E Yaga na Qarai ni Veika Vakayalo

“O koya sa lomana na siliva ena sega ni mamau e na siliva; se ko koya sa lomana nai yau e na kenai kuri.”​​—Dauvunau 5:​10.

NA CAKACAKA vakasivia e vakavu ni oca, tauvimate, se so na gauna e rawa ni tini sara ena mate. Ena levu na vanua, e kavoro na bula vakavuvale ni yaco na veisere. E vu vakalevu na leqa vaka oqo ena qarai vakasivia ni iyau. E sega ni lomavakacegu na tamata ena ka sa tu rawa vua, ia ni vinakata me vakalevutaka tiko ga na veika e taukena, sa sega ni lai kauaitaka kina na kena cakayaco ena nona bula na nona qara na iyau. E kaya e dua na ivola idusidusi: “Na kaukaua ni yalo ni veimurimuri sa ivalavala tudei ni bula. Ena nona saga e dua me kua ni raici sobu mai vei ira na nona ilala se o ira na tiko veitikivi, sa bolea kina o koya na ibole i ra boto, sa na veitalia ga na kacabote.”

Na kena sega ni mamau rawa na yalona e dua, e rawa ni sega ni marautaka kina na bula. Dua na ka e cakayaco sara ga ena noda malumalumu, oya na kena kacivaki na ivoli e rawa nida taukena! E yatusorosoro ga na kena saravi ena retioyaloyalo na veika e volitaki tu ena veisitoa e rawa nida lai volia, veitalia ke sega ni yaga se lekata na noda iqila. Rawa ni veivakaleqai na tikina oqo.

Ke sega ni qarauni na yalo ni nanumi keda ga ena rawa ni kakana lo ena noda bula qai vakacaraka na noda ivalavala vinaka kei na yagoda. Me kena ivakaraitaki, a kaya na tui vuku o Solomoni: “Ni sa vakabulai na yalo, sa bula talega kina na yago.” (Vosa Vakaibalebale 14:30) Kena veibasai, na cakacaka vakasivia, nuiqawaqawa, kei na idre kaukaua ni kena kumuni na iyau vakayago e rawa ni vakaleqa na noda bula da qai sega ni mamarau. Na vakaliuci ni isausau vakayago ena vakaleqa tale ga na noda veiwekani. Ni luluqa na nona bula vakavuvale e dua kei na nona veimaliwai, e macala ni na vakaleqa sara ga na nona bula.

E Uasivi Cake na Veika Vakayalo

“Dou kakua ni vakatauvatani kemudou kei ira era sa vakavuravura,” e vakadreta na yapositolo o Paula ena vica na senitiuri sa oti. (Roma 12:2) O vuravura e lomani ira ga era muria na veika e vakabibitaka. (Joni 15:19) Ia, e veirawai ena kena bacani na lima na sala eda dau vakila kina na tamata na ka​​—na noda rai, na ka eda tara, boica, rogoca kei na noda vakila na ikanakana ni ka​​—io, e vinakata o vuravura mo taurivaka na ivakarau ni bula domodomoiyau. Vakauasivi na kena vakabibitaki “na gagadre . . .  ni mata” mo qara kina kei ira na tani na veika vakayago.​​—1 Joni 2:​15-​17.

Ia, e tu e so na ka e uasivia na ilavo, rogo kei na iyau vakayago. Ena vica na senitiuri sa oti, a kumuna o Tui Solomoni na iyau vakayago kece ga e dulaka tu o vuravura. A tara na nona veivale kei na nona veiwere, werenivaini, a tu na nona tamata dauveiqaravi, o ira na tagane kei na yalewa dausere, qele ni bulumakau kei na sipi, vaka kina e vuqa na koula kei na siliva. Na iyau i Solomoni a sivia na nodra iyau o ira a veiliutaki e liu vua. A turaga vakavatu dina. A tu vei Solomoni na ka kece ga e vinakata e dua me na taukena. Ia, ni vakaraica na veika kece e rawata, a kaya: “Sa ka wale kecega ka sa ka ni oca wale.”​​—Dauvunau 2:​1-​11.

Na vuku levu a soli vei Solomoni, a rawa kina ni kila ni marau levu e rawati ga ena kena qarai na veika vakayalo. A vola: “Tou rogoca nai tinitini ni ka kecega oqo: Mo rerevaka na Kalou, ka muria na nona vunau: ni sai koya ga oqo nai tavi taucoko ni tamata.”​​—Dauvunau 12:13.

