Muria na iVakaraitaki i Jisu, Kauaitaki Ira na Dravudravua
E SEGA ni ka vou na bula dravudravua kei na veivakalolomataki, e voleka ni a cadra vata ga kei na itekitekivu ni bula ni kawatamata e vuravura. Na Lawa ni Kalou a soli vei ira na Isireli e vakadeitaka na nodra karoni na dravudravua me bau mamada kina na dredre era sotava, ia vakavuqa, a vakawaleni na Lawa oya. (Emosi 2:6) Na parofita o Isikeli a vakacala na nodra vakalolomataki na dravudravua. Laurai oqo ena nona kaya: “O ira na lewe ni vanua era sai valavala vakaukauwa, ka ia na veikoveraki, era sa vakararawataki ira talega na dravudravua kei na luveniyali: io, era sa vakasaurarataki ira na vulagi vakatawadodonu.”—Isikeli 22:29.
E sega ni se veisau na ituvaki oqori ena gauna e bula kina o Jisu e vuravura. O ira na iliuliu ni lotu ena gauna oya era sega sara ga ni bau kauaitaki ira vakalailai na dravudravua kei ira na vakaloloma. Nira dau vakacavutaki mada ga na iliuliu ni lotu oqori mera “daulomana nai lavo,” ra dau qai “kovea na nodrai yau na yada.” A bibi ga vei ira na nodra ivakavuvuli vakavanua, ra sega ni bau kauai ina nodra karoni na sa qase se o ira na vakaloloma. (Luke 16:14; 20:47; Maciu 15:5, 6, VV) Laurai na vakasama oqo ena vosa vakatautauvata i Jisu me baleta na kai Samaria dauloloma, oya ni rau a lako vakatikitiki ruarua na bete kei na dua na Livai ena nodrau sega ni via vukea na tamata a sikabotei qai sa mavoa koto e gaunisala.—Luke 10:30-37.
A Dau Kauaitaki Ira na Dravudravua o Jisu
E laurai ena itukutuku ni bula i Jisu ena Kosipeli ni a kila vinaka na dredre ni nodra bula na dravudravua, a dau qai kauai vakalevu ina ka era gadreva. A bula mai lomalagi o Jisu, ia e laiva tu yani na veika kece e tu vua me rawa ni mai sucu vakatamata, e ‘yaco me dravudravua ena vukuda.’ (2 Korinica 8:9) Ni raici ira na lewe vuqa o Jisu, e “lomani ira, ni ra sa malumalumu, ka biu wale tu, me vaka na sipi sa sega na nodrai vakatawa.” (Maciu 9:36) E votu ena kena itukutuku na yada dravudravua, ni o Jisu a sega ni qoroya na levu ni cau era solia na vutuniyau mai na “ka e bini tu vei ira” ia, e doka na nona cau lailai na yada. A tarai Jisu sara ga na nona “solia” na marama yada oya “na qavu ni ka . . . e toka vua.”—Luke 21:4, VV.
Ia, e sega ni tiko wale ga e loma i Jisu na kena tarai koya na kedra ituvaki na dravudravua, e dau kauai sara ga ina veika era gadreva. Ni a bau tiko sara mada ga na nodratou taga ilavo o Jisu kei ratou na nona yapositolo, ratou dau qai taura mai kina na ka me ratou solia vei ira na Isireli era vakaloloma. (Maciu 26:6-9; Joni 12:5-8; 13:29) O Jisu a uqeti ira era via muri koya mera ciqoma ni dua na nodra itavi, oya mera vukei ira na vakaloloma. Tukuna gona o Jisu vua e dua na turaga gone vutuniyau: “Volitaka na ka kecega sa tu vei iko, ka solia vei ira sa dravudravua, ko na qai vakaiyau mai lomalagi: ia mo lako mai, mo muri au.” Na nona sega ni via volitaka na nona iyau na turaga gone oqo, e vakaraitaka ni a lomana vakalevu na iyau, e lailai na nona lomana na Kalou kei ira na kainona. O koya gona, a sega vua na turaga vutuniyau oqori na roka ni bula me yaco kina me tisaipeli i Jisu.—Luke 18:22, 23.
