“Vakayacora Sara na Ka Ko sa Lesi Kina Moi Talatala”

“Vakayacora vinaka sara na nomu i tavi.”​—2 TIMOCI 4:5, VV.

1, 2. Dina ga nira daukaulotu kece na lotu Vakarisito, ia na cava e gadrevi vakaivolatabu vei ira na qase?

ODUA beka o daukacivaka na Matanitu ni Kalou? Ke vaka kina, vakavinavinakataki Jiova ena itavi dokai oqori. O dua beka na qase ni ivavakoso? Oqori e dua tale na itavi dokai mai vei Jiova. Ia meda nanuma tiko ni noda vuli vinaka se na noda matai ena vosa, e sega ni mai vu ni noda rawata na cakacaka vakavunau se na itavi vakaivakatawa ni ivavakoso. Eda rawata ga ni o Jiova e vakarautaki keda kina, qai so vei keda era tagane e soli vei ira na itavi dokai vakaivakatawa baleta ga nira rawata na kena ivakatagedegede vakaivolatabu.​—2 Korinica 3:5, 6; 1 Timoci 3:1-7.

² Era daukaulotu kece o ira na lotu Vakarisito era sa yalataki ira, ia e dodonu mera ivakaraitaki sara ga ena cakacaka vakavunau o ira na ivakatawa se o ira na qase. O ira gona na qase era “cakacaka vakaukauwa e na vunau kei na veivakavulici,” e raici ira tiko mai na Kalou kei Karisito vaka tale ga kina o ira na tacidra era iVakadinadina i Jiova. (1 Timoci 5:17; Efeso 5:23; Iperiu 6:10-12) E dodonu me bulabula vakayalo ena veigauna kece na nodra veivakavulici na qase, a tukuna kina na yapositolo o Paula vua na ivakatawa o Timoci: “E na yaco mai na gauna era na bese kina na tamata ni rogoca na i vakavuvuli vinaka, era sa na muria ga na nodra gagadre. Ia era na tauri ira ga na qasenivuli e na veidonui kei na ka era gadreva. E ra na sogota na daligadra ki na i vakavuvuli dina, ka goleva na veitukutuku wale. Ia ko iko mo yalomatua e na gauna kece ga, ka vosota na veika dredre. Mo vakayacora na cakacaka vakadauveivakalotutaki ka vakayacora vinaka sara na nomu i tavi me vaka e dua na tamata ni Kalou.”​—2 Timoci 4:3-5, VV.

3. Cava me caka me kua kina ni vakaleqa na bula vakayalo ni ivavakoso na ivakavuvuli lasu?

³ Me qarauna na ivakatawa me kua ni vakaleqa na bula vakayalo ni ivavakoso na ivakavuvuli lasu, e dodonu kina me muria na ivakasala i Paula: “Mo yalomatua e na gauna kece ga, . . . vakayacora vinaka sara na nomu i tavi.” (2 Timoci 4:5, VV) Io, ena gadrevi vua na qase me ‘vakayacora sara vakavinaka na nona itavi vakaitalatala.’ E kena ibalebale oqo me na vakayacora vakavinaka, se me vakaotia kece sara na nona itavi. Na qase e vakayacora vinaka na nona ilesilesi e dau cakava vinaka na itavi kece e lesi vua, e sega ni dau cakava vakavo. O ira era vaka oqo era dau dina ena ka lalai sara mada ga.​—Luke 12:48; 16:10.

4. Cava me caka meda vakayacora vinaka kina na cakacaka vakavunau?

⁴ E sega ni gadrevi me levu ga na gauna meda qai vakayacora vinaka kina na noda cakacaka vakavunau, na ka e vinakati oya me vakayagataki vinaka na gauna. Era na vakayacora vinaka na nodra ilesilesi na lotu Vakarisito kece ena cakacaka vakavunau ke ra cakava oqori e veigauna qai dua dua tu ga na kena ivakarau. Me vakaitavi vakalevu na qase ena cakacaka vakavunau, me dua na nona ituvatuva vinaka me rawa ni vakayacora vinaka kina na nona itavi, me kila na veika e dodonu me lesia vua e dua tale, kei na sala me caka kina. (Iperiu 13:17) Ia na qase e dokai ena sega ni dau vakasavuliga, me vakataki Niemaia ga, ni a vakaitavi tale ga ena kena taravaki tale na bai kei Jerusalemi. (Niemaia 5:16) O ira kece era qaravi Jiova e dodonu mera vakaitavi e veigauna kece ena cakacaka vakavunau.​—1 Korinica 9:16-18.