Na veika vakamareqeti e volai tu ena Vosa ni Kalou, na iVolatabu, e uasivia na talei ni koula se siliva. (Vosa Vakaibalebale 16:16) Me vaka na vatutalei, e tu kina na ka dina titobu e dodonu mo vakasaqara. O na vakasaqaqara beka ena nomu vakekeli mo kunea? (Vosa Vakaibalebale 2:​1-6) E uqeti iko na noda Dauveibuli kei na iVurevure ni veika e talei, mo cakava vaka kina ni na vukei iko tale ga. Ena sala cava?

O Jiova e vakarautaka na ivakavuvuli totoka ena vuku ni nona Vosa, yalona tabu, kei na nona isoqosoqo. (Same 1:​1-3; Aisea 48:​17, 18; Maciu 24:​45-​47, VV; 1 Korinica 2:​10) Ni o dikeva na veika vakamareqeti oqo kei na kena talei, e dolava vei iko na sala mo digia vakavuku kina na ivakarau ni bula e totoka qai yaga dina. E sega ni dredre noda na digia oqo baleta o Jiova, na noda Dauveibuli, e kila vinaka na ka eda gadreva meda bula marau kina.

E Vakauqeta na iVolatabu na Veika e Vinaka Sara

Na ivakasala se veidusimaki momona e kune ena iVolatabu e yaga qai sega ni vakatauvatani rawa. E vakasakiti dina na itovo savasava e tokona. E mana na ivakasala e koto kina. Sa vakadinadinataki na kena yaga mai na dua na gauna balavu. E so gona na ivakasala momona vakaivolatabu oya meda tamata dau cakacaka, dau dina, vakayagataki ilavo vakavuku, qai kua ni vucesa.​​—Vosa Vakaibalebale 6:​6-8; 20:23; 31:16.

E vakauqeti keda tale ga o Jisu ena nona kaya: “Dou kakua ni kumuna vata vei kemudou nai yau e vuravura, e dauvakacacana kina na sarasara kei na veveka, a sa ravabasuka kina na daubutako ka butakoca: ia mo dou kumuna vata na nomudoui yau mai lomalagi, sa sega ni vakacacana kina na sarasara se na veveka, a sa sega ni ravabasuka kina na daubutako me butakoca.”​​—Maciu 6:​19, 20.

Me vaka ga ena 2,000 na yabaki sa oti, e yaga vakalevu nikua na ivakasala veiganiti oqori. Meda kua gona ni ogataka vakalevu na qarai ni iyau vakayago, ia e yaga cake vei keda ena gauna oqo meda qara na ivakarau ni bula e uasivi. Na kena idola oya meda kumuna na iyau vakayalo, ena kune kina na bula marau dina kei na lomavakacegu. Eda na rawata vakacava oya? Ena noda wilika na Vosa ni Kalou, na iVolatabu, da qai bulataka na ka eda vulica.

E Yaga na Veika Vakayalo

Nida vakayagataka na veika vakayalo, ena yaga vei keda vakayago, vakayalo, ena vakavinakataka tale ga na lomada. Me vaka ga na yaga ni iolo ni vuravura e taqomaki keda mai na warumisa vakasivia ni matanisiga, e rawa ni veivakaleqai, ena taqomaki keda tale ga na ivakavuvuli dodonu mai na veivakaleqai ni domodomoiyau. A vola na yapositolo lotu Vakarisito o Paula: “Ia ko ira era sa gadreva me ra vutuniyau, era sa bale ki na dauvere kei nai cori, kei na gagadre ca e vuqa, ka lialia, ka dauveivakacacani, oqori sa luluvuraki ira na tamata e na mate kei na rusa. Ni sa vu ni ka ca kecega na daulomana nai lavo: era sa daukocova eso, a ra sa vakacalai kina e na vakabauta, a ra sa cokai ira sara vakai ira e na yaluma vakavuqa.”​​—1 Timoci 6:​9, 10.

Na gagadre ni via vutuniyau e dau bacana na tamata me vinakata vakalevu kina na iyau, itutu, kei na kaukaua. Vakavuqa, e dau taurivaki na sala ni lawaki qaseqase me rawati kina na isausau oqori. Na nona via vutuniyau e dua ena vakamaumautaka kina na nona gauna, kaukaua, se na veika e sa rawata. Ena moce vakaca sara mada ga kina ena bogi. (Dauvunau 5:​12) Na qarai gona me levu na iyau ena vakataotaka na toso vakayalo. Na tamata rogo duadua a bau bula, o Jisu Karisito, a vakatakila na sala vinaka duadua: “Era marau o ira era kauaitaka na nodra gagadre vakayalo.” (Maciu 5:​3, NW) E kila vinaka o koya ni vutuniyau vakayalo ena rawati kina na kalougata tawamudu qai uasivi cake mai na vutuniyau vakayago e sega ni tudei.​​—Luke 12:​13-​31.

