“Kauta Mai Nai Rogorogo Vinaka ni Ka Vinaka”

“Na kena lagilagi e na ulu-ni-vanua na yava i koya . . . sa kauta mai nai rogorogo vinaka ni ka vinaka.” ​—Aisea 52:7.

1, 2. (a) Na veika vakadomobula cava era yaco tiko e veisiga? (b) Na cava e yaco vei ira e levu nira rogoca wasoma na itukutuku ca?

ERA vakabauta na tamata e veiyasa i vuravura nikua nira sa bikai tu ena itukutuku ca. Nira dolava na retio, era kidroa ena itukutuku ni veimataqali mate e sa ravuta voli na veivanua e vuravura. Era sarava ena retioyaloyalo na kedra irairai vakaloloma na gone era tagi voli ena levu ni nodra waloloi. Nira cega na niusipepa, era wilika na kacabote ni gasaukuro e vorolaka na veivale, ra mate vakayauyau kina o ira era welewelei tu.

² Sa yaco dina tiko e veisiga na veika vakadomobula. Sa veisau tiko me ca sara na vuravura oqo. (1 Korinica 7:​31, NW) E kaya e dua na niusipepa mai na Ra kei Urope ni so na gauna, e nanumi ga ni sa “vakarau rusa vakadua o vuravura.” Sa rauta mera lomaleqa e levu nikua! E vakabauti nira duavata e vica vata na milioni kei na veika e kaya e dua ena vakadidike me baleta na itukutuku ena retioyaloyalo e Mereke: ‘E dau mositi au sara ga niu sarava na itukutuku ena retioyaloyalo. Sa ra itukutuku ca kece ga. E veivakayalolailaitaki dina.’

iTukutuku Mera Rogoca na Tamata Kece

3. (a) Na itukutuku vinaka cava e tukuna na iVolatabu? (b) Na cava mo raica kina vakabibi na itukutuku vinaka ni Matanitu ni Kalou?

³ E rawa beka ni kune e dua na itukutuku vinaka ena vuravura ca oqo? Io! E veivakacegui meda kila ni lewe tiko ni itukutuku ena iVolatabu na itukutuku vinaka, oya ni sa vakarau vakaotia na Matanitu ni Kalou na tauvimate, waloloi, basulawa, ivalu, kei na veika rarawa tale e so. (Same 46:9; 72:12) Sega beka ni o koya oqo na itukutuku era via rogoca tu na tamata kece? Io, era duavata kina na iVakadinadina i Jiova. Oya na vuna era kilai kina e veivanua kece ga nira dau gumatua ni tukuna yani na itukutuku vinaka ni Matanitu ni Kalou vei ira na tamata kece.​—Maciu 24:​14, VV.

4. Na tiki cava ni noda cakacaka vakavunau eda na veivosakitaka ena ulutaga oqo vaka kina ena ulutaga e tarava?

⁴ Na cava meda cakava meda marautaka tiko ga da qai solia noda vinaka kece ena noda kacivaka yani na itukutuku vinaka, ena yalava sara mada ga era sega ni via vakarorogo na lewena? (Luke 8:​15) Ena vukei keda na noda lesuva e tolu na tikina bibi e vauca na noda cakacaka vakavunau. Oya na (1) ka e uqeti keda, se vuna eda vunau kina; (2) noda itukutuku, se cava eda vunautaka; kei na (3) iwalewale ni noda vunau. Ni vinaka na vuna eda vunau kina, matata na noda itukutuku, qai laulau na iwalewale ni noda vunau, sa na rawa kina nira rogoca na duikaikai na itukutuku vinaka duadua, oya na itukutuku vinaka ni Matanitu ni Kalou.a

Vuna Eda Vunautaka Kina na iTukutuku Vinaka

5. (a) Na cava na vuna levu duadua eda vunau kina? (b) Na cava e rawa ni tukuni kina ni noda muria na ivakaro ena iVolatabu meda vunau, e vakaraitaka nida lomana na Kalou?