5. Na rai vakacava me tiko vei keda me baleta na cakacaka vakavunau?

⁵ E itavi marautaki dina meda kacivaka na Matanitu ni Kalou e sa tauyavu oti mai lomalagi! E dodonu gona meda vakamareqeta na noda itavi ni kacivaka na itukutuku vinaka vei ira na tamata kece e vuravura, ni bera ni yaco na icavacava. (Maciu 24:14, NW) Dina ga nida tamata ivalavala ca, e uqeti keda na vosa i Paula: “Ia sa waqa qele sa tu kina vei keitou nai yau oqo [na cakacaka vakavunau], me sa taka mai vua na Kalou na kaukauwa mana levu, ka me segai maivei keitou.” (2 Korinica 4:7) Io, e rawa nida vakayacora na itavi dokai oqo, ia eda na rawata ga ena kaukaua kei na vuku ni Kalou.​—1 Korinica 1:26-31.

Vakatakila na Lagilagi ni Kalou

6. Na cava e vakaduiduitaki rau na matanitu o Isireli vakayago kei Isireli vakayalo?

⁶ Ni tukuni ira tiko na lotu Vakarisito lumuti o Paula, a kaya ni ‘vakarautaki ira na Kalou mera italatala ni veiyalayalati vou.’ E vakatauvatana o Paula na veiyalayalati vou e caka vei ira na Isireli vakayalo ena vuku i Jisu Karisito, kei na veiyalayalati ni Lawa e caka vei ira na Isireli ena vuku i Mosese. E kaya o Paula ni a sega ni dua e veiraimata rawa kei Mosese ena serau ni matana ni sa kauta sobu mai ena ulunivanua o Saineai na vatu e volai tu kina na iVunau e Tini. Ni toso na gauna, a qai yaco e dua na ka e leqataki vakalevu ni “sa lomaqataki [tu] na lomadra” na Isireli qai vaka e tabonaki na lomadra. Ia, ke ra qaravi Jiova mai vu ni lomadra, ena kau laivi kina na ka e tabonaka tiko na lomadra. Oti sa qai tukuna o Paula na cakacaka vakavunau e soli vei ira na lewe ni veiyalayalati vou, e kaya: “Koi keda kecega, . . . sa sega ni tabonaki tiko na matada, eda sa raica se [“vakavotuya,” NW] na serau ni Turaga [o Jiova] me vaka nai iloilo.” (2 Korinica 3:6-8, 14-18; Lako Yani 34:29-35) Era kalougata tale ga na ‘so tani tale na sipi’ i Jisu nikua mera vakavotuya na lagilagi i Jiova.​—Joni 10:16.

7. E rawa vakacava nira vakavotuya na tamata na lagilagi ni Kalou?

⁷ E rawa vakacava vua na tamata ivalavala ca me vakavotuya na lagilagi ni Kalou, ni sega ni rawa ni bula e dua e raica na Kalou? (Lako Yani 33:20) Meda kila rawa mada ni tiko na ikuri ni lagilagi i Jiova, oya na inaki lagilagi me vakadinadinataki kina na dodonu ni nona veiliutaki ena nona vakayagataka na nona Matanitu. Na ka dina me baleta na Matanitu ni Kalou e tiki ni ‘cakacaka veivakurabuitaki ni Kalou,’ era tekivu kacivaka o ira na sovaraki vei ira na yalo tabu ena Penitiko 33 S.K. (Cakacaka 2:11) Ena veidusimaki gona ni yalo tabu, era vakayacora vinaka kina na cakacaka e tataunaki vei ira, oya na cakacaka vakavunau.​—Cakacaka 1:8.

