E Kauaitaka Beka o Jiova na ka o Cakava?

O NA sauma vakacava na taro oya? E levu era na kaya: ‘E kauaitaka o Jiova na nodra cakacaka na tamata me vakataki Mosese, Kitioni kei Tevita, ia ena sega ni kauaitaka na ka au cakava. Au sega ni rawa ni vakatauvatani kei Mosese, Kitioni se o Tevita.’

E dina taucoko ni so na tagane yalodina ena gauna vakaivolatabu era cakava e so na ka lelevu mera vakaraitaka kina nodra vakabauta. Era ‘vakamalumalumutaki ira na veimatanitu, ra sogota na gusudra na laione, ra bokoca na bukawaqa rerevaki kei na nodra dro bula mai na iseleiwau.’ (Iperiu 11:​33, 34) E so tale era vakaraitaka na nodra vakabauta ena sala lailai sara, qai vakadeitaka na iVolatabu ni kauaitaka tale ga na Kalou. Me kena ivakaraitaki, dikeva mada na ivakaraitaki ena iVolatabu me baleta e dua na ivakatawanisipi, na parofita kei na dua na yada.

Vakacaboisoro e Dua na iVakatawanisipi

Na cava o nanuma me baleti Epeli, na ikarua ni luve i Atama kei Ivi? O na rairai nanuma ni a mate ena vuku ni nona vakabauta, na ka era na rairai sotava e le vica ga. Ia, e duatani na ka a raica taumada na Kalou vei Epeli.

Dua na siga a vakacabora o Epeli vua na Kalou e so na manumanu vinaka mai na nona qelenimanumanu. Nikua ena rairai tukuni beka ni lailai wale sara na nona isolisoli oya, ia a kauaitaka na Kalou qai vakadonuya. E sega ni o koya wale ga oqori. Ni voleka ni oti tale e vanaudolu na yabaki, a uqeta o Jiova na yapositolo o Paula me vola na veika oqori ena ivola na Iperiu. Ni oti gona e vica vata tale na yabaki, e se nanuma tu ga na Kalou na isoro oqori!​—Iperiu 6:​10; 11:4.

E digia vakacava o Epeli na ka me vakacabora? E sega ni tukuna na iVolatabu, ia a rairai vakasamataka beka vakabibi e liu. E ivakatawanisipi o koya, sa macala ga ni na cabora e so na nona manumanu. Ia, dikeva ni a vakacabora na kena e vinaka duadua​—na kena “uro.” (Vakatekivu 4:4) E rairai vakasamataka tale tiko ga na vosa i Jiova vua na gata ena were o Iteni: “Ka’u na vakaveimecakitaki kemudrau kei na yalewa, kei na nomu kawa kei na nona kawa; ena butuqaqia na ulumu ko koya, ia ko na qaqia na bukubukuni-yavana.” (Vakatekivu 3:​15; Vakatakila 12:9) E dina ni sega ni kila o Epeli se o cei na “yalewa” kei na nona “kawa,” e rairai taura rawa o koya ni kena ‘qaqi na bukubukuniyava’ i koya na kawa ni yalewa ena vakadavei ga kina na dra. E kila deivaki ni sega tale ni qai dua na isoro talei me uasivia na manumanu bula. Ia, o koya e bibi sara oya ni veiganiti dina na isoro e cabora.

Me vakataki Epeli, era vakacaboisoro tale ga vua na Kalou na lotu Vakarisito edaidai. Era sega ni vakacabora na ulumatua ni nodra qelenimanumanu, ia era ‘vakacabora na imadrali ni vakavinavinaka, na vua ni tebenigusudra, nira tusanaka na yaca ni Kalou.’ (Iperiu 13:15) Eda wasea vei ira e so tale na noda vakabauta nida tusanaka na yaca ni Kalou.

O via tara cake na nomu dau vakavinavinaka? Mo vakasamataka gona na veika era gadreva tu na tiko ena nomu yalava. Na cava era kauai kina? Na cava era taleitaka? Na itukutuku cava mai na iVolatabu ena talei vei ira? Ena veigauna kece ni cakacaka vakavunau, vakasamataka na sala e so e rawa ni vakavinakataki kina na nomu vosa. Ni o vakamacalataki Jiova, me vu mai lomamu. Me dina na nomu “[i]madrali ni vakavinavinaka.”

