Kana ena Teveli ni Kavetani
E DAU ka ni marau na kania na kakana vinaka ena teveli i koya na kavetani ni waqa qai kuria na veivosaki kei ira na sureti mera kana vata kaya. Ia, e dua na veivosaki a yaco kei Kavetani Robert G. Smith mai na kabani ni waqa na White Star Line, a dusia e dua na kana magiti vakayalo.—Aisea 25:6.
Ni se qai yabaki 24 o Robert a kavetanitaka na waqa na Kinclune of Dundee, ena 1894. Oqo tale ga e se qai imatai ni gauna me soko yavokiti vuravura kina. E muri a qai kavetani tale ga ni veiwaqa mai na White Star, me vaka na Cedric, na Cevic, kei na Runic.a Ni soko takosova tiko na Atalanitika, mai Niu Yoka i Liverpool e Igiladi ena dua vei ira na waqa oqori, a sureti Charles Taze Russell me rau kanavata. A taleitaka o Robert nodrau veitalanoa ena iVolatabu. Me vukei koya ena so tale na ka, a marautaka me taura e so na ilavelave ni Studies in the Scriptures mai vei Russell.
E dauvolavola tiko ga vei Robert o Russell, mani vakalevutaka kina nona taleitaka na iVolatabu. E wasea tale ga vei watina na veika vou sa vulica tiko. Sega ni dede erau sa dua vei ira na Gonevuli ni iVolatabu, na yaca era a kilai tu kina ena gauna oya na iVakadinadina i Jiova. Sa qai nona itavi dokai o Robert me dau vunau vakaivolatabu. Me kena ivakaraitaki e Brisbane mai Ositerelia, a vosa ena ulutaga, “Wainivutu Mai Kiliati,” qai vakaraitaka ni Vosa ni Kalou e tiko kina na itukutuku me “iwali ni leqa e vuravura.” Ni lesu tale i Igiladi, e vukei koya na watina kei na rua na luvena me ratou vakarogoya na ivunau i Russell ena gauna e saravi tiko kina na iyaloyalo veicavuyaki na “Photo-Drama of Creation.”
E vakadewa vei iratou na luvena o Robert na ka dina ni Matanitu ni Kalou a vulica. Edaidai, ni sa oti e lima na itabatamata, era lewe 18 ena nona vuvale era ogataka voli na tukuni ni itukutuku vinaka vei ira tale e so. Eratou vakavinavinakataka gona na kakana se na veivosaki vakayalo a tauyavu ena dela ni teveli i koya na kavetani.
Era vakayagataka na nodra ivolatabaki kei na iVolatabu na iVakadinadina i Jiova mera vakatavuvulitaka kina e vuravura raraba na itukutuku ni iVolatabu, na ka vata ga a tarai Kavetani Smith. O na rawa tale ga ni mai kila na veika taleitaki a veivosakitaki ena teveli ni kana i kavetani.
[iVakamacala e ra]
a Dua tale na waqa erau via tautauvata oya na Titanic, a kena kavetani o E. J. Smith (erau sega ni veiwekani kei Robert). A luvu na waqa oqo ena imatai ga ni gauna a soko kina.
[iYaloyalo ena tabana e 8]
Robert G. Smith
[iYaloyalo ena tabana e 8]
Charles T. Russell