Era Rogoca na iTukutuku Vinaka “na Tamata era Duivosavosa”

‘Era kaya e lewe tini na tamata era duivosavosa mai na veivanua kece ga, Keitou na lako vata kei kemudou: ni keitou sa rogoca sa tiko vata kei kemudou na Kalou.’​—SAKARAIA 8:23.

1. E veiganiti vakacava na gauna a vakarautaka o Jiova me tauyavu kina na ivavakoso lotu Vakarisito, kei na kena tekivutaki na vunau vei ira na veimatatamata era duivosavosa?

A VEIGANITI dina na kena a vosataki na vosa tani e so ena siga ni Penitiko 33 S.K., ni gauna oya a osodrigi tu kina o Jerusalemi vei ira na Jiu kei ira na tavuki ina lotu Vakajiu era a lako yani ina solevu ni Lakosivia. Era se gole yani ena vica na macawa e liu mai na rauta e 15 na veivanua, e so e qali ena matanitu levu o Roma, e so e sega. Ra rogoca rawa kina e lewe vica na udolu na tamata ena siga oqori na nodra tukuna o ira a sobuti ira na yalo tabu na itukutuku vinaka ena veimataqali vosa e kilai ena matanitu o Roma. Era kila vinaka na vakarorogo na ka e tukuni, e duidui sara mai na nodra a sega ni veikilai vosa na lewe i Pepeli ena gauna makawa. (Cakacaka 2:1-12) Na ka vakasakiti a yaco oya, e dusia na tauyavu ni ivavakoso lotu Vakarisito, kei na kena tekivutaki na cakacaka ni nodra vakavulici na veimatatamata era duivosavosa, se vakacagau tiko ga me yacova mai na gauna oqo.

2. Na cava era cakava na tisaipeli i Jisu era “kurabui” kina na duikaikai era vakarorogo tu ena Penitiko 33 S.K.?

² O ira na tisaipeli i Jisu, a rairai ra vosataka na vosa vakirisi rawarawa ga a vakayagataki raraba tu ena gauna oya. Ra kila tale ga na vosa vakaiperiu, ni vosa oqori e dau vakayagataki e valenisoro. Ia, era “kurabui” na vakarorogo ena siga ni Penitiko ena nodra rogoci ira na tisaipeli nira sa vosataka na nodra vosanisucu na duikaikai era tu oya. Na cava a qai yaco? E coka sara ga na lomadra na vakarorogo na bibi ni veika dina era rogoca ni talaucaki ena nodra dui vosanisucu. Sa rauta me tubu na kedra iwiliwili lailai na tisaipeli ena siga tiko ga oya ina dua na ilawalawa levu e sivia e 3,000!​—Cakacaka 2:37-42.

3, 4. E tete vakacava na cakacaka vakavunau ena nodra sa biuti Jerusalemi, Jutia kei Kalili na tisaipeli?

³ Oti toka ga vakalailai na siga vakasakiti oya, a kacabote e dua na veivakacacani levu e Jerusalemi, a mani yaco mera “veiseyaki [na tisaipeli], era sa lako ki na veiyasana kecega ka vunautaka na vosa.” (Cakacaka 8:1-4) Kena ivakaraitaki, eda wilika ena Cakacaka wase 8 me baleti Filipi, e vakabauti ni dua na daukaulotu e vosa vakirisi. A vunau o Filipi vei ira na kai Samaria. E vunau tale ga vua e dua na vakailesilesi e turaga ni Iciopea a qai ciqoma na itukutuku kei Karisito.​—Cakacaka 6:1-5; 8:5-13, 26-40; 21:8, 9.

