“Dou Yadra Tiko”—Sa Yaco Mai na Gauna ni Veilewai!
Na ulutaga oqo e yavutaki mai na brochure Yadra Tiko! e soli ena soqo ni tikina e vakayacori ena veiyasa i vuravura ena 2004/05
“Dou yadra tiko . . . ni dou sega ni kila na gauna e na yaco mai kina na nomudou Turaga.”—MACIU 24:42, VV.
1, 2. O Jisu e vakatauvatana nona lako mai kei na cava?
NA CAVA o na cakava ke o kila ni sa butako wavoki tiko ena vanua o vakaitikotiko kina e dua na daubutako? O na qaqarauni se yadra tiko baleta ni o via taqomaka na nomu vuvale kei na nomu iyau. E sega ni dau vola mai na daubutako na gauna ena lako mai kina. E dau lako lo mai ena gauna e sega ni namaki.
2 E vakayagataka vakavica o Jisu na ka e dau cakava na daubutako ena nona vosa vakatautauvata. (Luke 10:30; Joni 10:10) Me baleta na veika ena yaco ena gauna ni ivakataotioti ni bera nona vakatauca na nona lewa, e vakarota o Jisu: “Dou yadra tiko, ni dou sega ni kila na gauna e na yaco mai kina na nomudou Turaga. Ia mo dou kila oqo: kevaka sa kila tiko na i taukei ni vale na gauna e na lako mai kina na daubutako, e na yadra tiko ka na sega ni laiva tu ga na nona vale me mai basu.” (Maciu 24:42, 43, VV) Io, e vakatauvatana o Jisu na nona lako mai ina nona lako mai na daubutako, e sega ni namaki.
3, 4. Na cava e okati ena kena muri na ivakasala i Jisu me baleta nona lako mai? (b) Na taro cava soti e tarogi?
3 E veiganiti na ivakatautauvata oqori baleta e sega ni kilai na siga ena lako mai kina o Jisu. E kaya taumada o Jisu ena parofisai vata oya: “E sega e dua e kila na siga ko ya, se na aua ko ya, e segai tale ga ko ira na agilosi mai lomalagi, e segai na Luvena, ia ko Tamaqu duadua ga.” (Maciu 24:36, VV) E uqeti ira kina na vakarogoci koya tiko: “Dou tu vakarau.” (Maciu 24:44, VV) Era na tu vakarau o ira na muria na nona ivakasala, era na qarauna tiko na nodra ivalavala veitalia se gauna cava ga ena lako mai kina o Jisu me mai vakatauca na lewa i Jiova.
4 Ena tarogi e so na taro bibi vaka oqo: E baleti ira beka ga na tamata ni vuravura oqo na ivakasala i Jisu, se e dodonu tale ga mera “yadra tiko” na lotu Vakarisito? Na cava e bibi kina meda “yadra tiko,” kei na cava e okati kina?
iVakasala Vei Cei?
5. Eda kila vakacava ni a tauci vei ira na lotu Vakarisito dina na ivakasala “dou yadra tiko”?
5 Vei ira na tamata ni vuravura oqo era sega ni via rogoca na ivakasala me baleta na ca sa roro mai, ena vaka e lako mai na daubutako na kena yaco mai na siga ni Turaga. (2 Pita 3:3-7) Ia, vakacava o ira na lotu Vakarisito dina? E vola na yapositolo o Paula vei ira nona itokani lotu Vakarisito: “Ni ko ni sa kila vinaka tu ni na lako mai na Siga ni Turaga [o Jiova] me vaka e dua na daubutako e na bogi.” (1 Cesalonaika 5:2, VV) Eda sega ni vakatitiqataka na kena ‘lako mai na siga i Jiova.’ E kena ibalebale beka oqo ni rawa meda vakaweleweletaka na noda yadra tiko? Vakasamataka ni a tukuna o Jisu vei ira na nona tisaipeli: “Ni na yaco mai na Luve ni Tamata e na dua na gauna dou sega ni namaka.” (Maciu 24:44, VV) Ni uqeti ira nona tisaipeli ena dua na gauna e liu mera vakasaqara tiko ga na Matanitu ni Kalou, a vakasalataki iratou o Jisu: “Dou vakarau tu, ni na yaco mai na Luve ni Tamata e na dua na gauna ko dou sega ni namaka.” (Luke 12:31, 40, VV) E sega li ni vakamatatataka oqo ni a vakasamataki iratou tiko na nona imuri o Jisu ena nona kaya: “Dou yadra tiko”?
