Me Kaukaua na Ligamudou

“Me kaukauwa na ligamudou, oi kemudou sa rogoca e na gauna oqo na vosa oqo mai na gusudra na parofita.”​—SAKARAIA 8:9.

1, 2. Na cava meda kauaitaka kina na ivola i Akeai kei Sakaraia?

A SE volai sara ena rauta na 2,500 na yabaki sa oti na nodrau parofisai o Akeai kei Sakaraia, ia e se yaga tiko ga vei keda. Na itukutuku ena iVolatabu e volai ena rua na ivola oqo e sega ni itukuni wale ga. Era tiki ni “ka kecega sa volai eliu . . . me da vakatavulici kina.” (Roma 15:4) E levu na ka eda wilika kina e ganita vinaka na veika eda sotava tiko me tekivu mai na gauna e tauyavutaki kina na Matanitu ni Kalou mai lomalagi ena 1914.

² Ni vakamacalataka na veika era sotava na tamata ni Kalou ena veigauna sa oti, e kaya na yapositolo o Paula: “Era sa i dusidusi kece na veika e yaco vei ira, ka ra sa volai tu me ra i vakasala vei keda eda sa bula e na gauna sa voleka mai kina na i vakataotioti.” (1 Korinica 10:​11, VV) O na rairai taroga beka, ‘Rau yaga vakacava na ivola i Akeai kei Sakaraia ena noda gauna oqo?’

3. Rau veivakauqeti o Akeai kei Sakaraia ena cava?

³ E vakamacalataki ena ulutaga sa oti ni a tauci na nodrau parofisai o Akeai kei Sakaraia ena gauna era suka kina na Jiu ina nodra vanua, nira sa sereki ena nodra vesu tu mai Papiloni. Rau veivakauqeti na rua na parofita oqo ena kena tara tale na valenisoro. Era vakadavora na yavu ni valenisoro na Jiu ena 536 B.S.K. Dina ni so vei ira na sa qase era vakananuma na gauna sa oti, a vakilai levu ga na “kaila vakadomoilevu e na marau.” Ia, e dua na ka e uasivi cake sara sa vakayacori tiko ena noda gauna oqo. E uasivi vakacava?​​—Esera 3:​3-​13.

4. Na cava e yaco ni oti toka ga na iMatai ni iValu Levu?

⁴ Ni oti toka ga na iMatai ni iValu Levu, era sa sereki mai vei Papiloni na Ka Levu o ira na lumuti i Jiova. E laurai votu e keri na veitokoni i Jiova. A nanumi taumada nira sa tarova vakadua na iliuliu ni lotu kei na nodra itokani vakapolitiki na nodra cakacaka vakavunau na Gonevuli ni iVolatabu ena gauna oya. (Esera 4:​8, 13, 21-​24) Ia, e qai kauta laivi o Jiova na ka e vakalatilati ena cakacaka vakavunau kei na veivakatisaipelitaki. Me tekivu mai na 1919, sa sega tale ni dua e tarova na kena tete na vunautaki ni Matanitu ni Kalou.

5, 6. Na cava e dusia tiko mai na Sakaraia 4:7?

⁵ Eda vakadeitaka gona ni na tokona tiko ga o Jiova na nodra cakacaka vakavunau kei na nodra veivakavulici na nona tamata. Eda wilika ena Sakaraia 4:7: “Ena kauta mai ko Koya na vatu sa kenai vakadei e na tutu ni vale ni sa kailavaki kina, Me kalougata! me kalougata!” Na cakacaka veivakurabuitaki cava ena noda gauna e dusia tiko mai oqori?

⁶ E dusia tiko na Sakaraia 4:7 na gauna sa na qai taucoko kina na sokaloutaki ni Turaga Cecere ena valenisoro vakayalo e kena lomanibai e tiko e vuravura. Na valenisoro oqo e sala ga ni noda torova rawa na Kalou meda sokalou vua ena vuku ni isoro veiganiti i Karisito Jisu. Dina ni sa tu na valenisoro vakayalo oqo me tekivu mai na imatai ni senitiuri S.K., ia e se bera ni vakataucokotaki na sokalou ena kena lomanibai e tiko e vuravura. E vica na milioni era sa veiqaravi tiko ena valenisoro vakayalo e kena lomanibai e tiko e vuravura. O ira oqo kei na dua na ilawalawa levu sara era vakaturi mai era na qai vakataucokotaki ena loma ni duanaudolu na yabaki ni veiliutaki vakatui i Jisu Karisito. Ni sa cava na duanaudolu na yabaki oya, sa ra na qai tu ga ena vuravura o ira na sokalou dina tiko vua na Kalou.