⁵ Meda veivosakitaka mada na imatai ni ka e vauca na noda cakacaka vakavunau​—oya na ka e uqeti keda. Na cava na vuna eda vunautaka kina na itukutuku vinaka? Na vuna vata ga a vunautaka kina o Jisu. E kaya: “Ni’u sa lomani Tamaqu.” (Joni 14:31; Same 40:8) Na vuna levu duadua oya nida lomana na Kalou. (Maciu 22:​37, 38) Na iVolatabu e sema vata na noda lomana na Kalou kei na cakacaka vakavunau, ni kaya: “Oqo na loloma vua na Kalou, me da muria na nona vunau.” (1 Joni 5:3; Joni 14:21) E okati beka ena ivunau se ivakaro ni Kalou na noda ‘lako yani ka qisi ira na tamata mera tisaipeli’? (Maciu 28:​19, VV) Io. A cavuta na vosa oqo o Jisu ena veivakauqeti i Jiova. Eda kila vakacava? E vakamacalataka o Jisu: “Ni’u sa sega talega ni kitaka e dua na ka vakai au; ia na ka ga sa vakatavulici au kina ko Tamaqu, sai koya ka’u sa vosataka.” (Joni 8:​28; Maciu 17:5) O koya gona, na noda muria na ivakaro meda vunau, e vakaraitaka nida lomani Jiova.

6. Na sala cava soti e uqeti keda kina na noda lomana na Kalou meda vunau?

⁶ Kena ikuri, na noda lomani Jiova e uqeti keda meda vunau meda sabaya kina na nona beitaka vakailasu na Kalou, o Setani. (2 Korinica 4:4) E lomatarotarotaka o Setani na dodonu ni Kalou me veiliutaki. (Vakatekivu 3:​1-5) Nida iVakadinadina i Jiova, eda via vakaitavi ena vakavotui ni lasu i Setani kei na vakacerecerei ni yaca ni Kalou vei ira na tamata kece. (Aisea 43:​10-​12) Eda vakaitavi ena cakacaka vakavunau nida sa mai kila na ivakatagedegede kei na sala i Jiova. Eda vakila nida voleka vua qai uqeti keda sara ga meda tukuna vei ira tale e so na veika me baleta na noda Kalou. Na yalololoma tale ga i Jiova kei na nona cakacaka dodonu e vakamarautaki keda meda tukuni koya tiko ga. (Same 145:​7-​12) Eda uqeti meda vakacaucautaki koya da qai tukuna na nona “veicakacaka uasivi” vei ira era na vakarorogo.​—1 Pita 2:​9, VV; Aisea 43:21.

7. Na cava e dua tale na vuna bibi eda vakaitavi kina ena cakacaka vakavunau?

⁷ E dua tale tiko na vuna bibi eda vakaitavi kina ena cakacaka vakavunau: Eda via vakacegui ira sa curuoso tu na lomadra ena levu ni itukutuku ca era rogoca e veisiga, kei ira era vakalolomataki tu. Me vakataki Jisu, eda gu tale ga meda vakacegui ira. Raica mada me kena ivakaraitaki, na veika e tukuni ena Marika wase 6.

8. Me vaka e tukuni ena Marika wase 6, e dau raici ira vakacava na lewenivanua o Jisu?

⁸ Eratou lesu mai na yapositolo ena nodratou cakacaka vakavunau ratou qai vakamacalataka vei Jisu na veika kece eratou cakava kei na ka eratou vakavulica. E raica o Jisu ni ratou oca na yapositolo, mani kaya vei iratou me ratou lai “vakacegu mada vakalailai.” Eratou mani vodo ena dua na waqa ratou qai soko ina dua na vanua vakanomodi. Era cicimuri iratou yani ena baravi na lewenivanua ra qai yaco sara ena vanua eratou tiko kina. Na cava sa qai cakava o Jisu? E kaya na kena itukutuku: “A sa . . . raici ira era sa lewe vuqa sara, a sa lomani ira, ni ra sa vaka na sipi sa sega na nodrai vakatawa: a sa vakatekivu me vakatavulici ira e na ka e vuqa.” (Marika 6:​31-​34) E dina ni wawale tu o Jisu, a uqeti koya na nona loloma me vunautaka tiko ga na itukutuku vinaka. Macala gona ni kauaitaki ira dina o Jisu.

