O Jiova e Wilika ‘Yadudua na Drauniuluda’

“Ka sega e dua vei rau [na separo] ena lutu walega ki na qele, me tabogo vua na Tamamudou. A sa wiliki vakaaduaga na drau ni ulumudou.”​—MACIU 10:29, 30.

1, 2. (a) Na cava e nanuma kina o Jope ni sa biuti koya na Kalou? (b) E vakaraitaka beka o Jope ena vosa a cavuta ni sa cati Jiova? Vakamacalataka.

“AU SA tagi vei kemuni, ia ko ni sa sega ni rogoci au: au sa tu cake, ia ko ni sa sega ni via kilai au. Kemuni sa vuki me yalovakatani vei au: ko ni sa vorati au e na ligamuni kaukauwa.” E sega ni tukuni rawa na nona yaluma na turaga a cavuta na veivosa oqo! Sa rauta me vaka kina, ni a vakayalia kece na veika me bula kina, eratou mate na luvena ena dua na cava e liwa tu ga mai vakasakasaka, qai yaviti koya e dua na mate e vakamalumalumutaki koya sara ga. Na yaca ni turaga oqo o Jope. E volatukutukutaki ena iVolatabu na ituvaki mosimosi a sotava meda vuli kina.​—Jope 30:20, 21.

² De rairai nanumi ni sa cata na Kalou o Jope mai na veika e cavuta oqo, ia e sega ni dina oqori. A talaucaka tiko ga na rarawa levu e bikai koya. (Jope 6:​2, 3) Vakauasivi ni lecava o Jope ni vakavuna tiko o Setani na nona vakatovolei, e mani lai nanuma cala kina ni sa biuti koya na Kalou. Ni sotava tiko o Jope na ituvaki oya, a kaya sara mada ga vei Jiova: “A cava ko ni sa vunia kina na matamuni, ka nanumi au me’u nomuni meca?”a​—Jope 13:24.

3. Na cava o na rairai liaca ni o sotava tiko na ituvaki dredre?

³ Nikua, e sega ni mudu na veika dredre era sotava e levu na tamata i Jiova ena vuku ni ivalu, tikoyavavala vakapolitiki se vakalewenivanua, leqa tubukoso, na bula vaqase, tauvimate, dravudravua kei na vakatabui vakamatanitu ni cakacaka vakarisito. De dua o sotava tale tiko ga na veika dredre. O na rairai nanuma ena so na gauna ni sa vunia o Jiova na matana. E dina beka ni o kila vinaka tiko na veivosa ni Joni 3:​16: “Sa lomani ira na kai vuravura vakaoqo na Kalou, me solia kina na Luvena e dua bauga sa vakatubura.” Ia, ke o sotava tiko ga na ka rarawa qai vaka me sega ni mudu, sa rauta mo na lialiaci: ‘E lomani au dina beka na Kalou? E kila tiko beka na ituvaki au sotava? E kauaitaki au beka?’

4. Na ituvaki dredre cava e sega ni mudu rawa e vinakati me na vosota tiko o Paula? Nida sotava na ituvaki e sega ni mudu rawa vaka oya, na cava e rawa ni lako mai ena noda vakasama?

⁴ Vakasamataka mada e dua na ka a yaco vua na yapositolo o Paula. E vola: “Sa dua na voto ni kau sa vakalauti kina na lewequ, e dua nai talaki i Setani me vakararawataki au,” qai kuria, “ka’u a masu vakatolu vua na Turaga, me kau tani vei au.” Dina ni a rogoca o Jiova na nona vakamamasu, ia a vakaraitaka vei Paula ni na sega ni kauta tani vakacakamana na ituvaki a sotava tiko. A gadrevi ga vei Paula me vakararavi ena kaukaua ni Kalou me vosota kina ‘na votonikau e lauta tiko na lewena.’b (2 Korinica 12:​7-9) Me vakataki Paula, o na rairai sotava tale tiko ga e dua na ituvaki rarawataki e vaka me sega ni mudu rawa. De dua o na vakasamataka, ‘Ni sega ni cakava o Jiova e dua na ka me baleta na dredre au sotava tiko, e kena ibalebale beka ni lecava na kequ ituvaki qai sega ni kauaitaki au?’ Sega, e kauaitaki iko o Jiova! Na nona kauaitaki ira yadudua na nona tamata e laurai ena veika e tukuna o Jisu vei iratou na nona yapositolo, ni oti toka ga vakalailai na nona digitaki iratou. Meda raica mada se rawa vakacava ni vakayaloqaqataki keda ena gauna oqo na ka e kaya.