7. Na cava e nona itavi o Jisu ena kena vakataucokotaki na sokalou dina ena gauna oqo? E uqeti keda vakacava oqo?

⁷ Rau a se tiko na kovana o Serupapeli kei na Bete Levu o Josua me rau raica na kena vakacavari na tara ni valenisoro ena 515 B.S.K. E parofisaitaki ena Sakaraia 6:​12, 13 na nona cakava o Jisu e dua na cakacaka vata vaka oqori ena nona vakataucokotaka na sokalou dina: “Sa kaya vakaoqo ko Jiova ni lewe vuqa, Raica na tamata, na yacana na COKE; ia ena tubu mai ko koya mai na nona yasana, ena tara na vale i Jiova ko koya: . . . ena tu talega vua na kenai ukuuku; ia ena tiko e na nonai tikotiko vakaturaga ka lewa ko koya; ena bete talega ko koya e na nonai tikotiko vakaturaga.” E tiko mai lomalagi o Jisu, a vakavuna tale ga mera buroro na tui ena iyatukawa i Tevita. Kevaka e tokona tiko o koya na cakacaka e baleta na valenisoro vakayalo, o nanuma beka ni rawa vua e dua me tarova na kena toso na cakacaka oya? Dravusakulukulu! E sega beka ni uqeti keda oqo meda tomana tiko ga na noda cakacaka vakavunau da qai sega ni vakatara e dua na ka me vakamuai keda tani?

Veika me Vakaliuci

8. Na cava meda vakaliuca kina na cakacaka e baleta na valenisoro vakayalo?

⁸ Me rawa ni qai tokoni keda qai vakalougatataki keda o Jiova, e dodonu meda vakaliuca tiko na cakacaka e baleta na valenisoro vakayalo. Meda kua ni vakataki ira na Jiu era kaya, “E se bera na kena gauna,” meda nanuma tiko nida sa bula tiko ena “iotioti ni veisiga.” (Akeai 1:​2, NW; 2 Timoci 3:​1, NW) A parofisaitaka o Jisu nira na vunautaka na itukutuku vinaka ni Matanitu ni Kalou ra qai veivakatisaipelitaki tiko na nona imuri yalodina. Meda kua ni vakaweleweletaka na noda itavi oqo. E se bera tiko ni vakacavari na cakacaka vakavunau kei na veivakavulici a tarovi vakalekaleka mada ena nona veitusaqati o vuravura, e tomani tale ena 1919. Ena vakacavari ga na cakacaka oya!

9, 10. E vakatau ina cava na nona vakalougatataki keda o Jiova? Na cava e kena ibalebale vei keda?

⁹ Ena vakatau na noda vakalougatataki yadudua se vakailawalawa tamata ena kaukaua ni noda cakacaka. Vakasamataka mada na vosa ni yalayala i Jiova ena vakadeitaki keda. Nira lesuva na Jiu na nodra cakacaka ni kena vakadavori na yavu ni valenisoro kei na nodra sokalou ena yalodina, e kaya o Jiova: “Tekivu vata kei na siga oqo ka’u na vakalougatataki kemudou.” (Akeai 2:​19) E vakadonui ira tale o koya. Dikeva na veivakalougatataki e yalataka na Kalou: “Ni na yaco na gauna ni sautu: na vaini ena vua tiko, ia na qele ena vuataka na vuana, ko lomalagi talega ena solia na kena tegu; ia ka’u na solia vei ira na kena vo ni mataqali oqo me ra taukena na ka kecega oqo.”​​—Sakaraia 8:​9-​13.