E Yaga Dina Beka?

“Erau a saga vakaukaua na noqu itubutubu me rau vakadeitaka vei au ni tawayaga na veika vakayalo,” a kaya o Greg. “Ia, dua na ka na noqu vakila na vakacegu ni vakasama niu kakavaka na isausau vakayalo, niu sega ni lomaocaoca me vaka e dau vakilai ni veisisivitaki na taukeni ni iyau.”

Na vakabibitaki ni veika vakayalo e vakaqaqacotaka na noda veiwekani. Na itokani dina ena taleitaki iko ena vuku ni nomu itovo, sega ni veika o taukena. E kaya na iVolatabu: “Ena vuku mai ko koya sa malele vata kei ira na vuku.” (Vosa Vakaibalebale 13:20) Kuria, na matavuvale bula marau e dau yavutaki ena vuku kei na loloma, sega ena iyau vakayago.​​—Efeso 5:22–​6:4.

Eda sega ni sucukaya mai na gadreva na veika e vinaka sara. Ena dodonu meda vuli vei ira na noda itokani se mai na Vosa ni Kalou. Oya na vuna na vuli e yavutaki ena iVolatabu e rawa ni veisautaka sara ga na ivakarau ni noda raica na veika vakayago. “Au a vukei meu vakadeuca na veika au dau okata tu me bibi, au qai vulica kina meu lomavinaka ga ena ka sa tu vei au,” e kaya o Don, a vakaitutu levu tu e liu ena baqe.

Qara na iYau Vakayalo ni Yaga Tawamudu

Na veika vakayalo e vakavotuya na veivakalougatataki tawamudu. E vola o Paula: “Sa dede vakalailai ga na veika sa rairai mai [vakayago]; ia sa sega ni mudu na veika sa sega ni rairai mai [vakayalo].” (2 Korinica 4:​18) E macala ni qarai ni veika vakayago ena rairai vakaceguya na noda gagadre ena dua na gauna lekaleka wale sara, ia na kocokoco ena sega ni yaga tawamudu. Ena yaga tawamudu ga na veika vakayalo.​​—Vosa Vakaibalebale 11:4; 1 Korinica 6:​9, 10.

E vakacala na iVolatabu na domodomoiyau, na ivakarau ni bula sa vakabibitaki tu ena gauna oqo. Ia, na iVolatabu e vakavulici keda ena sala meda tarova kina na yalo kocokoco, oya me rawarawa ga na noda bula. E uqeta na iVolatabu me vakaliuci na veika e bibi cake, na iyau vakayalo. (Filipai 1:​10) E vakavotuya na iVolatabu na yalo e vu ni kocokoco​​—oya na nanumi koya ga. Nida bulataka na veika eda vulica ena Vosa ni Kalou, eda na vakila na marau levu. Ena veisautaka na noda vakasama, meda dau soli ka mai na noda taura na ka. Oqo e dua dina na igu ena uqeti keda meda qara na veika vakayalo me sosomitaka na noda dau via vakamamautaka ga na yaloda!

Ena dua na vakasama, e ivakaruru ga na ilavo. (Dauvunau 7:​12) E donu vinaka kina na ka e kaya na iVolatabu: “Sa cakava vakaidina na tabana nai yau; ka vuka tani [“cagina,” NW] me vaka na ikeli vaka ki lomalagi.” (Vosa Vakaibalebale 23:5) E vuqa era vakayalia e levu na veika bibi ena nodra bula​​—nodra vuvale, bula vakayago, na lewaeloma vinaka sara mada ga ena vuku ni qarai ni iyau. Ia, e sega ni tukuni rawa na levu ni rarawa era sotava kina. Ena yasana kadua, na veika vakayalo ena vakaceguya na veika eda gadreva dina​​—meda lomani, me vakainaki na noda bula, kei na noda vinakata meda qarava na Kalou dauloloma o Jiova. E dusimaki keda tale ga ina sala ni bula uasivi tawamudu ena parataisi e vuravura​​—na inuinui e yalataka tu vei keda na Kalou.

Sega ni dede ena qai vakavatukana na tiko vinaka era gadreva voli na kawatamata ena vuravura vou ni Kalou. (Same 145:16) Ena gauna vata oqori ena robota na vuravura taucoko “na veikilai kei Jiova.” (Aisea 11:9) Ena tete na veika vakayalo. Sa na oti na domodomoiyau kei na veileqa e dau salavata kaya mai. (2 Pita 3:​13) Na veika ga ena yaga dina ena noda bula​​—na cakacaka e veivakacegui, bulabula ni yago, na ka ni veivakalasai e veitaraicake, veilomani vakavuvale, vaka kina na veiwekani tawamudu kei na Kalou​​—ena kauta mai vua na kawatamata na marau e tawamudu.