“Kakua ni Rere”​—Ena Vuku ni Cava?

5, 6. (a) E vukei iratou vakacava na nona yapositolo o Jisu me ratou kua ni rerevaka na veika eratou na qai sotava? (b) E nuidei vakacava o Paula ni kauaitaki koya o Jiova?

⁵ E solia vei iratou na nona yapositolo o Jisu na kaukaua levu, e okati kina na kaukaua ‘me ratou rawai ira na yalo velavela ratou qai vakasevi ira, me ratou vakabula kece ga na mate, kei na malumalumu kece ga.’ Ia, me kua ni ratou nanuma ni ratou na sega ni sotava na veivakatovolei kei na veika dredre. Kena veibasai ga, ni a vakamacalataka vakamatailalai o Jisu e so na ka ena yaco vei iratou. E vakauqeti iratou gona vaka oqo: “Kakua ni rerevaki ira era sa vakamatea na yago, a ra sega ni rawata me ra vakamatea na yalo; ia dou rerevaki koya ga sa rawata me vakarusa na yalo kei na yago talega mai eli [“Qiena,” NW].”​—Maciu 10:​1, 16-​22, 28.

⁶ A vukei iratou na nona yapositolo o Jisu me ratou raica na vuna me kua kina ni ratou rerevaka na veika eratou na sotava ena nona tukuna e rua na vosa vakatautauvata. E kaya vei iratou: “Sa sega li ni volitaki na separo e rua e na dua na facigi? ia ka sega e dua vei rau ena lutu walega ki na qele, me tabogo vua na Tamamudou. A sa wiliki vakaaduaga na drau ni ulumudou. O koya mo dou qai kakua ni rere: dou sa uasivi cake vei ira na separo e vuqa.” (Maciu 10:29-​31) Dikeva ni sema vata o Jisu na noda sega ni rerevaka na ituvaki dredre kei na noda vakanuinui ni o Jiova e kauaitaki keda yadudua. E sega ni vakabekataki ni vaka oqori na nona nuidei na yapositolo o Paula. Ni a vola: “Kevaka sa totaki keda na Kalou, o cei me noda meca? Ena vakaevei ko koya sa sega ni bureitaka na Luvena dina, ia sa soli koya yani me kedai sosomi kecega, ena dredre vakacava vua me solia walega vei keda na ka kecega vata kaya?” (Roma 8:​31, 32) Se mani dredre vakacava na ituvaki o sotava, o rawa tale ga ni nuidei ni na kauaitaki iko o Jiova kevaka o yalodina tiko ga vua. Ena votu mamaca sara oqo nida vakadeuca na veivakadreti i Jisu vei iratou na nona yapositolo.

E Talei na Separo

7, 8. (a) Era dau raici vakacava na separo ena gauna i Jisu? (b) Na cava e sega ni vakabekataki ni vu ni kena taurivaki ena Maciu 10:29 na vosa vakirisi e dusia vakatabakidua tiko na “separo” lailai?

⁷ Na iyaloyalo e boroya na vosa vakatautauvata i Jisu e dusia vakamatata ni o Jiova e kauaitaki ira yadudua na nona tamata. Eda na dikeva mada e liu na veika me baleta na separo. Ena gauna i Jisu, e dau laukana na separo, ia me vaka nira dau vakacacana na itei, era dau raici tu kina mera manumanu tawayaga. Dua na ka na kedra iwiliwili levu na separo ra qai saurawarawa, e sega mada ga ni yacova na lima na sede ni voli e rua. Ke vakaruataki na kena isau, ena sega ni voli kina e va na separo, e sa na soli e lima​—e soli wale e dua me vaka sara ga e sega ni okati tu me dua na ka!​—Luke 12:6.

⁸ Vakasamataka tale mada ga ni oqo e dua na manumanu vuka lailai. Ni vakatauvatani kei na so tale na manumanu vuka, na separo qase mada ga, e se ka lailai ga. Ia na vosa vakirisi e vakadewataki me “separo” ena Maciu 10:29 e dusia vakatabakidua tiko na separo lailai. Sega ni vakabekataki ni o Jisu a vinakata me ratou raitayaloyalotaka na nona yapositolo na manumanu vuka lailai duadua. Me vaka ga e kaya e dua na ivola: “Sa lailai tu mada na manumanu vuka na separo e vakayagataka o Jisu ena nona vosa vakatautauvata, ia sa qai cavuta tale ni separo lailai!”