¹⁰ Me vaka ga na nona vakalougatataki ira vakayalo, vakayago tale ga na Jiu o Jiova, ena vakalougatataki keda vaka kina kevaka eda gugumatua da qai cakava tiko ena marau na cakacaka e lesia vei keda. E okati ena veivakalougatataki oqo na noda lomavakacegu, noda sega ni rere se lomaocaoca, da qai sautu ena veika vakayago kei na veika vakayalo. Ia, ena vakatau nona vakalougatataki keda tiko o Jiova ena noda cakava tiko ga na cakacaka e baleta na valenisoro vakayalo ena kena icakacaka e vinakata o koya.

11. Na cava soti meda tarogi keda kina?

¹¹ Oqo e gauna meda ‘vakananuma mada kina na noda ivalavala.’ (Akeai 1:​5, 7) Meda dui tarogi keda mada se cava eda sa vakaliuca tiko ena noda bula. E vakatau ina levu ni nona vakalougatataki keda o Jiova ena levu tale ga ni noda vakalagilagia tiko na yacana kei na noda vakaitavi ena cakacaka e baleta na nona valenisoro vakayalo. Tarogi iko mada: ‘Sa veisau beka na ka au vakaliuca? Ni vakatauvatani kei na gauna au papitaiso kina, e vakacava na noqu lomakatakata vua na Kalou, ina nona cakacaka, kei na ka dina, ena gauna oqo? Sa vakaleqa tiko beka na noqu vakaliuci Jiova kei na nona Matanitu na qara na bula sau levu ni gauna oqo? E vakayalolailaitaki au tiko beka na noqu rerevaki ira na tamata kei na ka era na kaya?’​​—Vakatakila 2:​2-4.

12. Na cava era cakava na Jiu e vakamacalataki ena Akeai 1:​6, 9?

¹² Eda sega ni vinakata meda tarova na nona vakalougatataki keda na Kalou baleta nida vakaweleweletaka na nona cakacaka kei na noda vakalagilagia na yacana. Vakasamataki ira tale mada na Jiu, dina ga nira tekivu vinaka ena nodra tara na valenisoro, ia e kaya na Akeai 1:9 nira qai “dui cici yadua ki nona vale.” Era lai ogataka vakalevu tale na veika e baleti ira ga kei na veika e vinakati ena nodra vale e veisiga. Oqo e vakavuna me ‘lailai na ka era yauta mai,’ ni sega ni veirauti na kedra kakana, na medra, kei na nodra isulu katakata. (Akeai 1:6) A sega ni vakalougatataki ira o Jiova. Eda vulica beka kina e dua na ka?

13, 14. Eda rawa ni vakayagataka vakacava na ka eda vulica ena Akeai 1:​6, 9, na cava e bibi kina?

¹³ Eda sega li ni vulica e ke meda kua ni vakaliuca tiko na veika e baleti keda ga me lai leqa kina na noda sokalou vei Jiova kevaka eda vinakata me vakalougatataki keda? O koya gona se mani cava eda cakava me kua ni vagolei keda tani na qara iyau, na qara vutuniyau totolo, se na noda lalawataka meda toroya cake tale na noda vuli meda rawata kina e dua na cakacaka e vinaka cake ena vuravura oqo.

¹⁴ Era sega ni okati mera ivalavala ca na veika oqori. Ia, eda sega beka ni raica, ni vakatauvatani kei na bula tawamudu, na veika oqori era ‘cakacaka ni mate’? (Iperiu 9:​14) Era cakacaka ni mate vakacava? Era cakacaka ni mate vakayalo baleta nira tawayaga vakayalo. Ke dua e vakaliuci ira tiko ga na veicakacaka oqori ena rawa ni vakamatei koya vakayalo. Oqo na ka e vakaleqai ira e so na lotu Vakarisito lumuti ena nodra gauna na yapositolo. (Filipai 3:​17-​19) E vakaleqai ira tale ga e so ena noda gauna. Eda rairai kilai ira e so era goletani mai na veicakacaka vakarisito kei na ivavakoso sa ra sega tale ni vakasamataka mera suka vei Jiova. Eda nuitaka nira na suka vei Jiova o ira oqori, ia na nodra vakaliuca tiko na ‘cakacaka ni mate’ ena sega ni vakadonui ira kina o Jiova se vakalougatataki ira. Sa dua dina na ka vakaloloma oqori. Era sa na vakayalia kina na reki kei na vakacegu e vua ni yalo tabu ni Kalou. Vakasamataka tale ga na nodra sa na sega ni marautaka na veimaliwai kei ira na mataveitacini lotu Vakarisito!​​—Kalatia 1:6; 5:​7, 13, 22-​24.

