Tudei Tiko Ga, Mo Rawata na Bula

KEVAKA mo sokota e dua na wasawasa voravora, na mataqali waqa vakacava o na via vodo kina? O na vodo beka ena dua na waqa lailai, se ena dua na waqa kaukaua e tara vakavinaka? Sega ni vakabekataki ni o na digia na waqa e tara vakavinaka ni rawa ni vorata na voravora ni wasawasa.

Nida sa sokota tiko yani na ituvaki voravora ni gauna oqo eda sotava e veisiga na veilecayaki ni bula. Kena ivakaraitaka o ira na itabagone, era dau veilecayaki qai sega nira dei ena levu ni veika e taka tu ena vuravura oqo. O ira tale ga na se qai lotu Vakarisito era na sega sara beka ni dei. O ira sara mada ga na sa dede nodra qarava tiko na Kalou ena yalodina era rairai sotava tiko na ituvaki dredre ni ka era namaka tiko mai e se bera ni vakayacori kece.

E sega ni ka vou na mataqali yalo vaka oqo. O ira mada ga na dau qaravi Jiova tu ena yalodina me vakataki Mosese, Jope kei Tevita, era sega ni dei ena so na gauna. (Tiko Voli mai na Lekutu 11:​14, 15; Jope 3:​1-4; Same 55:4) Ia, e laurai ena nodra ivakarau ni bula na nodra tudei ni sokaloutaki Jiova. Nodra ivakaraitaki vinaka e uqeti keda meda tudei tiko ga, ia o Setani na Tevoro e via vagolei keda tani me kua nida rawata na bula tawamudu. (Luke 22:31) E rawa vakacava nida “tu dei e na vakabauta”? (1 Pita 5:9) E rawa tale ga nida vakaukauataki ira vakacava eda vakabauta vata?

E Vinakata o Jiova Meda Tudei

Kevaka eda yalodina tiko ga vei Jiova, ena tu vakarau me vukei keda meda tudei tiko ga. E levu na ituvaki dredre e sotava na daunisame o Tevita, ia e nuitaka na Kalou, e rawa kina ni lagata: “Sa tuberi au cake talega [o Jiova] mai nai keli sa tu kina na rorogo rerevaki, mai na qele lolobo talega, ka sa vakatura na yavaqu e na dela ni uluvatu, ka vakataudeitaka na noqui lakolako.”​—Same 40:2.

E vakaukauataki keda o Jiova meda ia na ‘ivalu vinaka ni vakabauta’ me rawa nida ‘taura vinaka kina na bula tawamudu.’ (1 Timoci 6:​12) E vakarautaka tale ga vei keda na veika meda tudei tiko kina me rawa nida qaqa ena noda vala vakayalo. A uqeti ira na tacina lotu Vakarisito na yapositolo o Paula mera ‘vakaukauataki ira ena nodra tu vata kei na Turaga kei na nona kaukaua levu,’ mera ‘vakaiyaragitaki tale ga ena iyaragi kece ga ni Kalou mera tudei ka vorata kina na ilawaki ni Tevoro.’ (Efeso 6:​10-​17, VV) Ia, na cava e rawa ni vakavuna noda sega ni dei? Rawa vakacava nida vorata na mataqali idre vaka oya?

Qarauna na Veika e Dau Veivakaleqai

E ka vakayalomatua meda nanuma na tikina bibi oqo: Na digidigi eda cakava ena tara noda bula vakarisito, eda na vinaka kina se sega. Era na digia na itabagone na cakacaka mera cakava, na nodra vuli kei na vakawati. O ira na uabula era na digia na vanua mera na toki kina se me dua tale na ikuri ni nodra cakacaka. Eda digia e veisiga na noda vakayagataka na gauna kei na vuqa tale na ka. Cava ena vukei keda meda digidigi vakavuku meda tudei kina nida dauveiqaravi ni Kalou? E kaya e dua e sa lotu Vakarisito dede tu: “Au dau kerea na veivuke i Jiova niu vakatulewataka e dua na ka. Au vakabauta ni bibi meda ciqoma da qai muria na ivakasala ena iVolatabu, ena soqoni vakarisito, mai vei ira na qase ni ivavakoso, kei na ivola vakaivolatabu tale e so.”

Nida vakatulewataka e dua na ka, e vinaka meda tarogi keda: ‘Au na marautaka beka na vakatulewa au cakava nikua ena lima se tini na yabaki mai oqo, se au na veivutunitaka? Au vakadeitaka beka ni digidigi au cakava ena sega ni vakaleqai au vakayalo, ia ena vukea ga noqu toso tiko vakayalo?’​—Filipai 3:16.