6. Na cava e gadrevi kina meda “yadra tiko”?
6 Na cava e vinakati kina meda “yadra tiko” da qai “vakarau tu”? E vakamacalataka o Jisu: “E rau na tiko e na i teitei e lewe rua na tagane; e na kau tani e dua ka biu tani mai e dua. E rau na qaqi sila tiko e lewe rua na yalewa; e na kau tani e dua ka biu tu mai e dua.” (Maciu 24:40, 41, VV) O ira ga na vakarautaki ira era na “kau,” se vakabulai, ena gauna e vakarusai kina na vuravura tawavakalou oqo. O ira na kena vo era na “biu tani” mera vakarusai baleta nira saga voli ga na veika e baleti ira. E rawa nira wiliki tale ga kina o ira na sa vakararamataki oti ra qai sega ni yadra tiko.
7. Na cava e rawa nida cakava baleta nida sega ni kila na gauna ena yaco kina na ivakataotioti?
7 Nida sega ni kila na tikinisiga ena cava kina na vuravura makawa oqo, meda vakaraitaka tiko nida sa qarava tiko na Kalou ena lomadina. Ena vuku ni cava? De dua eda nanuma ni sa rui berabera na kena yaco mai na ivakataotioti. E ka ni rarawa ni so na lotu Vakarisito a vaka oqori na nodra nanuma sa ra tinia na nodra lomakatakatataka na cakacaka i Jiova. Ia, ena gauna eda yalataki keda kina, eda sa soli keda vakatabakidua sara ga vei Jiova meda qaravi koya. O ira na kilai Jiova era kila ni sega ni taleitaka o koya meda qai gugumatua ga ni sa voleka na gauna. E raica o koya na ka e tu e yaloda se lomada.—1 Samuela 16:7.
8. E uqeti keda vakacava na noda lomani Jiova meda yadra tiko?
8 Nida lomani Jiova dina, eda marautaka noda cakava tiko na lomana. (Same 40:8; Maciu 26:39) Eda vinakata tale ga meda qaravi Jiova me tawamudu. Ena sega ni vakaseva na inakinaki oqori na kena vaka e sa dede tale na noda wawa mai na ka eda namaka taumada. Ia eda na yadra tiko ga ena vuku ni ka ena vakayacora na siga i Jiova me caka kina na lomana. Noda taleitaka dina meda vakamarautaka na Kalou ena uqeti keda meda dau bulataka na nona vosa da qai vakaliuca tale ga ena noda bula na nona Matanitu. (Maciu 6:33; 1 Joni 5:3) Meda raica mada oqo se ena moica vakacava na noda vakatulewa kei na ivakarau ni noda bula e veisiga na noda yadra tiko.
E Gole Tiko e Vei na Nomu Bula?
9. Na cava e bibi kina vei ira na tamata ni vuravura oqo mera kila na ibalebale ni veika e yaco tiko ena gauna oqo?
9 E levu na tamata era sega soti ni marautaka na vanua sa gole tiko kina na nodra bula baleta ni yaco tiko e veisiga na veileqa lelevu qai vakadomobula. Ia, era bau kila beka na ibalebale ni veika e yaco tiko e vuravura ena gauna oqo? Era kila beka nida sa bula tiko ena ‘gauna ni ivakataotioti’? (Maciu 24:3) Era kila beka ni kena vakilai tiko na itovo ni noda dau nanumi keda ga, na itovo voravora, kei na itovo e tawavakalou e vakaraitaka nida sa tiko ena “iotioti ni veisiga”? (2 Timoci 3:1-5, NW) E dodonu vei ira oqori mera kila na vuna era yaco tiko kina na veika oqo me rawa kina nira vakasamataka se sa gole tiko e vei na nodra bula.