8. Cava e dei tu e loma i Paula me baleta na nona cakacaka vakavunau?

⁸ Sa dei tu e loma i Paula me kua ni dua na ka e tarova na nona vakayacora vinaka na cakacaka vakavunau. E vola: “Ni sa soli vei keitou na cakacaka oqo, ka me vaka sa yaco vei keitou na loloma, keitou sa sega ni datuvu kina; ka keitou sa biuta na veika vuni e veivakamaduataki, a sa sega ni daulawaki na neitoui valavala, se keitou vakatanitaka na vosa ni Kalou; ia ni keitou sa tukuna na ka dina, keitou sa vakadonui keitou kina ki na lomadra na tamata kecega, e na mata ni Kalou.” (2 Korinica 4:1, 2) Na nona kaya tiko o Paula na “cakacaka oqo,” e vakaibalebaletaka na kena tukuni yani na ka dina, kei na kena sa tete na rarama ena veivanua.

9, 10. Eda na vakatakila vakacava na lagilagi i Jiova?

⁹ Ena vuku ni ivurevure ni rarama vakayalo kei na rarama vakayago, a vola kina o Paula: “Sai koya na Kalou, o koya sa kaya eliu me cila mai na butobuto na rarama, sa cila mai ki na loma i keitou, me cila yani kina na serau ni Kalou, o koya sa vakatakila rawa e na mata i Jisu Karisito.” (2 Korinica 4:6; Vakatekivu 1:2-5) Ni soli vei keda na itavi dokai meda italatala ni Kalou, meda saga meda savasava baleta nida vaka tiko na iloilo nida na vakavotuya yani na lagilagi i Jiova.

¹⁰ O ira na tu ena butobuto vakayalo era sega ni raica na lagilagi i Jiova se na kena iyaloyalo o Jisu Karisito, o Mosese Levu Cake. Nida dauveiqaravi i Jiova, eda ciqoma na rarama lagilagi mai na iVolatabu da qai vakatakila yani vei ira tale na so. Ke ra via bulata yani na veivakarusai o ira na tu ena butobuto vakayalo, ena gadrevi me sobuti ira na rarama e lako mai vua na Kalou. Eda muria ena marau kei na yalogu na ivakaro mai vua na Kalou meda cila yani ena vanua butobuto me vakalagilagi kina o Jiova.

Mo Cila Ramase ni O Veivakavulici Tiko

11. Cava e kaya o Jisu me baleta na noda vakacila yani na rarama? Cava e dua na sala eda na vakacila rarama kina ena cakacaka vakavunau?

¹¹ A tukuna vei ira na nona imuri o Jisu: “Oi kemudou na rarama kei vuravura. Na koro sa tara toka e na ulu-ni-vanua sa sega ni tabonaki rawa. Sa sega talega ni tutuvaki na cina, ka me qai toka e ruku ni vakarau ni sila, e na kenai tutu ga; sa qai cinavi ira kecega sa tiko e vale. Me caudre vakakina na nomudou rarama e na matadra na tamata, me ra raica na nomudoui valavala vinaka, ka vakarokorokotaka na Tamamudou sa tiko mai lomalagi.” (Maciu 5:14-16) Na noda itovo vinaka ena uqeti ira tale e so mera vakalagilagia tale ga kina na Kalou. (1 Pita 2:12) E levu na sala eda rawa ni vakacila rarama yani kina ena noda cakacaka vakavunau. E dua vei ira na noda inaki levu na noda vakavotuya yani na rarama vakayalo mai na Vosa ni Kalou, eda cakava oqori ena noda vakatavuvulitaka na iVolatabu ena sala maqosa. Oqo e dua na sala bibi meda vakayacora vinaka kina na cakacaka vakavunau. Nida caka vuli iVolatabu, cava soti meda cakava meda tara kina na lomadra o ira na vakasaqara tiko na ka dina?