Era Kauaitaki Ira na Dravudravua na iMuri i Karisito
Ni sa mate o Jisu, era se tomana tiko ga na yapositolo kei ira na nona imuri na nodra kauaitaki na dravudravua ena kedra maliwa. Ena yabaki 49 S.K., a sotavi Jemesa, Pita, kei Joni na yapositolo o Paula me vakaraitaka vei ratou ni Turaga o Jisu Karisito sa lesi koya me vunautaka na itukutuku vinaka. Ratou duavata ni dodonu me rau lako o Paula kei Panapasa vei ira “sa sega ni lotu,” oya me rau vunau vakatabakidua vei ira na kai Matanitu Tani. Ia, o Jemesa kei rau na nona itokani eratou a uqeti Paula kei Panapasa me rau “nanumi ira [tale ga] na dravudravua.” A ‘gumatuataka’ o Paula na nona cakava oya.—Kalatia 2:7-10.
Ena gauna a tui kina o Empara Kilotiu, a yaco ena so na vanua ena yasayasa vakaroma e dua na dausiga levu. Ra yavala na lotu Vakarisito mai Anitioki ena nodra lewa “me ra vakauta, me vaka na ka era dui rawata, na nodra veivuke vei ira na vakabauta mai Jiutia. Era sa qai cakava vaka kina, ka ra solia na i lavo vei rau ko Panapasa kei Saula me rau kauta vei ira na qase ni lotu mai ke ya.”—Cakacaka 11:28-30, VV.
Ena gauna oqo, era raica rawa tale ga na lotu Vakarisito dina, ni dodonu vei ira na imuri i Jisu mera kauaitaki ira na dravudravua kei ira na vakaloloma, vakauasivi ena kedra maliwa o ira era vakabauta vata era tiko ena ituvaki oqo. (Kalatia 6:10) Ra dau kauai gona mera dodoliga ena vukudra e sega na ka mera bula kina vakayago. Laurai oqo ena 1998, ena lauqa vakaitamera a tara sara vakaca e vuqa na yasana ena vuaicake kei Brazil. Na tarabi ni lauqa oya, e mate kina na raisi, bini, kei na sila qai tini dausiga na vanua—na kena e ca duadua e bau vakilai ena loma ni 15 na yabaki. Leqa sara tale mada ga na wainigunu ena so na yasana. E sega ni bera na nodra yavala na vo ni iVakadinadina i Jiova ena veiyasa i Brazil mera tuvanaka na komiti ni vakacoko. Totolo ga na nodra kumuna rawa e dua na ibinibini kakana levu, ra qai sauma sara tale ga na ivodovodo ni kena usani.
O ira na iVakadinadina era a dodoliga ina sasaga ni vakacoko oya, era vola: “Keimami marautaka vakalevu ni rawa ni keimami bau vukei ira na mataveitacini, vakauasivi ni keimami kila ni neimami veivuke oya, e vakamarautaka na loma i Jiova. E dei tiko vei keimami na veivosa ni Jemesa 2:15, 16.” Kaya na tikinivolatabu oqori: “Kevaka sa dua na veiwekani se yalewa se tagane sa sega na nonai sulu, ka sega na kena e na veisiga, ia ka dua vei kemudou sa kaya vei ira, Dou lako e na vakacegu, dou tatalai ka vakamamautaki; ia dou sa sega ni solia na veika e yaga ki na yagodra; a cava na betena?”