10. Na cava e dodonu meda cakava meda vakadeitaka kina nida yadra tiko?
10 Vakacava o keda? Eda vakatulewataka e veisiga na veika e vauca na noda cakacaka saumi, noda bula, noda vuvale, kei na noda sokalou. Eda kila na ka e vakasalataki keda kina na iVolatabu, da qai dau saga meda bulataka. O koya gona, e veiganiti meda dui tarogi keda: ‘Au vakatara tiko beka na lomaocaoca ni bula oqo me vakaleqa noqu rawata noqu isausau vakayalo? Au vakatara tiko beka na vuku kei na vakasama vakavuravura me lewa na veika au vakatulewataka?’ (Luke 21:34-36; Kolosa 2:8) E gadrevi tiko ga meda vakararavi vei Jiova mai na vu ni yaloda, meda kua ni vakararavi ina noda yalomatua. (Vosa Vakaibalebale 3:5) Oqo ga na sala ena rawa meda ‘rawata kina na bula dina,’ oya na bula tawamudu ena vuravura vou ni Kalou.—1 Timoci 6:12, 19, VV.
11-13. Na cava eda vulica ena ka e yaco ena (a) gauna i Noa? (b) ena gauna i Loti?
11 E tu ena iVolatabu e levu na ivakaraitaki vinaka ena vukei keda meda yadra tiko. Vakasamataka mada na ka e yaco ena gauna i Noa. Ni bera ni qai tauca nona lewa na Kalou, sa veivakasalataki rawa o koya. Era sega ni kauaitaka na tamata na ivakasala oya, vakavo ga o Noa kei na nona vuvale. (2 Pita 2:5) Oya na vuna e kaya kina o Jisu: “Me vaka ga e na gauna i Noa, e na vaka tale ga kina na nona lako mai na Luve ni Tamata. Me vaka e na veisiga ni bera tiko na waluvu era a kana na tamata, ka gunu, ka vakawati ka veimusumusuki me ra vakawati, ka yacova na siga sa vodo kina ki waqa ko Noa. Era sega voli ga ni kila [se kauai] me yacova ni sa qai yaco sara na waluvu ka carai ira kece yani; e na vaka tale ga kina na nona lako mai na Luve ni Tamata.” (Maciu 24:37-39, VV) Na cava eda vulica e ke? Ke da vakaogai keda tu ga ena ka ni bula ni veisiga e sega soti ni bibi me sa raici vakamamada kina na veika vakayalo e uqeti keda kina na Kalou meda vakaliuca, e dodonu meda liaci keda.—Roma 14:17.
12 Vakasamataka tale ga na gauna i Loti. Na koro eratou vakaitikotiko kina o Loti kei na nona vuvale e vutuniyau, ia e dukadukali na nodra itovo na lewenikoro. E qai tala e rua nona agilosi o Jiova me rau lai vakarusa na koro. Rau tukuna na agilosi vei Loti kei na nona vuvale me ratou biuti Sotoma vakatotolo, me ratou kua tale ga ni rai kimuri. Eratou mani biuta na koro ena nodrau veivakauqeti na agilosi. Ia e rui nanuma vakalevu o wati Loti na nona vale e Sotoma. E mani rai kimuri ena nona talaidredre qai mate sara kina. (Vakatekivu 19:15-26) E vakasalataki keda kina o Jisu: “Dou nanuma na wati i Loti.” Eda sa kauaitaka tiko na ivakasala oya?—Luke 17:32.
13 Era vakabulai ga o ira na kauaitaka na ivakasala ni Kalou. E vakadinadinataki oqo vei Noa kei na nona vuvale vaka kina vei Loti kei rau na luvenayalewa. (2 Pita 2:9) Nida kauaitaka na ivakasala ena rua na ivakaraitaki oqori, eda na uqeti tale ga ena itukutuku ni veivakabulai e tiko kina me baleti ira na vinakata na yalododonu. Ena dei tale ga kina na noda vakabauta na vosa ni yalayala ni Kalou me baleta na “lomalagi vou kei na vuravura vou” ena kune kina “nai valavala dodonu.”—2 Pita 3:13.
‘Sa Yaco Mai na Gauna ni Veilewai’!
14, 15. (a) Na cava e okati ena “gauna” ni veilewai? (b) Na cava e okati ena “rerevaka na Kalou ka vakalagilagia”?