9. Na rai donu cava me uqeti keda ena cakacaka vakavunau eda vulica ena Marika wase 6?

⁹ Na cava eda vulica ena ka e yaco oya? Nida lotu Vakarisito, eda lesi meda vunautaka na itukutuku vinaka, da qai vukei ira tale ga mera tisaipeli. E noda itavi meda kacivaka na itukutuku vinaka baleta ni vinakata na Kalou mera “bula na tamata kecega.” (1 Timoci 2:4) Ia, eda sega ni raica noda cakacaka me vaka e itavi wale ga, eda cakava ena vuku tale ga ni noda loloma. Kevaka eda vakataki Jisu ena noda lomani ira dina na tamata, ena gu na lomada meda cakava na ka eda rawata meda wasea kina vei ira na itukutuku vinaka. (Maciu 22:39) Ni vinaka na vuna eda vakaitavi kina ena cakacaka vakavunau, ena uqeti keda oqori meda vunautaka tiko ga yani na itukutuku vinaka.

Noda iTukutuku​—Na iTukutuku Vinaka ni Matanitu ni Kalou

10, 11. (a) E vakamacalataka vakacava o Aisea na itukutuku eda vunautaka? (b) E kauta mai vakacava o Jisu na irogorogo vinaka ni ka vinaka, era muria vakacava na tamata ni Kalou ena noda itabagauna oqo na ivakaraitaki i Jisu?

¹⁰ Vakacava na ikarua ni ka e vauci ena noda cakacaka vakavunau​—na noda itukutuku? Na cava eda vunautaka? E vakamacalataka vakavinaka na parofita o Aisea na itukutuku oqori: “Na kena lagilagi e na ulu-ni-vanua na yava i koya sa kauta mai nai rogorogo vinaka, sa vakarogoya mai na sautu, sa kauta mai nai rogorogo vinaka ni ka vinaka, ka vakarogoya mai na veivakabulai, ka sa tukuna mai ki Saioni, Sa lewa na nomu Kalou!”​—Aisea 52:7.

¹¹ Na tikina bibi ena tikinivolatabu oya, “sa lewa na nomu Kalou,” eda nanuma lesu kina na itukutuku e dodonu meda vunautaka, oya na itukutuku vinaka ni Matanitu ni Kalou. (Marika 13:10) Dikeva tale ga ni tikinivolatabu oqo e tukuna na veika vinaka e vakabibitaki ena noda itukutuku. E vakayagataka o Aisea na vosa e so me vaka na “veivakabulai,” “nai rogorogo vinaka,” “sautu,” kei na “ka vinaka.” Ena imatai ni senitiuri S.K., ni oti e vica vata na senitiuri mai na gauna i Aisea, sa qai vakayacori ena sala vakasakiti na parofisai oqo vei Jisu Karisito, ena nona gumatua ni vunautaka na itukutuku vinaka ni ka vinaka​—na yaco mai ni Matanitu ni Kalou. (Luke 4:​43) Ena noda itabagauna oqo, vakauasivi ni tekivu mai na 1919, sa ra muria voli mai na iVakadinadina i Jiova na ivakaraitaki i Jisu ena nodra yalogu ni kacivaka na itukutuku vinaka ni Matanitu ni Kalou e sa tauyavu oti, kei na veika vinaka ena kauta mai.

