“Dou Vakacegu; Au sa Vakamalumalumutaki Vuravura”

NA SIGA ni mate i Jisu​—na ika14 ni Naisani ena nodra vula na Jiu​—a tekivu ni dromu na matanisiga ena Lotulevu, 31 Maji, 33 S.K. Ena bogi oya, a soqovata mai o Jisu kei ira na nona yapositolo ena dua na tabavale e cake mai Jerusalemi, me ratou vakananuma kina na Lakosivia. Nona vakarau tiko “me lako tani yani e vuravura oqo vua na Tamana,” a vakaraitaka o Jisu na nona lomani ira na nona yapositolo me yacova na nona mate. (Joni 13:1) Ena sala cava? Oya na nona vakavulica vei iratou e so na lesoni totoka, me vakarautaki iratou ina veika eratou na qai sotava.

Ni toso tiko na bogi oya, a tukuna o Jisu vei iratou na nona tisaipeli: “Dou vakacegu; au sa vakamalumalumutaki vuravura.” (Joni 16:33) Na cava e vakaibalebaletaka o Jisu ena nona vosa vakadoudou oya? Vakatikina, oqo na kena ibalebale: ‘Au sega ni yalolekaleka meu via veisausaumitaka na ca e yaco tiko e vuravura. Au sega ni vakalaiva na vuravura oqo me rawai au. Oni rawa sara tale ga ni vakatotomuria oqo.’ Ena rawa sara tale ga ni vukei iratou na nona yapositolo yalodina na veika a vakavulica o Jisu vei iratou ena iotioti ni gauna ni nona bula vakatamata, me ratou vakamalumalumutaka na vuravura.

E sega ni vakatitiqataki ni sa qai rewailagi ga na ca ena noda vuravura nikua. Eda raica gona vakacava na veika tawadodonu kei na itovo kaukaua e caka tu ga vakasausa? E vakacudrui keda beka se da temaki meda via veisausaumitaka na ka e caka vei keda? E cakayaco beka vei keda na ivakarau ni bula torosobu eda donuya tu oqo? Kena ikuri, nida tamata ivalavala ca eda dau galeleta na ca, e kena ibalebale nida na valuta tiko e rua na idre: na vuravura ca oqo kei na gagadre ca eda sucukaya mai. Eda na rawa beka ni valuta ke sega na veivuke ni Kalou? Eda na rawata vakacava na nona veivuke? Na itovo cava soti e dodonu meda bucina me rawa kina nida vorata na gagadre vakayago? Na kena isau, e kerei meda dikeva mada na ka a vakavulica o Jisu vei ratou na nona tisaipeli lomani ena iotioti ni siga ni nona bula e vuravura.

Valuta na Viavialevu ena Yalomalumalumu

Dikeva mada na leqa ni dokadoka, se viavialevu. E kaya na iVolatabu: “Sa liu na viavialevu, ia sa muri na rusa, a sa liu na yaloviavialevu ia sa muri na bale.” (Vosa Vakaibalebale 16:18) E vakasalataki keda tale ga na iVolatabu: “Kevaka e dua sa nanumi koya me ka levu, ia sa ka walega, sa qai vakaisini koya vakai koya.” (Kalatia 6:3) Io, na viavialevu e dau veivakarusai qai veivakaisini. Eda vuku ke da cata “na qaciqacia, kei na viavialevu.”​​—Vosa Vakaibalebale 8:​13.

Eratou a rawai beka ena qaciqacia kei na viavialevu na yapositolo i Jisu? Dua na gauna, eratou a veiletitaka se o cei e uasivi vei iratou. (Marika 9:​33-​37) Ena dua tale na gauna, rau a kerea o Jemesa kei Joni me rau vakaitutu dokai ena Matanitu ni Kalou. (Marika 10:​35-​45) A gadreva o Jisu me vukei iratou na nona tisaipeli me ratou cavuraka laivi na itovo ni rai oqo. Ena kana gona ni Lakosivia, a lako o Jisu, taura na itauwelu, qai tekivu vuya na yavadratou na nona tisaipeli. A vakaraitaka vakadodonu na lesoni e vinakata me ratou vulica. “Kevaka ka’u sa vuya na yavamudou, koi au na Turaga kei nai Vakavuvuli,” e kaya o Jisu, “sa dodonu talega mo dou veivui yava.” (Joni 13:14) E dodonu me isosomi ni viavialevu na yalomalumalumu.