14 Na cava meda namaka ena noda yadra tiko? E vakaraitaka na ivola na Vakatakila na veika ena yaco veitaravi ena kena vakayacori na inaki ni Kalou. E dodonu meda muria na veika e tukuni kina kevaka eda via vakadeitaka nida sa tu vakarau. E vakamatatataka na parofisai oqo na veika ena yaco ena “siga ni Turaga,” a tekivu ena gauna e buli kina me tui mai lomalagi na Karisito ena 1914. (Vakatakila 1:10) E dusi keda na Vakatakila vua e dua na agilosi e vakacolati me kacivaka ‘na itukutuku vinaka tawamudu.’ E kacivaka ena domo levu: “Ni rerevaka na Kalou ka vakalagilagia, ni sa yaco mai na gauna ni nona veilewai.” (Vakatakila 14:6, 7, VV) E lekaleka wale ga na “gauna” ni veilewai oqo; ena vakayacori ruarua kina na kena kacivaki kei na kena vakatauci na lewa e vakamacalataki ena parofisai oya. Eda sa bula tiko ena gauna oya.
15 Ia ni bera ni qai cava na gauna ni veilewai, eda sa uqeti tiko meda: “Rerevaka na Kalou ka vakalagilagia.” Na cava e okati kina oqo? Nida rerevaka na Kalou eda na cata na ka ca. (Vosa Vakaibalebale 8:13) Kevaka eda doka na Kalou, eda na vakarorogo vua me vakaraitaka na noda rokovi koya. Eda na sega ni vakaogai keda vakalevu ena veika e so meda sega ni wilika wasoma kina na nona Vosa, na iVolatabu. Eda na sega ni taura vakamamada na nona ivakasala me baleta na noda dau tiko ena soqoni vakarisito. (Iperiu 10:24, 25) Eda na mareqeta da qai gumatua ena noda vakayacora na itavi e soli vei keda, oya meda kacivaka na itukutuku vinaka ni Matanitu ni Kalou ena veiliutaki kina na Mesaia. Eda na vakararavi tiko ga vei Jiova ena gauna kece ena lomada taucoko. (Same 62:8) Nida kila ni o Jiova e Turaga Cecere ni Lomalagi kei Vuravura, eda na dokai koya da qai talairawarawa tale ga ena gauna e vakatulewa kina ena noda bula. Eda rerevaka dina li na Kalou da qai vakalagilagia tiko ena veisala oqori?
16. Na cava eda kaya kina ni sa yaco oti na nona lewai o Papiloni na Ka Levu me vaka e tukuni ena Vakatakila 14:8?
16 E kuria na Vakatakila wase 14 na kena vakamacalataki na veika tale e so ena yaco ena gauna ni veilewai. E cavuti taumada kina o Papiloni na Ka Levu, na lotu lasu kece e vuravura: “Sa qai muria na i karua ni agilosi, ka kaya, ‘Sa bale! Sa bale ko Papiloni levu!’” (Vakatakila 14:8, VV) Io, e raica na Kalou me sa bale oti o Papiloni na Ka Levu. Ena 1919, era sa sereki oti kina na dauveiqaravi lumuti i Jiova mai na nodra vakabobulataki tu ena ivakavuvuli kei na itovo vakapapiloni e vesuki ira tu na tamata kei na veimatanitu ena vica vata na udolu na yabaki. (Vakatakila 17:1, 15) Me tekivu mai na gauna oya era sa cuqena tiko na vakatetei ni sokalou dina. Me tekivu tale ga mai na gauna oya sa vunautaki tiko e veiyasa i vuravura na itukutuku vinaka ni Matanitu ni Kalou.—Maciu 24:14.
17. Na cava e okati ena noda lako tani vei Papiloni na Ka Levu?
17 E sega ni o koya ga oqori na lewa e tau vei Papiloni na Ka Levu. Sa qai voleka oqo me vakarusai vakadua. (Vakatakila 18:21) Oya na vuna e veiuqeti kina na iVolatabu vei ira na tamata ena veivanua kece ga mera: “Lako tani mai vua [Papiloni na Ka Levu] . . . de ko ni na qai vakayacora tale ga na nona i valavala ca.” (Vakatakila 18:4, 5, VV) Eda lako tani vakacava vei Papiloni na Ka Levu? E sega ni okati ga kina na noda sa sega ni lewena e dua na lotu lasu. E vakilai tale ga na ivakavuvuli vakapapiloni ena levu na veisoqo rogo kei na itovo vakavanua, na vakatarai ni veiyacovi vakasisila, na tokoni ni veivakalasai e vauci kina na vakatevoro, kei na veika tale e so. Me vakaraitaka nida yadra tiko, e dodonu meda vakaraitaka ena veika eda cakava kei na veika eda gadreva nida sa lako tani dina vei Papiloni na Ka Levu.
