Watchtower LAIBRI ENA INTERNET
Watchtower
LAIBRI ENA INTERNET
vakaViti
  • IVOLATABU
  • IVOLA
  • SOQONI
  • w04 1/15 t. 8-9
  • “Na Kau sa Bulia ko Jiova, sa Mamau”

Sega na kena vidio.

Vosota, sega ni laurai rawa na vidio.

  • “Na Kau sa Bulia ko Jiova, sa Mamau”
  • Na Vale ni Vakatawa Kacivaka na Matanitu i Jiova—2004
  • iKuri ni Ulutaga
  • Veikau
    Yadra!—2023
Na Vale ni Vakatawa Kacivaka na Matanitu i Jiova—2004
w04 1/15 t. 8-9

Na Totoka ni Veika e Bulia o Jiova

“Na Kau sa Bulia ko Jiova, sa Mamau”

O SA bau duri tu ena dua na loga ni veikau, o qai raica ni botea yani na kena veidraunikau na rarama ni matanisiga? O rogoca beka na tavasa ni draunikau ni liwava na cagi?​—Aisea 7:2.

Ena so na yasa i vuravura e dau rairai vinaka ena so na gauna na duiroka ni draunikau, e so era damudamu, damu dromodromoa, dromodromo, kei na vuqa tale na roka. Nida raica tu yani e vaka ga ni kama tu na veikau! Na veika oqori e sota vinaka kei na veivosa oqo: “Dou lagata mai na sere, na veiulu-ni-vanua, na veikau, kei na kau yadua sa tu kina.”​—Aisea 44:23.a

E rauta ni dua na ikatolu ni iwase kei vuravura e robota tu na veikau. E veivakurabuitaki gona na veikau kei na veika bula era tu kina ni vakalagilagi koya na Matai kei na Dauveibuli, na Kalou o Jiova. “Dou vakavinavinaka vei Jiova,” e lagata na daunisame, “a kau dauvua, kei na sitari kecega.”​—Same 148:7-9.

“E bibi ena bula ni tamata na veikau ni yaga ena veika vakayago, qai marautaki tale ga na raica,” e kaya na ivola The Trees Around Us. E taqomaki keda, e veivakacegui, qai vakasavasavataka na wai. E solia tale ga na cagi bulabula. Ena sala cava? Ena dua na sala vakatubuqoroqoro e vakatokai na photosynthesis. Ena sala oqori, na sela ni draunikau e vukica na carbon dioxide, na wai, na mineral, kei na rarama ni siga me oxygen kei na kakana.

E vakasakiti na totoka ni veikau kei na kedra ibulibuli. Vakauasivi na totoka ni vunikau lelevu era tu e veikau. Era bula tale tu ga kina na kau me vaka na balabala, na kau e vaka na lumi, na veivaini, na kausala, kei na co. Era na sega gona ni bula rawa na veikau lalai oqori ke ra sega ni vakarurugi ena kau lelevu, kei na wai e solia.

Ena so na veikauloa, ni dau voleka ni cava na yabaki, rauta ni tini na milioni na draunikau era dau lulutu ena dua ga na ekatea. Cava e dau yaco ena draunikau oqori? Na veimataqali manumanu lalai me vaka na karou, na baca, kei na so tale era dau vukica na draunikau kece oqori me qele, oqo e vakabulabulataka na qele. E sega gona ni maumau wale e dua na ka nira vukica tale na manumanu lailai oqori me qele bulabula.

Era bula tale tu ga e levu na manumanu lalai ena ruku ni draunikau mate. E kaya na ivola The Forest, “rauta ni 1,350 na manumanu . . . e rawa ni kune ena dua na vanua e rauta ni 30 ga na sedimita na kena raba, qai 2.5 na sedimita e lomaniqele, e sega mada ga ni okati e ke na bilioni vakacaca na manumanu lailai e sega ni raica rawa na tamata, era bula tu ena dua ga na tiki ni qele eda qumia rawa.” Kena ikuri, era tu tale ga ena veikau na manumanu era dolo, na manumanu vuka, na manumanu lalai kei na manumanu yavai va. Ia o cei beka me vakalagilagi ena kedra totoka kei na kedra veimataqali? E veiganiti dina na ka e kaya na Dauveibuli: “Sa noqu ga na pulumokau kila kecega mai na veikau, kei na pulumokau lasa mai na veiulu-ni-vanua e udolu.”—Same 50:10.

E so na manumanu era buli me rawa nira tu ga vakadua se vaka era moce tu ena vulaililiwa, se na gauna e leqa kina na kakana. Era sega ni vaka oqori na manumanu kece. E so me vaka na dia era dau veilakoyaki tu ena vulaililiwa. Era sega gona ni dau tu ga vakadua, se ra maroroya na kakana, ia era dau qara na kedra, baria na tabanikau kei na buku ni kau me vaka na iyaloyalo e koto e cake mai Jamani.

E volai tale ga vakalevu ena iVolatabu na veika me baleta na kau. E kaya e dua na itukutuku ni rauta ni 130 na veimataqali kau, okati kina e 30 na vunikau era tukuni tu ena iVolatabu. A vola na dauteikau o Michael Zohary, ena nona vakamacalataka na ka e volai tu ena iVolatabu: “Ni vakatauvatani kei na so na ivola rawarawa era tu, e sega ni dua e vaka na iVolatabu ni tu kina e levu na ivakamacala ni kau e salavata kei na bula.”

Na kau kei na veivunikau era isolisoli talei mai vua na Dauveibuli loloma. Kevaka eda lai tu e veikau ena dua na gauna, eda na duavata kei na daunisame: “Na kau sa bulia ko Jiova, sa mamau e na kedra dra: io na sitari mai Lepanoni, sa tea ko koya; era vakasova kina na manumanu.”​—Same 104:16, 17.

[iVakamacala e ra]

a Raica na 2004 Calendar of Jehovah’s Witnesses, Janueri/Feperueri.

[Kato ena tabana e 9]

Na vu ni amodi e kau vakasakiti ena Tokalau e Loma. E dau se ena itekivu ni yabaki—ni bera nira se na vo tale ni kau. E dau vakatokai tu kina na kau oqo ena vosa vakaiperiu makawa me dau yadra e liu, baleta beka ni dau se totolo. E dau yadra na kau oqo ni piqi se vulavula na sena.—Dauvunau 12:5.

Mai na rauta ni 9,000 na veimataqali manumanu vuka, e rauta ni 5,000 era dausere. E dau voqa na nodra sere ena veikauloa. (Same 104:12) Kena ivakaraitaki, na manumanu vuka na siparo, e dau marautaki na rogoca na veimataqali rorogo ni sere e dau seretaka. Na manumanu vuka na mourning warblers, me vaka na kena e tabaki tiko oqo, e sega soti sara ni dausere, ia e totoka na rokana ni dravu, dromodromo, qai drokadroka tale ga.​—Same 148:1, 10.

[iYaloyalo ena tabana e 9]

Na veikau e Normandy, Varanise

    iVola vakaViti (1982-2026)
    Sogota
    Dolava
    • vakaViti
    • Vakauta
    • Digia
    • Copyright © 2025 Watch Tower Bible and Tract Society of Pennsylvania
    • iVakavakayagataki
    • Kemu iTukutuku
    • Privacy Settings
    • JW.ORG
    • Dolava
    Vakauta