12. E salavata vakacava kei na caka vuli iVolatabu na masu?

¹² Na noda masu vei Jiova me dua noda vuli iVolatabu, e vakaraitaka sara ga na noda vinakata meda vakavulica e dua. E vakaraitaka tale ga nida raica vakabibi na nodra vukei e so tale mera vulica na loma ni Kalou. (Isikeli 33:7-9) E sega ni vakabekataki ni na sauma o Jiova na noda masu, ena vakalougatataka tale ga na noda sasaga ena cakacaka vakavunau. (1 Joni 5:14, 15) Ia, e sega ni inaki wale ga ni noda masu me dua na noda vuli iVolatabu. Ke sa dua na noda vuli iVolatabu, ena laulau na noda veivakavulici ke da dau masulaki koya rawa o gonevuli, da qai vakasamataka e so na ka ena rairai ganiti koya.​—Roma 12​:12.

13. Cava ena vukei keda me laulau kina noda caka vuli iVolatabu?

¹³ Me laulau noda caka vuli iVolatabu, e bibi meda dau vakavakarau vinaka ena veigauna kece ni vuli. Ke dau tu vei keda na nanuma nida sega ni kenadau ena caka vuli iVolatabu, vakadikeva ena veigauna kece ni vuli na sala e dau taura kina na vuli o koya na ivakatawa ni Vulivola ni iVavakoso. Rawa tale ga nida veitomani kei ira na dautukutuku e dau vuavuaivinaka na nodra caka vuli iVolatabu. Io, e bibi meda dau dikeva na ituvaki ni rai kei na iwalewale ni nona veivakavulici o Jisu Karisito.

14. Eda na tara vakacava na lomadra na noda vuli iVolatabu?

¹⁴ Dau rekitaka o Jisu me cakava na loma i Tamana vakalomalagi, me dau tukuni koya tale ga. (Same 40:8) E yalomalua qai rawa vua me tara na lomadra na vakarogoci koya. (Maciu 11:28-30) O koya gona, me noda sasaga mada ga meda tara na lomadra na noda vuli iVolatabu. Ia meda rawata oqori, ena vinakati na vakavakarau me salavata kei na noda vakasamataki ira yadua na gonevuli kei na kedra dui ituvaki. Me kena ivakaraitaki, ke lako mai o koya mai na vanua e sega ni vakabauti kina na iVolatabu, de imatai ni ka meda cakava oya meda vukei koya me vakabauta ni dina na iVolatabu. Kena ibalebale oqori ni na vinakati meda wilika vata kei koya e levu na tikinivolatabu, oti da qai vakamatatataka vua.

Vukea na Gonevuli Me Kila na Vosa Vakatautauvata

15, 16. (a) Eda na vukea vakacava e dua eda vuli vata tiko e sega ni matata vua na vosa vakatautauvata ena iVolatabu? (b) Na cava meda cakava ke dredre ni taura rawa na ibalebale ni dua na vosa vakatautauvata o koya eda vuli iVolatabu vata tiko?

¹⁵ De na sega ni kila vinaka e dua e vuli iVolatabu tiko e dua na vosa vakatautauvata e cavuti ena iVolatabu. Kena ivakaraitaki, de na sega ni matata vua se cava a vakaibalebaletaka o Jisu ni a kaya me biu na cina ena kena itutu. (Marika 4:21, 22) Na cina a kaya tiko e ke o Jisu na cinadabe e vauvau na matana. Dau biu na cina vaka oya ena kena itutu me rarama kina na lomanivale. Ena matata cake na vosa vakatautauvata oqo i Jisu ke caka na vakekeli ena so na ivola me vaka na Insight on the Scriptures, ena ulutaga “Lamp” kei na “Lampstand.”a O na marautaka dina ke o vakavakarau vinaka yani mo lai serelaka vua nomu vuli iVolatabu na ibalebale ni ka e vulici ena sala e matata qai rekitaki vua!