Ia, e dredre toka me valuti na viavialevu. Ena bogi ga oya ni sa vakatalai Jutasa Isikarioti oti o Jisu, o koya a qai soli Jisu yani, a tubu e dua na veileti kaukaua ena kedratou maliwa na 11 na yapositolo. Na cava e vakavuna? Eratou veiletitaka se o cei me dokai vakalevu duadua! A sega ni cudruvi iratou o Jisu, e vakavulici iratou ga vakamalua ena itavi bibi ni dauveiqaravi. A kaya: “Era dau vakacola sau na nodra tui na kai veimatanitu tani ki vei ira na nodra tamata, ka ra sa vakatokai ko ira na nodra dau veiliutaki me ra Dauloloma. Ia me kakua ni vaka ko ya vei kemudou, ka me yaco ga ko koya e levu duadua vei kemudou me vaka e gone duadua, kei koya e veiliutaki me vaka e dua ka dauveiqaravi.” A vakalesuya mai vei ratou na nona ivakaraitaki ena nona tomana: “Au sa tiko vata ga kei kemudou me vaka e dua e dauveiqaravi.”​​—Luke 22:​24-​27, VV.

Eratou a vuli beka kina na yapositolo? E kena irairai ni a yaco vaka kina. Ni vica vata na yabaki e tarava a vola na yapositolo o Pita: “Dou lomavata kecega, dou ia na loloma vakai kemudou, dou veilomani me vaka na veitacini, dou yalololoma, dou lokomi.” (1 Pita 3:8) E dodonu sara tale ga vei keda meda valuta na viavialevu ena yalomalumalumu! Eda na vuku meda kua ni coko ena kena vaqarai na rogo, kaukaua, se vakaitutu. “O ira sa viavialevu sa vorati ira na Kalou,” e kaya na iVolatabu, “ia sa solia na loloma vei ira era sa yalomalumalumu.” (Jemesa 4:6) A kaya tale ga na vosa vakaibalebale makawa: “A kenai sau ni yalomalumalumu kei na rerevaki Jiova nai yau, kei na vakarokoroko, kei na bula.”​​—Vosa Vakaibalebale 22:4.

Valuti Vakacava na Veicati?

Dikeva mada e dua tale na itovo e kune vakalevu e vuravura​​—na veicati. De na vu beka mai na rere, lecaika, veivakaduiduitaki, veivakasaurarataki, sega na lewadodonu, veicati vakamatatamata, boletaki vanua se yavusa, ia eda kunea na veicati ena veivanua kece. (2 Timoci 3:​1-4) A kune vakalevu tale ga ena gauna i Jisu. O ira na Jiu era dau beci ira na kumuni ivakacavacava. Ra qai dau sega tale ga ni veiriti kei ira na kai Samaria. (Joni 4:9) Era dau cati ira tale ga na kai Matanitu Tani, se o ira na sega ni Jiu. Ia, yaco na gauna me tauyavutaka o Jisu na ivakarau ni sokalou e ciqoma na matatamata kece ga. (Cakacaka 10:​34, 35; Kalatia 3:​28) A solia gona kina vakayalololoma vei iratou na nona tisaipeli e dua na ivunau vou.

A kaya o Jisu: “E dua na vunau vou ka’u sa solia vei kemudou, Mo dou veilomani; me vaka ka’u sa lomani kemudou, mo dou veilomani talega vakakina.” Eratou vulica me ratou vakaraitaka na loloma oqo, ni a tomana: “A ka oqo era na kila kina na tamata kecega ni dou sa noqu tisaipeli, kevaka dou sa veilomani.” (Joni 13:​34, 35) E vunau vou baleta ena gadrevi kina e dua na ka e uasivita na nomu lomana “na kai nomu me vaka ko sa lomani iko.” (Vunau ni Soro 19:18) Ena sala cava? A vakamatatataka na tikina oqo o Jisu ena nona kaya: “Sa noqu vunau oqo, Mo dou veilomani, me vaka ka’u sa lomani kemudou. Sa sega na nona loloma e dua na tamata me uasivi cake e na ka oqo, me solia na nona bula e na vukudra na wekana.” (Joni 15:​12, 13) Oya na nodra tu vakarau sara ga mera mate ena vukudra na tacidra se ena vukudra na so tani tale.

