Kila na iNaki ni Veivakadodonutaki

CAVA o dau nanuma ni o rogoca na vosa “veivakadodonutaki”? Na ibalebale ni vosa oqo ena dua na ivolavosa oya na “ivalavala ni nodra vukei na tamata mera talairawarawa ina lewa se ivakatagedegede ni itovo, ra qai totogitaki ke ra sega ni muria.” Dina ga ni oqo e sega ni kena ibalebale duadua ga, e levu nikua era dau taura tu vakamamada na ka kece e vauca na veivakadodonutaki.

Ia e vakamacalataka na iVolatabu na veivakadodonutaki ena dua tale na yasana. “Na luvequ, mo kakua ni beca ni sa vakavulici [vakadodonutaki] iko ko Jiova;” a vola na tui vuku o Solomoni. (Vosa Vakaibalebale 3:​11) Na veivakadodonutaki e tukuni tiko e ke e sega ni o koya e caka raraba tu, ia na ‘veivakavulici se veivakadodonutaki i Jiova,’ e yavutaki ena ivakavuvuli cecere ni Kalou. E yaga qai veivakabulabulataki na veivakadodonutaki vaka oqori​—e gadrevi sara ga. Kena veibasai na veivakavulici e yavutaki ena vakasama vakatamata qai veisaqasaqa kei na ivakavuvuli cecere i Jiova, e torosobu qai mosimosi. Oya na vuna era dau raica vakatani kina na veivakadodonutaki e levu.

Cava eda uqeti kina meda ciqoma na veivakavulici i Jiova? E vakamacalataki ena iVolatabu ni veivakavulici vakalou e vakaraitaka nona lomana na Kalou na kawatamata. E kaya kina o Solomoni: “Sai koya sa lomana ko Jiova, sa vunauca ko koya; me vaka sa ia na tamata vua na luvena sa vinakata ko koya.”​—Vosa Vakaibalebale 3:​12.

Cava na Kedrau Duidui na Veivakadodonutaki kei na Veitotogitaki?

E levu sara na basoga ni veivakadodonutaki e volai koto ena iVolatabu​—veituberi, veivakasalataki, veivakavulici, veivunauci, vakadodonutaki ni cala, kei na veitotogitaki. Na veivakadodonutaki kece i Jiova e caka ena loloma qai kena inaki me yaga vua e vakadodonutaki. O koya gona, na veivakadodonutaki i Jiova e sega ni kena inaki duadua ga me itotogi.

Ena yasana adua, na nona veitotogitaki na Kalou e sega ni dau kena inaki ga me vakadodonutaki koya e cala se me veivakavulici. Kena ivakaraitaki, rau sa tekivu vakila na ca ni nodrau talaidredre ena siga ga rau valavala ca kina o Atama kei Ivi. A vakatalai rau tani mai na were totoka o Iteni na Kalou, rau tekivu vakila kina na tatara ni ivalavala ca, tauvimate kei na qase. Rau mani takali yani vakadua ni oti na nodrau vakila tu na bula rarawa ena vica vata na drau na yabaki. Oqo na nona veitotogitaki na Kalou, sega ni veivakadodonutaki. E sega gona kina ni rawa ni vakadodonutaki o Atama kei Ivi ni rau nakita nodrau talaidredre rau qai sega ni veivutuni.

So tale na ivakaraitaki ni nona vakatauitotogi o Jiova oya na Waluvu ena siga i Noa, nodrau vakarusai o Sotoma kei Komora, kei na nodra vakawabokotaki na mataivalu ni Ijipita ena Wasa Damudamu. Na ka e cakava oqo o Jiova e sega ni kena inaki me veituberi se veivakavulici. E kaya kina na yapositolo o Paula ena veitotogitaki e dau cakava na Kalou: “Sa sega talega ni lomani ira tiko na kai vuravura makawa, a sa vakabulai Noa ka lewe vitu tale, o koya ka dauvunautaka nai valavala dodonu, ka sa luvuci ira na kai vuravura era sa sega ni lotu: a sa vakamai rau na koro ko Sotoma kei Komora me dravusa, ka sa vaqeavutaka ni sa cudruva, a sa qisia me kedrai vakarau na tawa lotu e na gauna emuri.”​—2 Pita 2:​5, 6.

