Qarai na Bula Marau

ENA vica na yabaki sa oti, era a tarogi na lewenivanua mai Varanise, Jamani, Peritania, kei Mereke ena taro, “Na cava na yavu ni bula marau?” Vei ira na vakatarogi, e 89 na pasede era kaya nira na marau ke ra bulabula vinaka; e 79 na pasede era kaya ni vakatau ina vinaka ni bula vakawati; e 62 na pasede era kaya ni vakatau ke tini vinaka na veisusu vakaitubutubu; qai 51 na pasede era vakabauta ni rawati ni cakacaka vinaka ena kauta mai na bula marau. E macala vakasigalevu tu ni ilavo e sega ni vakatau kina na bula marau, ia e 47 na pasede era vakabauta ni vakatau kina. Na cava na kena dina?

Taumada, vakasamataka na kena tukuni ni vakatau na marau ena ilavo. Ena vakatataro a caka vei ira na le duanadrau na tamata vakavatu duadua e Mereke, e laurai nira sega ni marau vakalevu cake ni vakatauvatani kei ira na vo ni lewenivanua. Kuria oya, era kaya na kenadau ni vakasama, e dina ni sa voleka ni vakaruataki na levu ni iyau vakayago era taukena na lewenivanua o Mereke ena loma ga ni tolusagavulu na yabaki sa sivi, ia e sega ga nira marautaka vakalevu cake kina na bula. Ni kaya sara mada ga e dua na itukutuku: “E tubu ena gauna vata oqori na levu ni tamata era lomabibi. Vakatolutaki na kedra iwiliwili na itabagone era vakamatei ira ga. E vakaruataki na iwiliwili ni veisere.” E rauta ni 50 na matanitu era vakadidike kina na kenadau, ena kena sagai me laurai se vakatau na bula marau ena ilavo, qai vakadinadinataki ni ilavo e sega ni rawa ni volia na bula marau.

Tarava oqo, vakacava na vakasama ni bula marau e vakatau ena bulabula vinaka, ena vinaka ni bula vakawati, kei na rawati ni cakacaka vinaka? Ke oqori na veika e vakatau kina na bula marau, sa na qai vakacava ga o ira na le vica vata na milioni era tautauvimate tu, se o ira e ca na nodra bula vakawati? Vakaevei o ira na vakawati era sega ni vakaluveni, se o ira na yalewa se tagane era sega ni cakacaka vinaka? Sa nodra ivotavota beka me sega nira na kunea na bula marau? Ena yasana kadua, vei ira e nanumi nira bula marau ena vuku ni nodra bulabula vinaka se vinaka nodra bula vakawati, era na marau tiko beka ga ke mani veisau na kedra ituvaki?

Eda Vaqaqara Tiko Beka ena Kena iVurevure Dina?

Eda vinakata kece na bula marau. E sega gona ni kurabuitaki na tikina oqo baleta na noda Dauveibuli e tukuni ni “Kalou mamarau,” da qai buli meda itovo vata kei koya. (1 Timoci 1:​11, NW; Vakatekivu 1:​26, 27) Sa rauta meda vakasaqara kina na bula marau. Ia, e levu era raica ni marau e vaka ga ni sova e ligamu na nuku​​—⁠ni yali ga vakarawarawa.

De dua, e so beka vei keda sa rui sasaga tale tiko vakasivia. A vaka oqori na nona vakasama o Eric Hoffer, e dua na vuku e dau dikeva na veika e vauca na bula ni tamata. E kaya: “Na qarai tale vakasivia ni bula marau, e dua na vu levu ni rarawa.” E dina na vakasama oqori ke da vaqaqara tiko ena vanua cala. Eda na sotava dina kina na rarawa kei na cudru. Na kena sagai na vutuniyau; na sauvi ni veika vakapolitiki, bula vakailavo, se vakatorocaketaki ni bula raraba; qarai na rogo se vakaitutu; se na vakacegui totolo ni gagadre vakayago kei na kena muri na ivakarau ni bula ni nanumi koya ga, era na sega ni solia vei keda na bula marau. E dina ni rogorogo lasa, ia e levu era tokona na rai ni dua na dauvolaivola ena nona kaya: “Eda na bula marau cake, ke kua soti nida qara vakasivia”!

E vakavure vakasama dina na tikina oqo, na vakatataro a cavuti ena itekitekivu ni ulutaga oqo e vakaraitaka tale ga ni le 4 mai vei ira na le 10 na vakatarogi, era vakila ni rawati na bula marau ke da caka vinaka da qai vukei ira na tani. Vaka kina na le 1 mai vei ira na le ya4 e vakabibitaka ni vakabauta kei na daulotu, e usutu levu duadua ni kena rawati na bula marau. E dodonu gona meda dikeva sara mada na cava na vu ni marau dina. Ena vukei keda na ulutaga e tarava.

[iYaloyalo ena tabana e 3]

Levu era nanuma ni ilavo, na vinaka ni bula vakavuvale, se na cakacaka vinaka e vakatau kina na bula marau. O duavata kina?