E lewena e dua na ivavakoso ni iVakadinadina i Jiova ena korolevu o São Paulo, e dua na marama iVakadinadina e dau qacoya na nona sokalou, ia, ni dravudravua e sasaga ena veisiga me rawata na ka me bula kina. Kaya na tacida oqo: “Dina niu dravudravua, sa mai vakainaki na noqu bula ena itukutuku ni Vosa ni Kalou. Au sega ni kila se cava ena yacovi au ke ra sega ni dau vukei au na noqu itokani iVakadinadina.” Ena dua na gauna lekaleka sa oti, a vinakati me sele na marama lotu Vakarisito gugumatua oqo, ia e sega vua na ilavo me sauma kina na nona qaravi vakavuniwai. Era a dodoliga na mataveitacini lotu Vakarisito ena ivavakoso e lewena na tacida oqo, mera sauma na nona qaravi vakavuniwai. Na nodra vukei o ira na itokani vakabauta era gadreva na veivuke, e dua na ka era vakayacora na lotu Vakarisito dina e veiyasa i vuravura.
E dau luvuci keda nida raica na itovo ni veikauaitaki vaka oya, ia, se mani vakacava na kena vinaka, e matata ni na sega ni vakawabokotaka na dravudravua. Dina ni yaga vakalevu na nodra sasaga na matanitu kaukaua e vuravura kei ira na tabana lelevu ni vakacoko, ia era sega ni rawa ni vakawabokotaka na leqa makawa oqo, e voleka ni a cadra vata ga kei na itekivu ni bula ni kawatamata. O koya gona, e vure kina na taro, Na cava na iwali duadua ga ni bula dravudravua se na veileqa tale e so e vakararawataki keda tu na kawatamata?
Dulaka na iVakavuvuli ena iVolatabu na Kena iWali Duadua Ga
E laurai ena itukutuku ena Kosipeli ni o Jisu Karisito e wasoma na nona caka vinaka vei ira na dravudravua kei ira na vakaloloma. (Maciu 14:14-21) Ia, na cakacaka cava sara mada a vakaliuca? Ena dua na gauna, ni oti na nona vukei ira era a gadreva tu na veivuke, e tukuna o Jisu vei ratou na nona tisaipeli: “Tou lako ki na veikoro sa voleka, me’u vunau talega kina.” Na cava a muduka kina o Jisu na nona cakacaka ena kedra maliwa na tauvimate kei ira na vakaloloma me lai tomana na nona cakacaka vakavunau? A vakamacalataka vaka oqo: “Sa ka ga oqo [oya, me vunau] ka’u sa lako mai kina.” (Marika 1:38, 39; Luke 4:43) E dina ni a bibi vei Jisu na nona caka vinaka vei ira na vakaloloma, ia na nona ilesilesi bibi duadua, oya me vunautaka na Matanitu ni Kalou.—Marika 1:14.
Na iVolatabu e uqeti ira na lotu Vakarisito mera ‘muria na weniyava’ i Jisu, e matata gona na idusidusi sa kotora tu vei ira na lotu Vakarisito edaidai mera kila kina se mataqali veivuke vakacava mera vakabibitaka. (1 Pita 2:21) Io, me vakataki Jisu ga, era na dodoliga vei ira na vakaloloma. Ia, era na vakadamurimuri Jisu tale ga ena nodra okata me cakacaka bibi duadua ena nodra bula na kena vakatavulici na ka e tukuna na iVolatabu me baleta na itukutuku vinaka ni Matanitu ni Kalou. (Maciu 5:14-16; 24:14; 28:19, 20) Ena noda veivukei, na cava me vakabibitaki kina na vunautaki ni itukutuku ni Vosa ni Kalou ni vakatauvatani kei na basoga ni veivuke tale e so?
Nida dikeva na kedra italanoa e so mai na veiyasa i vuravura ena veika era a sotava dina, e laurai ni o ira era ciqoma na ivakasala yaga ena iVolatabu ra qai muria era kila vinaka na ka mera cakava ena nodra bula e veisiga nira sotava na ituvaki dredre, okati kina na bula dravudravua. Kuria oqori, na itukutuku ni Vosa ni Kalou me baleta na Matanitu ni Kalou era vunautaka voli na iVakadinadina i Jiova ena gauna oqo, e solia vua na tamata na inuinui dina me baleta na gauna se bera mai—oya na inuinui e vakainaki kina na bula, se mani vakacava na dredre ni ituvaki e sotavi. (1 Timoci 4:8) Na inuinui cava oya?