15. E vakaraitaka vakacava na Akeai 2:​14 na bibi ni noda sokalou?

¹⁵ Oqo e dua na tikina bibi. Dikeva ena Akeai 2:​14 na nona raici ira na Jiu o Jiova ena vuku ni nodra vakaweleweletaka na vale e sokaloutaki kina ra qai kauaitaka ga na nodra vakavinakataka na nodra vale. “Sa vakakina ko ira na tamata oqo, ka sa vakakina na matanitu oqo e mataqu, sa kaya ko Jiova; sa vaka talega kina na cakacaka kecega ni ligadra; ia na ka era sa vakacabora maikea sa sega ni savasava.” Na isoro kece e caka ga me rawa era vakacabora na Jiu lomalomarua oya ena icabocabonisoro e Jerusalemi e sega ni vakadonui baleta nira sa sega ni sokalou dina tiko.​​—Esera 3:3.

Yalataka me Veitokoni

16. Na cava era vakadeitaka na Jiu ena raivotu a soli vei Sakaraia?

¹⁶ E vakaraitaka na Kalou ena walu na raivotu e solia vei Sakaraia ni na tokoni ira na Jiu talairawarawa era tomana na kena tara na nona valenisoro. Na imatai ni raivotu e vakadeitaka na kena vakaoti na tara ni valenisoro kei na nodrau vakalougataki o Jerusalemi kei Juta ke ra talairawarawa tiko ga na Jiu ena nodra cakava na cakacaka e lesi vei ira. (Sakaraia 1:​8-​17) Na ikarua ni raivotu e yalataki kina na nodra vakaoti vakadua na veimatanitu era saqata na sokalou dina. (Sakaraia 1:​18-​21) Na vo ni raivotu e vakadeitaki kina ni na taqomaka na Kalou na tara ni valenisoro, nodra drodro mai na tamata mai na veimatanitu mera mai sokalou ni sa tara oti na vale e sokaloutaki kina o Jiova, na vakacegu kei na tiko nuidei dina, na kena kau laivi na veika e vakalatilati tiko ina cakacaka e lesia na Kalou, na vakaoti ni ivakarau ca, kei na nodra veiliutaki kei na nodra veitaqomaki na agilosi. (Sakaraia 2:​5, 11; 3:​10; 4:7; 5:​6-​11; 6:​1-8) Na veivakadeitaki kei na veitokoni ni Kalou oqo e vakavuna mera veisautaka na ivakarau ni nodra bula o ira era talairawarawa nira vakaliuca na cakacaka e vu ni nona sereki ira mai na Kalou ena nodra vesuki tu.

17. Ena vuku ni veivakadeitaki, na cava e dodonu meda tarogi keda kina?

¹⁷ Na kena vakadeitaki tale ga vei keda ni na qaqa na sokalou dina e dodonu me uqeti keda meda kauaitaka vakabibi na vale e sokaloutaki kina o Jiova. Tarogi iko mada: ‘Kevaka au vakabauta ni sa kena gauna oqo me vunautaki kina na itukutuku vinaka ni Matanitu ni Kalou qai vakayacori tale ga na veivakatisaipelitaki, e salavata beka na veika au lalawataka kei na ivakarau ni noqu bula na ka au vakabauta oqo? Sa veiganiti beka na gauna au vakayagataka tiko ena noqu vulica na Vosa ni Kalou, au qai talanoataka na veika au vulica vei ira na taciqu lotu Vakarisito kei ira tale e so au sotava?’