18. Me vaka e vakamacalataki ena Vakatakila 14:9, 10, na cava era na qarauna na lotu Vakarisito era yadra tiko?
18 E vakamacalataki ena Vakatakila 14:9, 10 (VV) e dua tale na ka e vauci ena ‘gauna ni veilewai.’ E kaya e dua tale na agilosi: “Kevaka e dua na tamata e qarava na manumanu kei na kena i vakatakarakara ka sa soli vua na i vakatakilakila e yadrena se ligana, sa gunuva tale ga ko koya na waini ni cudru ni Kalou.” Ena vuku ni cava? Na manumanu kei na kena ivakatakarakara erau vakatakarakarataka na veiliutaki ni tamata e sega ni vakadonuya na veiliutaki i Jiova. O ira na lotu Vakarisito era yadra tiko era na sega ni vinakata mera dusimaki se vakatakilakilataki ena nodra ivakarau se ena veika era cakava, nira lewai tiko vei ira na sega ni vakadonuya na nona veiliutaki cecere na Kalou dina o Jiova. Era kila na lotu Vakarisito ni sa tauyavutaki mai lomalagi na Matanitu ni Kalou, na matanitu ena vakaotia na veiliutaki vakatamata, ena qai tu tale ga me sega ni mudu.—Taniela 2:44.
Kua ni Vakawelewele!
19, 20. (a) Nida volekata tiko yani na ivakataotioti, na cava ena saga o Setani me cakava? (b) Na cava meda nakita dei meda vakayacora tiko ga?
19 Nida volekata tiko yani na ivakataotioti, sa na qai tubucake tiko ga na veika dredre kei na veivakatovolei eda na sotava. Ena gauna eda bula tiko kina ena vuravura makawa oqo eda na vakila na revurevu ni ivalavala ca eda sucukaya mai ena noda dau tautauvimate, da qase, era mate na wekada voleka, e dau mosi na yaloda, da yalolailai nira sega ni taleitaka na tamata na noda sasaga ni vunautaka na Vosa ni Kalou, kei na veika tale e so. Kua ni guilecava ni o Setani ena vakayagataka dina na veika dredre eda sotava me rawa kina ni vakamalumalumutaki keda, meda kua ni vunautaka na itukutuku vinaka se meda beca na ivakatagedegede ni Kalou. (Efeso 6:11-13) Na gauna eda bula tiko kina oqo e sega ni gauna ni vakawelewele!
20 A kila o Jisu nida na sotava na veika dredre ena noda yalodina tiko, e mani vakasalataki keda kina: “O koya gona mo dou yadra tiko, ni dou sega ni kila na gauna e na yaco mai kina na nomudou Turaga.” (Maciu 24:42, VV) Meda vakasamataka vinaka tiko na gauna eda sa tiko kina oqo. Meda qarauna matua na ilawaki i Setani e rawa ni vakamalumalumutaki keda se vakavuna meda cegu. Meda nakita dei tiko ga meda vunautaka vakalevu tiko ena yaloqaqa na itukutuku vinaka ni Matanitu ni Kalou. Io, meda kua ni vakawelewele ena noda muria na ivakasala i Jisu: “Dou yadra tiko.” Nida cakava oqori, eda sa na vakalagilagi Jiova tiko da qai nuitaka tale ga me vakalougatataki keda o koya.
O na Sauma Vakacava?
•Eda kila vakacava ni ivakasala i Jisu me baleta na “yadra tiko” e tauci vei ira na lotu Vakarisito dina?
•Na ivakaraitaki cava ena iVolatabu e vukei keda meda “yadra tiko”?
•Na cava na gauna ni veilewai, na cava eda uqeti meda cakava ni bera ni cava na gauna oya?
[iYaloyalo ena tabana e 23]
O Jisu e vakatauvatana na nona lako mai ina nona lako mai na daubutako
[iYaloyalo ena tabana e 24]
E a voleka ni rusa o Papiloni na Ka Levu
[iYaloyalo ena tabana e 25]
Meda nakita dei meda toroya cake tiko ga noda vunau ena yaloqaqa