Na Vosa ni Kalou e vakadeitaka vei keda me baleta na noda bula ena gauna se bera mai: “Ia, koi keda, me vaka na nona vosa ni yalayala [na Kalou], eda sa waraka na lomalagi vou kei na vuravura vou, sa tiko kina nai valavala dodonu.” (2 Pita 3:13) Ni cavuti ena iVolatabu na vosa “vuravura,” so na gauna e dau vakaibalebaletaki ira tiko na tamata era bula e vuravura. (Vakatekivu 11:1) O koya gona, na kena yalataki me waraki na “vuravura vou” e kune kina na ivalavala dodonu, oqori e vakaibalebaletaki tiko ina dua na ilawalawa tamata e vakadonui ira na Kalou. Na Vosa ni Kalou e yalataka tale ga ni gauna ena veiliutaki kina o Karisito, era na rawata o ira e vakadonui ira na Kalou na isolisoli ni bula tawamudu kei na bula vakacegu ena parataisi e vuravura. (Marika 10:30) Na inuinui totoka oqo e dulaki tu vei ira na tamata kece, okati kina o ira na dravudravua. Ena “vuravura vou” oya, sa na vakawabokotaki kina na bula dravudravua.
[Kato/iYaloyalo ena tabana e 7]
NA SALA CAVA ENA ‘VAKABULAI IRA KINA NA DRAVUDRAVUA’ O JISU?
LEWADODONU: “Ena lewa ko koya e na vukudra na tamata era vakararawataki, ena vakabula na luvedra na dravudravua, ka musuki koya sa dauivalavala vakaukauwa.” (Same 72:4) Ni sa na veiliutaki o Karisito e vuravura, ena yaco na lewadodonu ina tamata kece. Sa na kau tani vakadua na veidabui, oqo na itovo torosobu e vakavuna mera dravudravua e vuqa na vanua e rawa nira vutuniyau.
BULA VAKACEGU: “Ena tubu vinaka mai e na nona gauna ko ira na yalododonu; kei na sautu levu [“bula vakacegu,” NW], ka yacova na gauna e oti kina na vula.” (Same 72:7) Levu na dravudravua e vuravura e vu mai na veileqaleqati ni tamata, vaka kina na ivalu. O Karisito ena kauta mai e vuravura na bula vakacegu dina, me sa na qai kawaboko kina na rua na ka sa cavuti oti e vakavuna vakalevu na dravudravua.
LOLOMA: “Ena lomana ko koya na tamata malumalumu ka dravudravua, ka vakabula na yalodra na dravudravua. Ena vakabula na yalodra mai na lawaki kei nai valavala kaukauwa: ena ka talei talega e matana na kedra dra.” (Same 72:12-14) O ira na tamata malumalumu, dravudravua, kei ira na vakalolomataki era na yaco mera lewena e dua na vuvale mamarau, era vakaduavatataki ena ruku ni nona veiliutaki na Tui o Jisu Karisito.
SAUTU NA VANUA: “Ena sa tu e vuravura e na dela ni veiulu-ni-vanua na sila e qumi rawarawa ga.” (Same 72:16) Ni sa na veiliutaki o Karisito, ena sautu na vanua. Era na sega ni vakila na tamata na lailai ni kakana se na lauqa, na ka e vakavuna tale ga vakalevu na dravudravua ena gauna oqo.
[iYaloyalo ena tabana e 5]
O Jisu e dau kauai sara ga ina veika era gadreva na dravudravua
[iYaloyalo ena tabana e 6]
Na itukutuku ni Vosa ni Kalou e solia na inuinui dina