Ena rawa vakacava vua na kawatamata ivalavala ca me cavuivuvutaka na veicati gaga mai na nodra bula? Oya na nodra vakaisosomitaka ina loloma dina. Era sa vakayacora tiko vaka kina na vica na milioni na tamata lomavinaka kece era cavutu mai na veimatatamata, duidui itovo, lotu, kei na vakabauta vakapolitiki. Era sa mai yaco mera matatamata duavata e sega kina na veicati​​—na mataveitacini e vuravura raraba era iVakadinadina i Jiova. Era muria na nona vosa na yapositolo o Joni e uqeti vakalou: “Na daulaba ko koya yadua sa cata na wekana: ia dou sa kila ni sa sega sara ni tiko e lomana na daulaba na bula tawa mudu.” (1 Joni 3:​15) Era sega kina ni tauri iyaragi na lotu Vakarisito dina mera veivakamatei, ra qai saga tale ga vakaukaua mera veilomani.

Meda raici ira gona vakacava na wekada eda sega ni vakabauta vata kei ira era dau cati keda? Nona rube toka ena kaunirarawa, a masulaki ira era vakacacani koya o Jisu, ena nona kaya: “I Tamaqu, kakua ni cudruvi ira; ni ra sa sega ni kila na ka era sa kitaka.” (Luke 23:34) Nira vakamatea na tisaipeli o Sitiveni na tamata dauveicati kaukaua, sa qai iotioti ni nona vosa: “Kemuni Jiova, kakua ni cudruvi ira ena ivalavala ca oqo.” (Cakacaka 7:​60, NW) Erau sega ni vinakata o Jisu kei Sitiveni mera cudruvi na cati rau. Sega ni bau vure e lomadrau na yalo ni veicati. “Me da caka vinaka vei ira na tamata kecega,” e vakaroti keda kina na iVolatabu.​​—Kalatia 6:​10.

‘Tawamudu na Nona Veivukei’

Ni vakacagau tiko na nodratou bose na le 11 na yapositolo yalodina, sa qai tukuna vei iratou o Jisu ni na sega ni tiko vakayago tale kei iratou ena dua na gauna lekaleka ga oqo. (Joni 14:28; 16:28) Ia a yalataka vei iratou: “Au na qai masuti Tamaqu, me na solia vei kemudou e dua tale na Dauveivuke, me tiko vata kei kemudou ka tawa mudu.” (Joni 14:​16, VV) Na dauveivuke yalataki oqo, oya na yalo tabu ni Kalou. Ena vakavulica vei iratou na veika titobu mai na iVolatabu qai vakananuma lesu tale ga na veika a vakavulica vei iratou o Jisu ena nona cakacaka voli vakaitalatala e vuravura.​​—Joni 14:26.

Ena vukei keda vakacava nikua na yalo tabu? Na iVolatabu e Vosa uqeti ni Kalou. O ira kece na tagane era parofisai ra qai vola na iVolatabu e “vakauti ira na Yalo Tabu.” (2 Pita 1:​20, 21; 2 Timoci 3:​16) O koya gona, nida vulica na iVolatabu da qai vakayagataka na ka eda vulica, eda na rawata kina na kilaka, vuku, rai titobu, lewa matau qai rawa tale ga nida na dau vakasamataka vinaka na ka. Sega li nida vakarautaki vinaka meda vorata na idre ni vuravura ca oqo?

Na yalo tabu e dauveivuke ena dua tale na sala. Me vaka ni igu kaukaua ni caka vinaka na yalo tabu ni Kalou, era na vuataka gona na itovo vakalou o ira era vakalaiva na yalo oqo me cakacaka ina nodra bula. “Na vua ni Yalo Tabu na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, nai valavala malua,” e kaya na iVolatabu. Sega li ni veitovo sara ga oqo eda gadreva meda valuta kina na gagadre vakayago e okati kina na itovo vakasisila, dauveileti, veiqati, daucudrucudru, kei na veitovo vaka oya?​​—Kalatia 5:​19-​23.

