Taro na Dauwiliwili

Na cava e yaco ena itukutuku e volai ena Lako Yani 4:24-26, ia na bula i cei a tu ena itutu leqataki sara?

A gole tiko i Ijipita o Mosese, o Sipora na watina, kei rau na gone o Kerisomi kei Eliesa, qai yaco oqo: “Ni sa tiko e na dua na bure e na gau ni sala, sa veitata kaya ko Jiova, ka segata me vakamatea. A sa taura e dua na vatu gata ko Sipora, ka drutia laivi na vusona na luvena, ka biuta ki yavana, ka kaya, Na watiqu ni vakadavedra ko iko. Sa qai biuti koya me lako ko koya: a sa kaya na yalewa, Na watiqu sa vakadave dra, e na vuku ni veicilivi.” (Lako Yani 4:20, 24-26) E sega ni matata sara na veika e vakamacalataki i ke kei na kena ibalebale dina, ia e so na ka e matata me baleta na veitikinivolatabu oqo ke da raica na iVolatabu.

E sega ni kaya na itukutuku oya se o cei e leqataki nona bula. Ia sa rawa toka nida kaya ni sega ni bula i Mosese, ni se qai tau oti ga vua na ilesilesi vakalou me kauti ira tani na Isireli mai Ijipita. (Lako Yani 3:10) Ena veicalati gona ke nanumi ni via vakamatei Mosese na agilosi ni Kalou ke sa lako tiko o Mosese me lai vakayacora nona ilesilesi oya. Sa na rawa ga ni dua vei rau na gone e leqataki nona bula. Ena lawa a se vakaroti taumada kina o Eparama, e tukuni kina oqo: “Na gonetagane sa sega ni cilivi ena vakatatabui [“vakamatei,” NW] sara na tamata ko ya maivei ira na kai nona; sa vakacataka ko koya na noqu veiyalayalati.” (Vakatekivu 17:14) Kena irairai ni a weletaka o Mosese me cilivi luvena, mani ririkotaki kina de na vakamatei koya na agilosi i Jiova.

Ni sa ciliva oti na luvena o Sipora ena nona via cakava na ka e dodonu, na yava i cei e qai cuva yani kina? Na yava i koya na agilosi i Jiova e tu vua na kaukaua me vakamatea na gonetagane ke a sega ni cilivi. Nona biuta gona o Sipora ena yava i koya na agilosi na kuli ni yago vakatagane i luvena, e dusia ni sa muria na veika e vakaroti ena veiyalayalati.

E via rogo duatani toka na vosa i Sipora, “na watiqu ni vakadavedra ko iko.” Na cava e dusia oqo me baleti koya? Ena nona muria o Sipora na veika e lavaki ena veiyalayalati me baleta na cili, e vakadinata kina o koya ni tiko na nodrau veiwekani kei Jiova ena yavu ni veiyalayalati oya. A qai vakavotui ena veiyalayalati ni Lawa a soli vei ira na Isireli ni o Jiova e vaka tiko e dua na tagane vakawati, o ira na Isireli mera watina. (Jeremaia 31:32) O koya gona, na vosa i Sipora vei Jiova (se vua na agilosi e matataka na Kalou) kei na nona kaya ni o Jiova e ‘watina ni vakadavedra,’ e vakadinadinataka tiko kina o Sipora ni sa dodonu ga me vakamalumalumutaki koya ina veiyalayalati oya. E vaka me ciqoma tiko na itutu ni yalewa vakawati me vaka e gadrevi ena veiyalayalati oya me baleta na veicilivi, me watina kina na Kalou o Jiova. Mai na ka e cakava, oya nona talairawarawa ina veika sara ga e vinakata na Kalou, mani yaco me sega tale ni qai leqataki na bula i luvena.