¹⁶ De dua, na vosa vakatautauvata e vakayagataki ena ivola drau vulica e dredre ni taura rawa o gonevuli. Tovolea mo sereka vua oqori, se vakayagataka e dua tale na vosa vakatautauvata erau vakabibitaka e dua vata ga na tikina. De dua e kauta cake mai na ivola ni vuli ni bibi ena vakawati e dua na keda isa eda sota vinaka, qai gadrevi tale ga na cakacaka vata. Na vosa vakatautauvata ena vakayagataki beka me vakamatatataka na tikina oqo e baleta e dua na daulili ni sakisi, e biuta na kau e lili tiko kina e macawa qai nuitaka ni na toboki koya na kena isa. Ia de dua, ena matata cake na tikina oqori ke vakayagataki na vosa vakatautauvata me baleta na nodra dau cakacaka vata e le vica ena talaci ni iyaya mai na dua na waqa.

17. Na cava eda vulica vei Jisu me baleta na vosa vakatautauvata?

¹⁷ Sa na gadrevi ga na vakavakarau ke da nanuma me dua tale na vosa vakatautauvata me isosomi ni kena sa tiko rawa. Ia na noda cakava oqori e vakaraitaka nida kauaitaki koya dina na noda vuli iVolatabu. E dau rawarawa ga na vosa vakatautauvata e vakayagataka o Jisu me vakamatatataka kina e so na usutu dredre. Eda raica oqori ena nona iVunau ena Ulunivanua, qai vakamacalataki ena iVolatabu ni lauti ira dina na vakarorogo na nona iwalewale ni veivakavulici. (Maciu 5:1–7:29) Dau saga o Jisu me vakamacalataka vakamalua na ka vei ira na rogoci koya baleta ni kauaitaki ira dina.​—Maciu 16:5-12.

18. Cava me caka ena tikinivolatabu era dau tabaki tu ena ivola e vulici?

¹⁸ Na noda kauaitaki ira dina e so tale ena uqeti keda meda ‘vakamacala vei ira mai na iVolatabu.’ (Cakacaka 17:2, 3) Oqo e vinakati kina na vuli vagumatua kei na masu, vaka kina na vakayagataki vakavuku ni ivola e vakarautaka mai o koya na “dauniyau yalo dina.” (Luke 12:42-44, VV) Kena ivakaraitaki, e levu na tikinivolatabu era tu ena ivola Na Ka Mo Kila Mo Bula Tawamudu Kina.b Ni ivola lailai ga, e so ga na tikinivolatabu era lavetaki. Ke caka tiko gona na vuli, e bibi me wiliki qai vakamacalataki e so na tikinivolatabu era tabaki tu. Vakauasivi ni ka eda vakavulica e yavutaki ena Vosa ni Kalou, qai kaukaua sara na Vosa oqori. (Iperiu 4:12) Dau vakayagataka vakalevu na iVolatabu ena gauna ni vuli kece, oqo na tikinivolatabu era tabaki tu ena veiparakaravu. Vukei ira na gonevuli mera raica na ka e tukuna na iVolatabu me baleta e dua na ulutaga se na ka era na rawa ni cakava kina. Saga mo vakaraitaka na ka ena yaga vua ke dau talairawarawa vua na Kalou.​—Aisea 48:17, 18.

Vakayagataka na Taro Vakavure Vakasama

19, 20. (a) Cava e bibi kina mo vakayagataka na taro ni o caka vuli iVolatabu tiko? (b) Cava e rawa ni caka ke gadrevi me vakamatatataki tale e dua na ulutaga?

¹⁹ E dau vakayagataka vakavuku o Jisu na taro me rawa kina nira vakasama na tamata. (Maciu 17:24-27) Ke da taroga e dua na taro e vakavure vakasama qai sega ni na madua kina o gonevuli, e rawa sara ga ni kilai na ka e nanuma mai na nona isaunitaro. E rawa nida raica kina ni se sega ni tiko vua na rai vakaivolatabu. Kena ivakaraitaki, ke se vakabauta tiko o gonevuli na Letoluvakalou. Ena wase 3 ni ivola na Kila, e vakaraitaka ni sega ni kune ena iVolatabu na vosa “Le Tolu Vakalou.” E lavetaki qai tabaki tale tu ga kina e so na tikinivolatabu e vakaraitaka ni o Jiova e duatani, e duatani tale ga o Jisu, qai igu kaukaua wale ga ni Kalou na yalo tabu, e sega ni dua na ka bula me vaka na tamata. Na wiliki kei na vakamacalataki ni tikinivolatabu sa rawa sara ga ni vakadinadinataki kina na ivakavuvuli oya. Ia vakacava ke sega? Ni oti e dua na nomudrau vuli, e rawa ni o drau veivosakitaka na ulutaga oqo ena nomudrau vakayagataka e dua tale na ivola e tabaka na iVakadinadina i Jiova, me vaka na brochure E Dodonu li Mo Vakabauta na Tikovakalewetolu? Ni oti oya, drau qai tosoya na nomudrau vulica na ivola na Kila.