12. E yaga vakacava na itukutuku vinaka ni Matanitu ni Kalou vei ira era ciqoma?

¹² E yaga vakacava na itukutuku vinaka ni Matanitu ni Kalou vei ira era ciqoma? Me vaka ga ena gauna i Jisu, na itukutuku vinaka ena gauna oqo e vakadeitaka na noda inuinui qai veivakacegui. (Roma 12:12; 15:4) E dei kina na nodra inuinui na tamata lomadina mera raica ni tu na vuna vinaka mera vakabauta kina na veigauna vinaka e tu mai liu. (Maciu 6:​9, 10; 2 Pita 3:​13) Na inuinui vaka oqo e vukei ira na dau rerevaka na Kalou mera nuidei ni vakanamata ina veigauna se bera mai. E kaya na daunisame nira na “sega ni rerevaka nai rogorogo ca.”​—Same 112:​1, 7.

iTukutuku ena “Vakabulai Ira sa Ramusu na Yalodra”

13. E vakamacalataka vakacava na parofita o Aisea na veivakalougatataki era na sotava ena gauna sara ga oqo o ira era ciqoma na itukutuku vinaka?

¹³ Kena ikuri, o ira tale ga era ciqoma na itukutuku vinaka era na vakacegui ra qai vakalougatataki sara mada ga ena gauna oqo. Ena sala cava? E so na ka ni veivakalougatataki e cavuta na parofita o Aisea ena nona parofisai: “Sa tu vei au na Yalo ni Turaga ko Jiova, ni sa lumuti au ko Jiova, me’u vunautaka nai rogorogo vinaka vei ira era sa yalomalumalumu; sa talai au mai me’u vakabulai ira sa ramusu na yalodra; me’u vunautaka na veisereki vei ira na bobula, kei na veisereki vei ira era tiko e na vale ni veivesu; me’u vunautaka na yabaki vinaka i Jiova; kei na siga sa ia kina na veisausaumi na noda Kalou; me vakacegui ira kecega era sa tagi.”​—Aisea 61:​1, 2; Luke 4:​16-​21.

14. (a) Na cava e dusia na matavosa “vakabulai ira sa ramusu na yalodra” me baleta na itukutuku ni Matanitu ni Kalou? (b) Eda na vakatotomuri Jiova vakacava ena nona kauaitaki ira sa ramusu na yalodra?

¹⁴ Me vaka e cavuti ena parofisai oya, e “vakabulai ira sa ramusu na yalodra” o Jisu ena nona vunautaka na itukutuku vinaka. E vakavure vakasama na vosa e vakayagataka e ke o Aisea! E kaya e dua na ivolavosa ni iVolatabu ni vosa vakaiperiu e vakadewataki me ‘veivakabulai’ e “dau vakayagataki vakalevu ena ‘vadretitaki’ ni mavoa se kena sagai me vakawainimatetaki na mavoa me rawa ni mavo.” Ena vakayagataka beka e dua na nasi dau veikauaitaki na ivadreti se tikinisulu me vauraki kina e dua na tikiniyago e mavoa. E vakatale ga oqo na itukutuku ni Matanitu ni Kalou era vunautaka na dautukutuku era dau veikauaitaki, e vakacegui ira kece era rogoca era sotava tu e so na ituvaki rarawataki. Na nodra vakacegui ira era gadreva na veivuke, sa ra vakaraitaka tiko kina na nona veikauaitaki o Jiova. (Isikeli 34:​15, 16) E kaya na daunisame me baleta na Kalou: “Sa vakabulai ira sa ramusu na yalodra, ka sa vauca na nodra vue.”​—Same 147:3.

Veika e Rawa ni Vakayacora na iTukutuku Vinaka ni Matanitu ni Kalou

15, 16. Na italanoa cava ni veika e yaco dina e vakaraitaka ni dau vakacegui ira qai vakaukauataki ira era gadreva na veivuke, na itukutuku ni Matanitu ni Kalou?