Nida vakararavi ina yalo tabu ni Kalou, eda na rawata tale ga na “kaukauwa mana levu” me wali kina na leqa se rarawa cava ga eda sotava. (2 Korinica 4:7) Ena sega ni kauta tani na yalo tabu na veivakatovolei se veitemaki, ia ena vukei keda ga meda na vosota rawa. (1 Korinica 10:13) “Au sa rawata na ka kecega e na vuku i Karisito o koya sa vakaukauwataki au,” e vola na yapositolo o Paula. (Filipai 4:​13) E veivakaukauataki na yalo tabu ni Kalou. Eda vakavinavinakataka dina na cakacaka ni yalo tabu! E yalataki gona vei ira era ‘lomani Jisu qai talairawarawa ina nona ivunau.’​​—Joni 14:15.

“Dou Tiko ga e na Noqu Loloma”

Ena iotioti ni bogi ni nona bula vakatamata, a kaya tale ga o Jisu vei iratou na nona yapositolo: “Ko koya sa nanuma na noqu vunau ka talairawarawa kina, sai koya oqo sa lomani au; ia ko koya sa lomani au ena lomani koya ko Tamaqu.” (Joni 14:21) “Dou tiko ga e na noqu loloma,” e uqeti iratou kina o Jisu. (Joni 15:9) Ena vukei keda vakacava na noda tiko ga ena nodrau loloma o Jisu kei Tamana, meda valuta kina na gagadre cala ni lomada kei na vuravura ca oqo?

E rawa beka nida valuta na gagadre cala ke sega ni lomada? Ke lomada gona meda veiwekani vinaka kei na Kalou o Jiova kei na Luvena, oqo na igu duadua ena vukei keda. O Eremasi,a e dua na cauravou a saga vagumatua me valuta na ivakarau ni bula dukadukali a bulataka mai ni se tamata gone, a vakamacalataka: “Au via vakamarautaka na Kalou, ia au vulica ena iVolatabu ni sega ni vakadonuya na Kalou na ivakarau ni noqu bula. Au mani vakatulewataka kina meu sa na veisau, meu muria na nona veidusimaki na Kalou. Ia, e ka ni veisiga na noqu saga meu cavuraka laiva mai noqu vakasama na vakanananu ca qai dukadukali. Ni sa lomaqu meu na valuta na malumalumu oqo, au kerea wasoma kina ena masu na nona veivuke na Kalou. Oti e rua na yabaki, au vakila niu sa rawata, dina ga niu se dau qaqarauni tiko ga me yacova mai oqo.”

Dikeva na iotioti ni masu i Jisu ni bera ni biuta na tabavale e cake mai Jerusalemi, me baleta na kena vakamalumalumutaki o vuravura. A masuti Tamana ena vukudratou na nona tisaipeli ena nona kerea: “Au sa sega ni masu mo ni kauti ira tani e vuravura, mo ni maroroi ira ga mai na vu-ni-ca. Era sa sega ni vakavuravura, me vaka ka’u sa sega ni vakavuravura.” (Joni 17:​15, 16) E veivakacegui dina! O Jiova e dau raici ira e lomana qai vakaukauataki ira nira saga mera kua ni vakavuravura.

“Vakabauta”

Ke da muria na ivakaro i Jisu, ena vukei keda meda valuta rawa na vuravura ca oqo kei na noda gagadre cala. Dina ni bibi na noda saga meda qaqa ena ituvaki oqo, ia ena sega ga ni vakawabokotaka na vuravura se vakaotia na ivalavala ca e dewavi keda mai. Ia, meda kua ni yalolailai.

“Ko vuravura sa lako tani yani, kei na kena gagadre talega,” e kaya na iVolatabu, “ia ko koya sa cakava na ka sa vinakata na Kalou, sa tu dei ga ka sega ni mudu.” (1 Joni 2:​17) A solia na nona bula o Jisu me sereki ira “era sa vakabauti koya” mai na ivalavala ca kei na mate. (Joni 3:​16) Ni tubu noda kila na loma ni Kalou kei na nona inaki, ena gadrevi meda ciqoma na nona veivakadreti o Jisu: “Dou sa vakabauta na Kalou; dou vakabauti au talega.”​​—Joni 14:1.

[iVakamacala e ra]

[iYaloyalo ena tabana e 7]

“Dou tiko ga e na noqu loloma,” a uqeti iratou kina na nona yapositolo o Jisu

[iYaloyalo ena tabana e 7]

Ena yaco dina na galala mai na ivalavala ca kei na veika e vakavuna