9. Na tikina bibi cava e vakavotui ena vosa vakatautauvata i Jisu me baleta na separo?

⁹ Na nona vosa vakatautauvata o Jisu me baleta na separo e votu kina e dua na tikina bibi: Na ka e nanuma na tamata ni tawayaga e raica vakabibi na Kalou o Jiova. Sa qai vakadeitaka tale o Jisu na tikina bibi oqo ena nona kuria ni na sega ni “lutu walega ki na qele” e dua na separo lailai me lecava o Jiova.c Matata vinaka na ka eda vulica e ke. Ke sa kauaitaka na Kalou o Jiova na manumanu vuka lailai duadua qai tawayaga, me qai sega vakacava ni kauaitaka na kedra ituvaki na tamata era digitaka mera qaravi koya!

10. Na cava e dusia na kena vakayagataki na vosa oqo: “Sa wiliki vakaaduaga na drau ni ulumudou”?

¹⁰ Me ikuri ni nona vosa vakatautauvata me baleta na separo, sa qai kaya o Jisu: “A sa wiliki vakaaduaga na drau ni ulumudou.” (Maciu 10:30) Na vosa lekaleka qai momona oqo e sa qai vakadeitaki vinaka ga kina na tikina bibi ena vosa vakatautauvata i Jisu me baleta na separo. Vakasamataka mada: Na iwiliwili ni drauniuluna e dua, e rawa ni yacova sara toka na 100,000. Vakavuqa, ena via tautauvata kece tu ga na irairai ni malanidrauniuluda yadua, eda na sega gona ni kauai soti kina. Ia, na Kalou o Jiova e sega wale ga ni raica na malanidrauniuluda, e wilika yadudua sara tale ga. Ke sa vakayacora oqori o Jiova, me qai sega vakacava ni kila na itukutuku matailalai kece me baleti keda. Ni o Jiova ga e kila vinaka tu na keda ibulibuli yadua na nona tamata. Io, e ‘raica sara mada ga na yaloda.’​—1 Samuela 16:7.

11. E vakaraitaka vakacava o Tevita na nona nuidei ni o Jiova e kilai koya qai kauaitaki koya?

¹¹ O Tevita e dua e sega ni vulagi ena veika dredre, ia e nuidei ni kilai koya qai kauaitaki koya tiko o Jiova. Laurai oqo ena ka a vola: “I Jiova, ko ni sa dikevi au, ka kilai au. O ni sa kila na noqu tiko sobu kei na noqu tu cake, o ni sa kila na nanuma ni lomaqu ni sa yawa tiko.” (Same 139:​1, 2) O rawa tale ga ni nuidei ni o Jiova e kilai iko vinaka. (Jeremaia 17:10) Mo kua gona ni kusarawa ni nanuma ni o tawayaga, ni sega ni raici iko na mata i Jiova e dau veiraiyaki e veiyasana kece!

“Ni Vakataloca na Wai ni Mataqu ki na Nomuni Tavaya”

12. Eda kila vakacava ni o Jiova e kila vinaka tiko na veika dredre era dau sotava na nona tamata?

¹² E sega wale ga ni kilai ira yadudua na nona tamata o Jiova, e kila vinaka tale ga na veika dredre era dui sotava. Me kena ivakaraitaki na nodra a vakasaurarataki tu vakabobula na Isireli, a kaya kina o Jiova vei Mosese: “Au sa raica dina na nodra rarawa na noqu tamata, era sa tiko mai Ijipita, ka’u sa rogoca talega na nodra tagi e na vukudra era sa lesia vakabibi na nodra cakacaka; ni’u sa kila na nodra rarawa.” (Lako Yani 3:7) Veivakacegui dina meda kila ni noda vosota e dua na ituvaki rarawataki, e raica tiko o Jiova, ena rogoca tale ga na noda tagi! E sega sara ga ni taura vakamamada na rarawa eda sotava.

13. Na cava e vakaraitaka ni tarai Jiova dina na ka era sotava na nona tamata?

¹³ O Jiova e dau nanumi ira era sa veiwekani kei koya. Laurai oqo ke da raica lesu na kena dau tarai koya na ka e yaco vei ira na Isireli. Dina nira a sotava na rarawa ena vuku ga ni nodra domoqa, ia e vola o Aisea me baleti Jiova: “E na nodra rarawa kecega sa rarawa kina ko koya.” (Aisea 63:9) Ni o dauveiqaravi yalodina i Jiova, o rawa ni nuidei ni gauna o rarawa kina, e rarawa tale ga o Jiova. E dodonu gona me uqeti iko oqori mo yaloqaqa tiko ga ni o sotava na veika dredre, qai solia nomu vinaka kece ena nomu qaravi koya.​—1 Pita 5:​6, 7.

