Na Yavu ni Bula Marau

EKILA vinaka o Jiova, “na Kalou mamarau,” kei Jisu Karisito, “na Turaga levu duadua ga qai dau mamarau,” na yavu ni bula marau. (1 Timoci 1:​11, NW; 6:​15, NW) E sega gona ni kurabuitaki ni kune ena Vosa ni Kalou, na iVolatabu, na yavu ni bula marau.​​—⁠Vakatakila 1:3; 22:⁠7.

Ena nona iVunau rogo ena Ulunivanua, a vakamacalataka o Jisu na yavu ni bula marau. E kaya: “Era marau o ira era” (1) kauaitaka na nodra gagadre vakayalo, (2) tagi, (3) yalomalua, (4) via kania qai via gunuva na ivalavala dodonu, (5) dauloloma, (6) yalosavasava, (7) dau veisaututaki, (8) vakacacani ena vuku ni ivalavala dodonu, qai (9) vakasewasewani ka vakacacani ena vukuna.​​—⁠Maciu 5:​3-​11, NW.a

E Donu Beka na Veivosa i Jisu?

E sega ni rawa ni lomatarotarotaki na dina ni so na ka e kaya o Jisu. Ni sa macala tu ga ni na bula marau cake na tamata yalomalua, dauloloma, dau veisaututaki qai cakava na ka ena dela ni yalosavasava, ni vakatauvatani kei na dua e dau cudrucudru, veiba, qai sega ni dauloloma.

Ia, eda na rairai vakasamataka se rawa vakacava mera marau o ira era via kania qai via gunuva na ivalavala dodonu se o ira era dau tagi. E tiko vei ira oqo na rai matata me baleta na ituvaki kei vuravura. Era ‘vutugu qai qoqolou ena vuku ni ka vakasisila kece ga sa caka’ tu ena noda gauna oqo. (Isikeli 9:⁠4) Era rarawataka na kena yaco tu na veika oqo. Ia, nira vulica na inaki ni Kalou, oya me kauta mai na ivalavala dodonu e vuravura qai vakatulewa vakadodonu ena vukudra na vakalolomataki, e sega ni tukuni rawa na levu ni nodra marau.​​—⁠Aisea 11:⁠4.

Na lomani ni ivalavala dodonu e dau vakavuna tale ga vua e dua me rarawataka na nona sega ni cakava na ka e dodonu ena levu na gauna. O ira vaka oqo era kauaitaka na nodra gagadre vakayalo. Era tu vakarau mera qara na veidusimaki ni Kalou nira kila ni o koya ga e rawa ni vukea na tamata mera valuta na nodra malumalumu.​​—⁠Vosa Vakaibalebale 16:​3, 9; 20:⁠24.

O ira era tagi, era via kania qai via gunuva na ivalavala dodonu, ra qai kauaitaka nodra gagadre vakayalo era kila na bibi ni nodra veiwekani vinaka kei na Dauveibuli. Eda marau nida veiwekani vinaka kei ira na so tale, qai vakauasivi nida veiwekani vinaka kei na Kalou. Io, o ira era lomana dina na cakava na ka e vinaka, era tu vakarau mera muria na veidusimaki ni Kalou, e rawa ni tukuni nira bula marau.

Ia, ena rairai dredre beka mo vakabauta ni rawa ni marau e dua e vakasewasewani se vakacacani. E yaco dina oya, baleta o Jisu sara ga a kaya. O koya gona, na cava sara mada na kena ibalebale?

Vakacacani ia e Marau ​—⁠E Rawa Vakacava?

Dikeva ni sega ni kaya tiko o Jisu ni na rawata na bula marau e dua e vakasewasewani se vakacacani wale tu ga. E tukuna o koya: “Sa kalougata [“marau,” NW] ko ira era sa vakacacani e na vuku ni valavala dodonu, . . . ni dou sa vakasewasewani, ka vakacacani . . . , e na vukuqu.” (Maciu 5:​10, 11) Kena ibalebale, e rawati na marau ke vakasewasewani e dua baleta ni imuri i Karisito qai bulataka na ivakavuvuli dodonu a vakavulica o Jisu.