¹⁵ E levu na italanoa ni veika e yaco dina e vakaraitaka na kena vakacegui ira qai vakaukauataki ira e ramusu na yalodra na itukutuku ni Matanitu ni Kalou. Kena ivakaraitaki, sa sega ni qai galeleta na bula o Oreanna, e dua na kena marama mai Sauca Amerika. Mani sikovi koya sara tiko yani e dua na iVakadinadina i Jiova, e dau wilika vua na iVolatabu kei na ivola na iTalanoa Mai na iVolatabu.b Ni se qai tekivu, e dau davo voli ga na marama oqo, e dau bobo koto ga, vakarorogo ena gauna ni wiliwili, qai dau vakaisaisa voli. Sega ni dede, sa dau saga me dabe ena nona imocemoce ena gauna ni wiliwili. Ni toso na gauna, sa lai dabe sara toka e lomanivale me waraki nona qasenivuli ni vuli iVolatabu. Ni oti oya, sa lako sara ena soqoni vakarisito ena Kingdom Hall. Na veika e vulica mai na soqoni e vakayaloqaqataki koya me tekivu veisoliyaka na ivola vakaivolatabu vei koya ga e tavali e nona vale. Ni sa yabaki 93 o Oreanna, sa qai papitaiso me iVakadinadina i Jiova. A vakauqeti koya na itukutuku ni Matanitu ni Kalou me marautaka tale na bula.​—Vosa Vakaibalebale 15:30; 16:24.

¹⁶ Na itukutuku tale ga ni Matanitu ni Kalou e vakacegui ira era kila ni sa na tinikoso nodra bula ena vuku ni tauvimate. Me kena ivakaraitaki o Maria mai na Ra kei Urope. E tauvi koya e dua na mate e sega na kena wai qai sega tale na ka e vakanuinui kina. Dua na ka nona lomabibi ena gauna era sikovi koya kina na iVakadinadina i Jiova. Ia, ena gauna e vulica kina na inaki ni Kalou, sa qai vaka me vakaibalebale vua na bula. E papitaiso sara qai dau gugumatua ena cakacaka vakavunau. Ena iotioti ni rua na yabaki ni nona bula, e laurai vua na marau kei na nona vakanamata ina veigauna se bera mai. Ena gauna e takali kina o Maria, a qaqaco vinaka tu na nona nuitaka na veivakaturi.​—Roma 8:​38, 39.

17. (a) Na cava e rawa ni vakayacora na itukutuku vinaka ni Matanitu ni Kalou vei ira era ciqoma? (b) Na sala cava soti o vakadinadinataka kina ni o Jiova e “sa vakatudonutaki ira kecega era sa vakalairoro”?

¹⁷ Na italanoa vaka oqo e vakadinadinataki kina na veika e rawa ni vakayacora na itukutuku ni Matanitu ni Kalou vei ira era gadreva na ka dina ena iVolatabu. O ira era lolositaka voli na nona mate e dua na wekadra voleka, era vakaukauataki nira vulica na inuinui ni veivakaturi. (1 Cesalonaika 4:​13) O ira na dravudravua era cumuaqara ena nodra vaqara na sala me bula kina nodra vuvale, era mamarau qai nuidei nira sa kila ni o Jiova ena sega ni biuti ira ke ra yalodina tiko ga vua. (Same 37:28) Ena veivuke i Jiova, e levu era yalobibi tu era vakaukauataki mera vosota, se so na gauna era vorata rawa sara kina na leqa. (Same 40:​1, 2) Io, ena kaukaua ni nona Vosa, e “sa vakatudonutaki ira kecega era sa vakalairoro” ena gauna oqo o Jiova. (Same 145:14) Na noda raica na nodra vakacegui ena itukutuku vinaka ni Matanitu ni Kalou o ira e ramusu na yalodra ena noda yalava kei na noda ivavakoso vakarisito, e vakadeitaka tale ni tiko vei keda nikua na itukutuku vinaka duadua!​—Same 51:17.