⁴ Ena nodra veitosoyaki na lotu Vakarisito nira vaqara na vanua mera lai bula kina e taudaku kei Jerusalemi, Jutia, kei Kalili, era sotavi ira kina e so na matatamata vou era sega ni veikilai vosa. E kena irairai ni so vei ira na tisaipeli era a vunau rawa ga vei ira na Jiu. Ia, e volatukutukutaka na tisaipeli o Luke: “E so vei ira na vakabauta era kai Saipurusi ka so e kai Kirini. Era a lako ko ira ‘o ya ki Anitioki ka vosa tale ga vei ira na kai veimatanitu tani, ka vunautaka kina na Turaga ko Jisu.”​—Cakacaka 11:19-21, VV.

Sega ni Veivakaduiduitaki na Kalou​—E Baleti Keda Kece na Nona iTukutuku

5. E votu vakacava ena kena kacivaki na itukutuku vinaka na nona sega ni veivakaduiduitaki o Jiova?

⁵ Na kena sa lai vakatetei vaka oya na itukutuku vinaka, e salavata ga kei na nona itovo na Kalou—e sega ni dau veivakaduiduitaki. Laurai oqo ena ka e tukuna ena yalolokomi na yapositolo o Pita ni oti na nona vakadodonutaka o Jiova na rai i Pita me baleti ira na kai Matanitu Tani: “Au sa qai kila dina sara oqo ni sega ni dau vakaduiduitaka na tamata na Kalou. Ia sa dau vinakati ira kece ga era dau vakarokorokotaki koya ka dau cakava na ka e dodonu, veitalia ga se mataqali kawa tamata cava era lewena.” (Cakacaka 10:34, 35, VV; Same 145:9) Na yapositolo o Paula, e dua a dau vakacacani ira e liu na lotu Vakarisito, e vakadeitaka tale ga na vakasama ni sega ni veivakaduiduitaki na Kalou, e kaya: “Sa vinakata [na Kalou] me bula na tamata kecega.” (1 Timoci 2:4) Votu gona na nona sega ni veivakaduiduitaki na Dauveibuli ena nona dolava na inuinui ni nona Matanitu vei ira na tagane vaka kina o ira na yalewa mai na veimatatamata, veivanua, kei na duivosavosa.

6, 7. Na parofisai cava soti ena iVolatabu sa dusia tu mai na vakatetei ni itukutuku vinaka vei ira na veimatatamata era duivosavosa?

⁶ Na nodra mai okati oya ena itukutuku vinaka na duikaikai era duivosavosa, a sa tukuni oti tu ena vica vata na senitiuri yani e liu. A tukuna na parofisai i Taniela: “Sa soli . . . [vei Jisu] na lewa, kei na vakarokoroko, kei na matanitu, me ra qaravi koya ko ira na tamata kece, kei na veivanua, kei na dui vosavosa.” (Taniela 7:14) Na kena tabaki na ivoladraudrau oqo ena 151 na vosa qai veisoliyaki e vuravura raraba e vakadeitaka ga na dina ni parofisai oqori. Sa rawa tale ga kina mo wilika na ka e vauca na Matanitu i Jiova.

⁷ E yalataka tu mai na iVolatabu ni na yaco na gauna era na rogoca kina na itukutuku ni bula o ira era duivosavosa. Io, sa tukuna oti tu mai o Sakaraia ena nona parofisai na nodra na galele na lewe vuqa ina sokalou dina: “E na gauna ko ya, era na mai taura na tutu ni nonai sulu e dua na Jiu [na lotu Vakarisito lumuti e lewe ni “Isireli ni Kalou”], e lewe tini na tamata era duivosavosa mai na veivanua kecega, ka kaya, Keitou na lako vata kei kemudou: ni keitou sa rogoca sa tiko vata kei kemudou na Kalou.” (Sakaraia 8:23; Kalatia 6:16) Na yapositolo o Joni, e vakamacalataka vaka oqo na ka e raica ena nona raivotu: “Ka’u sa vakaraica, ka raica, sa dua nai soqosoqo levu sara, e sega e dua na tamata e wilika rawa, mai na veivanua kece, kei na veimataqali, kei na veimatanitu, kei na duivosavosa, era sa tu e na mata ni tikotiko-vakaturaga, kei na mata ni Lami.” (Vakatakila 7:9) Eda sa vakadinata na kena yaco na vica na parofisai oqo!

