka sa vinaka vua na Turaga.” Noda vakatovolea e okati kina noda dikeva vinaka na vuna eda cakava kina e dua na ka kei na gagadre ni lomada. E tomana na yapositolo: “Mo dou kila ga na loma ni Turaga [o Jiova].” (Efeso 5:​10, 17) Na cava gona e vakadonuya o Jiova? E sauma na vosa vakaibalebale mai na iVolatabu: “Sa ka levu duaduaga na vuku; mo rawata mada na vuku: ia e na ka kece ko sa rawata mo rawata vata kei na yalomatua. Mo taleitaki koya, ena vueti iko kicake.” (Vosa Vakaibalebale 4:​7, 8) O Jiova e marautaki ira era rawata na vuku vakalou ra qai cakacakataka. (Vosa Vakaibalebale 23:15) Na ka e totoka kina na vuku oqo ni sega ni rawa ni kau laivi se vakarusai. Ia e taqomaki keda qai karoni keda mai vei ira na “kitaka na ka ca, ka marautaka nai valavala veve.”​—Vosa Vakaibalebale 2:​10-​15.

E ka vakayalomatua meda kua ni vakaweleweletaka na veika vakayalo! Meda teivaka na yalo ni dau vakavinavinakataka na vosa i Jiova kei na noda rerevaki koya dina. (Vosa Vakaibalebale 23:​17, 18) Dina ga nida na rawata na ka oqo ena dua ga na gauna ni noda bula, ia e vinaka sara ke da muria e dua na ituvatuva vinaka da qai bulataka na ivakavuvuli ni iVolatabu nida se gone. E kaya kina na tui vuku o Solomoni: “Mo nanumi koya ka Buli iko ni ko sa cauravou tiko.”​—Dauvunau 12:1.

Na sala voleka e rawa nida vakaraitaka kina noda vakavinavinakataki Jiova, oya noda dau masu e veisiga. E vakadinadinataka o Tevita na bibi ni vakararavi vei Jiova, ni kerea: “Mo ni rogoca na noqu masu, Jiova, ka vakatu daligamuni ki na noqu tagi; mo ni kakua ni galu ni sa vakawai na mataqu.” (Same 39:12) E tara beka na lomada na titobu ni noda veivolekati kei Jiova, e dau vakavuna ena so na gauna me tonawanawa na matada? Io, na levu ga ni noda vakaraitaka vei Jiova na ka e tu e lomada kei na noda vakananuma na nona Vosa, na levu tale ga ni nona volekati keda mai.​—Jemesa 4:8.

Vulica na Talairawarawa

O Mosese e dua na tamata vakabauta e kila na bibi ni vakararavi vua na Kalou. Me vakataki Tevita ga, e raica o Mosese ni sa rui levu na leqa. A qai masuta kina na Kalou me vakavulici koya me ‘wilika nona siga me rawata kina na vuku.’ (Same 90:​10-​12) Ena rawati ga na vuku ke da vulica da qai bulataka na lawa kei na ivakavuvuli i Jiova. Na ka oqo e kila o Mosese, ni dau saga mera kila na ka dina na matanitu o Isireli ena nona tokaruataka vei ira na lawa kei na ivakaro ni Kalou ni bera nira lai taukena na Vanua Yalataki. Na tui e digitaka o Jiova me liutaki Isireli, e dodonu me dau vola e dua nona ilavelave ni Lawa qai wilika ena nona bula taucoko. Na vuna? Me vulica kina me rerevaka na Kalou. Oqo ena vakatovolei kina nona talairawarawa na tui. Ena tarova nona vakalevulevui koya vei ira na tacina, ena vakabalavutaka tale ga na gauna ni nona veiliutaki. (Vakarua 17:​18-​20) A tokaruataki na yalayala oqo ena nona a kaya o Jiova vua na luve i Tevita o Solomoni: “Kevaka ko na lako e na noqu sala, mo vakabauta na noqu vunau, kei na noqui vakaro, me vaka ka cakava na tamamu ko Tevita, ka’u na qai vakadedetaka na nomu bula.”​—1 Tui 3:​10-​14.

E bibi vua na Kalou na talairawarawa. E sega ni lecava o Jiova ke da vakawalena e so na nona ivakaro se ivakavuvuli. (Vosa Vakaibalebale 15:3) E dodonu me uqeti keda oqo meda muria tiko ga na ivakasala kece i Jiova, dina ga ni na sega ni rawarawa. Ena saga nona igu kece o Setani me ‘tarovi keda’ nida saga tiko meda muria na lawa kei na ivakaro ni Kalou.​—1 Cesalonaika 2:​18.

E bibi meda muria na ivakasala ni iVolatabu meda dau veimaliwai da qai sosoqoni vata meda sokalou. (Vakarua 31:​12, 13; Iperiu 10:​24, 25) E vinaka meda dui tarogi keda: ‘E tu beka vei au na yalo kei na igu meu cakava na veika e bibi?’ Ena vakaluluqataka noda veiwekani kei Jiova ke da vakayagataka na gauna ni vakasosoqonivata kei na veivakavulici ena soqoni vakarisito me gauna ni qara ilavo. A vola kina na yapositolo o Paula: “Mo dou kakua ni daukocova nai lavo: ia dou lomavinaka e na ka sa tu vei kemudou: ni sa kaya ko koya [Jiova], Au na sega sara ni biuti iko, se vakalaivi iko.” (Iperiu 13:5) E sega ni vakabekataki ni na taqomaki keda o Jiova ke da talairawarawa ina nona ivakaro.