Sala cava me “kedrai vakarau [kina] na tawa lotu e na gauna emuri” na itotogi a soli ena gauna oya? Na nona ivola o Paula vei ira mai Cesalonaika e dusia na noda gauna me gauna ena vakayacora kina na Kalou ena vuku i Jisu Karisito na nodra ‘cudruvi o ira era sega ni kila na Kalou ra qai sega ni vakabauta na itukutuku vinaka.’ Kuria o Paula: “Sa nodra cudruvi na veivakarusai tawa mudu.” (2 Cesalonaika 1:​8, 9) E sega ni inaki ni itotogi vaka oqo mera vakavulici se vakavinakataki na sega ni veivutunitaka nodra ivalavala ca. O koya gona ni veisureti tiko o Jiova vei ira na dau sokalou vua mera ciqoma nona veivakadodonutaki, e sega ni vakaibalebaletaka tiko ena nodra totogitaki na sega ni veivutuni.

E vakavure vakasama ni iVolatabu e sega ni vakamacalataki Jiova me dau vakatauitotogi ga. Ia ena levu na gauna e dau vakamacalataki koya ga me qasenivuli yalololoma, qai dauveivakavulici ena vosota. (Jope 36:22; Same 71:17; Aisea 54:13) Ni dau veivakavulici gona na Kalou ena sala ni veivakadodonutaki e dau salavata tu ga ena loloma kei na vosota. Na noda kila gona na lotu Vakarisito na ibalebale dina ni veivakadodonutaki qai tiko vei keda na rai dodonu, ena rawarawa noda ciqoma.

Veivakadodonutaki na iTubutubu Dauloloma

E dodonu mera kila kece ena loma ni vuvale kei na ivavakoso vakarisito na inaki ni veivakadodonutaki. E bibi oqo vei ira na veiliutaki me vakataki ira na itubutubu. E kaya na Vosa Vakaibalebale 13:24: “O koya sa sega ni vakanakuitataka na luvena sa cati koya: ia ko koya sa lomani koya sa vakanakuitataka [vakadodonutaka] ni sa gone.”

Sala cava mera veivakadodonutaki kina na itubutubu? E kaya na iVolatabu: “Oi kemudou talega na qase, dou kakua ni vakacudrui ira na nomudou gone: ia dou vakavulici ira e na vunau kei nai vakavuvuli ni Turaga.” (Efeso 6:4) E tokaruataki na ivakasala oqo ena veivosa e vaka: “Oi kemudou na qase, mo dou kakua ni vakacudrui ira na luvemudou, de ra datuvu kina.”​—Kolosa 3:​21.

O ira na itubutubu lotu Vakarisito era kila vinaka na inaki ni veivakadodonutaki, era na sega ni cakava vakaukaua. E rawa nira muria na itubutubu na ivakavuvuli e koto ena 2 Timoci 2:​24 (VV) nira veivakadodonutaki. E vola o Paula: “Sa sega ni dodonu me dauveivala na dauveiqaravi ni Turaga, sa dodonu me yalovinaka vei ira na tamata kece ga.” E sega ni veivakadodonutaki ena loloma na cudru vakalialia, na veikaralaki, na ruru se na vosa ni veibeci qai sega tale ga ni itovo ni lotu Vakarisito.​—Efeso 4:​31; Kolosa 3:8.

Na veivakadodonutaki ni itubutubu e sega ni yala wale ga ina nodra totogitaki vakusakusa na gone se lewa ga vakatotolo. Ena gadrevi mera vakadodonutaki vakavica e levu na gone me rawa ni qai veisautaki na nodra vakasama. Ena gadrevi gona kina vei ira na itubutubu na gauna, na vosota kei na nodra vakasamataka vakavinaka na ka era veivakadodonutaki kina. Mera nanuma tiko na itubutubu ni dodonu mera vakavulici na gone ena “vunau kei nai vakavuvuli” i Jiova. Kena ibalebale oya na veivakavulici ena dua na gauna balavu.

Veivakadodonutaki ena Yalomalua na iVakatawa Lotu Vakarisito

Era okati tale ga na qase lotu Vakarisito ena ivakavuvuli oqo. Nira ivakatawa dau loloma era dau saga kina mera vakayaloqaqataki ira na lewe ni ivavakoso ena nodra veivakasalataki vaka kina na veivunauci ke gadrevi. Nodra dau cakava oqori era na nanuma tiko na inaki dina ni veivakadodonutaki. (Efeso 4:​11, 12) Ke sa lomadra ga mera vakatauitotogi, era na totogitaki koya ga e cakacala ra qai sega ni cakava tale kina e dua na ka. Na veivakadodonutaki vakalou e okati kina e levu tale na ka. Ni uqeti ira na qase na loloma, era na muria na ivakasala era solia ra qai saga mera vukei koya e cala. Nodra kauai vakalevu, era dau tuvanaka gona vakavica mera dau lai veivakayaloqaqataki ra qai veivakavulici tale ga.