Bibi Mera Rogoca na iTukutuku Vinaka o ira Kece era Duivosavosa

8. Na ivakarau ni bula cava edaidai e sa na gadrevi ga kina na veiveisau ena noda cakacaka vakavunau?

⁸ Edaidai, e sa ivakarau ni bula na nodra biuvanua e dua na iwiliwili levu ni tamata mera lai vakaitikotiko e vanuatani. Sa qai vakarawarawataka ga na veitokiyaki na nodra sasaga na veimatanitu e vuravura mera cakacaka vata. Lewe levu ena veivanua dravudravua se na vanua e carubi tu kina na veivaluvaluti, era qacoya na toki ina veivanua sautu ena nodra vinakata mera lai tikovinaka. Ena vuqa gona na matanitu era yausorosoro kina na biuvanua kei ira na isenivalu, sa lai babasika kina na nodra itikotiko o ira era duivosavosa, e dau vakavuqa mera lai vakaitikotiko ga vakaivata. Me kena ivakaraitaki o Finiladi, sa rawa ni rogoci e kea e sivia e 120 na vosa; mai Ositerelia, e sa vakayagataki tu kina e sivia e 200 na vosa. Mai Mereke, ena korolevu wale mada ga o San Diego, e rogoci kina e sivia e 100 taucoko na vosa!

9. Meda raici ira vakacava na tiko ena noda yalava e duidui na nodra vosa?

⁹ Vakacava o keda na italatala lotu Vakarisito, eda raici ira beka e duidui na nodra vosa mera vakasugusugu ena noda cakacaka vakavunau? Sega sara! Kena veibasai ga, eda marautaka ni rawa nida vakarabailevutaka kina na noda yalava ni cakacaka vakavunau, vakauasivi ‘ni sa matua tu na yabaki.’ (Joni 4:35) Eda na saga vagumatua meda qaravi ira era kauaitaka na nodra gagadre vakayalo, veitalia ke duidui na nodra vosa se ra duatani na matatamata. (Maciu 5:3, NW) Na noda kauai e vakavuna me tubu tiko ga kina na kedra iwiliwili “na duivosavosa” era yaco mera tisaipeli i Karisito. (Vakatakila 14:6) Meda raica mada e so na ivakaraitaki ni nodra kauaitaki na duivosavosa. Mai Jamani, me tekivu ena Okosita 2004, sa vakayacori tiko na cakacaka vakavunau ena rauta na 40 na vosa. Ena gauna vata oqori sa vakayagataki tiko mai Ositerelia e voleka ni 30 taucoko na vosa me kacivaki kina na itukutuku vinaka. Tubu oqori mai na 18 wale ga na vosa ena tini na yabaki sa oti. Mai Kirisi, sa voleka ni 20 na vosa era kacivaka tiko kina na iVakadinadina i Jiova na itukutuku vinaka. Io, e rauta ni 80 na pasede ni iVakadinadina i Jiova e veiyasa i vuravura era sega ni vosa vakavalagi, na vosa e vakayagataki raraba.