E vakaleqai nodra bula vakayalo e so na lotu Vakarisito nira vakalaiva mera temaki se ra vovoleka sara ni beca na lawa ni Kalou. E so era vakasivoi ena ivavakoso nira sega ni veivutunitaka na nodra ivalavala ca, era dau saga vakaukaua mera vakalesui mai. Ia, sega ni dede era vakasivoi tale nira cakava na ivalavala ca vata ga era a cakava e liu. E yaco oqo baleta beka nira sega ni masuta na veivuke ni Kalou mera ‘cata sara na ka ca, ra qai kabita sara na ka vinaka’? (Roma 12:9; Same 97:10) E gadrevi vei keda kece meda ‘vakadodonutaka na sala ni yavada.’ (Iperiu 12:13) Meda dikeva mada e so na tikina e rawa ni vukei keda meda tudei tiko ga kina vakayalo.

Vakaitavi ena Cakacaka Vakarisito Mo Tudei Tiko Kina

Dua na sala meda dei tiko ga kina oya na noda vakaitavi vakalevu ena veika e vauca na kena kacivaki na itukutuku vinaka ni Matanitu ni Kalou. Io, na noda cakacaka vakaitalatala e ivukevuke yaga ni rawa ni vukea na lomada kei na noda vakasama meda cakava na loma ni Kalou qai dei tiko ga ina icocovi ni bula tawamudu. Ena tikina oqo, a uqeti ira kina e Korinica o Paula: “Oi kemudou na wekaqu lomani, mo dou qai tu dei sara, mo dou kakua ni yavala, mo dou uasivi cake e na cakacaka ni Turaga e na gauna kecega, ni dou sa kila sa sega ni ka walega na nomudou cakacaka e na vuku ni Turaga.” (1 Korinica 15:58) Na vosa “tu dei” e kena ibalebale e dua na ka e ‘yavutaki dei.’ Na vosa “kakua ni yavala” e vakaraitaka e dua na ka e sega ni yavala, e tu ga vakadua. Noda vakaogai keda tiko ga ena cakacaka vakaitalatala e rawa ni vakadeitaka na noda bula na lotu Vakarisito. Io, noda vukei ira e so mera mai kilai Jiova e vakainaki kina na noda bula, e vakamarautaki keda tale ga.​—Cakacaka 20:35.

O Pauline, e dua na lotu Vakarisito e sa sivia e 30 na yabaki nona cakacaka vakatabakidua kei na kaulotu, a kaya: “E itataqomaki na cakacaka vakaitalatala, ni noqu dau vunau vei ira e so e vakadeitaka ni tiko vei au na ka dina.” E vaka sara ga oya noda nuidei nida vakaitavi wasoma ena so tale na cakacaka vakarisito me vaka na noda tiko ena soqoni, kei na noda gumatua ni vulica na iVolatabu.

Veivakadeitaki Nodra Veikauaitaki na Mataveitacini

Noda tiki ni dua na isoqosoqo e qaravi Jiova e vuravura raraba e veivakadeitaki. E ka ni veivakalougatataki dina noda rawa ni veimaliwai kei ira na mataveitacini dau veikauaitaki vaka oqo e vuravura raraba! (1 Pita 2:​17, NW) E rawa kina vei keda meda veivakadeitaki vei ira eda vakabauta vata.

Dikeva mada na veivuke a cakava na tamata yalododonu o Jope. O koya mada ga na dauveivakacegui lasulasu o Elifasi a voraki me vakadinata kina: “A nomu vosa sa dautokoni koya sa voleka ni bale; ko sa dauvakaukauwataka na duru malumalumu.” (Jope 4:4) Vakacava o keda ena ituvaki vaka oqo? E noda itavi yadudua meda vukei ira na tacida tagane kei na tacida yalewa vakayalo mera tudei tiko ga ena veiqaravi vei Jiova. Nida veitaratara kei ira, e rawa nida muria na veivosa oqo: “Vakaukauwataka na ligadra era malumalumu, ka vakataudeitaka na durudra sa tuninini.” (Aisea 35:3) Vakacava me nomu isausau mo uqeta e dua se rua na tacimu lotu Vakarisito ena veigauna kece o sotavi rau kina? (Iperiu 10:​24, 25) E rawa ni vukei ira mera tudei tiko ga ena nodra sasaga mera vakamarautaki Jiova na vosa ni veivakauqeti e veivakacaucautaki.