Vunau na Parofita Vei Ira na Sega ni Veiciqomi

Dikeva mada oqo na ivakaraitaki ni parofita o Inoki. A rairai le dua ga o koya ena kena vakadinadinataki na Kalou o Jiova. O vakataki Inoki beka ni o le dua ga ena nomu matavuvale o qaravi Jiova tiko ena yalodina? O iko taudua beka ga na gonevuli ena nomu kalasi se tamata cakacaka ena valenicakacaka o muria na ivakavuvuli vakaivolatabu? Ke vaka kina, o na rairai tusaqati. Era na rairai uqeti iko na nomu itokani, na wekamu, nomu lewenikalasi se o ira ni cakacaka vata mo beca na lawa ni Kalou. Era na rairai kaya: “Ena sega ni dua e kila na ka o cakava. Keimami na sega ni tukuna.” Era na rairai tukuna ni ka lialia me muri na ivakatagedegede vakaivolatabu baleta ni sega ni kauaitaka na Kalou na ka o cakava. Ni o sega ni duavata kei na nodra vakasama se itovo, era na saga ena nodra kaukaua taucoko mera rawai iko.

E sega ni ka rawarawa dina me vorati na veitusaqati vaka oqori, ia e rawa. Vakasamataki Inoki mada, na ikavitu ni tagane e taravi Atama. (Juta 14) Ena gauna e sucu kina o Inoki, sa dua na ka na torosobu ni nodra ivalavala na tamata ra qai sega ni kila na madua. E vakasisila nodra vosa, qai “ca” na nodra itovo. (Juta 15) E sega ni duidui na nodra itovo ni vakatauvatani kei ira e levu edaidai.

E vosota rawa vakacava o Inoki? E bibi vei keda kece nikua na isaunitaro oqori. A rairai sokaloutaki Jiova duadua ga o Inoki e vuravura ena gauna oya, ia a sega ni galili. E dau lako vata kei na Kalou o koya.​—Vakatekivu 5:​22.

E bibi vei Inoki me vakamarautaka na Kalou. E kila ni nona lako vata tiko kei na Kalou e sega ni kena ibalebale ga me vinaka qai savasava nona itovo. E namaka na Kalou me vunau. (Juta 14, 15) E gadrevi mera vunauci na tamata ni sa laurai levu na nodra itovo tawavakalou. E sivia na 300 na yabaki nona lako vata tiko ga kei na Kalou o Inoki​—e sivita sara tale ga na yabaki eda bau vosota voli kina o keda edaidai. E lako vata tiko ga kei na Kalou me yacova ni mate.​—Vakatekivu 5:​23, 24.

Me vakataki Inoki eda lesi tale ga meda vunau. (Maciu 24:14) Me ikuri ni noda vunau e veivale, eda saga meda tukuna na itukutuku vinaka vei ira na wekada, ira eda veitaratara ena veika vakabisinisi, kei ira noda lewenikalasi. So na gauna eda dau rere ni vosa. E nomu leqa beka oqori? Kua ni yalolailai. Vakatotomuri ira na lotu Vakarisito taumada, qai masu vua na Kalou mo yalodoudou. (Cakacaka 4:​29) Kua ni guilecava ni o na sega ni tiko taudua ke o lako vata tiko ga kei na Kalou.

Vakarautaka e Dua na Kakana na Yada

Vakasamataka mada e dua na yada e vakalougatataki vakarua ni vakarautaka e dua na kakana lailai! E sega ni marama ni Isireli, qai bula ena ikatini ni senitiuri B.S.K. ena tauni o Sarifaci. Ni voleka ni oti na lauqa balavu, sa vo lailai sara na kena na yada oqo. Sa vo tu ga vakalailai na falawa kei na waiwai me rauta e dua wale ga na gauna ni nodrau kana vakaveiluveni.

Ena tiki ni gauna sara ga oqori sa yaco yani kina e dua na vulagi. Oqo na parofita ni Kalou o Ilaija, mani kerea sara vua na yada me bau wasei vua na kakana. Sa rauti koya ga kei luvena na kakana qai sega ni dua na ka e vo me kena na vulagi. Ia, e vakadeitaka vua o Ilaija, ena vosa i Jiova, erau na sega ni walokai tale kei luvena ke wasea vua na kedrau. Ena gadrevi na vakabauta me rawa ni vakadinati kina ni na kauaitaka na yada vulagi na Kalou ni Isireli. Ia, e vakabauti Ilaija qai vakalougatataki koya o Jiova. “Sa sega ni oti na saqa madrai droka, ka sega ni maca sobu na tavaya waiwai, me vaka na vosa i Jiova ka vosataka ko koya e na gusu i Ilaija.” E tu ga vei rau na veitinani oqo na kakana me yacova sara ni sa oti na lauqa.​—1 Tui 17:​8-​16.