10. Na cava e noda itavi na dautukutuku yadua ‘mera vakatisaipelitaki kina na lewe ni veivanua kece ga’?

¹⁰ E matata ni sa vakayacori tiko na ivakaro i Jisu, oya ‘mera vakatisaipelitaki na lewe ni veivanua kece ga’! (Maciu 28:19) Ra ciqoma ena marau na ilesilesi oqo na iVakadinadina i Jiova, ra qai vakaraitaka ena nodra ogaoga tiko na vunau ena 235 na vanua, kei na nodra veisoliyaka na ivolatabaki vakaivolatabu ena sivia e 400 na vosa. Macala e ke ni sa cakava tiko na nona itavi na isoqosoqo i Jiova, oya na kena vakarautaki na veika e gadrevi mera vukei kina vakayalo na duikaikai. Sa qai vo ga na noda itavi na dautukutuku yadua, oqori na noda saga ena noda igu meda tukuna na itukutuku ni Vosa ni Kalou vei ira “na tamata kecega” ena vosa era kila vinaka. (Joni 1:7) Na noda cakacaka vata vaka oqo e rawa ni yaga kina na itukutuku vinaka vei ira na lewe vica na milioni era duivosavosa. (Roma 10:14, 15) Io, e bibi meda cakava na noda itavi yadua!

Na Noda Sasaga Meda Vukei Ira na Duikaikai Era Duivosavosa

11, 12. (a) Na cava soti e okati ena noda sasaga meda vukei ira na duikaikai era duivosavosa? Ena veivuke vakacava e ke na yalo tabu? (b) Na cava e uasivi kina na vunau vei ira na tani ena nodra vosanisucu?

¹¹ Nikua, e levu na dautukutuku e lomadra mera vulica e dua na vosa vou, ia e macala ni sega ni rawa nira vakanuinui se mera namaka me sobuti ira vakacakamana na yalo tabu mera vosataka kina e dua na vosa vou. (1 Korinica 13:8) Sa kena ibalebale ni na gadrevi na sasaga me rawa ni vulici kina e dua na vosa vou. Vua mada ga na dautukutuku e sa vesau ena vosa vou e vulica, ena vinakati me moica tale ga na nona rai kei na nona iwalewale ni vunau me rawa nira taleitaka kina na itukutuku ni Vosa ni Kalou o ira na itaukei ni vosa. Na vuna, ni duidui na nodra isususu kei na itovo vakavanua. Sa qai kuria na nodra dau mamadua o ira na curuvanua; e sega gona ni cakacaka rawarawa na kena sagai me kilai na yalodra.

¹² Ia, e macala ni se cakacaka tiko ga na yalo tabu i Jiova vei ira na nona tamata ena gauna oqo ena nodra sasaga mera vukei ira na duivosavosa. (Luke 11:13) E dina ni sega ni na solia vakacakamana na yalo tabu na kaukaua meda vosataka kina na vosa vou e so, ia e rawa ga ni uqeta na lomada meda veitaratara kei ira e sega nida veikilai vosa. (Same 143:10) De dua era sa na tautauri na tani ke da vunau se da vakavulici ira ena iVolatabu ena noda vakayagataka na vosa era kila vakacaca, ia na leqa, ni na tugani toka ga ena nodra vakasama. O koya gona, me rawa ni tara na lomadra na noda ivakamacala, e uasivi me vakayagataki ga na nodra vosanisucu—ni oya na vosa e rawa ni sereka na lomadra, e laulau, ra qai lomagalala mera talaucaka kina na yalodra.—Luke 24:32.

13, 14. (a) Na cava e uqeti ira e so na dautukutuku mera vunau vakatabakidua kina ena nodra yalava e duidui na nodra vosa? (b) Na cava e so na ivakaraitaki e laurai kina na yalo ni veiqaravi?

¹³ Era sa nakita e levu na dautukutuku ni Matanitu ni Kalou me nodra yalava vakatabakidua ni vunau o ira e duidui na nodra vosa. E uqeti ira na dautukutuku na nodra raica na levu ni nodra taleitaka o ira oqo na ka dina mai na Vosa ni Kalou. So tale na dautukutuku e vaka ni solia tale vei ira e dua na igu na kamikamica ni cakacaka ena veiyalava vaka oqo, kei na dui ituvaki era sotava kina. E kaya e dua na valenivolavola ni tabana ni iVakadinadina i Jiova ena ceva kei Urope: “Lewe vuqa era gole mai ena tokalau kei Urope, era karamaca tu ena nodra via gunuva na wai ni ka dina.” E veivakacegui dina na vukei ira era tataleitaki vaka oqo!​—Aisea 55:1, 2.