Oqori sara ga na ka a yacovi ira na lotu Vakarisito taumada. O ira na lewe ni Sanadrini, na nodra mataveilewai cecere na Jiu, era a “kacivi iratou nai apositolo, ka vakanakuitataka, era sa vakarota matua vei iratou me ratou kakua sara ni vosa e na yaca i Jisu, a ra sa qai sereki iratou me ratou lako.” Cava eratou a cakava na yapositolo? “Ni ratou sa lako tani e matadra na mataveilewai, eratou sa reki ni ratou sa yaga me ratou vakacacani e na vuku ni yacana. Ia e na veisiga kecega e na vale ni soro, kei na veivale kecega, era sa sega ni mudu ni vakatavuvuli ka vunautaki Jisu ni sai koya na Karisito.”​​—⁠Cakacaka 5:​40-​42; 13:​50-​52.

Sa qai vakamatatataka sara na yapositolo o Pita na nodrau veisemati na vakasewasewani kei na marau. A vola: “Kevaka dou sa vakasewasewani e na vuku ni yaca i Karisito, dou sa kalougata [“marau,” NW] kina; ni sa qai tu vei kemudou na Yalo sa vakarokorokotaki kei na Yalo ni Kalou.” (1 Pita 4:​14) Io, ni sotava na rarawa e dua na lotu Vakarisito ena nona cakava na ka e dodonu, se mani mosimosi sara vakacava, ena marau ni kila ni na rawata kina na yalo tabu ni Kalou. Erau semai vakacava na yalo ni Kalou kei na marau?

Cakacaka ni iTovo Vakayago se Vua ni Yalo Tabu?

Na yalo tabu ni Kalou ena sobuti ira ga era talairawarawa vua. (Cakacaka 5:​32) E sega ni solia o Jiova na yalona vei ira era vakaitovotaka “na cakacaka ni tovo vakayago.” Oya na “dauveibutakoci, na daudara, nai valavala tawa-savasava, na daugarogaro, na dausoro ki na veimatakau, na daucakaisausau, na dauveicati, na dauveileti, na veiqati, na daucudrucudru, na dauveiba, na veisei vakavuravura, na veisei ni lotu, na dauvuvu, na daumateni, na daumarau vakalialia, kei na veika sa vakakina.” (Kalatia 5:​19-​21) E dina ni sa ivakarau tudei ni vuravura nikua na “cakacaka ni tovo vakayago.” Ia, o ira era guta na itovo vaka oqo era sega ni kunea na marau dina. Na roka ni bula vaka oqo e vakacaraka na veiwekani, vaka kina na veitokani. Kuria, e kaya na Vosa ni Kalou, “ni na sega ni rawata na matanitu ni Kalou ko ira era sa kitaka na veika vakaoqo.”

Kena veibasai, na Kalou e solia na yalona vei ira era bucina “na vua ni Yalo Tabu.” Na itovo totoka e okati me vua ni yalo tabu oya “na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, nai valavala malua.” (Kalatia 5:​22, 23) Ni roka ni noda bula oqo, ena vakavinakataka na noda veiwekani kei na Kalou kei na noda veimaliwai kei ira na tani, ena vure kina na marau dina. (Raica na kato.) Koya e bibi sara, ke da bulataka na loloma, yalovinaka, da cakacaka vakayalololoma, kei na itovo vakalou tale e so, eda na vakamarautaki Jiova da qai nuitaka tale ga ena marau na bula tawamudu ena vuravura vou ni yalododonu ni Kalou.