[Kato/​iYaloyalo ena tabana e 6]

Vakayagataka Vakavuku na Nomu iLavo!

Vakalewa vinaka na veika o gadreva. A vakavulica o Jisu meda masuta: “Ni solia mai vei keimami e na veisiga na kakana e rauti keimami.” (Luke 11:​3, VV) Kua gona ni saga mo taukena na veika e sega soti ni gadrevi. Kua ni guilecava, ena sega ni vakabulai iko na veika o taukena.​​—Luke 12:​16-​21.

Me dua na ituvatuva ni nomu vakayagataki ilavo. Kua ni o rawai ena volivoli vakaveitalia. Na iVolatabu e kaya: “A nanuma ni lomana [“nona lalawa,” NW] na dautara ka sa vakauta ga ki na sautu; ia na nodra nanuma na tamata kecega sa lomariri sa vakauta ga ki na viakana.” (Vosa Vakaibalebale 21:5) O Jisu a vakasalataki ira na rogoci koya mera cakacakataka mada e liu na isau vakailavo ni dua na sasaga era nakita tiko ni bera nira qai tekivutaka.​​— Luke 14:​28-​30, VV.

Kua ni dinau. Ke rawa, maroroi ilavo mo qai volivoli me kua kina ni o tauri iyaya vakadinau. E kaya vaka oqo e dua na ivosavosa: “A sa veiqaravi ko koya sa kere ka vua sa soli ka vua.” (Vosa Vakaibalebale 22:7) Ni o lewai iko vinaka qai o dei tiko ga ena ituvatuva ni nomu vakayagataki ilavo, o rawa sara mada ga ni lalawataka mo na volia e so na iyaya lelevu.

Kua ni vakasabusabu. O na sega ni vakasabusabu ke o tovolea mo qarauna vinaka na iyaya o taukena me rawa ni bula dede. E dau qarauna vinaka o Jisu me kua ni vakasabusabutaka na veika e vakayagataka.​​—Joni 6:​10-​13.

Vakaliuca na ka e dodonu me liu. Na tamata vuku ena ‘volia na gauna’ qai kakavaka na isausau e bibi cake.​​—Efeso 5:​15, 16.

[Kato/​iYaloyalo ena tabana e 7]

E Sega ni Tukuni Meda Tara Sara na Wenivako

Na veika eda dui sotava ena noda bula​​—se mani vinaka se ca​​—e rawa nida vuli kina. Ia, kena ibalebale beka meda lai tara sara na wenivako meda qai vuli? Sega, e tiko na veidusimaki e uasivi. A vakatakila oqo na daunisame ena nona masu: “A nomuni vosa na cina ki na yavaqu, kei na rarama ki na noqu sala.”​​—Same 119:105.

Na cava e uasivi cake kina na noda vuli mai na veidusimaki ni Kalou, ni vakatauvatani kei na noda lai tara sara na wenivako meda qai vuli kina? E dua na vuna, ke da vuli ena sala dredre vaka oya, e sega wale ga ni dau mosimosi, e rawa ni vakamawe vakadede tu ena noda bula na veika eda sotava. E rawa nida levea oya. A kaya na Kalou vei ira na Isireli ena gauna makawa: “De ko a vakarorogo ki na noqu vunau! sa na qai vaka na uciwai na nomu vakacegu, ka vaka na ua ni wasawasa na nomu cakacaka dodonu.”​​—Aisea 48:18.

E yaga gona me veidusimaki na Vosa ni Kalou, ni koto kina na itukutuku makawa duadua kei na veika dina era sotava na tamata ena nodra bula. O na rairai dikeva rawa ni yaga meda vuli mai na ka era sotava na tani, sega ni noda lai sotava sara ga. (1 Korinica 10:​6-​11) Kena ilutua, na Kalou e vakarautaka ena iVolatabu na lawa kei na yavu ni ivakavuvuli e nuitaki vakaoti. “Sa vinaka sara na vunau i Jiova . . . sa dina nai tukutuku i Jiova, ka sa vakavukui ira era sa sega ni vuku.” (Same 19:7) Kena ibalebale, na nona vuku na Dauveibuli yalololoma e sala uasivi meda vuli kina.

[iYaloyalo ena tabana e 4]

E vinakata o vuravura mo muria na kena ivakarau ni bula domodomoiyau

[iYaloyalo ena tabana e 5]

E uasivia na talei ni koula kei na siliva na ka vakamareqeti e kune ena iVolatabu