18. Na cava ena yaco ena gauna e se bera mai me vaka e kaya na Sakaraia wase 14?

¹⁸ E parofisaitaka o Sakaraia na kena vakarusai o Papiloni na Ka Levu kei na ivalu na Amaketoni. Eda wilika: “Ena qai yaco e dua na siga, (sa kilai ga vei Jiova,) ena sega ni siga ena sega talega ni bogi; ia ena yaco, ni sa yakavi, ena qai rarama mai.” Io, ena siga butobuto dina vei ira na nona meca e vuravura na siga i Jiova! Ia era na rarama ra qai vakadonui tiko ga o ira na qaravi Jiova tiko ena yalodina. E vakamacalataka tale ga o Sakaraia nira na kacivaka na savasava i Jiova o ira na tiko ena vuravura vou. Na sokalou duadua ga ena vakayacori ena vuravura vou oya na sokalou ena valenisoro vakayalo ni Kalou. (Sakaraia 14:​7, 16-​19) Oqo e dua dina na veivakadeitaki totoka. Eda na lai raica na kena vakayacori na veika e parofisaitaki da qai vakadinadinataka tale ga na dodonu ni nona veiliutaki o Jiova. E dua dina na siga duatani na siga i Jiova oya!

Veivakalougatataki e Tudei

19, 20. Na cava e uqeti iko kina na Sakaraia 14:​8, 9?

¹⁹ Ni sa yaco oti na veisau vakatubuqoroqoro oqo, era na sogoti tu ena ibulubulu sega ni vakabotona o Setani kei ira na nona timoni. (Vakatakila 20:​1-3, 7) Sa na qai vakilai na veivakalougatataki ni nona veiliutaki ena duanaudolu na yabaki na Karisito. E kaya na Sakaraia 14:​8, 9: “E na siga ko ya, ena dave yani na wai bula mai Jerusalemi, e dua na kena wase ki na wasawasa ki na isiti, ka dua na kena wase ki na wasawasa ki na wesiti; e na vula i katakata kei na vula i liliwa ena vaka tu kina. Ia ena kilai ko Jiova ni sa tui ni vuravura kecega: e na siga ko ya ena sai Jiova duaduaga, kei na yacana duaduaga.”

²⁰ Na “wai bula” se “uciwai ni bula,” e vakatakarakarataka na nona isolisoli ni bula o Jiova ena drodro tiko mai ena itikotiko vakaturaga ni Matanitu i koya na Mesaia. (Vakatakila 22:​1, 2) Nira sa vakabulai ena Amaketoni o ira na ilawalawa levu era qaravi Jiova tiko, era na qai sereki mai na mate e dewa mai vei Atama. Ena yaga tale ga vei ira na sa mate tu nira na vakaturi mai. Ena tekivu tale ga ena gauna oya e dua na ivakarau vou ni nona liutaki vuravura o Jiova. Era na kila na tamata ena veiyasa i vuravura ni o Jiova e Turaga Cecere ni Lomalagi kei Vuravura, na Kalou ena sokaloutaki duadua ga.

21. Na cava meda vakatulewataka?

²¹ Nida raica lesu na veika erau parofisaitaka o Akeai kei Sakaraia kei na tiki ni parofisai oqori sa vakayacori oti, sa dodonu me uqeti keda meda gu ena cakacaka e lesia vei keda na Kalou meda vakayacora tiko ena valenisoro vakayalo e kena lomanibai e tiko e vuravura. Meda vakaliuca tiko mada ga na veika e vauca na Matanitu ni Kalou me yacova na gauna sa na qai vakataucokotaki kina na sokalou dina. E uqeti keda na Sakaraia 8:9: “Me kaukauwa na ligamudou, oi kemudou sa rogoca e na gauna oqo na vosa oqo mai na gusudra na parofita.”

O se Nanuma Tiko?

• Na cava e yaco ena gauna sa oti e vakavuna me yaga tale ga nikua na nodrau ivola o Akeai kei Sakaraia?

• Na cava erau vakaraitaka na ivola i Akeai kei Sakaraia me baleta na ka meda vakaliuca?

• E vukei keda vakacava meda nuitaka na veika e se bera ni yaco na noda dikeva na Akeai kei na Sakaraia?

[iYaloyalo ena tabana e 26]

O Akeai kei Sakaraia rau uqeti ira na Jiu mera cakacaka vakaukaua me rawa kina nira vakalougatataki

[iYaloyalo ena tabana e 27]

O dau ‘ciciva beka ga na veika e baleta na nomu vale’?

[iYaloyalo ena tabana e 28]

E solia o Jiova na veivakalougatataki e yalataka