Ka ni Digidigi na Bula Marau

Erau tiko mai Jamani o Wolfgang kei Brigitte na watina, rau sa tekivu vulica vagumatua na iVolatabu, rau taukena tale ga e levu na iyau vakayago era nanuma e vuqa ni yavu ni bula marau. Erau se veiwatini gone rau qai bulabula vinaka. Erau vakaisulu isau levu, e totoka na nodrau vale, qai cici vinaka na nodrau bisini. Erau vakayagataka e dua na iwase levu ni nodrau gauna me rau qara kina e levu tale na iyau, ia e sega ga ni solia vei rau na marau dina. Yaco na gauna, sa vinakati me rau digitaka na cava e bibi ena nodrau bula. Sa mani rau tekivu vakayagataka e levu na nodrau gauna ena kena sagai na veika vakayalo, kei na nodrau qara sara tale ga na sala me rau toro voleka kina vei Jiova. Na digidigi erau cakava oqo e veisautaka na nodrau rai, ni vakavuna sara ga me rau vakarawarawataka na nodrau bula, yaco sara me rau painia, se dauvunau vakatabakidua ni Matanitu ni Kalou. Nikua, erau sa veiqaravi tiko ena valenivolavola ni tabana ni iVakadinadina i Jiova mai Jamani. Rau sa vulica tale tiko ga e dua na vosa vakaesia, me rau vukei ira kina na vulagi yani ena vanua oya mera vulica na ka dina ena Vosa ni Kalou, na iVolatabu.

Erau a kunea beka na marau dina? E kaya o Wolfgang: “Mai na gauna keirau tekivu vakaliuca kina na veika vakayalo, keirau mamarau qai vakila tale ga na bula vakacegu. E vaqaqacotaka na neirau bula vakawati na neirau qaravi Jiova vakatabakidua. E liu, e dina ni keirau marautaka na neirau bula vakawati, ia ni tu na neirau itavi yadua kei na veika keirau dui taleitaka, e vakavuna me duidui neirau isausau. Ia, oqo keirau duavata ena kena kakavaki e dua ga na isausau.”

Na Cava na Yavu ni Marau?

Vakalekaleka sara: Kua ni cakava “na cakacaka ni tovo vakayago,” ia, bucina “na vua ni yalo tabu ni [Kalou].” Me bula marau e dua, ena vinakati vua me taleitaka na veiwekani voleka kei na Kalou. Ke dua e saga me cakava oya ena ganita dina na ivakamacala i Jisu me baleta na tamata mamarau.

O koya gona, kua ni nanuma ni o na sega ni rawata na bula marau. De dua ena gauna oqo o na rairai sega beka ni bulabula vinaka se o sotava tiko e so na leqa ena nomu bula vakawati. Rairai o sa sega ni rawa ni vakaluveni, se o sasagataka tiko me dua na nomu cakacaka vinaka. De sa sega beka ni levu nomu ilavo me vaka e liu. Ia, mo yaloqaqa; kua ni o leqataka! Ni Matanitu ni Kalou ena walia na veileqa oqori kei na vuqa tale. Sega ni dede, ena vakayacora na Kalou o Jiova na nona vosa ni yalayala me vaka e kaya na daunisame: “A nomuni matanitu sa tiko ga e na veigauna kecega ka sega ni mudu, . . . O ni sa dedeka na ligamuni, ka vakamamautaka na ka bula kecega e na ka era gadreva.” (Same 145:​13, 16) Era sa vakadinadinataka na tikina oqo na vica na milioni na tamata i Jiova ena veiyasa i vuravura, mo nanuma dei tiko na vosa ni yalayala veivakacegui oqori i Jiova ena vukea vakalevu na nomu bula marau ena gauna oqo.​​—⁠Vakatakila 21:⁠3.

[iVakamacala e ra]

[Kato/​iYaloyalo ena tabana e 9]

Na Veitovo e Vukea me Rawati Kina na Bula Marau

Ke o dauloloma, era na qai lomani iko tale ga na tani.

Na reki ena uqeti iko mo vosota na veituvaki dredre.

Na vakacegu ena vukea na nomu veimaliwai, me kua na veivala.

Na vosota vakadede ena vukei iko mo marau tiko ga, dina ni o vakatovolei.

Ni o tamata yalomalua, era na taleitaki iko na tani.

Ke o dau yalololoma, era na dodoliga ena marau na tani mera vukei iko.

Na vakabauta ena vakadeitaka vei iko na veidusimaki yalololoma ni Kalou.

Na yalomalumalumu ena vinaka kina na nomu vakasama, yalomu, kei na yagomu.

Ni o ivalavala malua se mo lewai iko vinaka, ena lailai kina na cala o na cakava.

[iYaloyalo ena tabana e 7]

Mo bula marau, ena gadrevi mo vakaceguya na nomu gagadre vakayalo