¹⁴ Ia, me rawa ni vuavuaivinaka na noda cakacaka ena yalava oqo, ena vinakati na sasaga kei na yalo ni veiqaravi. (Same 110:3) Meda raica mada e vica na kena ivakaraitaki. E so na vuvale iVakadinadina i Jiova mai Japani era sa biuta na nodra vale vivinaka ena korolelevu, ra qai toki e lomanivanua mera lai vukei ira kina na ilawalawa turaga kei na marama ni Jaina era curuvanua yani e kea mera kila na iVolatabu. Mai na ra kei Mereke, era dau vodo motoka ena dua se rua na aua na dautukutuku mera yacova yani na vanua era dui tiko kina na kai Filipaini era vuli iVolatabu tiko. Mai Norway, erau vuli iVolatabu tiko kei na dua na vuvale ni Afghanistan e dua na veiwatini. Ratou vakayagataka ena nodratou vuli na ivola Na Cava e Loma ni Kalou Vei Keda? a O rau na veiwatini iVakadinadina erau vakayagataka na itabataba vakavalagi ni ivola oqo kei na kena vaka Norway. Ia, o ratou na vuvale eratou wiliwili mai na kena itabataba vakaperisia ni via volekata na nodratou vosa, e vakatokai na Dari. Ratou qai veivosaki vakavalagi kei na vaka Norway. Io, e ka ni sasaga na veiqaravi vaka oqo, e vinakati tale ga na yalorawarawa meda veisau ina ituvaki cava ga eda sotava. Ia, eda na vakalougatataki kina, vakauasivi na noda raica na nodra taleitaka na itukutuku vinaka o ira na duikaikai era duivosavosa.b

15. Na cava e rawa nida cakava kece meda vakaitavi kina ena kena tukuni na itukutuku vinaka vei ira na duikaikai era duivosavosa?

¹⁵ E rawa beka ni o vakaitavi ena kena tukuni na itukutuku vinaka vei ira na duikaikai era duivosavosa? Rawa ni o tekivu sara ga ena nomu tovolea mo kila taumada se vica na mataqali vosa e vosataki ena nomu yalava ni vunau. Sa rawa ni o dau qai tawana tu e so na ivolacebaceba se brochure ena veivosa oqori. E veivuke tale ga ena vakatetei ni inuinui ni Matanitu ni Kalou na ivola lailai a soli ena 2004, na Good News for People of All Nations, ni rawarawa qai totoka na kena ivakamacala e tabaki ena vica vata na vosa.—Yalovinaka raica na ulutaga “Good News for People of All Nations,” ena tabana e 32.

“Lomani Ira na Vulagi”

16. E rawa nira vakaraitaka vakacava na yalo ni veinanumi na mataveitacini era qarava na ivavakoso ena nodra tokoni na vulagi?

¹⁶ Ke da mani sega ni vulica rawa e dua na vosa vou, se rawa ga nida tokona na nodra vakavulici vakayalo na duikaikai ena noda yalava. A matata na nona ivakaro o Jiova vei ira na nona tamata, oya mera “lomani ira na vulagi.” (Vakarua 10:18, 19) Laurai na nodra lomani na vulagi ena ivakaraitaki oqo mai na dua na korolevu e Mereke. E lima na ivavakoso eratou vakayagataka vata e dua na Kingdom Hall, ia, me vaka ga na kena ivakarau ena vuqa na valenisoqoni, e dau veisau e veiyabaki na gauna ni soqoni. Kena ibalebale ni sa na toso na nodra soqoni na mataveitacini ena ivavakoso e vosa vakajaina ina yakavibogi ni Sigatabu. Ia, ni levu vei ira na vulagi oqo era cakacaka e valenikana, e macala nira na calata na soqoni ni oya na gauna ni nodra cakacaka. Ratou mani yalovata na qase ni kena vo ni ivavakoso me ratou cakava na veiveisau me rawa ni vakayacori na soqoni ena vosa vakajaina ni se siga ena Sigatabu.