14. Na cava a yaco tiko ena gauna e volai kina na Same 56?

¹⁴ Na nona nuidei o Tui Tevita ni kauaitaki koya qai nanumi koya o Jiova, e laurai vinaka ena Same 56 a vola o Tevita ena gauna a dro voli kina ni a via vakamatei koya o Tui  Saula. A dro sara o Tevita i Kaca, ia a rerevaka ni na vesu ena gauna era sa kilai koya kina na kai Filisitia. A vola: “Era sa via tilomi au e na veisiga na noqu meca: ni ra sa lewe vuqa era veivala kei au.” Ena ituvaki ririkotaki oqori, a rai ga vei Jiova o Tevita. E kaya: “E na veisiga kecega era kauta vakatani na noqu vosa; a ka kecega era sa nanuma sa ka ga me’u ca kina.”​—Same 56:​2, 5.

15. (a) Na cava e vakaibalebaletaka o Tevita ni kerei Jiova me maroroya na wainimatana ena tavaya se volai ena ivola? (b) Na cava eda rawa ni vakadeitaka nida vosota tiko na ituvaki e vakatovolei kina na noda vakabauta?

¹⁵ Ia, me vaka e volatukutukutaki ena Same 56:8, e cavuta o Tevita na itukutuku talei oqo: “O ni sa wilika na noqu veiseyaki: mo ni vakataloca na wai ni mataqu ki na nomuni tavaya: sa sega beka ni volai oti e na nomuni vola?” Oqo e dua dina na ivakamacala veivakauqeti ni nona veikauaitaki vakayalololoma o Jiova! Kena ibalebale, ke da lomaleqataka e dua na ka, e rawa tale ga nida tagi vei Jiova. Na turaga uasivi mada ga, o Jisu, a vakayacora oya. (Iperiu 5:7) O Tevita a vakabauta deivaki ni raici koya tu mai o Jiova, ena sega ni vakawalena na nona rarawa, ena vaka ga ni maroroya o Jiova na wainimata i Tevita ena tavaya se volai ena ivola.d De sa rui dredre na ka o sotava tiko, o na rairai nanuma kina ni levu ni wainimatamu ena voleka ni vakasinaita na tavaya oqori se volatukutukutaki ena vica vata na draunipepa. Ke dina oqori, mo lomavakacegu ga, ni vakadeitaka vei keda na iVolatabu: “Sa voleka ko Jiova vei ira sa ramusu na yalodra; ka sa vakabulai ira sa dasila na lomadra.”​—Same 34:18.

Yaco Meda iTokani Voleka ni Kalou

16, 17. (a)Eda kila vakacava ni o Jiova e sega ni lecava na leqa era sotava na nona tamata? (b) Na cava e cakava o Jiova me rawa kina na veivolekati kei koya?

¹⁶ Ni wilika yadudua na ‘drauniuluda’ na Kalou o Jiova, eda kila kina ni digovi keda tu mai qai kauaitaki keda tale ga, eda kalougata gona nida mai qaravi koya. E dina nida na waraka sara na vuravura vou e yalataki me na qai oti kece kina na mosi kei na rarawa, ia ena gauna mada ga oqo, e vakasakiti na ka e sa cakava tiko o Jiova vei ira na nona tamata. A vola o Tevita: “E dau voleka sara o Jiova vei ira era rerevaki koya; kei na nona veiyalayalati e vakavulica vei ira.”​—Same 25:14, NW.

¹⁷ E matata e ke ni rawa na ‘veivolekati kei Jiova.’ Ena rai ni tamata sega ni uasivi, e macala ni na sega vakadua ni rawa ni yaco oqo! Ia, o Jiova e sureti ira era rerevaki koya mera tiko ena nona vale. (Same 15:​1-5) Na cava ena cakava o Jiova vei ira na sureti oqo? Ena vakavulici ira ena nona veiyalayalati, me vaka ga e kaya o Tevita. O Jiova e dolava vei ira na lomana, e vakatakila na nona “vosa vuni” vei ira na parofita me kilai kina na nona inaki kei na ka me caka me muri kina.​—Emosi 3:7.