A vulica o Jisu na talairawarawa qai yaga tale ga vua. E vaka tale ga kina o keda. (Iperiu 5:8) Nida bucina na talairawarawa, e sa na matau ga mai vei keda, ena veika lalai sara mada ga. Noda dau yalodina e rawa kina nida vosota nodra veivakacacani kei na veivakatotogani e so. Vakabibi e valenicakacaka, e koronivuli se na vuvale era duidui lotu. Ia, ena vakacegui keda na itukutuku vei ira na Isireli, oya ke ra ‘lomani Jiova nira vakarorogo ina nona vosa ra qai kabiti koya, ena vakabulai ira, ena vakabalavutaka tale ga na nodra bula.’ (Vakarua 30:20) E vauci keda tale ga na vosa ni yalayala oqo.

Vakayagataka Vakavuku na Gauna

Noda vakayagataka vakavuku na gauna e rawa ni vakadonuya kina o Jiova noda bula e veisiga. Na gauna e sega ni vaka na ilavo meda maroroya, ia me vakayagataki ga se da na vakayalia. Na vei aua kece ga sa sivi ena sega ni lesu tale mai. Ena levu ni veika e tu me caka, sa da vakayagataka vinaka tiko beka na noda gauna ena kena vakaliuci na veika e bibi ena noda bula? E dua na ka bibi vei ira kece na lotu Vakarisito oya nodra vakaitavi wasoma ena cakacaka vakavunau kei na veivakatisaipelitaki.​—Maciu 24:14; 28:​19, 20.

Eda na vakayagataka ga vakavuku na gauna ke da kila na kena bibi. E veiganiti kina na ka e kaya na Efeso 5:​16 ‘meda volia me noda na gauna’ ena noda vakuai keda mai na veika e sega ni bibi. E kena ibalebale meda kua ni vakalusi gauna wale tu ena saravi vakasivia ni retioyaloyalo, na vakayagataki ni Internet, wiliki ni so na ivola, se na qarai vakasivia ni veika ni veivakalasai e veivakaocai wale ga. Kuria oya, e rawa tale ga ni kania na gauna eda gadreva meda vakayagataka ena qarai ni vuku vakayalo, na kumuni vakasivia ni iyau.

Era kaya o ira na dau tuvana vinaka nodra gauna: “Ena dredre mo vakayagataka vakavuku nomu gauna kevaka e sega ni matata nomu isausau.” Era vakatura e lima na ivakatagedegede me rawati kina na isausau: me matata, laurai, rawati, me dina, qai tuvani.

Dua na isausau yaga noda vakavinakataka noda wilika na iVolatabu. Na imatai ni ikalawa oya me matata noda isausau​—wilika tasevu na iVolatabu. Na ikarua ni ikalawa me laurai na yaga ni noda isausau. Oqo e dua na sala eda rawa ni raica kina noda toso. Na isausau tale ga e vukei keda meda sasaga vagumatua, da qai tubu tiko. E dodonu me rawati qai caka dina. Me vakasamataki tale ga na ka eda dui rawata, na veika beka eda kenadau kina, kei na gauna e tu eda rawa ni cakava kina. Vei ira e so, era na gadreva beka e levu na gauna mera rawata kina nodra isausau. Na ikalima, me tuvani noda isausau. Noda lokuca gona na siga me vakayacori kina e dua na ka, ena uqeti keda meda na vakaotia sara.

O ira kece na lewenivuvale e Peceli e veiyasa i vuravura, o ira era veiqaravi ena itikotiko liu ni iVakadinadina i Jiova se na dua ga na valenitabana, e nodra isausau kece mera wilika tasevu na iVolatabu ena imatai ni nodra yabaki e Peceli. Era raica na yaga ni nodra wilika na iVolatabu oya ni tosoya cake nodra tubu vakayalo kei na nodra veiwekani kei Jiova, o koya e vakavulici ira tiko me yaga vei ira. (Aisea 48:17) E rawa tale beka ga ni noda isausau meda wilika wasoma na iVolatabu?

Yaga ni Vakadonui Noda Bula ni Veisiga

Ena vuqa na veivakalougatataki eda sotava ke da vakaliuca na veika vakayalo. E solia tale ga vei keda na marau nida sa vakayacora na ka eda nakita, qai vakainaki tale ga kina noda bula. Noda dau veitaratara wasoma kei Jiova ena masu ena vakavolekati keda vua. Na noda masu mada ga e vakaraitaka noda nuitaki koya. Noda wilika e veisiga na iVolatabu kei na ivola era yavutaki vakaivolatabu e vakarautaka mai “na dauveiqaravi yalo dina ka vuku,” e vakaraitaka noda yalorawarawa meda rogoca na veika e tukuna na Kalou. (Maciu 24:​45-​47, VV) Oqo ena vukea me tiko vei keda na vuku, meda vakatulewataka kina vakadodonu na veika eda digia ena noda bula.​—Same 1:​1-3.

Eda marau nida muria na ivakaro i Jiova ni sega ni icolacola bibi vei keda. (1 Joni 5:​3, VV) Nida cakava na veika me vakadonuya kina o Jiova noda bula e veisiga, eda sa vaqaqacotaka tiko kina noda veiwekani. Eda na tokoni ira dina tale ga na tacida vakarisito ena veika vakayalo. Noda cakava na veika oqo ena vakamarautaka na Kalou o Jiova. (Vosa Vakaibalebale 27:11) E sega tale ni dua na icovi e totoka me vaka noda marautaka nona veivakadonui o Jiova ena gauna oqo me tawamudu!

[iYaloyalo ena tabana e 21]

Era vakabibitaka na lotu Vakarisito na veika vakayalo

[iYaloyalo ena tabana e 22]

O vakayagataka tiko vakavuku na nomu gauna?

[iYaloyalo ena tabana e 23]

Eda na vaqaqacotaka noda veiwekani kei Jiova ke da cakava na veika e vakadonuya ena noda bula e veisiga