17. Meda raica vakacava na nona via toki e dua na tacida vakayalo me lai veiqaravi ena dua na iwasewase e duidui na kena vosa?

¹⁷ O ira na ivakatawa yalololoma era vakacaucautaki ira na mataveitacini tagane kei na yalewa era buta vinaka ena veivakavulici qai ganiti ira na nodra via toki mera lai veiqaravi ena dua na iwasewase e duidui na kena vosa. Macala nira dau guiguilecavi dredre na qasenivuli maqosa ni iVolatabu ena ivavakoso era sa biuta, ia e tautauvata na nodra rai na qase ni ivavakoso kei ira na ivakatawa mai Lisitira kei Ikoniona. Oya na nodra a sega ni via tarovi Timoci ena nona ilakolako kei Paula, e dina ga ni dua na veivuke levu a dau cakava o Timoci ena ivavakoso sa biuta. (Cakacaka 16:1-4) Kuria oqo, ni sega ni tarovi ira na liutaka na cakacaka vakavunau na duidui ni nodra itovo, vakasama se nodra ivakarau vakavanua na duikaikai ena nodra yalava. Kena veibasai ga, oya nira ciqoma na duidui oqo ra qai saga na sala me vinaka tiko ga kina na veimaliwai kei ira na duikaikai ena vuku ga ni itukutuku vinaka.—1 Korinica 9:22, 23.

18. Na katuba levu cava ni cakacaka vakavunau sa tadola tu oqo vei keda kece?

¹⁸ Me vaka ga e parofisaitaki oti tu mai, sa kacivaki tiko na itukutuku vinaka ena ‘duivosavosa ni veivanua kece.’ E laurai ni rawa ni vuavuaivinaka sara na cakacaka ni kena kacivaki na itukutuku vinaka vei ira na duikaikai era duivosavosa. Era sa curuma kina “na katuba levu ni cakacaka yaga” oqo e lewe vica vata na udolu na dautukutuku gugumatua. (1 Korinica 16:9, VV) Ia, e tiko e so tale na ka meda cakava me laulau qai katoa kina noda cakacaka ena nodra yalava na duikaikai era duivosavosa. Oqo na ka ena veivosakitaki ena ulutaga e tarava.

[iVakamacala e ra]

Vakamacalataka Mada

• Eda na vakatotomuria vakacava na nona sega ni veivakaduiduitaki o Jiova?

• Meda raici ira vakacava na duikaikai ena noda yalava eda sega ni veikilai vosa?

• Na cava e yaga cake kina meda vunau vei ira na tani ena nodra vosanisucu?

• Eda na vakaraitaka vakacava nida lomani ira na vulagi ena keda maliwa?

[Mape/iYaloyalo ena tabana e 23]

(Raica tale na iVola)

Roma

KIRITI

ESIA

FIRIJIA

PAMIFILIA

PONITO

KAPATOSIA

MESOPOTEMIA

MITIA

PARICIA

ILAMA

ARAPEA

LIPEA

IJIPITA

JUTIA

Jerusalemi

[Wasawasa]

Wasa Levu

Wasawasa Loaloa

Wasa Damudamu

Toba o Perisia

[iYaloyalo]

Ena siga ni Penitiko 33 S.K., era a rogoca kina na itukutuku vinaka ena nodra dui vosa o ira na duikaikai era gole yani mai na rauta e 15 na veivanua, e so e qali ena matanitu levu o Roma, e so e sega

[iYaloyalo ena tabana e 24]

E levu sara na duikaikai era duivosavosa era taleitaka na ka dina mai na iVolatabu

[iYaloyalo ena tabana e 25]

E volai tu ena lima na vosa na ivakatakilakila ni dua na Kingdom Hall