18. Eda kila vakacava ni vinakata o Jiova meda veitokani vakavoleka kei koya?

¹⁸ E veivakayaloqaqataki dina meda kila ni rawa vei keda na tamata ivalavala ca meda veitokani vakavoleka kei koya e Cecere Duadua, na Kalou o Jiova. Ni vakauqeti keda sara mada ga meda toro voleka vua. Kaya vaka oqo na iVolatabu: “Toro voleka yani vua na Kalou, ka na toro voleka mai vei kemudou ko koya.” (Jemesa 4:8) E vinakata o Jiova meda veitokani vakavoleka kei koya. Sa tuvanaka oti tale tu ga na ka me vakayacori rawa kina oqori. Na isoro ni veivoli i Jisu e dolava na sala meda veitokani kina kei na Kalou Kaukaua Duadua. E kaya na iVolatabu: “Eda sa lomani koya, e na vuku ni sa taumada na nona loloma vei keda.”​—1 Joni 4:​19.

19. Ena vaqaqacotaka vakacava na noda veiwekani kei Jiova na noda vosota?

¹⁹ Sa na qai qaqaco ga na ivau ni veiwekani voleka oqori nida vosota na ituvaki dredre. E vola na tisaipeli o Jemesa: “Me tini vinaka na cakacaka ni dauvosota, mo dou vinaka taucoko sara kina, me kakua na ka e yali.” (Jemesa 1:4) Na “cakacaka” cava e rawati ni vosoti na veika dredre? Vakasamataka tale mada ‘na votonikau e lauta na lewe’ i Paula? Na cava a rawati ena nona vosota? Oqo na ka e kaya o Paula me baleta na ituvaki dredre a sotava: “O koya oqo sa yaloqu sara kina me’u rekitaka na noqu malumalumu, me tiko kina vei au na kaukauwa i Karisito. O koya oqo ka’u sa vinakata kina na malumalumu, na vakasewasewani, na vakadravudravuataki, na veivakacacani, na veivakararawataki, e na vuku i Karisito: ia ni’u sa malumalumu, au sa qai kaukauwa.” (2 Korinica 12:​9, 10) E vakabauta o Paula ni o Jiova ena solia vua na kaukaua e gadrevi​—“na kaukauwa mana levu,” ke veiganiti me rawa kina ni vosota. Na ka oqo sa qai vakavolekataki koya ga vei Karisito kei na Kalou o Jiova.​—2 Korinica 4:7; Filipai 4:​11-​13.

20. Na cava eda nuidei kina ni o Jiova ena tokoni keda qai vakacegui keda nida sotava na ituvaki dredre?

²⁰ De dua se vakalaiva tiko ga o Jiova mo sotava na ituvaki dredre. Ke vaka kina, nanuma matua na nona vosa ni yalayala vei ira era rerevaki koya: “Au na sega sara ni biuti iko, se vakalaivi iko.” (Iperiu 13:5) O rawa tale ga ni vakila na veitokoni kei na veivakacegui oqori. Nanuma tiko ni o Jiova e wilika ‘vakayadua na drauniuluda.’ E vakaraica tu mai na nomu vosota qai vakila na veika mosimosi o sotava tiko. Io, e kauaitaki keda vakaidina. Ena sega gona ni ‘guilecava na noda cakacaka, kei na loloma eda vakatakila ina yacana.’​—Iperiu 6:​10.

[iVakamacala e ra]

O se Nanuma Tiko?

• Na cava soti e rawa ni vakavuna me lai nanuma kina e dua ni sa biuti koya na Kalou?

• Na cava eda vulica ena vosa vakatautauvata i Jisu me baleta na separo kei na kena wiliki yadudua na drauniuluda?

• Na cava na kena ibalebale ni tukuni me maroroi na wainimata ena “tavaya” i Jiova se volai ena nona ‘ivola’?

• E rawa vakacava nida ‘veivolekati kei Jiova’?

[iYaloyalo ena tabana e 22]

Na cava e sega ni kauta laivi kina o Jiova ‘na votonikau e lauta na lewe’ i Paula?

[iYaloyalo ena tabana e 23]

Na cava eda vulica ena vosa vakatautauvata i Jisu me baleta na separo?

[Credit Line]

© J. Heidecker/VIREO

[iYaloyalo ena tabana e 25]

Na noda wilika wasoma na iVolatabu, eda na vakadeitaka kina ni kauaitaki keda yadudua na Kalou