Ia, sa vo e dua tale na ka ni veivakalougatataki. Ni oti toka vakalailai na cakamana oya, a tauvimate mani mate sara na luvena lomani na yada. Ni uqeti Ilaija na loloma, a kerei Jiova me vakabula na gone. (1 Tui 17:​17-​24) Ena vinakati kina e dua na cakamana vakatubuqoroqoro. E se bera mada ga ni dua e bau vakaturi e liu! Ena kauaitaka tale beka na yada sega ni Isireli oqo o Jiova? Io. E solia na kaukaua o Jiova vei Ilaija me vakabula kina na cauravou oya. E kaya e muri o Jisu me baleta na marama kalougata oqo: ‘Era lewe vuqa na yada e Isireli, ia a talai ga o Ilaija vua e dua na yada mai Sarifaci, ena yasayasa vakasaitoni.’​—Luke 4:​25, 26, VV.

E sega ni dei na bula vakailavo nikua, vei ira sara mada ga na vanua vutuniyau. E so mada ga na kabani lelevu sa ra vakacegui ira nodra tamata cakacaka sa dede nodra cakacaka voli ena yalodina. Ni rawa mera vakacegui mai valenicakacaka, era na rairai temaki na lotu Vakarisito mera cakacaka vakalevu, mera kua ni vakacegui. Era na sega ni tiko kina vakalevu ena soqoni vakarisito, lako ena cakacaka vakaitalatala, se mera qarava na bula vakayago vaka kina vakayalo ni nodra vuvale. Ia, ena nanuma ni dodonu me cakacaka tiko ga se mani cava e yaco.

Ena kauai sara tale ga vakalevu na lotu Vakarisito ena dredre ni bula vakailavo edaidai. E dredre na kunei ni cakacaka. E dina ni levu vei keda e sega ni saga me vutuniyau ia eda vinakata na ka meda bula kina e veisiga me vakataki koya ga na yada mai Sarifaci. Ia, na yapositolo o Paula e vakadeitaka tale vei keda na ka e kaya na Kalou: “Au na sega sara ni biuti iko, se vakalaivi iko.” Eda rawa ni kaya ena doudou: “A noqui vukevuke ko Jiova, ia ka’u na sega ni rere A cava na ka ena kitaka vei au na tamata?” (Iperiu 13:​5, 6) E vakararavitaka sara ga o Paula na nona bula ena yalayala oya, qai dau karoni koya o Jiova. Ena cakava tale ga vei keda oqori o Jiova ke da sega ni biuti koya.

Eda na rairai nanuma beka ni sega ni tautauvata na ka eda rawata ni vakatauvatani kei ira na tamata kaukaua vakayalo me vakataki Mosese, Kitioni kei Tevita, ia eda se rawa tiko ga ni vakatotomuria na nodra vakabauta. Eda rawa tale ga ni nanuma lesu na vakabauta eratou vakaraitaka ena sala lailai sara o Epeli, Inoki kei na yada mai Sarifaci. E kauaitaka kece o Jiova na sala cava ga eda vakaraitaka kina noda vakabauta​—se mani lailai sara mada ga. E kauaitaka o Jiova na nona sega mada ga ni ciqoma na wainimate gaga mai vua na nona icaba e dua na gonevuli e rerevaka na Kalou, se nona cata na ivalavala vakasisila mai valenicakacaka e dua na lotu Vakarisito, se yalodina ni dau tiko ena soqoni e dua na iVakadinadina itabaqase dina ga ni wawale se tautauvimate. Na ka kece oqo e marautaka o Jiova!​—Vosa Vakaibalebale 27:11.

O Dau Kauaitaka na Ka Era Cakava na So?

E kauaitaka o Jiova na ka eda cakava. O koya gona, nida vakatotomuria na Kalou, e dodonu tale ga meda kauaitaka na ka era cakava na so. (Efeso 5:1) Vakacava mo vakadikeva na ituvaki dredre era sotava na nomu itokani lotu Vakarisito mera tiko kina ena soqoni, lako ena cakacaka vakaitalatala, kei na ka mada ga era cakava e veisiga?

Vakaraitaka vei ira oni sokaloutaki Jiova vata tiko ni o kauaitaka vakalevu na nodra sasaga. Era na marau ni o kauaitaki ira, qai vakadeitaka ni kauaitaki ira tale ga o Jiova.