Taro na Dauwiliwili

Meda dei tiko beka ga ena noda bubului vua na Kalou?

Ena iVolatabu, na bubului e vosa ni yalayala vua na Kalou ni na vakayacori e dua na ka, na cabori ni isolisoli, curu ena dua na taba ni cakacaka se ciqomi ni itavi, se vakatatabu, dina ga ni ka e vakatabui e sega ni cala. E tu tale ga ena iVolatabu na itukutuku ni bubului e tiko kina na veidinadinati, ena vakayacori ga ke cakava e liu e dua na ka na Kalou. Kena ivakaraitaki, o Ana, na tinai Samuela na parofita, a “cavuta na bubului, ka kaya, Kemuni Jiova ni lewe vuqa, kevaka ko ni . . . sega ni guilecava na nomuni vada, ka solia vei au na nomuni vada e dua na gonetagane, ka’u na qai soli koya vei Jiova e na veisiga kecega sa bula kina, ia ena tabu tasi ko koya.” (1 Samuela 1:​11) E tukuna tale ga na iVolatabu na bubului e vu sara ga mai lomada. E vakacava sara mada na bibi ni bubului vua na Kalou?

“Ni ko sa ia na bubului vua na Kalou,” e kaya o Tui Solomoni ni Isireli makawa, “kakua ni berabera ni vakayacora.” E kuria: “Mo vakayacora na ka ko sa bubului kina. Sa vinaka mo kakua ni bubului, ka ca ni ko bubului ka sega ni vakayacora.” (Dauvunau 5:​4, 5) E kaya na Lawa a solia o Mosese vei ira na Isireli: “Ni kemuni sa bubului vei Jiova na nomuni Kalou, mo ni kakua ni berabera ni vakayacora: ni na taroga dina vei kemuni ko Jiova na nomuni Kalou; o ni na qai cala kina.” (Vakarua 23:21) Me kua ni tauri tu ga vakamamada na bubului vua na Kalou. Me tiko na vuna vinaka. O koya tale ga e bubului me kila ni rawa ni cakava na veika e bubuluitaka. Kevaka e sega, me kua ni bubului. Ia, ni dua e bubului vua na Kalou, e dodonu beka me sa na dei ina veika kece e yalataka?

Vakacava ke dua e bubului qai kila e muri ni sega ni salavata kei na loma ni Kalou? Kaya mada ke lai vauci kina na veika vakasisila? (Vakarua 23:18) Sa macala tu ga, ni na sega ni vakabau na bubului vaka oqo. Kuria, ena Lawa i Mosese, na bubului ni dua na yalewa e rawa ni tagutuva o tamana se o watina.​—Tiko Voli mai na Lekutu 30:​3-​15.

Dua tale, vakasamataka mada ni dua e bubului vua na Kalou me kua ni vakawati, lakolako sa vakila ni sa na sega ni rawa ni taqomaki koya tiko. E rawa sara ga ni tini ena ivalavala dukadukali ke na kabi dei toka ga ina ka a bubuluitaka. Me na dei tiko beka ga ena nona bubului? E vinaka cake me taqomaki koya me kua ni coko ena ivalavala dukadukali ena nona tagutuva na nona bubului, me sa na qai kere veivosoti ga vua na Kalou. Ia me sa na vakatau sara ga vua. Me kua ni dua e via vakatulewa ena vukuna.

Vakacava ke dua e bubului qai liaca e muri ni cakava vakusakusa? Me dei tiko beka ga ena nona bubului? A sega ni rawarawa vei Jefica me cakava na veika a bubuluitaka vua na Kalou, ia a qai vakayacora. (Dauveilewai 11:​30-​40) Ke dua e sega ni cakava na veika e bubuluitaka vua na Kalou, ena “vakacudruya” na Kalou qai vakaleqa na ka sa bau cakava rawa. (Dauvunau 5:6) Na tauri vakamamada ni bubului e rawa ni sega ni vakadonui keda kina na Kalou.

E kaya o Jisu Karisito: “Ia me io, na io, me sega, na sega, na nomudou vosa: ia na ka sa levu cake, sa tubu e na ca.” (Maciu 5:​37) Me kua ni kauaitaka ga na lotu Vakarisito nona bubului vua na Kalou, e bibi tale ga me dau dina ina nona vosa, vua na Kalou kei ira tale e so. Vakacava ke veidinadinati kei na dua me baleta e dua na ka e rairai nanuma o koya ni vinaka, ia e muri qai laurai ni vaka e tawayaga? Se dodonu tiko ga me dei tiko nodrau veidinadinati. Vakavo ga ke rau veivosakitaka vinaka tale, de rairai sa na bole o koya erau veidinadinati me sa tini koso nodrau veiyalayalati.​—Same 15:4; Vosa Vakaibalebale 6:​2, 3.

Nida bubului se nida cakava e so tale na ka, na cava meda kauaitaka vakabibi? Meda tovolea e veigauna me vinaka tiko ga noda veiwekani kei na Kalou o Jiova.

[iYaloyalo ena tabana e 30, 31]

Sega ni lomalomarua o Ana ni vakayacora na veika a bubuluitaka

[iYaloyalo ena tabana e 31]

A rarawa dina o Jefica, ia a dei tiko ga ena nona bubului