“Au sa Masu Talega Vua na Kalou e na Vukudra”

18. E tarai Paula vakacava na nodra cata na Jiu na itukutuku vinaka, na cava na vuna?

¹⁸ E dina ni noda itukutuku e itukutuku vinaka duadua, ia e levu era cata. Ena tarai keda vakacava oqori? Me vaka ga a yaco vua na yapositolo o Paula. E dau vunau vei ira na Jiu, ia e levu era cata na itukutuku ni bula a kacivaka voli. Na ka era cakava oqo e tarai Paula sara ga. E kaya: “Ni’u sa rarawa vakalevu, a sa yaluma tikoga na lomaqu.” (Roma 9:2) O Paula e dau lomani ira na Jiu e vunau vei ira. Oya na vuna e dau vakararawataki koya kina vakalevu na nodra cata na itukutuku vinaka.

19. (a) Na cava e rawa nida yalolailai kina ena so na gauna? (b) Na cava a uqeti Paula me tomana tiko ga na nona vunau?

¹⁹ O keda tale ga eda vunautaka na itukutuku vinaka ena vuku ni noda loloma. E macala kina ni rawa nida yalolailai ke levu era cata na itukutuku ni Matanitu ni Kalou. Ni yaco vei keda oqori, e vakaraitaka nida kauaitaka dina na nodra bula vakayalo na tamata eda vunau vei ira. E vinaka meda nanuma na ivakaraitaki ni yapositolo o Paula. Na cava a uqeti koya me tomana tiko ga nona vunau? E dina ni vakararawataki Paula na nodra sega ni ciqoma na Jiu na itukutuku vinaka, a sega ni soro koso me lai nanuma kina ni sega ni rawa nira vukei. E nuitaka nira tiko e so era na ciqomi Karisito. Sa qai vola o Paula na nona rai me baleti ira yadudua na Jiu: “Au sa gadreva e na vu ni yaloqu, au sa masu talega vua na Kalou e na vukudra na Isireli, me ra bula.”​—Roma 10:1.

20, 21. (a) Eda na vakatotomuria vakacava na ivakaraitaki i Paula ena noda cakacaka vakavunau? (b) Na tikina cava e vauca na noda cakacaka vakavunau ena veivosakitaki ena ulutaga e tarava?

²⁰ Raica mada e rua na ka e vakabibitaka o Paula. E kila deivaki ni so era na ciqoma na itukutuku ni bula, qai masuta na nona veivuke na Kalou me vakayacori rawa kina. Nikua, eda vakatotomuria na ivakaraitaki i Paula. Eda gadreva dina meda sotava e dua e tu vakarau me ciqoma na itukutuku vinaka. Meda masuti Jiova tiko ga meda kunei ira era vaka oqo, da qai vukei ira mera muria na sala ena lai tini ena nodra vakabulai.​—Vosa Vakaibalebale 11:30; Isikeli 33:11; Joni 6:​44.

²¹ Ia, me rawa nida wasea na itukutuku vinaka ni Matanitu ni Kalou vei ira e levu, eda na sega ni kauaitaka wale ga na vuna eda vunau kina, kei na cava eda vunautaka, ia na iwalewale tale ga ni noda vunau. Ena qai veivosakitaki oqo ena ulutaga e tarava.

[iVakamacala e ra]

Na Cava O sa Vulica?

• Na cava soti na vuna eda vakaitavi kina ena vunau?

• Na itukutuku bibi cava eda vunautaka?

• Na veika vinaka cava era vakila o ira era ciqoma na itukutuku ni Matanitu ni Kalou?

• Na cava ena vukei keda meda vunau tiko ga?

[iYaloyalo ena tabana e 18]

Na itukutuku ni Matanitu ni Kalou e vakacegui ira e ramusu na yalodra

[iYaloyalo ena tabana e 20]

Na masu ena vukei keda meda vunau tiko ga