Nira sotavi ira era sega ni dau ciqoma na veivakadodonutaki, e dodonu vei ira na qase mera ‘veivakavulici ga ena yalomalumalumu’ me vaka e kune ena 2 Timoci 2:​25, 26. Sa qai tukuna na tikinivolatabu oqo na inaki ni veivakadodonutaki: “De solia beka vei ira na Kalou na veivutuni me ra kila kina na ka dina, ka me ra bula tale mai nai cori ni tevoro.”

Ena so na gauna e dau gadrevi mera vakasivoi mai na ivavakoso o ira na sega ni veivutunitaka na ka ca era cakava. (1 Timoci 1:​18-​20) E dodonu me dikevi na ikalawa bibi vaka oqo me veivakadodonutaki, sega ni itotogi ga. Ena so na gauna era dau lai sikovi ira na vakasivoi na qase. Oqo o ira na sa muduka na ivalavala ca era a vakayacora. Ena veisiko vaka oqo, era dau muria vinaka na qase na inaki ni veivakadodonutaki ena nodra vakamacalataka na ikalawa e dodonu me muri mera qai vakalesui tale mai kina ena ivavakoso vakarisito.

E Turaganilewa Tabucala o Jiova

E dodonu mera taura vakabibi na itubutubu, na ivakatawa lotu Vakarisito kei ira tale na so na nodra itavi lesi vakalou mera dau veivakadodonutaki. Mera kua ni nanuma ena nodra vakatulewa ni na sega ni rawa ni veisau e so. O koya gona me kua vakadua ni vaka era sauma lesu na ca se veitotogitaki kaukaua na nodra dau veivakadodonutaki.

Na iVolatabu e tukuna ni o Jiova duadua ga ena kaukaua nona veitotogitaki, ena solia tale ga na iotioti ni itotogi. E tukuni ena iVolatabu ni “ka vakadomobula me da lutu ki na liga ni Kalou bula!” (Iperiu 10:​31, VV) Me kua gona ni dua e vakatauvatani koya kei Jiova ena sala oqo se ena dua tale na ka. Me kua tale ga ni dua e rerevaka nona vakadodonutaki koya nona itubutubu se o ira na qase ni ivavakoso.

E veiraurau na vakatulewa i Jiova ni veivakadodonutaki. O keda na tamata eda sega ni tautauvata kei koya. E kila vinaka na loma ni tamata na Kalou qai kilai koya e sega ni ganita me vakadodonutaki, me totogitaki ga. Ia o keda na tamata eda sega ni rawa ni vakatulewataka na ka vaka oya. Oya na vuna, nira veivakadodonutaki na veiliutaki e dodonu mera cakava ena kena inaki dina.

Ciqoma na Veivakadodonutaki i Jiova

Eda gadreva kece na veivakadodonutaki i Jiova. (Vosa Vakaibalebale 8:​33) E dodonu gona meda gadreva na veivakadodonutaki e yavutaki mai na Vosa ni Kalou. Nida vulica na Vosa ni Kalou, eda na rawa ni ciqoma kina na veivakadodonutaki e lako vakadodonu mai vei Jiova ena iVolatabu. (2 Timoci 3:​16, 17) Ia ena so na gauna era dau vakadodonutaki keda na tacida lotu Vakarisito. Na noda kila na kena inaki ena vukei keda meda ciqoma ena yalo rawarawa.

E kaya na yapositolo o Paula: “E na gauna eda totogitaki kina sa vaka mera mosi kece ga ni i totogi ka sega ni ka me da marau kina.” E qai kuria: “Ia e muri era sa qai dau tauca kina na vakacegu kei na yalododonu vei ira era sa tuberi cake kina.” (Iperiu 12:​11, VV) Na veivakavulici i Jiova e vakaraitaka na nona lomani keda dina. O koya gona ke da mani vakadodonutaki se da veivakadodonutaki, meda nanuma tiko na inaki ni veivakadodonutaki vakalou da qai muria na ivakasala vuku ni iVolatabu: “Taura matua nai vakavuvuli; kakua ni laiva: mo vakabauti koya; ni sa nomu vu ni bula ko koya.”​—Vosa Vakaibalebale 4:​13.

[iYaloyalo ena tabana e 21]

O ira na sega ni veivutunitaka na ka ca era cakava ena cudruvi ira na Kalou, ena sega ni vakadodonutaki ira

[iYaloyalo ena tabana e 22]

Ni uqeti ira na qase na loloma, era vakayagataka kina nodra gauna mera vakekeli mera vukei kina na cakacala

[iYaloyalo ena tabana e 23]

Era veivakavulici na itubutubu ena yalovosota kei na yalololoma ena “vunau kei nai vakavuvuli” i Jiova