E levu na ka vinaka e rawa nira cakava na qase ni ivavakoso mera uqeti ira kina na ka vou. E rawa nira solia na ivakasala yaga kei na ivakavuvuli dei vakaivolatabu qai tomani ira ena cakacaka vakaitalatala. E dau tu vakarau na yapositolo o Paula me veivakayaloqaqataki. E dau gu na yalona me raici ira na lotu Vakarisito e Roma me vakaukauataki ira vakayalo. (Roma 1:​11) E raici ira na tacina vakarisito e Filipai mera ‘ka rekitaki qai nona itekiteki’ qai dau uqeti ira mera ‘tudei vua na Turaga.’ (Filipai 4:1, VV) Gauna e rogoca kina na dredre era sotava tiko na tacina e Cesalonaika, a talai Timoci o Paula me lai ‘vakataudeitaki ira qai vakaroti ira, me kakua kina e dua e vakayavalati ena veika rarawa era sotava tiko.’​—1 Cesalonaika 3:​1-3.

Rau vakavinavinakataka, rau qai vakamareqeta o Paula kei Pita na nodra sasaga vagumatua na tacidra era vakabauta vata. (Kolosa 2:5; 1 Cesalonaika 3:​7, 8; 2 Pita 1:12) Meda vaka tale ga oya, meda kua ni raica nodra malumalumu na tacida, ia meda raica ga na veika era vinaka kina kei na nodra sasaga mera tudei tiko ni vakarokorokotaki Jiova.

Kevaka eda dau rai cala da qai dau vakalelewa, o cei e kila, eda sa na vakadredretaka vei ira e so mera dei tiko ga ena vakabauta. E bibi kina meda nanuma nira “malumalumu ka biu wale tu” na tacida ena ituvaki oqo! (Maciu 9:​36) E dodonu ga mera kunea ena ivavakoso vakarisito na veivakabulabulataki kei na vakacegu. Meda solia mada ga o keda kece na noda vinaka taucoko ena noda uqeti ira eda vakabauta vata kei na noda vukei ira mera tudei tiko ga.

E so era na cakava beka vei keda e so na ka e rawa ni vakaleqa noda tudei tiko ga. Eda na vakalaiva beka e so na vosa vere se so na itovo veibeci me tarova noda qaravi Jiova? Me kua nida vakalaiva e dua me mai vakamalumalumutaka na noda yalodina tiko ga!​—2 Pita 3:17.

Veivakadeitaki na Vosa ni Yalayala ni Kalou

Na veika e yalataka o Jiova me baleta na inuinui totoka ena ruku ni veiliutaki ni Matanitu ni Kalou e solia vei keda na inuinui meda tudei tiko kina. (Iperiu 6:​19) Noda vakadeitaka ni Kalou e dau vakayacora na veika e yalataka, ena uqeti keda meda ‘yadra tiko qai tudei ena vakabauta.’ (1 Korinica 16:13; Iperiu 3:​6) E rawa ni vakatovolea noda vakabauta ni vaka me bera tiko na vakayacori ni so na vosa ni yalayala. E bibi kina noda qarauna meda kua ni vakacalai ena ivakavuvuli lasu ni rawa ni luluqa kina noda inuinui.​—Kolosa 1:​23; Iperiu 13:9.

E dodonu meda vuli ena nodra ivakaraitaki ca na Isireli era vakarusai ena vuku ni nodra sega ni vakabauta na vosa ni yalayala i Jiova. (Same 78:37) Meda kua ni vakataki ira, ia meda tudei tiko ga ena noda yadrayadravaki tiko nida qaravi Jiova ena iotioti ni veisiga oqo. E kaya e dua na qase ni ivavakoso matua: “Na ivakarau ni noqu bula e veisiga e vaka meu sa namaka tiko na kena yaco nimataka na siga levu i Jiova.”​—Joeli 1:​15.

Io, sa voleka sara na siga levu i Jiova. Ke da kabiti koya tiko na Kalou ena sega ni dua na ka meda rerevaka. Noda kabita matua na nona ivakatagedegede dodonu e rawa nida rawata kina na bula tawamudu!​—Vosa Vakaibalebale 11:19; 1 Timoci 6:​12, 17-​19.

[iYaloyalo ena tabana e 23]

O sa cakava tiko na ka o rawata mo vukei ira kina na tacimu lotu Vakarisito mera tudei tiko ga?

[iTaba ni Credit Line ena tabana e 21]

The Complete Encyclopedia of Illustration/J. G. Heck