²⁰ Ia vakacava ke dikevi ena nona isaunitaro o gonevuli ni sega ni taleitaka se kidacalataka na taro e tarogi vua. Ke okati ena veitalanoa oya na vakatavako, e vinaka meda tosoya tiko ga na vuli, ia me qai veivosakitaki na tikina oya ena dua tale na gauna. Na noda kila ni se vakatavako tiko ga o gonevuli e rawa nida lai vaqara mai e so na kena ulutaga e sa tabaki oti me vukei koya me toso kina vakayalo. Nida saga meda tara na loma i gonevuli, meda masulaka me vukei koya o Jiova me tubu cake vakayalo.

21. Cava e rawa ni yaco ke da veivakavulici ena sala e ganiti ira yadudua na gonevuli?

²¹ Na noda vakavakarau gona vakavinaka kei na veivuke i Jiova, eda na veivakavulici kina ena sala e ganiti ira yadudua na gonevuli era vuli iVolatabu tiko. Toso na gauna, sa rawa nida vukei ira me titobu na nodra lomana na Kalou. E rawa tale ga nida vukei ira mera doka ra qai taleitaka na isoqosoqo i Jiova. Ena veivakacegui dina ke ra qai vakadinata na gonevuli ni ‘tiko kei keda na Kalou’! (1 Korinica 14:24, 25) Me laulau mada ga na noda caka vuli iVolatabu, da qai saga vagumatua meda vukei ira tale e so mera mai tisaipeli i Jisu.

Na iYau me Vakamareqeti

22, 23. Cava e gadrevi meda vakayacora vinaka kina na noda cakacaka vakavunau?

²² Meda vakayacora vinaka na noda cakacaka vakavunau, e dodonu meda vakararavi ena kaukaua mai vua na Kalou. Ni tukuna tiko na cakacaka vakavunau o Paula, a vola vei ira na tacina lotu Vakarisito: “Sa waqa qele sa tu kina vei keitou nai yau oqo, me sa taka mai vua na Kalou na kaukauwa mana levu, ka me segai maivei keitou.”​—2 Korinica 4:7.

²³ Ke da lumuti se da ‘so tani tale na sipi,’ eda vaka kece na waqa qele malumalumu. (Joni 10:16) Ia ena solia vei keda o Jiova na kaukaua meda vakayacora vinaka kina na noda itavi, se mani vakacava na idre eda sotava. (Joni 16:13; Filipai 4:13) Meda nuitaki Jiova mada ga vakatabakidua, meda vakamareqeta na noda veiqaravi vua, da qai vakayacora sara vakavinaka na noda cakacaka vakavunau.

[iVakamacala e ra]

O na Sauma Vakacava?

• Cava e rawa nira cakava na qase mera vakayacora vinaka kina na nodra cakacaka vakaitalatala?

• Sala cava e rawa nida vakavinakataka cake kina na iwalewale ni noda caka vuli iVolatabu?

• Cava o na cakava ke sega ni taura rawa o gonevuli e dua na vosa vakatautauvata, se gadrevi e so tale na ivakamacala ni dua na ulutaga?

[iYaloyalo ena tabana e 16]

Era dau veivakavulici na qase ena ivavakoso, ra qai tuberi ira na tacidra vakayalo ena cakacaka vakavunau

[iYaloyalo ena tabana e 18]

Dua na sala eda na vakacila yani kina na rarama oya me laulau na noda caka vuli iVolatabu