Tukutuku Mai na Daukacivaka na Matanitu

Vua ni Sasaga kei na Vosota

A TUKUNA oti tu o Jisu Karisito ni na “batabata mai na nodra loloma na lewe vuqa” ena iotioti ni veisiga. Oya na vuna, ena levu na veiyasa i vuravura nikua, era sega ni kauaitaka na lewenivanua na itukutuku vinaka ni Matanitu ni Kalou. So era raica na lotu me ka beci.​—Maciu 24:​12, 14.

Dina ni vaka oya na rai ni so, na nodra vakabauta kei na nodra vosota na daukacivaka na itukutuku vinaka ni Matanitu ni Kalou, e rawa nira tutaka kina na veika ni bolebole era sotava me vaka eda na vakarau raica ena ivakaraitaki mai na Czech Republic.

Rau a vunau tiko ga yani e tautuba vua e dua na marama e rua na iVakadinadina i Jiova ni sogo tu na katuba. Dede vakalailai, a vakalaqa na katuba, qai sala mai tuba na ligana me taura Na Vale ni Vakatawa kei na Yadra! erau a vakaraitaka tiko na iVakadinadina. A rogo mai e dua na domo ena nona kaya “vinaka,” qai sogota tale na katuba. “Me keirau sikovi koya lesu?” rau a lomatarotarotaka na iVakadinadina. E dua vei rau e painia, se cakacaka vakatabakidua, a vakatulewataka me sikovi koya lesu, ia a sotava na painia oya na ka vata ga a yaco e liu, a vaka tiko oya me dua na yabaki.

A mani vakasamataka na painia oya me sa veisautaka mada na ivalavala ni nona vosa vua na marama oqo, qai kerea na veivuke i Jiova ena masu. Na gauna tale e lai solia kina na ivola, a tarogi koya vakayalovinaka: “Oni bula vinaka tiko? Oni a taleitaka na wilika na ivola?” Ena imatai ni gauna a sega ni sauma na marama oya, ia ni oti tale e vica na veisiko, sa qai vaka me kauai mai. Dua na gauna a dolava vinaka sara na katuba, ia a sega ga ni dede na nodrau veitalanoa.

Nona raica ni vaka e sega ni taleitaka na marama oya na veitalanoa e matanikatuba, a nanuma kina me volavola vua qai vakamacalataka na inaki ni nona dau veisiko yani qai sureti koya tale ga me vuli iVolatabu. Ni oti e dua veimama na yabaki na nona vosota na painia oqo, a qai yaco me rau tekivu vuli iVolatabu. Dina ni a kurabuitaka, ia a vakayaloqaqataki koya na ka a qai tukuna vua e muri na marama oya: “Au a tekivu vakabauta na Kalou ena gauna o tekivu kauta mai kina na noqu ivola.”

Io, na sasaga kei na vosota e rawa ni vuavuaivinaka kina na vunautaki ni Matanitu ni Kalou kei na cakacaka ni veivakatisaipelitaki.​—Maciu 28:​19, 20, VV.